၃. ပတ္တဝဂ္ဂေါ၊ ၁၀. ပရိဏတ သိက္ခာပုစ္ဆာ
ပုစ္ဆာ – ယံ တေန အာဝုသော ဘဂဝတာ ပဿတာ အရဟတာ သမ္မာသမ္ဗုဒ္ဓေန ဇာနံ သံဃိကံ လာဘံ အတ္ထနော ပရိဏာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တံ.
ဝိဿဇ္ဇနာ – သာဝတ္ထိယံ ဘန္တေ ပညတ္တံ.
ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တံ.
ဝိဿဇ္ဇနာ – ဆဗ္ဗဂ္ဂိယေ ဘန္တေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဇာနံ သံဃိကံ လာဘံ ပရိဏတံ အတ္တနော ပရိဏာမေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.
ပုစ္ဆာ – ဇာနံ အာဝုသော သံဃိကံ လာဘံ ပရိဏတံ အတ္တနော ပရိဏာမေန္တော၊ ကတိ အာပတ္တိယော အာပဇ္ဇတိ.
ဝိဿဇ္ဇနာ – ဇာနံ ဘန္တေ သံဃိကံ လာဘံ ပရိဏတံ အတ္တနော ပရိဏာမေန္တော ဒွေ အာပတ္တိယော အာပဇ္ဇတိ၊ ပရိဏာမေတိ ပယောဂေ ဒုက္ကဋံ၊ ပရိဏာမိတေ နိဿဂ္ဂိယံ ပါစိတ္တိယံ၊ ဇာနံ ဘန္တေ သံဃိကံ လာဘံ ပရိဏတံ အတ္တနော ပရိဏာမေန္တော ဣမာ ဒွေ အာပတ္တိယော အာပဇ္ဇတိ.
ပုစ္ဆာ – ကဿ အာဝုသော ဝစနံ.
ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ.
ပုစ္ဆာ – ကေနာဝုသော အာဘတံ.
ဝိဿဇ္ဇနာ – ပရမ္ပရာယ ဘန္တေ အာဘတံ.
ပုစ္ဆာ – အတ္ထိ နုခေါ အာဝုသော တတ္ထ ကောစိပိ ဝိရဒ္ဓဒေါသော.
ဝိဿဇ္ဇနာ – နတ္ထိ ဘန္တေ.
သံဂါယနတ္ထာယ ဉာပနံ
သုဏာတု မေ ဘန္တေ သံဃော၊ အဟံ ဘန္တေ ဣမေသံ သောဠသန္နံ နိဿဂ္ဂိယပါစိတ္တိယသိက္ခာပဒါနံ နိဒါနာဒီနိ အနေကာနိ ပုစ္ဆိတဗ္ဗာနိ အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ပုစ္ဆိံ၊ သော စ ပုဋ္ဌော ပုဋ္ဌော ဝိဿဇ္ဇေတိ၊ ဣတိဟိဒံ ဘန္တေ သိက္ခာပဒသဉ္ဇာတံ နိမ္မလံ သု ပရိသုဒ္ဓံ တဿေဝ ဘဂဝတော ဝစနံ အရဟတော သမ္မာသမ္ဗုဒ္ဓဿ၊ တသ္မာ ယထာ ပုရေ မဟာကဿပါဒယော မဟာထေရ ဝရာ ပေါရာဏသံဂီတိကာရာ ဗြဟ္မစရိယသင်္ခါတဿ ဗုဒ္ဓသာသနဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ ဓမ္မဝိနယံ သံဂါယိံသုစေဝ အနုသံဂါယိံသုစ၊ ဧဝမေဝ မယမ္ပိ ဒါနိ ဆဋ္ဌသံဂီတိ မဟာဓမ္မသဘာပရိယာပန္နာ ဣမာနိ သိက္ခာပဒါနိ ယထာနုပ္ပတ္တဋ္ဌာနတော ပဋ္ဌာယ ဧကတော ဂဏသဇ္ဈာယံ ကတွာ သံဂါယေယျာမ.