၅၃. သီလာ+ဘိက္ခညာ+ဝဿကေသု ဏီ

ကြိယတ္ထာ ဏီ ဟောတိ သီလာဒီသု. သံသ=ပသံသနေ၊ ပိယပုဗ္ဗော၊ ပိယံ ပသံသတိ သီလေနာတိ ပိယပသံသီ ရာဇာ. အထ ဝါ ပိယံ ပသံသတိ သီလေန ဝါ ဓမ္မေန ဝါ တသ္မိံ သာဓု ဝါတိ ပိယပသံသီ၊ ပိယပသံသနီ၊ ပိယပသံသိ ကုလံ၊ အာဝုဒ္ဓိမှိ တထာ သစ္စဝါဒီ၊ ဓမ္မဝါဒီ. သီဃယာယီတိ ‘‘အဿာ+ဏာပိမှီ ယုက’’ ဣတိ ယုက. ပါပကာရီ၊ မာလကာရီ ဣစ္စာဒိ. ဥဏှံ ဘုဉ္ဇတိ သီလေနာတိ ဥဏှဘောဇီ၊ ‘‘လဟုဿုပန္တဿာ’’တိ ဩကာရော.

အာဘိက္ခညေ-ပုနပ္ပုန ခီရံ ပိဝတီတိ ခီရပါယီ၊ ယုက. အဝဿံ ကရောတီတိ အဝဿကာရီ. ‘‘သျာဒိ သျာဒိနေ+ကတ္ထံ’’တိ သမာသေ ဝိဘတ္တိလောပေ စ ကတေ ‘‘လောပေါ’’တိ နိဂ္ဂဟီတလောပေါ. သတန္ဒာယီတိ ဧတ္ထ ဗဟုလံဝိဓာနာ ဝိဘတ္တိအလောပေ အမာဒိသမာသပဋိသေဓေ စ ကတေ ဝဂ္ဂန္တံ.

အညသ္မိံ အတ္ထေပိ ‘‘ဏီ’’တိ ယောဂဝိဘာဂေန သိဒ္ဓံ. သာဓုကာရီ၊ ဗြဟ္မစာရီ၊ အဿဒ္ဓဘောဇီ. ပဏ္ဍိတံ အတ္တာနံ မညတီတိ ပဏ္ဍိတမာနီ၊ ဗဟုဿုတဓာရီ ဣစ္စာဒိ.

သာဓုကရဏံ သာဓုကာရော၊ သော အဿ အတ္ထီတိ သာဓုကာရီတိ ဃဏန္တာ ဤ.