သဒ္ဒဗိန္ဒု |ဩ၀.၀၀၀၁| ပကရဏံ

နမော တဿ ဘဂဝတော အရဟတော သမ္မာသမ္ဗုဒ္ဓဿ

၁. ယဿဉေယျေသု ဓမ္မေသု၊ နာဏုမတ္တမ္ပဝေဒိတံ၊

နတွာသဒ္ဓမ္မသံဃံတံ၊ သဒ္ဒဗိန္ဒုံသမာရဘေ၊

၂. |ဩ၀.၀၀၀၂|

ကာဒိရိတာ နဝသင်္ချာ၊ ကမေနဋာ ဒိ ယာဒိစ၊

ပါဒယောပဉ္စ သင်္ချာတာ၊ သုညနာမာ သရညနာ၊

၃. သရေဟေဝသရာပုဗ္ဗေ လုတ္တာဝါဝီပရေရမာ၊

ဗျဉ္ဇနာစာဂမာဝါဝီ ဒီဃရဿာဒိသမ္ဘဝါ၊

၄. |ဩ၀.၀၀၀၃|

ကာကာသေနာဂတောသိသ ကေနိဒ္ဓိမစ္စဒဿယိ၊

အရာဇခွဂ္ဂိမေသီနံ သောတုကမ္မေဃယိတ္ထိယော၊

ဣတိ သန္ဓိကပ္ပေါ သမတ္တော.

၅. |ဩ၀.၀၀၀၄|

ဗုဒ္ဓပုမယုဝသန္တ ရာဇဗြဟ္မသခါစသာ၊

ယတာဒိဒေဟီဇန္တုစ သတ္ထုပိတာဘိဘူဝိဒူ၊

၆. ကညာမ္မာရတ္တိထိပေါ၊ က္ခရဏီနဒိရုမာတုဘူ၊

နပုံသကေတိယန္တာစ၊ ပဒကမ္မဒဓာယုနော၊

၇. |ဩ၀.၀၀၀၅|

ဂဟိတာဂဟဏေနေတ္ထ သုဒ္ဓေါသျာဒျန္တကာပုမေ၊

ဝိမလာဟောန္တိဇာန္တေဟိ ထျံပဉ္စန္တေဟိဒါဓိကာ၊

၈. နပုံသကေပယောဂါတု ဇနကာဟောန္တိတျန္တတော၊

ပဓာနာနုဂတာသဗ္ဗ နာမသမာသတဒ္ဓိတာ၊

၉. |ဩ၀.၀၀၀၆|

အတ္တိလိင်္ဂါနိပါတာဒိ တတောလုတ္တာဝသျာဒယော၊

သုတ္တာနုရူပတောသိဒ္ဓါ ဟောန္တိဝတ္တာမနာဒယော၊

ဣတိ နာမကပ္ပေါ သမတ္တော.

၁၀. ဆကာရကေသသာမိသ္မိံ သမာသောဟောတိသမ္ဘဝါ၊

တဒ္ဓီတာကတ္တုကမ္မသ၊ မ္ပဒါနောကာသသာမိသု၊

၁၁. |ဩ၀.၀၀၀၇|

သာဓတ္တယမှိအာချာတော ကိတကောသတ္တသာဓနေ၊

သဗ္ဗတ္ထပဌမာဝုတ္တေ အဝုတ္တေဒုတိယာဒယော၊

၁၂. မနသာမုနိနောဝုတျာ ဝနေဗုဒ္ဓေနဝဏ္ဏိတေ၊

ဝဋ္ဋာဟိတောဝိဝဋ္ဋတ္ထံ ဘိက္ခုဘာဝေတိဘာဝနံ၊

ဣတိ ကာရကကပ္ပေါ သမတ္တော.

၁၃. |ဩ၀.၀၀၀၈|

ရာသီဒွိပဒိကာဒွန္ဒာ လိင်္ဂေနဝစနေနစ၊

လုတ္တာတုလျာဓိကရဏာ ဗဟုဗ္ဗီဟီတုခေမရူ၊

၁၄. တပ္ပုရိသာစခေမောရာ ဒယာစကမ္မဓာရယာ၊

ဒိဂဝေါစာဝျယာဟာရာ ဧတေသဗ္ဗေပိဟာရိတာ၊

ဣတိ သမာသကပ္ပေါ သမတ္တော.

၁၅. ကစ္စာဒိတောပိဧကမှာ သဒ္ဒတောနိယမံဝိနာ၊

နေကတ္ထေသတိဘောန္တေဝ သဗ္ဗေတဒ္ဓိတပစ္စယာ၊

ဣတိ တဒ္ဓိတကပ္ပေါ သမတ္တော.

၁၆. |ဩ၀.၀၀၀၉|

ကတ္တရိနာညထာကမ္မေ တထာဘာဝေတုမေရယာ၊

သဗ္ဗေတေပစဓာတုမှိ သင်္ခေပေနမရူမယာ၊

၁၇. |ဩ၀.၀၀၁၀|

ဂမီမှာတိဂုဏာဖတ္တော သမ္ဘဝါအညဓာတုသု၊

အနန္တာဝပယောဂါတေ အာဒေသပစ္စယာဒိဟိ၊

ဣတိ အာချာတကပ္ပေါ သမတ္တော.

၁၈. ကိတာဒိပစ္စယာသဗ္ဗေ၊ ဧကမှာအပိဓာတုတော၊

သိယုံနုရူပတောသတ္တ၊ သာဓနေသတိပါယတော၊

ဣတိ ကိတကပ္ပေါ သမတ္တော.

၁၉. |ဩ၀.၀၀၁၁|

ဣမိနာကိဉ္စိလေသေန၊ သက္ကာဉာတုံဇိနာဂမေ၊

ပယောဂါဉာဏိနာသိန္ဓု၊ ရသောဝေကေနဗိန္ဒုနာ၊

၂၀. ရမ္မံသီဃပ္ပဝေသာယ၊ ပုရံပိဋကသညိတံ၊

မဂ္ဂေါဇုမဂ္ဂတံမဂ္ဂံ၊ သဒ္ဒါရညေဝိသောဓိတော၊

၂၁. |ဩ၀.၀၀၁၂|

တေနေဝ ကိဉ္စိ ဇလိတော ဇလိတော ပဒီပေါ

ကစ္စာယနုတ္တိရတနော စိတဂဗ္ဘကောဏေ၊

ဓမ္မာဒိရာဇဂုရုနာ ဂရုမာမကေန

ဓမ္မေန ယောဗ္ဗိပတိနာ သဂရုတ္တနီတော၊

ဣတိ သဒ္ဒဗိန္ဒု ပကရဏံ ပရိသမတ္တံ.

ယောသညမော ဂုဏဓနော နယနံ နိဇံဝ

သိက္ခာပယီ မမ မဝံ သုဂတာဂမာဒေါ၊

သလ္လောက ပုဉ္ဇ သုဟဒေါ ပဒုမာဒိ ရာမ

နာမော မဟာ ယတိဝရာ စရိယော သမယှံ၊

သဒ္ဓါဓနေန ဝသတာ ဝိဒိတမှိ ပုပ္ဖါ

ရာမေဓုနာ အရိယဝံသ ဓဇဝှယေန၊

သန္တေန ဉာဏတိလကော တျပရာချကေန

ဗာလာနမေတမဝိဓီယိ မယာဟိတာယ၊