၁၄၄. မနာဒီဟိ သ္မိံ+သံ+နာ+သ္မာနံ သိ+သော+ဩ+သာ+သာ

မနာဒီဟိ သ္မိ+မာဒီနံ သိ+သော+ဩ+သာ+သာ ဟောန္တိ ဝါ ယထာက္ကမံ. မနော၊ မနာ. ဘော မန မနာ၊ မနာ. မနော၊ မနံ၊ မနေ. မနသာ မနေန၊ မနေဟိ မနေဘိ. မနသော မနဿ၊ မနာနံ. မနသာ မနာ မနမှာ မနသ္မာ၊ မနေဟိ မနေဘိ. မနသိ မနမှိ မနသ္မိံ၊ မနေသု.

ဧဝံ ဝစော ပယော တေဇော၊

တပေါ စေတော တမော ယသော.

အယော ဝယော သိရော သရော၊

ဥရော+တျေ+တေ မနာဒယော.

ရူပသိဒ္ဓိယံ အဟ+ရဟသဒ္ဒါ မနာဒီသု ပဌိတာ. အဟဿ အာပါဒိတ္တာ ရဟောတိ နိပါတတ္တာ ရဟသီတိ ဝိဘတျန္တပဋိရူပကနိပါတတ္တာ ဣဓ န ဂဟိတာ.

ဂစ္ဆန္တ သိ၊ ‘‘သိဿ’’ ‘‘ဝေ’’တိ စ ဝတ္တတေ. ပရတော ဘိယျော နာနုဝတ္တယိဿာမ၊ ဝုတ္တိယာ ဧဝ အနုဝတ္တဿ ဂမျမာနတ္တာ.