၁၅၉. ကွိဿ

ကြိယတ္ထာ ပရဿ ကွိဿ လောပေါ ဟောတိ. သမ္ဘဝတီတိ သမ္ဘူ. ဧဝံ ဝိဘဝတီတိ ဝိဘူ၊ အဘိဘူ၊ သယမ္ဘူ. တထာ ဓု=ကမ္ပနေ၊ သန္ဓုနာတီတိ သန္ဓု. ဝိဘာတီတိ ဝိဘာ. ပဘာတီတိ ပဘာ. သံဂမ္မ ဘာသန္တိ ဧတ္ထာတိ သဘာ၊ ‘‘ကွိမှိ လောပေါ+န္တဗျဉ္ဇနဿာ’’တိ အန္တဗျဉ္ဇနဿ လောပေါ. ဘုဇေန ဂစ္ဆတီတိ ဘုဇဂေါ. ဧဝံ ဥရဂေါ. တုရံ=သီဃံ ဂစ္ဆတီတိ တုရင်္ဂေါ. ခေန ဂစ္ဆတီတိ ခဂေါ. ဝိဟာယသေ ဂစ္ဆတီတိ ဝိဟဂေါ၊ တဒမိနာဒိပါဌာ ဝိဟာဒေသော. န ဂစ္ဆတီတိ နဂေါ. ဧဝံ အဂေါ၊ ‘‘နဂေါ ဝါ+ပ္ပါဏိနီ’’တိ ဝိကပ္ပေန နဉသမာသေ ဋာဒေသနိသေဓော. ဇန=ဇနနေ၊ ကမ္မတော ဇာတောတိ ကမ္မဇော၊ အမာဒိသမာသော၊ ကမ္မဇော ဝိပါကော၊ ကမ္မဇာ ပဋိသန္ဓိ၊ ကမ္မဇံ ရူပံ. ဧဝံ စိတ္တဇံ၊ ဥတုဇံ၊ အာဟာရဇံ. အတ္တဇော ပုတ္တော၊ ဝါရိမှိ ဇာတော ဝါရိဇော. ဧဝံ ထလဇော. ပင်္ကဇံ. ဇလဇံ. အဏ္ဍဇံ. သရသိဇံ၊ ဥပပဒသမာသေ ဗဟုလံဝိဓာနာ ဝိဘတျလောပေ ‘‘မနာဒီဟီ’’တိအာဒိနာ သိအာဒေသော. ဒွိက္ခတ္တုံ ဇာတော ဒွိဇော၊ ‘‘တဒမိနာ’’ ဒိနာ က္ခတ္တုံလောပေါ. ပစ္ဆာ ဇာတော အနုဇော. သဉ္ဇာနာတီတိ သညာ. ပဇာနာတီတိ ပညာ. ဧဝံ ပတိဋ္ဌာတီတိ ပတိဋ္ဌာ. ဈာ=စိန္တာယံ၊ ပရသမ္ပတ္တိံ အဘိဇ္ဈာယတီတိ အဘိဇ္ဈာ. ဟိတေသိတံ ဥပဋ္ဌာပေတွာ ဈာယတီတိ ဥပဇ္ဈာ. သော ဧဝ ဥပဇ္ဈာယော၊ ‘‘သကတ္ထေ’’တိ ယော. သမ္မာ ဈာယန္တိ ဧတ္ထာတိ သံဈာ. ကွိဒန္တာ ဓာတွတ္ထံ န ဇဟန္တိ၊ လိင်္ဂတ္ထံ ပဋိပါဒယန္တိ.