၂၄. စတုတ္ထီ သမ္ပဒါနေ

အစေတနံ သစေတနံ ဝါ ပဋိဂ္ဂါဟကဘာဝေနာ+ပေက္ခိတံ၊ တံ သမ္ပဒါနံ၊ တဉ္စ ဒါ-ဒါနေတိ ဓာတုတော ဗျပ္ပေန ယုတ္တမေဝ၊ တတ္ထ စတုတ္ထီ ဟောတိ. တဉ္စ ဒီယမာနဿ ဝတ္ထုနော အနိဝါရဏ+ဇ္ဈေသနာ+နုမတိတော တိဝိဓော၊ ယထာ ဗုဒ္ဓဿ ပုပ္ဖံ ဒေတိ၊ ဗောဓိရုက္ခဿ ဇလံ ဒေတိ၊ ယာစကဿ ဓနံ ဒေတိ၊ ဘိက္ခူနံ ဒါနံ ဒေတိ.

အနိရာကရဏာ+ရာဓ-န+ဗ္ဘနုညဝသေန ဟိ၊

သမ္ပဒါနံ တိဓာ ဝုတ္တံ၊ ရုက္ခ+ယာစက+ဘိက္ခဝေါ.

အာဓာရဝိဝက္ခာယံ သတ္တမီပိ၊ သံဃေ ဂေါတမိ ဒေဟိ၊ သံဃေ ဒိန္နေ အဟဉ္စေဝ ပူဇိတော ဘဝိဿာမိ၊ ယာ ပလာလမယံ မာလံ၊ နာရီ ဒတွာန စေတိယေတိ.