၅၇. ဟိမိမေသွ+ဿ

အကာရဿ ဒီဃော ဟောတိ ဟိမိမေသု. အဟံ ဘဝါမိ. ဗဟုဝစနံ မပစ္စယော၊ မယံ ဘဝါမ. ဧဝံ ပရစ္ဆေက္ကေပိ-ဘဝတေ၊ ဘဝန္တေ. ဘဝသေ၊ ဘဝဝှေ. ဘဝေ၊ ဘဝမှေ. ကေစိ ဒီဃံ ကတွာ ပဌန္တိ၊ ‘‘ဗျဉ္ဇနေ ဒီဃရဿာ’’တိ ဒီဃော၊ ဘဝါမှေ.

ဧတ္ထ စ –

လဇ္ဇာ သတ္တာ ဌိတိ ဇာဂရဏံ၊

ဝုဒ္ဓိ က္ခယ ဇီဝိတ မရဏံ၊

ကီဠာ ရုစိ ရောစတေ ဣတျေဝံ၊

ဝုတ္တာ အကမ္မကဓာတု သဗ္ဗေ.

–တိ ဝုတ္တတ္တာ ကမ္မံ ဒုတိယာ န.

ပစ=ပါကေ၊ အကာရော ဥစ္စာရဏတ္ထော၊ ဧဝ+မုပရိပိ. ပစ ဣတိ ဌိတေ လဝိကရဏံ၊ ဝိကရဏလောပါဒိ ပုရိမသမံ. သော ဩဒနံ ပစတိ၊ တေ ပစန္တိ. တွံ ပစသိ၊ တုမှေ ပစထ. အဟံ ပစာမိ၊ မယံ ပစာမ. ပရစ္ဆက္ကေ-ပစတေ၊ ပစန္တေ. ပစသေ၊ ပစဝှေ. ပစေ၊ ပစာမှေ.