၇၄. ဂရုပုဗ္ဗာ ရဿာ ရေ+န္တေန္တီနံ

ဂရုပုဗ္ဗသ္မာ ရဿာ န္တေ+န္တီနံ ရေ ဝါ ဟောတိ.

အက္ခရနိယမော ဆန္ဒံ၊

ဂရုလဟုနိယမော ဘဝေ ဝုတ္တိ၊

ဒီဃော သံယောဂါဒိပုဗ္ဗော၊

ရဿော ဂရု လဟု တု ရဿော.

ဂစ္ဆရေ ဂစ္ဆန္တိ. တွံ ဂစ္ဆသိ၊ တုမှေ ဂစ္ဆထ. အဟံ ဂစ္ဆာမိ၊ မယံ ဂစ္ဆာမ. စ္ဆာဒေသာဘာဝပက္ခေ ‘‘ဦ လဿေ’’တိ ဧကာရေ ဂမေတိ. ပရလောပေ ဂမေန္တိ. ဂမေသိ၊ ဂမေထ. ဂမေမိ၊ ဂမေမ. ပရစ္ဆက္ကေပိ သော ဂစ္ဆတေ၊ ဂစ္ဆရေ ဂစ္ဆန္တေ. ဂစ္ဆသေ၊ ဂစ္ဆဝှေ. ဂစ္ဆေ၊ ဂစ္ဆာမှေ.

ပုရေ အဓမ္မော ဒိဗ္ဗတိ၊ ပုရာ မရာမီတိ စ တံသမီပေ တဗ္ဗောဟာရူပစာရေန ဝတ္တမာနဝစနံ. ဝုတ္တဉှိ –

အာရဒ္ဓါ+နိဋ္ဌိတံ ကိစ္စံ၊ ဝတ္တမာနန္တိ ဝုစ္စတိ၊

ဝတ္တမာနသမီပဉ္စ၊ ဝတ္တမာနန္တိ ဝုစ္စတိ.

ကိမိဝ တေ –

ဂင်္ဂါစ တံသမီပဉ္စ၊ ယတော ဂင်္ဂါတိ ဉာယတေ၊

ဂင်္ဂါယံ ပါတု+မာဂစ္ဆ၊ ဃောသော ဂင်္ဂါယ+မိတျပိ.

မုချာ+မုချတ္ထဘေဒေန၊ ဝတ္တမာနံ တတော ဒွိဓာ၊

မုချဉှိ ရုဠှိ+မာပန္နံ၊ တ+ဒါရောပါ အမုချတာတိ.

ပုရေ+ပုရာသဒ္ဒေဟိ ဝါ အနာဂတတာ ဂမျတေ၊ တဒါ တဿ ဝတ္တမာနတ္တာ. ကာလဗျတ္တယော ဝါ ဧသော၊ ဘဝန္တျေဝ ဟိ ကာလန္တရေပိ တျာဒယော ဗာဟုလကာ ‘‘သန္တေသု ပရိဂူဟာမိ’’ ‘‘ကာယဿ ဘေဒါ အဘိသမ္ပရာယံ၊ သဟဗျတံ ဂစ္ဆတိ ဝါသဝဿ’’ ‘‘အတိဝေလံ နမဿိဿံ’’တိ. ‘‘ကုတော နု တွံ အာဂစ္ဆသိ၊ ရာဇဂဟတော အာဂစ္ဆာမီ’’တိအာဒီသု ပန ပစ္စုပ္ပန္နသမီပေ ဝတ္တမာနဝစနံ.