၂၆. ပဉ္စမျ+ဝဓိသ္မာ

ပဒတ္ထာဝဓိသ္မာ ပဉ္စမီဝိဘတ္တိ ဟောတိ.

သမေပျ+ပဂမေ ဒွိန္နံ၊ ပုဗ္ဗရူပါ ယ+ဒစ္စုတံ၊

ဝုစ္စတေ တ+ဒပါဒါနံ၊ တံ စလာစလတော ဒွိဓာ၊

ယထာ+ဿာ ဓာဝတာ ပေါသော၊ ပတော၊ ရုက္ခာဖလန္တိ စ.

တတ္ထ စလာဝဓိ ဓာဝတာ အဿာ ပုရိသော ပတတိ၊ အစလာဝဓိ ပဗ္ဗတာ ဩတရန္တိ ဝနစာရကာတိ.

တဉ္စ အဝဓိ ဝိသယကြိယာဝိသေသဿ နိဒ္ဒိဋ္ဌတ္တာ နိဒ္ဒိဋ္ဌဝိသယံ၊ ယတ္ထ အပ အပဂမနကြိယံ ဥပါတ္တံ=အဇ္ဈာဟဋံ ဝိသယံ ကတွာ ပဝတ္တတိ၊ တံ ဥပါတ္တံ. ယံ ကေနစိ ဂုဏေန ဥက္ကံသိယတိ၊ တံ အနုမေယျံ. ယထာ ဂါမာ အပေန္တိ မုနယော၊ နဂရာ နိဂ္ဂတော ရာဇာ၊ ပါပါ စိတ္တံ နိဝါရေန္တိ. ဝလာဟကာ ဝိဇ္ဇောတတေ၊ ကုသုလတော ပစတီတိ. ဧတ္ထ စ ဝဠာဟကာ နိက္ခမ္မ၊ ကုသုလတော အပနေတွာတိ စ ပုဗ္ဗကြိယာ အဇ္ဈာဟရီယတိ. မထုရာ ပါဋလိပုတ္တကေဟိ အဘိရူပါတိ အနုမီယတိ. ဝုတ္တဉှိ –

နိဒ္ဒိဋ္ဌဝိသယံ ကိဉ္စိ၊ ဥပါတ္တဝိသယံ တထာ၊

အနုမေယျဝိသယဉ္စေတိ၊ တိဓာ+ဟု အဝဓိံ ဗုဓာတိ.

ဘယဟေတုမှိ-စောရာ ဘယံ ဇာယတိ၊ တဏှာယ ဇာယတိ ဘယံ၊ ပါပတော ဥတ္တသတိ၊ နတ္ထိ သောကော ကုတော ဘယံ. အက္ခာတရိ-ဥပဇ္ဈာယာ သိက္ခံ ဂဏှာတိ၊ အာစရိယမှာ အဓီတော သုဏာတိ ဝါ. ဗုဒ္ဓသ္မာ ပရာဇေန္တိ အညတိတ္ထိယာ၊ ပရာဇိတာ ဘဝန္တီတျတ္ထော. ဟိမဝတာ ပဘဝတိ ဂင်္ဂါ၊ အစိရဝတိယာ ပဘဝန္တိ ကုန္နဒိယော. ဥရသ္မာ ဇာတော ပုတ္တော၊ ကမ္မတော ဇာတံ ဣန္ဒြိယံ၊ ဥပဇ္ဈာယာ အန္တရဓာယတိ သိဿော၊ မာတာပိတူဟိ အန္တရဓာရယတိ ပုတ္တော၊ နိလီယတီတျတ္ထော. ဒူရတ္ထယောဂေကီဝဒူရော ဣတော နဠကာရဂါမော၊ တတော ဟဝေ ဒူရတရံ ဝဒန္တိ၊ ဂါမတော နာတိဒူရေ၊ အာရကာ တေ မောဃပုရိသာ ဣမသ္မာ ဓမ္မဝိနယာ၊ အာရကာ တေဟိ ဘဂဝါ ဒူရတောဝ နမဿန္တိ၊ အဒ္ဒသ ဒူရတောဝ အာဂစ္ဆန္တံ. အန္တိကတ္ထယောဂေ-အန္တိကံ ဂါမာ၊ အာသန္နံ ဂါမာ၊ သမီပံ ဂါမာ. ပရိမာဏေ-ဣတော မထုရာယ စတူသု ယောဇနေသု သံကဿံ၊ ရာဇဂဟတော ပဉ္စစတ္တာလီသယောဇနမတ္ထကေ သာဝတ္ထိ. ကာလပရိမာဏေ-ဣတော ဧကနဝုတိကပ္ပမတ္ထကေ၊ ဣတော ဝဿသတသဟဿဿ အစ္စယေန ဗုဒ္ဓေါ လောကေ ဥပ္ပဇ္ဇိဿတိ. ပါသာဒါ သံကမေယျ၊ ပါသာဒံ အဘိရုဟိတွာ သံကမေယျာတိ အတ္ထော၊ တထာ ဟတ္ထိက္ခန္ဓာ သံကမေယျ၊ အဘိဓမ္မာ ပုစ္ဆန္တိ၊ အဘိဓမ္မံ သုတွာတိ အတ္ထော၊ အာသနာ ဝုဋ္ဌဟေယျ. ဒိသတ္ထဝါစီဟိ ယောဂေ-ဣတော သာ ပုရိမာ ဒိသာ၊ ဣတော သာ ဒက္ခိဏာ ဒိသာ၊ အဝီစိတော ယာဝ ဘဝဂ္ဂံ၊ ဥဒ္ဓံ ပါဒတလာ၊ အဓော ကေသမတ္ထကာ. ဝိဘဇနေ-ယတော ပဏီတတရော ဝါ ဝိသိဋ္ဌတရော ဝါ နတ္ထိ၊ အတ္တဒန္တော တတော ဝရံ၊ ကိဉ္စာပိ ဒါနတော သီလံ ဝရံ၊ တတော မယာ ဗဟုတရံ သုတံ၊ သီလမေဝ သုတာ သေယျော. အာရတိပ္ပယောဂေ-အာရတိ ဝိရတိ ပါပါ၊ ပါဏာတိပါတာ ဝေရမဏိ၊ အဒိန္နာဒါနာ ပဋိဝိရတော၊ အပ္ပဋိဝိရတာ မုသာဝါဒါ. သုဒ္ဓတ္ထယောဂေ-လောဘနီယေဟိ ဓမ္မေဟိ သုဒ္ဓေါ၊ မာတုတော စ ပိတုတော စ သုဒ္ဓေါ အနုပက္ကုဋ္ဌော. ပမောစနတ္ထယောဂေ-ပရိမုတ္တော ဒုက္ခသ္မာတိ ဝဒါမိ၊ မုတ္တော+သ္မိ မာရဗန္ဓနာ၊ န တေ မုစ္စန္တိ မစ္စုနာ၊ မုတ္တော+ဟံ+သဗ္ဗပါသေဟိ. ဝိဝေစနေ-ဝိဝိစ္စေဝ ကာမေဟိ၊ ဝိဝိစ္စ အကုသလေဟိ ဓမ္မေဟိ. ပမာဏတ္ထေ-အာယာမတော စ ဝိတ္ထာရတော စ ယောဇနံ၊ ဂမ္ဘီရတော စ ပုထုလတော စ ယောဇနံ စန္ဒဘာဂါယ ပရိမာဏံ၊ ပရိက္ခေပတော နဝယောဇနသတပရိမာဏော မဇ္ဈိမဒေသော. ပုဗ္ဗာဒိယောဂေ-ပုဗ္ဗေဝ မေ ဘိက္ခဝေ သမ္ဗောဓာ၊ ဣတော ပုဗ္ဗေ နာဟောသိ၊ တတော ပရံ ပစ္စန္တိမာ ဇနပဒါ၊ တတော အပရေန သမယေန. ပဉှေ-ကုတော+သိ တွံ၊ ကုတော ဘဝံ၊ ပါဋလိပုတ္တတော. ကိစ္ဆာ လဒ္ဓန္တိ ဂုဏေ ပဉ္စမီ၊ ကိစ္ဆေန မေ အဓိဂတန္တိ ဟေတုမှိ ကရဏေ ဝါ တတိယာ၊ ဧဝံ ထောကာ မုတ္တော၊ ထောကေန မုတ္တောတိ.

