၁၄၆. ဘဝတော ဝါ ဘောန္တောဂ+ယော+နာ+သေ

ဘဝန္တသဒ္ဒဿ ဘောန္တာဒေသော ဝါ ဟောတိ ဂ+ယော+နာ+သေ. န္တောအာဒေသော၊ ဘောန္တော ဘောန္တာ ဘဝန္တော ဘဝန္တာ. ဂေ ပန ဘော ဘောန္တ ဘောန္တာ ဘဝ ဘဝါ ဘဝံ၊ ဘောန္တော ဘောန္တာ ဘဝန္တော ဘဝန္တာ. ဘောန္တာဒေသပက္ခေ ဋ+ဋာ+အံအာဒေသာ ဗဟုလာဓိကာရာ န ဟောန္တိ. ဘဝံ ဘဝန္တံ၊ ဘောန္တေ ဘဝန္တေ. ဘောတာ ဘောန္တေန ဘဝတာ ဘဝန္တေန၊ ဘဝန္တေဟိ ဘဝန္တေဘိ. ဘောတော ဘောန္တဿ ဘဝတော ဘဝဿ ဘဝန္တဿ၊ ဘဝတံ ဘဝန္တာနံ. ဘဝတာ ဣစ္စာဒိ ဂစ္ဆန္တသမံ.

ဘောဣတိ အာမန္တဏေ နိပါတော၊ ‘‘ကုတော နု အာဂစ္ဆထ ဘော တယော ဇနာ’’တိ ဗဟုဝစနေပိ ဒဿနတော. ဧဝံ ဘန္တေတိ. ဘဒ္ဒေတိ ဘဒ္ဒသဒ္ဒန္တရေန သိဒ္ဓံ. ဘဒ္ဒန္တဣတိ ဒဿ ဒွိဘာဝေန.

သံ သန္တော၊ သန္တော သန္တာ. ဘော သ သာ သံ၊ သန္တော သန္တာ. သံ သန္တံ ‘‘သံယောဂါဒိလောပေါတိ နဿ လောပေ ‘‘ယံ ယဉှိ ရာဇ ဘဇတိ၊ သန္တံ ဝါ ယဒိ ဝါ အသံ’’၊ သန္တေ. သတာ သန္တေန.