ကဗ္ဗသတ္ထဝိစာရဏာ

၄. ပုနပိ သော ဧဝမာဟ ‘‘ကိဉ္စာပိ ဗုဒ္ဓဃောသော ရာမာယဏမဟာဘာရတသင်္ခါတာနံ မဟာကဗ္ဗသတ္ထာနံ သုကုသလော ဝိယ န ဒိဿတိ၊ တထာပိ တာနိ ဒဿေသိ. ကထံ? အက္ခာနန္တိ ဘာရတယုဇ္ဈနာဒိကံ၊ တံ ယသ္မိံ ဌာနေ ကထီယတိ၊ တတ္ထ ဂန္တုမ္ပိ န ဝဋ္ဋတီတိ [ဒီ. နိ. အဋ္ဌ. ၁.၁၃] စ၊ တဿ (သမ္ဖပလာပဿ) ဒွေ သမ္ဘာရာ ဘာရတယုဒ္ဓသီတာဟရဏာဒိနိရတ္ထကကထာပုရေက္ခာရတာ တထာရူပိကထာကထနဉ္စာတိ [ဒီ. နိ. အဋ္ဌ. ၁.၈] စ ဒဿေသီ’’တိ.

တံ ပန ပုရိမဝစနတောပိ အဟေတုကတရံ ကေဝလံ အနာဒရီကရဏမတ္တမေဝ. အတိဂမ္ဘီရတ္ထဿ ဟိ အတိဂရုကရဏီယဿ ပိဋကတ္တယဿ အတ္ထသံဝဏ္ဏနာယံ နိရတ္ထကဿ သမ္ဖပလာပသမုဒါယဘူတဿ ကဗ္ဗသတ္ထဿ ဝိတ္ထာရတော ပကာသနေန ကိံ သိယာ ပယောဇနံ၊ အညဒတ္ထု သာယေဝဿ အသမ္မာနိတာ၊ အနာဒရိယာ စ ဝိညူဟီတိ.