၆. သေနာသနက္ခန္ဓက

ပုစ္ဆာ – ပဉ္စ အာဝုသော လေဏာနိ ဘဂဝတာ ကတ္ထ အနုညာတာနိ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာနိ.

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတာနိ၊ သမ္ဗဟုလာ ဘန္တေ ဘိက္ခူ ဘဂဝန္တံ ဥပသင်္ကမိတွာ ဧတဒဝေါစုံ ‘‘ရာဇဂဟကော ဘန္တေ သေဋ္ဌီ ဝိဟာရေ ကာရာပေတုကာမော၊ ကထံ နု ခေါ ဘန္တေ ပဋိပဇ္ဇိတဗ္ဗ’’န္တိ၊ တသ္မိံ ဘန္တေ ဝတ္ထုသ္မိံ အနုညာတာနိ.

ပုစ္ဆာ – ကထံ အာဝုသော ဝိဟာရာ ပဌမံ ဥပ္ပန္နာ၊ ကထဉ္စ တေ ပတိဋ္ဌာပိ တာ.

ဝိဿဇ္ဇနာ – ဧကာဟေနေဝ ဘန္တေ ရာဇဂဟကေန သေဋ္ဌိနာ ဆဋ္ဌိဝိဟာရာ ပတိဋ္ဌာပိတာ၊ တေ ဣဓ ဘန္တေ သဋ္ဌိဝိဟာရာ ဗုဒ္ဓပ္ပမုခဿ အာဂတာနာဂတဿ စာတုဒ္ဒိသဿ သံဃဿ ပတိဋ္ဌာပိတာ.

ပုစ္ဆာ – ဝိဟာရေ အာဝုသော ပဋိဘာနကမ္မံ ပဋိက္ခိပိတွာ မာလာကမ္မာဒီနိ ဘဂဝတာ ကတ္ထ အနုညာတာနိ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာနိ.

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ အနုညာတာနိ. ဆဗ္ဗဂ္ဂိယာ ဘန္တေ ဘိက္ခူ ဝိဟာရေ ပဋိဘာနစိတ္တံ ကာရာပေသုံ ဣတ္ထိရူပကံ ပုရိသရူပကံ၊ တသ္မိံ ဘန္တေ ဝတ္ထုသ္မိံ အနုညာတာနိ.

ပုစ္ဆာ – ယထာဝုဍ္ဎံ အာဝုသော အဘိဝါဒနာဒီနိ စ အဂ္ဂါသနာဒီနိ စ အနုဇာနိတွာ သံဃိကံ ယထာဝုဍ္ဎံ ပဋိဗာဟန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – အန္တရာ စ ဘန္တေ ဝေသာလိံ အန္တရာ စ သာဝတ္ထိံ ဆဗ္ဗဂ္ဂိယာနံ ဘိက္ခူနံ အန္တေဝါသိကေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာနံ ဘန္တေ ဘိက္ခူနံ အန္တေဝါသိကာ ဘိက္ခူ ဗုဒ္ဓပ္ပမုခဿ သံဃဿ ပုရတော ပုရတော ဂန္တွာ ဝိဟာရေ ပဋိဂ္ဂဟေသုံ၊ သေယျာယော ပဋိဂ္ဂဟေသုံ ‘‘ဣဒံ အမှာကံ ဥပဇ္ဈာယာနံ ဘဝိဿတိ၊ ဣဒံ အမှာကံ အာစရိယာနံ ဘဝိဿတိ၊ ဣဒံ အမှာကံ ဘဝိဿတီ’’တိ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ဧကေန အာဝုသော ဒွေ ပဋိဗာဟန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ဥပနန္ဒံ သကျပုတ္တံ အာရဗ္ဘ ပညတ္တံ၊ အာယသ္မာ ဘန္တေ ဥပနန္ဒော သကျပုတ္တော ဧကော ဒွေ ပဋိဗာဟိ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – နဝကေန အာဝုသော ဥဒ္ဒိသန္တေန သမကေ ဝါ အာသနေ နိသီဒိတုံ ဥစ္စတရေ ဝါ ဓမ္မဂါရဝေန၊ ထေရေန ပန ဘိက္ခုနာ ဥဒ္ဒိသာပေန္တေန သမကေ ဝါ အာသနေ နိသီဒိတုံ နီစတရေ ဝါ ဓမ္မဂါရဝေန ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ အာယသ္မတော ဥပါလိဿ သန္တိကေ ဝိနယံ ပရိယာပုဏိံသု၊ အာယသ္မာ ဘန္တေ ဥပါလိ ဌိတကောဝ ဥဒ္ဒိသတိ ထေရာနံ ဘိက္ခူနံ ဂါရဝေန၊ တတ္ထ ဘန္တေ ထေရာ စေဝ ဘိက္ခူ ကိလမိံသု အာယသ္မာ စ ဥပါလိ ကိလမိ၊ တသ္မိံ ဘန္တေ ဝတ္ထုသ္မိံ အနုညာတံ.

