၃. တတိယပါဋိဒေသနီ သိက္ခာပုစ္ဆာ

ပုစ္ဆာ – သေက္ခသမ္မတေသု အာဝုသော ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တဿ ပါဋိဒေသနီယံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ နမတ္တံ ဇာနိတွာ ပဋိဂ္ဂဟေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

သေခိယကဏ္ဍ

ပုစ္ဆာ – အနာဒရိယံ အာဝုသော ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တေန နိဝါသေန္တဿစ ပါရုပန္တဿစ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ပုရတော စ ပစ္ဆတော စ ဩလမ္ဗန္တာ နိဝါသေသုံစေဝ ပါရုပိံသုစ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ကာယံ ဝိဝရိတွာ အန္တရဃရေ ဂစ္ဆန္တဿ စ နိသီဒန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂီယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ကာယံ ဝိဝရိတွာ အန္တရဃရေ ဂစ္ဆိံသု စေဝ နိသီဒိံသုစ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ဟတ္ထံ ဝါ ပါဒံ ဝါ ကီဠာပေန္တေန အန္တရဃရေ ဂစ္ဆန္တဿ စ နိသီဒန္တဿ စ၊ တဟံ တဟံ ဩလောကေန္တေန အန္တရဃရေ ဂစ္ဆန္တဿ စ နိသီဒန္တဿ စ၊ ဥက္ခိတ္တကာယ အန္တရဃရေ ဂစ္ဆန္တဿ စ နိသီဒန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဟတ္ထမ္ပိ ပါဒမ္ပိ ကီဠာပေန္တာ တဟံ တဟံပိ ဩလောကေန္တာ အန္တရဃရေ ဂစ္ဆိံသုစေဝ နိသီဒိံသု စ၊ တေယေဝ ဘန္တေ ဆဗ္ဗဂ္ဂိယာ ဘိက္ခူ ဥက္ခိတ္တကာယ အန္တရဃရေ ဂစ္ဆိံသုစေဝ နိသီဒိံသုစ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ဥဇ္ဇဂ္ဃိကာယ ဝါ ဥစ္စာသဒ္ဒံ မဟာသဒ္ဒံ ကရောန္တေန ဝါ အန္တရဃရေ ဂစ္ဆန္တဿစ နိသီဒန္တဿစ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ မဟာဟသိတံ ဟသန္တာ စ ဥစ္စာသဒ္ဒံ မဟာသဒ္ဒံ ကရောန္တာ စ အန္တရဃရေ ဂစ္ဆိံသုစေဝ နိသီဒိံသုစ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ကာယပ္ပစာလကံ ဝါ ဗာဟုပ္ပ စာလကံ ဝါ သီသပ္ပစာလကံ ဝါ ခမ္ဘကတေန ဝါ ဩဂုဏ္ဌိတေန ဝါ အန္တရဃရေ ဂစ္ဆန္တဿ စ နိသီဒန္တဿ စ ဥက္ကုဋိကာယ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ကာယပ္ပစာလကံ ဗာဟုပ္ပစာလကံ သီသပ္ပစာလကံ ကရောန္တာ စ ခမ္ဘီကတာ စ ဩဂုဏ္ဌိတာ စ အန္တရဃရေ ဂစ္ဆိံသုစေဝ နိသီဒိံသုစ၊ ဥက္ကုဋိကာယစ အန္တရဃရေ ဂစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ပလ္လတ္ထိကာယ အန္တရဃရေ နိသိန္နဿ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ပလ္လတ္ထိကာယ အန္တရဃရေ နိသီဒိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ အသက္ကစ္စံ ပိဏ္ဍပါတံ ပဋိဂ္ဂဏှန္တဿ စ တဟံ တဟံ ဩလောကေန္တေန ပိဏ္ဍပါတံ ပဋိဂ္ဂဏှန္တဿစ သူပညေဝ ဗဟုံ ပဋိဂ္ဂဏှန္တဿစ ထူပီကတံ ပိဏ္ဍပါတံ ပဋိဂ္ဂဏှန္တဿစ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ အသက္ကစ္စံ ပိဏ္ဍပါတံ ပဋိဂ္ဂဟေသုံ၊ တဟံ တဟံ ဩလောကေန္တာ ပိဏ္ဍပါတံ ပဋိဂ္ဂဟေသုံ၊ သူပညေဝ ဗဟုံ ပဋိဂ္ဂဟေသုံ၊ ထူပီကတံ ပိဏ္ဍပါတံ ပဋိဂ္ဂဟေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ အာသက္ကစ္စံ ပိဏ္ဍပါတံ ဘုဉ္ဇန္တဿစ တဟံ တဟံ ဩလောကေန္တန ပိဏ္ဍပါတံ ဘုဉ္ဇန္တဿ စ တဟံ တဟံ ဩမသိတွာ ပိဏ္ဍပါတံ ဘုဉ္ဇန္တဿ စ သူပညေဝ ဗဟုံ ဘုဉ္ဇန္တဿ စ ထူပကတော ဩမဒ္ဒိတွာ ပိဏ္ဍပါတံ ဘုဉ္ဇန္တဿ စ သူပံ ဝါ ဗျဉ္ဇနံ ဝါ ဩဒနေန ပဋိစ္ဆာဒေန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ အသက္ကစ္စံ ပိဏ္ဍပါတံ ဘုဉ္ဇိံသု၊ တဟံ တဟံ ဩလောကေန္တာ ပိဏ္ဍပါတံ ဘုဉ္ဇိံသု၊ တေယေဝ ဘန္တေ ဆဗ္ဗဂ္ဂိယာ ဘိက္ခူ တဟံ တဟံ ဩမသိတွာ ပိဏ္ဍပါတံ ဘုဉ္ဇိံသု၊ တေယေဝ ဘန္တေ ဆဗ္ဗဂ္ဂိယာ ဘိက္ခူ ဗဟုံ သူပံ ဘုဉ္ဇိံသု၊ တေယေဝ ဘန္တေ ဆဗ္ဗဂ္ဂိယာ ဘိက္ခူ ထူပကတော ဩမဒ္ဒိတွာ ပိဏ္ဍပါတံ ဘုဉ္ဇိံသု၊ တေယေဝ ဘန္တေ ဆဗ္ဗဂ္ဂိယာ ဘိက္ခူ သူပမ္ပိ ဗျဉ္ဇနမ္ပိ ဩဒနေန ပဋိစ္ဆာဒေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ သူပံဝါ ဩဒနံဝါ အဂိလာနေန အတ္တနော အတ္ထာယ ဝိညာပေတွာ ဘုဉ္ဇန္တဿ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ဥဇ္ဈာနသညိနာ ပရေသံ ပတ္တံ ဩလောကေန္တဿ စ အတိမဟန္တံ ကဗဠံ ကရောန္တဿ စ ဒီဃံ အာလောပံ ကရောန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဥဇ္ဈာနသညိနော ပရေသံ ပတ္တံ ဩလောကေသုံ၊ တေယေဝ ဘန္တေ ဆဗ္ဗဂ္ဂိယာ ဘိက္ခူ အတိမဟန္တံ ကဗဠံ ကရိံသု၊ တေယေဝ ဘန္တေ ဆဗ္ဗဂ္ဂိယာ ဘိက္ခူ ဒီဃံ အာလောပံ ကရိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ အနာဟဋေ ကဗဠေ မုခဒွါရံ ဝိဝရန္တဿ စ ဘုဉ္ဇမာနေ သဗ္ဗံ ဟတ္ထံ မုခေ ပက္ခိပန္တဿ စ သကဗဠေန မုခေန ဗျာဟရန္တဿ စ ပိဏ္ဍုက္ခေပကံ ပိဏ္ဍပါတံ ဘုဉ္ဇန္တဿ စ ကဗဠာဝစ္ဆေဒကံ ပိဏ္ဍပါတံ ဘုဉ္ဇန္တဿ စ အဝဂဏ္ဍကာရကံ ပိဏ္ဍပါတံ ဘုဉ္ဇန္တဿ စ ဟတ္ထနိဒ္ဓုနကံ သိတ္ထာဝကာရကံ ဇိဝှါနိစ္ဆာရကံ စပုစပုကာရကံ ပိဏ္ဍပါတံ ဘုဉ္ဇန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ အနာဟဋေ ကဗဠေ မုခဒွါရံ ဝိဝရိံသု၊ ဘုဉ္ဇမာနာ သဗ္ဗံ ဟတ္ထံ မုခေ ပက္ခိပိံသု၊ သကဗဠေန မုခေန ဗျာဟရိံသု၊ ပိဏ္ဍုက္ခေပကံ ဘုဉ္ဇိံသု၊ ကဗဠာဝစ္ဆေဒကံ ဘုဉ္ဇိံသု၊ အဝဂဏ္ဍကာရကံ ဘုဉ္ဇိံသု၊ ဟတ္ထနိဒ္ဓုနကံ သိတ္ထာဝကာရကံ ဇိဝှါနိစ္ဆာရကံ စပုစပုကာရကံ ဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ သုရုသုရုကာရကံ ဘုဉ္ဇန္တဿစ ဟတ္ထနိလ္လေဟကံဝါ ပတ္တနိလ္လေဟကံ ဝါ ဩဋ္ဌနိလ္လေဟကံ ဝါ ဘုဉ္ဇန္တဿ စ သာမိသေန ဟတ္ထေန ပါနီယထာလကံ ပဋိဂ္ဂဏှန္တဿ စ သသိတ္ထကံ ပတ္တဓောဝနံ အန္တရဃရေ စဍ္ဍေန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သုရု