၄၁. ကွစဏ

ကမ္မတော ပရာ ကြိယတ္ထာ ကွစိ အဏ ဟောတိ ကတ္တရိ. ကုမ္ဘံ ကရောတီတိ ကုမ္ဘကာရော၊ အမာဒိသမာသော. ဣတ္ထိယံ ကုမ္ဘကာရီ. ဧဝံ ကမ္မကာရော၊ မာသာကာရော၊ ကဋ္ဌကာရော၊ ရထကာရော သုဝဏ္ဏကာရော၊ သုတ္တကာရော၊ ဝုတ္တိကာရော၊ ဋီကာကာရော. သရံ လုနာတီတိ သရလာဝေါတိ ဩ+အဝါဒေသာ. မန္တေ အဇ္ဈာယတီတိ မန္ထဇ္ဈာယော၊ ဣ=အဇ္ဈေနဂတီသု၊ အဓိပုဗ္ဗော၊ ဧ+အယာဒေသာ၊ အဓိနော ဣဿ ယကာရ+စဝဂ္ဂါဒယော စ.

ဗဟုလာဓိကာရာ ဣဟ န ဟောတိ ‘‘အာဒိစ္စံ ပဿတိ၊ ဟိမဝန္တံ သုဏောတိ၊ ဂါမံ ဂစ္ဆတိ’’. ကွစီတိ ကိံ၊ ကမ္မကရော၊ ဧတ္ထ အပစ္စယော.