၉၆. မနာနံ နိဂ္ဂဟီတံ

မကာရ+နကာရန္တာနံ ကြိယတ္ထာနံ နိဂ္ဂဟီတံ ဟောတျ+ယကာရေ ဗျဉ္ဇနေ. ဝဂ္ဂန္တံ၊ ဂမိယတီတိ ဂန္တဗ္ဗော. ဂမိတဗ္ဗံ ဂမနီယံ. ခန=ခဏ=အဝဒါရဏေ၊ နိဂ္ဂဟီတံ ဝဂ္ဂန္တတ္တဉ္စ၊ ခညတေတိ ခန္တဗ္ဗံ အာဝါဋံ ခနိတဗ္ဗံ ခနနီယံ. ဟန=ဟိံသာယံ၊ ဟညတေတိ ဟန္တဗ္ဗံ ဟနိတဗ္ဗံ ဟနနီယံ. မန=ဉာဏေ၊ မညတေတိ မန္တဗ္ဗော မနိတဗ္ဗော. ‘‘ပဒါဒီနံ ကွစီ’’တိ ယုက၊ စဝဂ္ဂါဒိမှိ ကတေ မညိတဗ္ဗံ မညနီယံ.

ပူဇ=ပူဇာယံ၊ ‘‘စုရာဒိတော ဏီ’’တိ ဏိမှိ ဉုကာရဿ ဂုရုတ္တာ ဩကာရာဝုတ္တိ ‘‘ယုဝဏ္ဏာန+မေဩ ပစ္စယေ’’တိ ဧကာရေ ပူဇေတဗ္ဗော ဦမှိ အယာဒေသေ ပူဇယိတဗ္ဗော ပူဇနီယော ဘဂဝါ.

ကတ္တရိ-ယာ=ပါပုဏနေ၊ နီယတီတိ နိယျာနိယော မဂ္ဂေါ၊ ဂစ္ဆန္တီတိ ဂမနီယာ ဘောဂါ. ကရဏေ-နဟ=သောစေယျေ၊ နဟာယန္တျ+နေနာတိ နဟာနီယံ စုဏ္ဏံ. သမ္ပဒါနေ-ဒါ=ဒါနေ၊ သံ+ပပုဗ္ဗော၊ သမ္မာ ပဒီယတေ အဿာတိ သမ္ပဒါနိယော ဗြာဟ္မဏော.