၂၅. တာဒတ္ထျေ

တာဒတ္ထျေ စတုတ္ထီ သိယာ. တဒတ္ထဿ ဘာဝေ၊ တာဒတ္ထျံ၊ တသ္မိံ တဒတ္ထဘာဝေ ဇောတနီယေဝ စတုတ္ထီ သိယာ. တဒတ္ထဿ ဘာဝေါတိ နိမိတ္တနိမိတ္တီသမ္ဗန္ဓေ ဆဋ္ဌီ၊ တသ္မာ ဆဋ္ဌာပဝါဒေါ+ယံ. သမေပိ နိမိတ္တနိမိတ္တီနံ သမ္ဗန္ဓေ နိမိတ္တဘူတယူပတောဝ စတုတ္ထီ၊ နော နိမိတ္တီဘူတဒါရုတော. ယူပါယ ဒါရု၊ ပါကာယ ဝဇတိ၊ ဗုဒ္ဓဿတ္ထာယ ဇီဝိတံ ပရိစ္စဇာမိ၊ နေဝ ဒဝါယ၊ န မဒါယ၊ ဦနဿ ပါရိပူရိယာ၊ အတ္ထာယ ဟိတာယ သုခါယ သံဝတ္တတိ၊ လောကာနုကမ္ပာယ၊ ဖာသု ဝိဟာရာယ.

ဣစ္စာယံ ကစ္စာယနေ ဥပရိ ဝက္ခမာနဿ စတုတ္ထီတိ သာဓိတတ္တာ ဣဓ ဆဋ္ဌီတိ ဒီပနတ္ထံ ဝုစ္စတေ –

ကဿ သာဒု နရုစ္စတိ၊ မာ အယသ္မန္တာနမ္ပိ သံဃဘေဒေါ ရုစ္စိတ္ထ၊ ခမတိ သံဃဿ၊ ဘတ္တ+မဿ နစ္ဆာဒေတီတိ ဆဋ္ဌီ သမ္ဗန္ဓဝစနိစ္ဆာယံ၊ န စေ+ဝံ ဝိရောဓော သိယာ၊ သဒိသရူပတ္တာ၊ ဧဝံဝိဓေသု စ သမ္ဗန္ဓဿ သဒ္ဒိကာနုမတတ္တာ. တထာ ဟိ ဘာဂဝုတ္တိယာ ‘‘ဥပပဒဝိဘတ္တိ ဆဋ္ဌိယာ+ပဝါဒါ’’တိ ဝုတ္တံ၊ သဒ္ဒန္တရေ ဝိဟိတာ ဝိဘတ္တိ ဥပပဒဝိဘတ္တိ.

ကဿ ဝါ တွံ ဓမ္မံ ရောစေသီတိ အတ္ထမတ္တေ ပဌမာ၊ ကဿ ဝါ တုယှန္တိ အဝတွာ ကဿ ဝါ တွံ ဓမ္မံ ရောစေသီတိ အတ္ထမတ္တေ ပဌမာဝသေန ဗျဘိစာရဒဿနာ. ဧဝ+မညာပိ ဝိညေယျာ၊ ပရတောပိ ယထာဂမံ.

