၂၁. သံချာဒိ

ဧကတ္ထေ သမာဟာရေ သံချာဒိ နပုံသကလိင်္ဂံ ဘဝတိ. တယော လောကာ သမာဟဋာ=စိတ္တေန သမ္ပိဏ္ဍိတာ၊ တိဏ္ဏံ လောကာနံ သမာဟာရောတိ ဝါ ဝါကျေ ဝိသေသနသမာသေ ကတေ ဣမိနာ နပုံသကတ္တံ ဘဝတိ. သမာဟာရဿေ+ကတ္တာ ဧကဝစနမေဝ၊ တိလောကံ၊ ဘော တိလောက၊ တိလောကံ၊ တိလောကေန ဣစ္စာဒိ. ဧဝံ တယော ဒဏ္ဍာ တိဒဏ္ဍံ၊ တီဏိ မလာနိ သမာဟဋာနိ၊ တိဏ္ဏံ မလာနံ သမာဟာရောတိ ဝါ တိမလံ၊ တိလက္ခဏံ၊ စတုသစ္စံ၊ ပဉ္စသိက္ခာပဒံ၊ ဆဋ္ဌာယတနံ၊ သတ္တာဟံ၊ အဋ္ဌသီလံ၊ နဝလောကုတ္တရံ၊ ဒသသီလံ၊ သတယောဇနံ. ဒွေ ရတ္တိယော သမာဟဋာ ဒွိရတ္တံ.