ပုစ္ဆာ – တိဝဿန္တရေန အာဝုသော သဟ နိသီဒိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာနံ ဘန္တေ ဘိက္ခူနံ ဧတဒဟောသိ ‘‘ကိတ္တာဝတာနု ခေါ သမာနာသနိကော ဟောတီ’’တိ၊ တသ္မိံ ဘန္တေ ဝတ္ထုသ္မိံ အနုညာတံ.

ပုစ္ဆာ – မဉ္စေ စ အာဝုသော ပီဌေ စ ဒွိန္နံယေဝ နိသီဒိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ သမာနာသနိကေ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ သမာနာသနိကာ မဉ္စေ နိသီဒိတွာ မဉ္စံ ဘိန္ဒိံသု၊ ပီဌေ နိသီဒိတွာ ပီဌံ ဘိန္ဒိံသု၊ တသ္မိံ ဘန္တေ ဝတ္ထုသ္မိံ အနုညာတံ.

ပုစ္ဆာ – ဒီဃာသနေ ပနာဝုသော အသမာနာသနိကေဟိပိ နိသီဒိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဒီဃာသနေ အသမာနာသနိကေဟိ သဟ နိသီဒိတုံ ကုက္ကုစ္စာယိံသု၊ တသ္မိံ ဘန္တေ ဝတ္ထုသ္မိံ အနုညာတံ.

ပုစ္ဆာ – ပဉ္စ အာဝုသော အဝိဿဇ္ဇိယာနိ ဘဂဝတာ ကတ္ထ ပညတ္တာနိ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တာနိ.

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တာနိ၊ သမ္ဗဟုလာ ဘန္တေ ဘိက္ခူ သံဃိကံ သေနာသနံ ဝိဿဇ္ဇေသုံ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ပဉ္စ အာဝုသော အဝေဘင်္ဂိယာနိ ဘဂဝတာ ကတ္ထ ပညတ္တာနိ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တာနိ.

ဝိဿဇ္ဇနာ – ကီဋာဂိရိသ္မိံ ဘန္တေ အဿဇိပုနဗ္ဗသုကေ ဘိက္ခူ အာရဗ္ဘ ပညတ္တာနိ၊ အဿဇိပုနဗ္ဗသုကာ ဘန္တေ ဘိက္ခူ သံဃိကံ သေနာသနံ ဝိဘဇိံသု၊ တသ္မိံ ဘန္တေ ဝတ္ထုသ္မိံ ပညတ္တာနိ.

ပုစ္ဆာ – အညတြ ပရိဘောဂံ အာဝုသော အညတြ ပရိဘုဉ္ဇန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – အာဠဝိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အညတရဿ ဥပါသကဿ ဝိဟာရပရိဘောဂံ သေနာသနံ အညတြ ပရိဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အဓောတေဟိ စ အာဝုသော အလ္လေဟိ စ ပါဒေဟိ သေနာသနံ အက္ကမန္တဿ စ သဥပါဟနေန သေနာသနံ အက္ကမန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – အာဠဝိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အဓောတေဟိ ပါဒေဟိ သေနာသနံ အက္ကမိံသု၊ အလ္လေဟိ စ ပါဒေဟိ သေနာသနံ အက္ကမိံသု၊ သဥပါဟနာပိ သေနာသနံ အက္ကမိံသု၊ သေနာသနံ ဒုဿိ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – ပရိကမ္မကတာယ အာဝုသော ဘူမိယာ နိဋ္ဌုဘန္တဿ စ ပရိကမ္မကတံ ဘိတ္တိံ အပဿယန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – အာဠဝိယံ ဘန္တေ သမ္ဗဟုလေဝ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ပရိကမ္မကတာယ ဘူမိယာ နိဋ္ဌုဘိံသု၊ ပရိကမ္မကတံ ဘိတ္တိံ အပဿယိံသု၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – သေနာသနက္ခန္ဓကံ ပုစ္ဆိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ အာဝုသော ကတိ အာပတ္တိယော.

ဝိဿဇ္ဇနာ – သေနာသနက္ခန္ဓကံ ဝိဿဇ္ဇိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ ဘန္တေ တိဿော အာပတ္တိယော.