၇. သင်္ဃတေဒကက္ခန္ဓက

ပုစ္ဆာ – ကထံ အာဝုသော ဆန္နံ သကျကုမာရာနံ သဟ ဥပါလိကပ္ပကေန ပဗ္ဗဇ္ဇာ အဟောသိ၊ ကထဉ္စ နေသံ ဝိသေသော ဥဒပါဒိ.

ဝိဿဇ္ဇနာ – ဘဂဝါ ဘန္တေ ဥပါလိံ ကပ္ပကံ ပဌမံ ပဗ္ဗာဇေသိ၊ ပစ္ဆာ တေ သကျကုမာရေ၊ အထ ဘန္တေ အာယသ္မာ ဘဒ္ဒိယော တေနေဝ အန္တရဝဿေန တိဿော ဝိဇ္ဇာ သစ္ဆာကာသိ၊ အာယသ္မာ အနုရုဒ္ဓေါ ဒိဗ္ဗစက္ခုံ ဥပ္ပါဒေသိ၊ အာယသ္မာ အာနန္ဒော သောတာပတ္တိဖလံ သစ္ဆာကာသိ၊ ဒေဝဒတ္တော ပေါထုဇ္ဇနိကံ ဣဒ္ဓိံ အဘိနိပ္ဖါဒေသိ. ဧဝံ ခေါ ဘန္တေ ဆန္နံ သကျကုမာရာနံ ဥပါလိကပ္ပကေန သဟ ပဗ္ဗဇ္ဇာ အဟောသိ၊ ဧဝဉ္စ ပန ဘန္တေ တေသံ ဝိသေသာဓိဂမော အဟောသိ.

ပကာသနီယ

ပုစ္ဆာ – ပကာသနီယကမ္မံ အာဝုသော ကာတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံ အာရဗ္ဘ ပညတ္တံ၊ ဒေဝဒတ္တော ဘန္တေ ‘‘သရာဇိကာယ မံ ဘဂဝါ ပရိသာယ ခေဠာသကဝါဒေန အပသာဒေတိ၊ သာရိပုတ္တမောဂ္ဂလ္လာနေဝ ဥက္ကံသတီ’’တိ ကုပိတော အနတ္တမနော ဘဂဝတိ အာဃာတံ ဗန္ဓိ၊ တသ္မိံ ဘန္တေ ဝတ္ထုသ္မိံ ပညတ္တံ.

ပကာသနီယ

ပုစ္ဆာ – ဒေဝဒတ္တဿ အာဝုသော ပကာသနီယကမ္မံ ကာရာပေတွာ ကထံ ဘဂဝါ ပကာသေတုံ အာဏာပေသိ.

ဝိဿဇ္ဇနာ – ဘဂဝါ ဘန္တေ ဒေဝဒတ္တဿ ပကာသနီယကမ္မံ ကာတုံ ပညပေတွာ အာယသ္မန္တံ သာရိပုတ္တံ အာမန္တေသိ ‘‘တေန ဟိ တွံ သာရိပုတ္တ ဒေဝဒတ္တံ ရာဇဂဟေ ပကာသေဟီ’’တိ၊ ဧဝံ ခေါ ဘန္တေ ဒေဝဒတ္တဿ ပကာသနီယကမ္မံ ကတွာ ဒေဝဒတ္တံ ရာဇဂဟေ ပကာသေတုံ ဘဂဝါ အာဏာပေသိ.

ဒေဝဒတ္တ

ပုစ္ဆာ – ကထံ အာဝုသော ဒေဝဒတ္တေန ဒုဋ္ဌစိတ္တေန ဝဓကစိတ္တေန တထာ ဂတဿ ရုဟိရံ ဥပ္ပါဒေတွာ ပဌမံ အာနန္တရိယံ ကမ္မံ ဥပစိတံ.

ဝိဿဇ္ဇနာ – ဘဂဝါ ဘန္တေ ဂိဇ္ဈကူဋဿ ပဗ္ဗတဿ ဆာယာယံ စင်္ကမိ၊ အထ ဘန္တေ ဒေဝဒတ္တော ဂိဇ္ဈကူဋံ ပဗ္ဗတံ အာရုဟိတွာ မဟတိံ သိလံ ပဝိဇ္ဈိ ‘‘ဣမာယ သမဏံ ဂေါတမံ ဇီဝိတာ ဝေါရောပေဿာမီ’’တိ၊ အထ ခေါ ဘန္တေ ဒွေ ပဗ္ဗတကူဋာနိ သမာဂန္တွာ တံ သိလံ သမ္ပဋိစ္ဆိံသု၊ တတော ပပတိကာ ဥပ္ပတိတွာ ဘဂဝတော ပါဒေ ရုဟိရံ ဥပ္ပါဒေသိ. ဧဝံ ခေါ ဘန္တေ ဒေဝဒတ္တေန ဒုဋ္ဌေန ဝဓကစိတ္တေန တထာဂတဿ ရုဟိရံ ဥပ္ပါဒေတွာ ပဌမံ အာနန္တရိယကမ္မံ ဥပစိတံ.