ရညော သတံ ဓာရေတိ ရညော ဆတ္တံ ဓာရေတီတိ သမ္ဗန္ဓေ ဆဋ္ဌီဝ. သိလာဃ=ကထနေ၊ ဧဝံ ရညော သိလာဃတေ ဣစ္စာဒိ၊ ထုတိံ ကရောတီတျတ္ထော. ဟနု=အပနယနေ၊ ရညော ဟနုတေ၊ ဝဉ္စေတီတျတ္ထော. ဥပတိဋ္ဌေယျ သကျပုတ္တာနံ ဝဍ္ဎကီ၊ ဥပဂစ္ဆေယျာတျတ္ထော. သပ=အက္ကောသေ၊ မယှံ သပတေ၊ သစ္စံ ကုရုတေတျတ္ထော. ဓရ=ဓာရဏေ၊ သုဝဏ္ဏံ တေ ဓာရယတေ၊ ဣဏံ တေ ဓာရယတိ၊ အဿ ရညော နာဂံ ဓာရယာမ. ပိဟ=ဣစ္ဆာယံ၊ ဒေဝါပိ တဿ ပိဟယန္တိ တာဒိနော၊ တေသံ ပိဟယန္တိ သမ္ဗုဒ္ဓါနံ သတီမတံ၊ ပိဟယန္တိ=ပတ္ထေန္တိ. တဿ ကုဇ္ဈ မဟာဝီရ၊ ယဒိ+ဟံ တဿ ပကုပ္ပေယျံ၊ ဒုဘယတိ ဒိသာနံ မေဃော၊ ယော မိတ္တာနံ န ဒူဘတိ၊ ယော အပ္ပဒုဋ္ဌဿ နရဿ ဒုဿတိ. ဣဿ=ဣဿာယံ၊ တိတ္ထိယာ ဣဿယန္တိ သမဏာနံ. ဥသူယ=ဒေါသာဝိကရဏေ၊ ဒုဇ္ဇနာ ဂုဏဝန္တာနံ ဥဿူယန္တိ၊ ကာ ဥသုယာ ဝိဇာနတံ. ဣဓ+သိဓ+ရာဓ+သာဓ=သံသိဒ္ဓိယံ၊ အာရာဓော မေ ရညော၊ ရညော ဘာဂျ+မာရဇ္ဈတိ၊ ကျာ+ဟံ အယျာနံ အပရဇ္ဈာမိ၊ အာယသ္မတော ဥပါလိတ္ထေရဿ ဥပသမ္ပဒါပေက္ခော ဥပတိဿော. ဘိက္ခူ ဘဂဝတော ပစ္စဿောသုံ၊ အာသုဏန္တိ ဗုဒ္ဓဿ ဘိက္ခူ၊ တဿ ဘိက္ခုနော ဇနောအနုဂိဏာတိ၊ ပတိဂိဏာတိ၊ သာဓုကာရဒါနာဒိနာ တံ ဥဿဟတီတျတ္ထော. အာရောစယာမိ ဝေါ ဘိက္ခဝေ၊ ပဋိဝေဒယာမိ ဝေါ၊ အာမန္တယာမိ တေ မဟာရာဇ၊ ဓမ္မံ တေ ဒေသိဿာမိ၊ ဒေသေတု ဘန္တေ ဘဂဝါ ဓမ္မံ ဘိက္ခူနံ၊ ယထာ နော ဘဂဝါ ဗျာကရေယျ၊ နိရုတ္တိံ တေ ပဝက္ခာမိ၊ အလံ မေ ရဇ္ဇံ၊ အလံ ဘိက္ခု ပတ္တဿ၊ အလံ မလ္လော မလ္လဿ၊ အရဟတိ မလ္လော မလ္လဿ၊ အလံ တေ ဣဓ ဝါသေန၊ ကိံ မေ ဧကေန တိဏ္ဏေနာတိ သဗ္ဗတ္ထ သမ္ဗန္ဓေ ဆဋ္ဌီ.

ဧဝံ အာယု ဘောတော ဟောတု၊ စိရံ ဇီဝိတံ၊ ဘဒ္ဒံ၊ ကလျာဏံ၊ အတ္ထံ၊ ပယောဇနံ၊ ကုသလံ၊ အနာမယံ၊ ဟိတံ၊ ပတ္ထံ၊ သုခံ၊ သာတံ၊ ဘောတော ဟောတု၊ သာဓု သမ္မုတိ မေ တဿ၊ ပုတ္တဿာ+ဝိကရေယျ ဂုယှ+မတ္ထံ၊ တဿ မေ သက္ကော ပါတုရဟောသိ၊ တဿ ပဟိဏေယျ၊ ဘိက္ခူနံ ဒူတံ ပါဟေသိ၊ ကပ္ပတိ သမဏာနံ အာယောဂေါ၊ ဧကဿ ဒွိန္နံ တိဏ္ဏံ ဝါ ပဟောတိ၊ ဥပမံ တေ ကရိဿာမိ၊ အဉ္ဇလိံတေ ပဂ္ဂဏှာမိ၊ တဿ ဖာသု၊ လောကဿ+တ္ထော၊ နမော တေ ပုရိသာဇည၊ သောတ္ထိ တဿ၊ သမတ္ထော မလ္လော မလ္လဿ၊ တဿ ဟိတံ၊ တဿ သုခံ၊ သွာဂတံ တေ မဟာရာဇာတိ သဗ္ဗတ္ထ သမ္ဗန္ဓေ ဆဋ္ဌီ.