၁၀၉. ပုရိသေ ဝါတိ

ကုဿ ကာ ဝါ. ကုစ္ဆိတော ပုရိသော ကာပုရိသော၊ ကုပုရိသော ဝါ. ပကဋ္ဌော နာယကော ပနာယကော၊ ပဓာနံ ဝစနံ ပါဝစနံ ဘုသံ ဝဒ္ဓံ ပဝဒ္ဓံ သရီရံ၊ သမံ သမ္မာ ဝါ အာဓာနံ သမာဓာနံ၊ ဝိဝိဓာ မတိ ဝိမတိ၊ ဝိဝိဓော ဝိသိဋ္ဌော ဝါ ကပ္ပေါ ဝိကပ္ပေါ၊ အဓိကော ဒေဝေါ အတိဒေဝေါ၊ ဧဝံ အဓိဒေဝေါ၊ အဓိသီလံ. သုန္ဒရော ဂန္ဓော သုဂန္ဓော၊ ကစ္ဆိတော ဂန္ဓော ဒုဂ္ဂန္ဓော၊ သုဋ္ဌု ကတံ သုကတံ၊ ဒုဋ္ဌု ကတံ ဒုက္ကတံ အဘိ သိဉ္စနံ အဘိသေကောတိ သနန္တော၊ အတိသယေန ကတွာ၊ ကတံ ပကရိတွာ၊ ပကတံ၊ အတိသယေန ထုတံ အတိတ္ထုတံ၊ အတိက္ကမ္မ ထုတံ အတိတ္ထုတံ၊ ဤသံ ကဠာရော အာကဠာရော၊ သုဋ္ဌု ဗဒ္ဓေါ အာဗဒ္ဓေါ.

ပါဒယော ဂတာဒျတ္ထေ ပဌမာယ

ပဂတော အာစရိယော ပါစရိယော၊ ဧဝံ ပန္တေဝါသီ.

အစ္စာဒယော ကန္တာဒျတ္ထေ ဒုတိယာယ

အတိက္ကန္တော မဉ္စံ အတိမဉ္စော. အတိမာလော၊ ‘‘ဃပဿ+န္တဿာ+ပ္ပဓာနဿာ’’တိ မာလာသဒ္ဒေ ဃဿ ရဿော. ဧဝ+မုပရိပိ ဃပါနံ ရဿော.

အဝါဒယော ကုဋ္ဌာဒျတ္ထေ တတိယာယ

အဝကုဋ္ဌံ ကောကိလာယ ဝနံ အဝကောကိလံ၊ အဝမယူရံ. အဝကုဋ္ဌန္တိ ပရိစ္စတ္တံ.

ပရိယာဒယော ဂိလာနာဒျတ္ထေ စတုတ္ထိယာ

ပရိဂိလာနော+ဇ္ဈေနာယ ပရိယဇ္ဈေနော.

နျာဒယော ကန္တာဒျတ္ထေ ပဉ္စမိယာ

နိက္ခန္တော ကောသမ္ဗိယာ နိက္ကောသမ္ဗိ. အသျာဒိဝိဓိမှီတိ ကိံ၊ ရုက္ခံ ပတိ ဝိဇ္ဇောတတေ.