ပုစ္ဆာ – ကုလေသု အာဝုသော တိကဘောဇနံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံ အာရဗ္ဘ ပညတ္တံ၊ ဒေဝဒတ္တော ဘန္တေ ပရိဟီနလာဘသက္ကာရော သပရိသော ကုလေသု ဝိညာပေတွာ ဝိညာပေတွာ ဘုဉ္ဇိ၊ တသ္မိံ ဘန္တေ ဝတ္ထုသ္မိံ ပညတ္တံ.

ပုစ္ဆာ – အလံ ဒေဝဒတ္တ၊ မာ တေ ရုစ္စိ သံဃဘေဒေါ၊ ဂရုကော ခေါ ဒေဝဒတ္တ သံဃဘေဒေါတိအာဒိကော အာဝုသော ဩဝါဒေါ ဘဂဝတာ ကတ္ထ ဒိန္နော၊ ကိသ္မိံ ဝတ္ထုသ္မိံ ဒိန္နော.

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံ အာရဗ္ဘ ဒိန္နော၊ ဒေဝဒတ္တော ဘန္တေ သံဃဘေဒါယ ပရက္ကမိ စက္ကဘေဒါယ၊ တသ္မိံ ဘန္တေ ဝတ္ထုသ္မိံ ဒိန္နော.

အလံ ဒေဝဒတ္တ၊ မာ တေ ရုစ္စိ သံဃဘေဒေါ၊ ဂရုကော ခေါ ဒေဝဒတ္တ သံဃဘေဒေါ –

ပုစ္ဆာ – ‘‘သုကရံ သာဓုနာ သာဓုံ၊ သာဓုံ ပါပေန ဒုက္ကရံ. ပါပံ ပါပေန သုကရံ၊ ပါပမရိယေဟိ ဒုက္ကရ’’န္တိ- အာဝုသော ဣဒံ ဥဒါနံ ဘဂဝတာ ကတ္ထ ဥဒါနိတံ၊ ကံ အာရဗ္ဘ ကိသ္မိံ ဝတ္ထုသ္မိံ ဥဒါနိတံ.

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံယေဝ အာရဗ္ဘ ဥဒါနိတံ၊ အာယသ္မာ ဘန္တေ အာနန္ဒော ပုဗ္ဗဏှသမယံ နိဝါသေတွာ ပတ္တစီဝရမာဒါယ ရာဇဂဟံ ပိဏ္ဍာယ ပါဝိသိ၊ အထ ခေါ ဘန္တေ ဒေဝဒတ္တော ယေနာယသ္မာ အာနန္ဒော တေနုပသင်္ကမိ၊ ဥပသင်္ကမိတွာ အာယသ္မန္တံ အာနန္ဒံ ဧတဒဝေါစ ‘‘အဇ္ဇတဂ္ဂေ ဒါနာဟံ အာဝုသော အာနန္ဒ အညတြေဝ ဘဂဝတာ အညတြေဝ ဘိက္ခုသံဃာ ဥပေါသထံ ကရိဿာမိ သံဃကမ္မံ ကရိဿာမီ’’တိ၊ တသ္မိံ ဘန္တေ ဝတ္ထုသ္မိံ ဥဒါနိတံ.

သုကရံ သာဓုနာ သာဓုံ၊ သာဓုံ ပါပေန ဒုက္ကရံ၊

ပါပံ ပါပေန သုကရံ၊ ပါပမရိယေဟိ ဒုက္ကရံ.

ပုစ္ဆာ – ဘေဒါနုဝတ္တကာနံ အာဝုသော ဘိက္ခူနံ ထုလ္လစ္စယံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ.

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ အာယသ္မာ ဘန္တေ သာရိပုတ္တော ဘဂဝန္တံ ဥပသင်္ကမိတွာ ဧတဒဝေါစ ‘‘သာဓု ဘန္တေ ဘေဒါနုဝတ္တကာ ဘိက္ခူ ပုန ဥပသမ္ပဇ္ဇေယျု’’န္တိ၊ တသ္မိံ ဘန္တေ ဝတ္ထုသ္မိံ ပညတ္တံ.

‘‘သာဓု ဘန္တေ ဘေဒါနုဝတ္တကာ ဘိက္ခူ ပုန ဥပသမ္ပဇ္ဇေယျု’’န္တိ –

ပုစ္ဆာ – ကိတ္တာဝတာ နု ခေါ အာဝုသော သင်္ဃရာဇိ ဟောတိ နော စ သံဃဘေဒေါ၊ ကိတ္တာဝတာ စ ပန သင်္ဃရာဇိ စေဝ ဟောတိ သံဃဘေဒေါ စ.