ကထံ ‘‘ထောကံ စလတီ’’တိ၊ ကြိယာဝိသေသနေ ကမ္မနိ ဒုတိယာ၊ ထောကံ စလနံ ကရောတီတျတ္ထော၊ ထောကန္တိ စလနကြိယာယ ဝိသေသနတ္တာ ကြိယာဝိသေသနံ.

ကြိယာဝိသေသနံ နာမ၊ ကမ္မတ္တေ+ကတ္တသဏ္ဌိတာ၊

နျာယသိဒ္ဓံ ယတော တသ္မာ၊ တဒတ္ထံ န ဝိသုံ ဝိဓိ.

နျာယသိဒ္ဓံဝ=စလနန္တိ ယသ္မာ ဘာဝေ အနော၊ တသ္မာ ဘာဝဿေ+ကတ္တာ ဧကဝစနန္တိ ဉာယာ ဧကတ္တဉ္စ၊ ဘာဝေ အနတ္တာ နပုံသကတ္တဉ္စ၊ ကရောတိကြိယာယ သမ္ဗန္ဓေန ကမ္မတ္တဉ္စ သိဇ္ဈတီတိ. ကရ+ဘူဓာတဝေါ စ –

ကာရိယရူပါဘိဓာတွတ္ထာ၊ သဗ္ဗေ သတ္တာယ ယုဇ္ဇရေ၊

တတော ကြိယာ စ ဘာဝေါ စ၊ သာမညံ တေသု ဂမျတေ –

တိ ဝုတ္တတ္တာ ယုဇ္ဇန္တိ.

ထောကတ္ထေ-ထောကာ မုစ္စတိ. သဗ္ဗတ္ထ သဝိသယေ ပဉ္စမီ. ဧတ္ထ ‘‘ဝိဝက္ခာ လောကိကာ သာ စ၊ န သက္ကာ အနိဝတ္တိတုံ’’တိ ဝုတ္တတ္တာ အနိဋ္ဌပ္ပသင်္ဂေါ န သိယာ. မရိယာဒါယံ-အာပဗ္ဗတာ ခေတ္တံ. အဘိဝိဓိမှိ-အာဗြဟ္မလောကာ သဒ္ဒေါ အဗ္ဘုဂ္ဂစ္ဆတိ၊ ပဗ္ဗတံ ဝဇ္ဇေတွာ၊ ဗြဟ္မလောကမှိ ဗျာပေတွာတိ စ အတ္ထော. ဧတ္ထ ဝဇ္ဇမာနသီမာ မရိယာဒါ၊ ဂယှမာနသီမာ အဘိဝိဓိ.