၂. ကောသိယဝဂ္ဂ ၈. ရူပိယ သိက္ခာပုစ္ဆာ

ပုစ္ဆာ – ရူပိယံ အာဝုသော ပဋိဂ္ဂဏှန္တဿ နိဿဂ္ဂိယံ ပါစိတ္တိယံ ဘဂဝတာ ကတ္ထ ပညတ္တံ.

ဝိဿဇ္ဇနာ – ရာဇဂဟေ ဘန္တေ ပညတ္တံ.

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – အာယသ္မန္တံ ဘန္တေ ဥပနန္ဒံ သကျပုတ္တံ အာရဗ္ဘ ပညတ္တံ၊ အာယသ္မာ ဘန္တေ ဥပနန္ဒော သကျပုတ္တော ရူပိယံ ပဋိဂ္ဂဟေသိ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ကထံ အာဝုသော တတ္ထ ပဋိပဇ္ဇန္တော ရူပိယံ ပဋိဂ္ဂဏှာတိ နာမ.

ဝိဿဇ္ဇနာ – သယံ ဘန္တေ ဂဏှာတိ၊ အညံ ဝါ ဂဏှာပေသိ၊ ဣဒံ အယျဿ ဟောတူတိ ဥပနိက္ခိတ္တံ သာဒိယတိ၊ ဧဝံ ခေါ ဘန္တေ ပဋိပဇ္ဇန္တော ဘိက္ခု ရူပိယံ ပဋိဂ္ဂဏှာတိ နာမ.

ပုစ္ဆာ – ကထံ အာဝုသော တတ္ထ ပဋိပဇ္ဇန္တော ဘိက္ခု ရူပိယံ န ပဋိဂ္ဂဏှာတိ နာမ.

ဝိဿဇ္ဇနာ – ယထာ ဘန္တေ ရာဇသိက္ခာပဒေ ယထာ စ ဘန္တေ မေဏ္ဍကသိက္ခာပဒေ အာဂစ္ဆတိ၊ တထာ ဘန္တေ ပဋိပဇ္ဇန္တော ဘိက္ခု ရူပိယံ န ပဋိဂ္ဂဏှာတိနာမ.