၆၃. ပုဗ္ဗေ+ကကတ္တုကာနံ

ဧကော ကတ္တာ ယေသံ ဗျာပါရာနံ၊ တေသု ယော ပုဗ္ဗော၊ တဒတ္ထတော ကြိယတ္ထာ တုနာဒယော ဟောန္တိ ဘာဝေ. ‘‘တုံတုနာ’’ ဒိနာ ကရဿ အာ၊ သော ကာတုန ကမ္မံ ဂစ္ဆတိ၊ အကာတုန ပုညံ ကိလိဿန္တိ. ရလောပေ ကမ္မံ ကတွာန ဘဒြကံ၊ ပုညာနိ ကတွာ သဂ္ဂံ ဂစ္ဆတိ. အဘိသင်္ခရဏံ ကတွာ အဘိသင်္ခရိတွာ ကရိတွာ ဝါ. တထာ သိဗ္ဗိတွာ ဆာဒယိတွာ ဇာနိတွာ ဓမ္မံ သုတွာ သုတွာန ဓမ္မံ မောဒတိ၊ သုဏိတွာ၊ ပတွာ ပါပုဏိတွာ၊ ကိနိတွာ၊ ဇေတွာ ဇိနိတွာ ဇိတွာ၊ စောရေတွာ စောရယိတွာ၊ ပူဇေတွာ ပူဇယိတွာ၊ တထာ မေတ္တံ ဘာဝေတွာ ဘာဝယိတွာ၊ ဝိဟာရံ ကာရေတွာ ကာရယိတွာ ကာရာပေတွာ ကာရာပယိတွာ သဂ္ဂံ ဂမိဿန္တိ+စ္စာဒိ. ပုဗ္ဗေတိ ကိံ၊ ဘုဉ္ဇတိ စ ပစတိ စ. ‘‘အပတွာ နဒိံ ပဗ္ဗတော၊ အတိက္ကမ္မ ပဗ္ဗတံ နဒီ’’တိအာဒီသု ဘူဓာတုဿ သမ္ဘဝါ ဧကကတ္တုကတာ ပုဗ္ဗကာလတာ စ ဂမျတေ. ‘‘ဘုတွာ ဘုတွာ ဂစ္ဆတီ’’တိ ဣမိနာဝ သိဒ္ဓံ၊ အာဘိက္ခညန္တု ဒွိဗ္ဗစနာဝ ဂမျတေ. ကထံ ‘‘ဇီဝဂ္ဂါဟံ အဂါဟယိ၊ ကာယပ္ပစာလကံ ဂစ္ဆတီ’’တိ၊ ဃဏန္တေန ကြိယာဝိသေသနေန သိဒ္ဓံ၊ ယထာ ဩဒနပါကံ သယတီတိ.