၁၅၀. ဘိဒါဒိတော နော က္တ+က္တဝန္တူနံ

ဘိဒါဒီဟိ ပရေသံ က္တ+က္တဝန္တူနံ တဿ နော ဟောတိ. အာကတိဂဏော+ယံ. ‘‘က္တော ဘာဝကမ္မေသူ’’တိ ကမ္မေ ဥပရိ သဗ္ဗတ္ထ က္တော. ဘိဇ္ဇိတ္ထောတိ ဘိန္နော၊ တဿ နေ ပရရူပံ. အဘိန္ဒီတိ ဘိန္နဝါ၊ ‘‘ကတ္တရိ ဘူတေ’’ စ္စာဒိနာ က္တဝန္တု. ဧဝ+မုပရိပိ. ဆိဇ္ဇိတ္ထာတိ ဆိန္နော. အဆိန္ဒီတိ ဆိန္နဝါ. ဆဒ=အပဝါရဏေ၊ ဆာဒီယိတ္ထာတိ ဆန္နော. အဆာဒယီတိ ဆန္နဝါ၊ စုရာဒိတ္တာ ဏိ၊ တဿ ‘‘ဏိဏာပီနံ တေသူ’’တိ ဧတ္ထ ‘‘ဏိ’’ ဣတိ ယောဂဝိဘာဂါ လောပေါ. ခိဒ=အသဟနေ၊ ခိဇ္ဇီတိ ခိန္နော ခိန္နဝါ၊ ကတ္တရိ. ဧဝ+မုပရိပိ. ဥပ္ပဇ္ဇီတိ ဥပ္ပန္နော ဥပ္ပန္နဝါ. သိဒ=ပါကေ၊ အသိဇ္ဇီတိ သိန္နော သိန္နဝါ. သဒ=ဝိသရဏဂတျ ဝသာဒနာဒါနေသု၊ သိဒီတိ သန္နော သန္နဝါ. ပီနီတိ ပီနော ပီနဝါ. သူ=ပသဝေ၊ သူနီတိ သူနော. ပသဝီတိ သူနဝါ. ဒီ=ခယေ၊ ဒီယီတိ ဒီနော ဒီနဝါ. ဍီ+လီ=အာကာသဂမနေ၊ ဍီယီတိ ဍီနော ဍီနဝါ. လီယိ လေယိ အလီယီတိ လီနော လီနဝါ. အလုယီတိ လူနော လူနဝါ.