၅၊၁၇. ကျော ဘာဝကမ္မေသွ+ပရောက္ခေသု မာန+န္တ+တျာဒီသု

ဘာဝကမ္မဝိဟိတေသု ပရောက္ခာဝဇ္ဇိတေသု မာန+န္တ+တျာဒီသု ပရေသု ကျော ဟောတိ ကြိယတ္ထာ. ကကာရော+နုဗန္ဓကာရိယတ္ထော. ‘‘န တေ ကာနုဗန္ဓ+နာဂမေသူ’’တိ ပဋိသေဓာ ဩကာရာဘာဝေါ. အနုဘူယတိ သုခံ ဒေဝဒတ္တေန.

ဧတ္ထ စ –

အာချာတေန အဝုတ္တတ္တာ၊ ကတ္တုတော တတိယာ န တု၊

ဒုတိယာ ဟောတိ ကမ္မဿ၊ ဝုတ္တတ္တာ ပဌမာပိ+ဓ.

အနုဘူယန္တိ သမ္ပတ္တိယော တယာ. အနုဘူယသိ တွံ ဒေဝဒတ္တေန. အနုဘူယထ တုမှေ. အဟံ အနုဘူယာမိ၊ တယာ မယံ အနုဘူယာမ. ဒွိတ္တေ အနုဘုယျတိ+စ္စာဒိ. ဧဝံ ပရစ္ဆက္ကေ.

ဘာဝေ အဒဗ္ဗဝုတ္တိနော ဘာဝဿ ဧကတ္တာ ဧကဝစနမေဝ. တဉ္စ ပဌမပုရိသေကဝစနေယေဝ သမ္ဘဝတိ၊ နေဝ+ညံ၊ ဗဟုလံဝိဓာနာ. ဘူယတိ ဘူယတေ ဒေဝဒတ္တေန၊ သမ္ပတိ ဘဝနန္တျတ္ထော.

ပစဓာတုတော ကမ္မေ ကျော.