၇၈. ဇာယာယ ဇယံ ပတိမှိ
ပတိမှိ ပရေ ဇာယာယ ဇယံ ဟောတိ. ဇာယာ စ ပတိ စ ဇယမ္ပတယော. ဇာနိပတီတိ ပကတန္တရေန သိဒ္ဓံ၊ ဇာနိ စ ပတိ စ ဇာနိပတိ. ဧဝံ ဇမ္ပတိ ဒမ္ပတီတိ.
ကွစိ အပ္ပသရံ ပုဗ္ဗံ နိပတတိ၊ ယထာ-စန္ဒော စ သူရိယော စ စန္ဒသူရိယာ၊ နိဂမာ စ ဇနပဒါ စ နိဂမဇနပဒါ. ဧဝံ သုရာသုရဂရုဍမနုဇဘုဇဂဂန္ဓဗ္ဗာ.
ကွစိ ဣဝဏ္ဏု+ဝဏ္ဏန္တာနံ ပုဗ္ဗနိပါတော၊ ယထာ-အဂ္ဂိဓုမာ၊ ဂတိဗုဒ္ဓိဘုဇပဌဟရကရသယာ၊ ဓာတုလိင်္ဂါနိ.
ကွစိ သရာဒိအကာရန္တံ ပုဗ္ဗံ နိပတတိ၊ ယထာ-အတ္ထဓမ္မာ၊ အတ္ထသဒ္ဒါ၊ သဒ္ဒတ္ထာ ဝါ.
အညမညသာပေက္ခာနမေဝ တိရောဟိတာဝယဝဘေဒေါ သမုဒါယပဓာနော သမာဟာရော၊ ယထာ-ဆတ္တဉ္စ ဥပါဟနာ စ ဆတ္တုပါဟနံ.