ဝိဿဇ္ဇနာ – ဧကတော ဘန္တေ ဧကော ဟောတိ၊ ဧကတော ဒွေ စတုတ္ထော အနုဿာဝေတိ၊ သလာကံ ဂါဟေတိ ‘‘အယံ ဓမ္မော အယံ ဝိနယော ဣဒံ သတ္ထုသာသနံ ဣမံ ဂဏှထ ဣမံ ရောစေထာတိ’’၊ ဧတေနေဝ ဘန္တေ နယေန စတုန္နံ ဝါ ပဉ္စန္နံ ဝါ ဆန္နံ ဝါ သတ္တန္နံ ဝါ အဋ္ဌန္နံ ဝါ သင်္ဃရာဇိ ဟောတိ၊ နော စ သံဃဘေဒေါ၊ ဧကတော ဘန္တေ စတ္တာရော ဟောန္တိ၊ ဧကတော စတ္တာရော၊ နဝမော အနုဿာဝေတိ၊ သလာကံ ဂါဟေတိ ‘‘အယံ ဓမ္မော အယံ ဝိနယော ဣဒံ သတ္ထုသာသနံ ဣမံ ဂဏှထ ဣမံ ရောစေထာ’’တိ၊ ဧဝံ ခေါ ဘန္တေ သင်္ဃရာဇိ စေဝ ဟောတိ သံဃဘေဒေါ စ. ဧဝံ ခေါ ဘန္တေ သင်္ဃရာဇိ ဟောတိ၊ နော စ သံဃဘေဒေါ၊ ဧဝဉ္စ ပန ဘန္တေ သင်္ဃရာဇိ စေဝ ဟောတိ သံဃဘေဒေါ စ.

ပုစ္ဆာ – ကိတ္တာဝတာ နု ခေါ အာဝုသော သံဃော ဘိန္နော ဟောတိ.

ဝိဿဇ္ဇနာ – ဣဓ ဘန္တေ ဘိက္ခူ အဓမ္မာဒိံ ဓမ္မာဒီနီတိ ဒီပေန္တိ၊ တေ ဣမေဟိ အဋ္ဌာရသဟိ ဝတ္ထူဟိ အပကဿန္တိ၊ အဝပကဿန္တိ၊ အာဝေနိံ ဥပေါသထံ ကရောန္တိ၊ အာဝေနိံ ပဝါရဏံ ကရောန္တိ၊ အာဝေနိံ သံဃကမ္မံ ကရောန္တိ၊ ဧဝံ ခေါ ဘန္တေ သံဃော ဘိန္နော ဟောတိ.

ပုစ္ဆာ – ကိတ္တာဝတာ နု ခေါ အာဝုသော သံဃော သမဂ္ဂေါ ဟောတိ.

ဝိဿဇ္ဇနာ – ဣဓ ဘန္တေ ဘိက္ခူ အဓမ္မံ အဓမ္မောတိ ဒီပေန္တိ၊ ဓမ္မံ ဓမ္မောတိ ဒီပေန္တိ၊ အဝိနယံ အဝိနယောတိ ဒီပေန္တိ။ပေ။ ဒုဋ္ဌုလ္လံ အာပတ္တိံ ဒုဋ္ဌုလ္လာ အာပတ္တီတိ ဒီပေန္တိ၊ အဒုဋ္ဌုလ္လံ အာပတ္တိံ အဒုဋ္ဌုလ္လာ အာပတ္တီတိ ဒီပေန္တိ၊ တေ ဣမေဟိ အဋ္ဌာရသဟိ ဝတ္ထူဟိ န အပကဿန္တိ၊ န အဝပကဿန္တိ၊ န အာဝေနိံ ဥပေါသထံ ကရောန္တိ၊ န အာဝေနိံ ပဝါရဏံ ကရောန္တိ၊ န အာဝေနိံ သံဃကမ္မံ ကရောန္တိ၊ ဧတ္တာဝတာ ခေါ ဘန္တေ သံဃော သမဂ္ဂေါ ဟောတိ.

ပုစ္ဆာ – သမဂ္ဂံ အာဝုသော သံဃံ ဘိန္ဒိတွာ ကိံ သော ပသဝတိ.

ဝိဿဇ္ဇနာ – သမဂ္ဂံ ခေါ ဘန္တေ သံဃံ ဘိန္ဒိတွာ ကပ္ပဋ္ဌိတိကံ ကိဗ္ဗိသံ ပသဝတိ၊ ကပ္ပံ နိရယမှိ ပစ္စတိ.

ပုစ္ဆာ – ဘိန္နံ ခေါ အာဝုသော သံဃံ သမဂ္ဂံ ကတွာ ကိံ သော ပသဝတိ.

ဝိဿဇ္ဇနာ – ဘိန္နံ ခေါ ဘန္တေ သံဃံ သမဂ္ဂံ ကတွာ ဗြဟ္မံ ပုညံ ပသဝတိ၊ ကပ္ပံ သဂ္ဂမှိ မောဒတိ.

ပုစ္ဆာ – သံဃဘေဒံ ပုစ္ဆိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ အာဝုသော ကတိ အာပတ္တိယော.

ဝိဿဇ္ဇနာ – သံဃဘေဒံ ဝိဿဇ္ဇိဿံ၊ သနိဒါနံ သနိဒ္ဒေသံ. သမုက္ကဋ္ဌပဒါနံ ဘန္တေ ဒွေ အာပတ္တိယော.