၂. ကောသိယဝဂ္ဂ ၉. ရူပိယသံဝေါဟာရ သိက္ခာပုစ္ဆာ

ပုစ္ဆာ – ရူပိယသံဝေါဟာရံ အာဝုသော သမာပဇ္ဇန္တဿ နိဿဂ္ဂိယံ ပါစိတ္တိယံ ဘဂဝတာ ကတ္ထ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ပညတ္တံ.

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – ဆဗ္ဗဂ္ဂိယေ ဘန္တေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ နာနပ္ပကာရကံ ရူပိယသံဝေါဟာရံ သမာပဇ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

၂. ကောသိယဝဂ္ဂ၊ ၁၀. ကယဝိက္ကယ သိက္ခာပုစ္ဆာ

ပုစ္ဆာ – နာနပ္ပကာရကံ အာဝုသော ကယဝိက္ကယံ အာပဇ္ဇန္တဿ နိဿဂ္ဂိယံ ပါစိတ္တိယံ ဘဂဝတာ ကတ္ထ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ ပညတ္တံ.

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – အာယသ္မန္တံ ဘန္တေ ဥပနန္ဒံ သကျပုတ္တံ အာရဗ္ဘ ပညတ္တံ၊ အာယသ္မာ ဘန္တေ ဥပနန္ဒော သကျပုတ္တော ပရိဗ္ဗာဇကေန သဒ္ဓိ ကယဝိက္ကယံ သမာပဇ္ဇိ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ကထံ အာဝုသော တတ္ထ ပဋိပဇ္ဇန္တော ဘိက္ခု ကယဝိက္ကယံ သမာပဇ္ဇတိနာမ.

ဝိဿဇ္ဇနာ – ဣမိနာ ဣမံ ဒေဟိ ဣမိနာ ဣမံ အာဟရ ဣမိနာ ဣမံ ပရိဝတ္တေဟိ ဣမိနာ ဣမံ စေတာမေဟီတိ အဇ္ဈာစရတိ၊ ဧဝံ ခေါ ဘန္တေ ပဋိပဇ္ဇန္တော ကယဝိက္ကယံ သမာပဇ္ဇတိနာမ.

ပုစ္ဆာ – ကထံ အာဝုသော တတ္ထ ပဋိပဇ္ဇန္တော ဘိက္ခု န ကယဝိက္ကယံ သမာပဇ္ဇတိနာမ.

ဝိဿဇ္ဇနာ – ယော ဘန္တေ အဂ္ဃံ ပုစ္ဆတိ၊ ယော စ ဘန္တေ ကပ္ပိယကာရကဿ အာစိက္ခတိ၊ ယော စ ဘန္တေ အမှာကဉ္စ ဣဒံ အတ္ထိ အမှာကဉ္စ ဣမိနာ စ ဣမိနာ စ အတ္ထောတိ ဘဏတိ၊ ဧဝံ ခေါ ဘန္တေ ပဋိပဇ္ဇန္တော ဘိက္ခု န ကယဝိက္ကယံ သမာပဇ္ဇတိနာမ.