သုရုကာရကံ ဘန္တေ ဘုဉ္ဇန္တဿ ဒုက္ကဋံ ကောသမ္ဗိယံ ပညတ္တံ၊ သမ္ဗဟုလေ ဘန္တေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ သုရုသုရုကာရကံ ခီရံ ပိဝိံသု၊ တသ္မိံ ဘန္တေ ဝတ္ထုသ္မိံ ပညတ္တံ. ဟတ္ထနိလ္လေဟကံ ဘုဉ္ဇန္တဿ စ ပတ္တနိလ္လေဟကံ ဘုဉ္ဇန္တဿ စ ဩဋ္ဌနိလ္လေဟကံ ဘုဉ္ဇန္တဿ ဒုက္ကဋံ သာဝတ္ထိယံ ပညတ္တံ၊ ဆဗ္ဗဂ္ဂိယေ ဘန္တေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဟတ္ထနိလ္လေဟကံ ဘုဉ္ဇိံသု၊ ပတ္တနိလ္လေဟကံ ဘုဉ္ဇိံသု၊ ဩဋ္ဌနိလ္လေဟကံ ဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

သာမိသေန ဟတ္ထေန ပါနီယထာလကံ ပဋိဂ္ဂဏှန္တဿ စ သသိတ္ထကံ ပတ္တဓောဝနံ အန္တရဃရေ ဆဍ္ဍေန္တဿ စ ဒုက္ကဋံ ဘဂ္ဂေသု ပညတ္တံ၊ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘိက္ခူ သာမိသေန ဟတ္ထေန ပါနီယထာလကံ ပဋိဂ္ဂဟေသုံ၊ တေယေဝ ဘန္တေ သမ္ဗဟုလာ ဘိက္ခူ သသိတ္ထကံ ပတ္တဓောဝနံ အန္တရဃရေ ဆဍ္ဍေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ဆတ္တပါဏိဿ ဓမ္မံ ဒေသေန္တဿ စ ဒဏ္ဍပါဏိဿ ဝါ သတ္ထပါဏိဿ ဝါ အာဝုဓပါဏိဿ ဝါ ဓမ္မံ ဒေသေန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဆတ္တပါဏိဿ ဒဏ္ဍပါဏိဿ သတ္ထပါဏိဿ အာဝုဓပါဏိဿ ဓမ္မံ ဒေသေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ပါဒုကာရုဠှဿ စ ဥပဟနာရုဠှဿ စ ယာနဂတဿ စ သယနဂတဿ စ ဓမ္မံ ဒေသေန္တဿ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ပါဒုကာရုဠှဿ ဥပဟနာရုဠှဿ ယာနဂတဿ သယနဂတဿ ဓမ္မံ ဒေသေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ပလ္လတ္ထိကာယ နိသိန္နဿ စ ဝေဌိတသီသဿ စ ဩဂုဏ္ဌိတသီသဿ စ ဆမာယံ နိသီဒိတွာ အာသနေ နိသိန္နဿ စ နီစေ အာသနေ နိသီဒိတွာ ဥစ္စေ အာသနေ နိသိန္နဿ စ ဌိတေန နိသိန္နဿ စ ပစ္ဆတော ဂစ္ဆန္တေန ပုရတော ဂစ္ဆန္တဿ စ ဥပ္ပထေန ဂစ္ဆန္တေန ပထေန ဂစ္ဆန္တဿ စ ဓမ္မံ ဒေသေန္တဿ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ပလ္လတ္ထိကာယ နိသိန္နဿ စ ဝေဌိတသီသဿ စ ဩဂုဏ္ဌိတသီသဿ စ ဆမာယံ နိသီဒိတွာ အာသနေ နိသိန္နဿ စ နီစေ အာသနေ နိသီဒိတွာ ဥစ္စေ အာသနေ နိသိန္နဿ စ ဌိတာနိသိန္နဿ စ ပစ္ဆတော ဂစ္ဆန္တာ ပုရတော ဂစ္ဆန္တဿ စ ဥပ္ပထေန ဂစ္ဆန္တာ ပထေန ဂစ္ဆန္တဿ စ ဓမ္မံ ဒေသေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အနာဒရိယံ အာဝုသော ပဋိစ္စ ဌိတေန ဥစ္စာရံ ဝါ ပဿာဝံ ဝါ ကရောန္တဿ စ ဟရိတေ ဝါ ဥဒကေ ဝါ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ စ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဌိတာ ဥစ္စာရမ္ပိ ပဿာဝမ္ပိ အကံသု၊ တေယေဝ ဘန္တေ ဆဗ္ဗဂ္ဂိယာ ဘိက္ခူ ဟရိတေပိ ဥဒကေပိ ဥစ္စာရမ္ပိ ပဿာဝမ္ပိ ခေဠမ္ပိ အကံသု၊ တသ္မိံ ဘန္တေ ဝတ္ထုသ္မိံ ပညတ္တံ.