၂၉. ဂမိဿာ

အာအာဒေါ ဤအာဒေါ စ ဂမိဿ အာ ဟောတိ ဝါ. သော အဂါ အဂမိ ဂမိ အဂမိတ္ထော ဂမိတ္ထော အဂမတ္ထော ဂမတ္ထော. ဤပစ္စယေ လဿာကာရဿ ‘‘ဟိမိမေသွ+ဿာ’’တိ ဧတ္ထ ‘‘အဿာ’’တိ ယောဂဝိဘာဂါ ဒီဃေ ‘‘ဒီဃာ ဤဿာ’’တိ ဤဿ သိအာဒေသော၊ အဂမာသိ အဂမိ ဂမိ အဂမီ ဂမီ၊ အဂမိံသု ဂမိံသု အဂမံသု ဂမံသု အဂမုံ ဂမုံ. ဩဿ အအာဒေသေ အဇ္ဈဂုံ. တွံ အဇ္ဈဂါ ပရဿ လောပေါ. တုမှေ အဇ္ဈဂုတ္ထ. အဟံ အဇ္ဈဂံ၊ မယံ အဇ္ဈဂမှ. ပရစ္ဆက္ကေ – ‘‘ဧယျာထာ’’ဒိနာ တ္ထေ သော အဂစ္ဆိတ္ထ ဂစ္ဆိတ္ထ အဂဉ္ဆိတ္ထ ဂဉ္ဆိတ္ထ အဂမိတ္ထ ဂမိတ္ထ အဂမ ဂမ အဂမာ ဂမာ. တေ အဂမူ ဂမူ၊ ဩဿ အာအာဒေသေ အဇ္ဈဂုံ. တွံ အဂမိသေ ဂမိသေ. တုမှေ အဂမိဝှံ. ‘‘ဧယျာထာ’’ ဒိနာ အ+မာဒေသေ အဟံ အဂမံ ဂမံ အဇ္ဈဂံ. မယံ အဂမိမှေ ဂမိမှေ. ကမ္မေအဂစ္ဆီယိ အဂမီယိ၊ အဂစ္ဆိယုံ အဂမိယုံ ဣစ္စာဒိ. တထာ အဃမ္မီ ဃမ္မီ ဣစ္စာဒိ.