၈၈. ယောလောပ+နိသု ဒီဃော

ယောနံ လောပေနိသု စ ဒီဃော ဟောတိ. မုနိ. မုနယောတိ ဧတ္ထ ယောလောပေါ ကိမတ္ထံ န ဟောတိ၊ အက္ကေန ဈတ္တဿ နာသိတတ္တာ. ကိန္တိ ပဌမံ န ဟောတိ၊ အန္တရင်္ဂတ္တာ ဈတ္တဿ. ဘော မုနိ မုနီ၊ မုနယော မုနီ. မုနိံ၊ မုနယော မုနီ. မုနိနာ၊ မုနီဟိ မုနီဘိ. ‘‘ယောလောပနိသု’’ ‘‘ဝီမန္တုဝန္တူန’’ မိစ္စာဒိဉာပကာ ဣကာရုကာရာနံ သုနံဟိသု ဒီဃဿာ+နိစ္စတ္တာ မုနိဟိ မုနိနံ မုနိသု ဣတိပိ ဟောတိ. ‘‘ဈလာ သဿ နော’’တိ နော၊ မုနိနော မုနိဿ၊ မုနီနံ. ‘‘နာသ္မာဿာ’’တိ နာ၊ မုနိနာ မုနိမှာ မုနိသ္မာ. မုနိမှိ မုနိသ္မိံ၊ မုနီသု. ‘‘ဣတော ကွစိ သဿ ဋာနုဗန္ဓော’’ (ဂဏသုတ္တ)တိ ဗြဟ္မာဒီသု ပါဌာ ‘‘ယော စ သိဿော မဟာမုနေ’’တိ ဧတ္ထ ‘‘ဃ+ဗြဟ္မာဒိတေ’’တိ သဿ ဧဋ.

ဧဝံ –

ဇောတိ ပါဏိ ဂဏ္ဌိ မုဋ္ဌိ၊ ကုစ္ဆိ ဝတ္ထိ သာလိ ဝီဟိ၊

ဗျာဓိ ဩဓိ ဗောဓိ သန္ဓိ၊ ရာသိ ကေသိ သာတိ ဒီပိ.

ဣသိ ဂိနိ မဏိ ဓနိ၊ ဂိရိ ရဝိ ကဝိ ကပိ၊

အသိ မသိ နိဓိ ဝိဓိ၊ အဟိ ကိမိ ပတိ ဟရိ.

အရိ တိမိ ကလိ ဗလိ၊ ဇလဓိ စ ဂဟပတိ၊

ဥရမိတိ ဝရမတိ၊ နိရုပဓိ အဓိပတိ၊

အဉ္ဇလိ သာရထိ အတိထိ၊ သမာဓိ ဥဒဓိပ္ပဘုတယော.

အဂ္ဂိ+ဣသီနံ အယံ ဝိသေသော –