၂၆. လဘ ဝသ+စ္ဆိဒ ဘိဒ ရုဒါနံ စ္ဆင

လဘာဒီနံ စ္ဆင ဟောတိ ဿေန သဟ. လစ္ဆတိ လဘိဿတိ၊ လစ္ဆန္တိ လဘိဿန္တိ ဣစ္စာဒိ. ကြိယာတိပတ္တိယံ ဿာဘာဂဿ စ္ဆငါဒေသေ အလစ္ဆာ အလဘိဿ ဣစ္စာဒိ. ဝသ=နိဝါသေ၊ ဝစ္ဆတိ ဝသိဿတိ. ကမ္မေ-ဗဟုလာဓိကာရာ ‘‘အဿူ’’တိ ဥကာရော၊ ပုဗ္ဗရူပေ ဝုဿတိ ဝုဿိဿတိ ဣစ္စာဒိ. တထာ အဝစ္ဆာ အဝသိဿာ. ဆိဒ=ဒွေဓာကရဏေ၊ ဆေစ္ဆတိ ဆိန္ဒိဿတိ၊ ‘‘မဉ္စ ရုဓာဒီနံ’’တိ မံ လော စ. လဿ လောပေါ စ. ဘိဒ=ဝိဒါရဏေ၊ ဘေစ္ဆတိ ဘိန္ဒိဿတိ. အဘေစ္ဆာ အဘိန္ဒိဿာ. ရုဒ=ရောဒနေ၊ ရုစ္ဆတိ ရောဒိဿတိ. အရုစ္ဆာ အရောဒိဿာ ဣစ္စာဒိ.

အညပစ္စယေပိ ဆိဒဿ ‘‘စ္ဆင’’ ဣတိ ယောဂဝိဘာဂါ စ္ဆင၊ ဘူတေ ဦံ ပစ္စယေ အစ္ဆေစ္ဆုံ အစ္ဆိန္ဒိံသု. ဝုတ္တတော အညဓာတူနဉ္စ၊ ဂမ=ဂမနေ၊ ဂစ္ဆံ ဂစ္ဆိဿံ. အညပစ္စယေပိ ဝစ=ဗျတ္တဝစနေ ဣစ္စာဒိ၊ ကမ္မေ-ဗဟုလာဓိကာရာ တျာဒီသု ပရဘူတေသုပိ ယထာဂမံ ဝစာဒီနဉ္စဿ ‘‘ဝစာဒီနံ ဝဿုဋ ဝါ’’တိ ကမ္မေ ဥဋ စ ‘‘အဿူ’’တိ အဿ ဥ စ၊ တေန ဓမ္မော ဥစ္စတိ ဝုစ္စတိ၊ ဝုစ္စန္တိ ဣစ္စာဒိ၊ ယဿ စ ပုဗ္ဗရူပံ.