၅. ပဏိဟိတအစ္ဆဝဂ္ဂ

ပုစ္ဆာ – ပဉ္စမေ အာဝုသော ပဏိဟိတအစ္ဆဝဂ္ဂေ ဘဂဝတာ ကီဒိသီ ဓမ္မဒေသနာယော ဒေသိတာ.

ဝိဿဇ္ဇနာ – ပဉ္စမေ ဘန္တေ ပဏိဟိတအစ္ဆဝဂ္ဂေ ‘‘သေယျထာပိ ဘိက္ခဝေ သာလိသူကံ ဝါ ယဝသူကံ ဝါ မိစ္ဆာပဏိဟိတံ ဟတ္ထေန ဝါ ပါဒေန ဝါ အက္ကန္တံ ဟတ္ထံ ဝါ ပါဒံ ဝါ ဘေစ္ဆတိ၊ လောဟိတံ ဝါ ဥပ္ပါဒေဿတီတိ နေတံ ဌာန ဝိဇ္ဇတိ. တံ ကိဿဟေတု၊ မိစ္ဆာပဏိဟိတတ္တာ ဘိက္ခဝေ သူကဿ. ဧဝမေဝ ခေါ ဘိက္ခဝေ သော ဝတ ဘိက္ခု မိစ္ဆာပဏိဟိတေန စိတ္တေန အဝိဇ္ဇံ ဘေစ္ဆတိ၊ ဝိဇ္ဇံ ဥပ္ပါဒေဿတိ၊ နိဗ္ဗာနံ သစ္ဆိကရိဿတီတိ နေတံ ဌာနံ ဝိဇ္ဇတိ၊ တံ ကိဿ ဟေတု၊ မိစ္ဆာပဏိဟိတတ္တာ ဘိက္ခဝေ စိတ္တဿာ’’တိ ဧဝမာဒိကာ ဘဂဝတာ ဓမ္မဒေသနာယော ဒေသိတာ.