၂၀၀. ကိ+မံသိသု သဟ နပုံသကေ

အံသိသု သဟ တေဟိ ကိံ သဒ္ဒဿ ကိံဟောတိ နပုံသကေ. ကာဒေသဿ သာမညတ္တာ ‘‘ဝိသေသဝိဟိတာ ဝိဓယော သာမညဝိဓယော နိသေဓေန္တီ’’တိ ဉာယာ ကိံအာဒေသေန ကာဒေသနိဝုတ္တိ. ကိံ၊ ကာနိ. ကိံ၊ ကေ ကာနိ. ကေနေ+စ္စာဒိ ပုဗ္ဗေဝ.

ဧကသဒ္ဒေါ သံချာ+တုလျ+ည+သဟာယဝစနော. ယဒါ သံချာဝစနော၊ တဒါ ဧကဝစနန္တော၊ အတြ ဧကသဒ္ဒေါ သံချေယျဝါပီ. အညတြ တုလျာဒီသု ဗဟုဝစနန္တောပိ. ဧကော၊ ဧကေ. ဧကာ၊ ဧကာ ဧကာယော. ဧကံ၊ ဧကာနိ+စ္စာဒိ သဗ္ဗသမံ တိလိင်္ဂေ.

တုလျေ ဧကော ဝိလာသော ဒွိန္နံ ကုမာရာနံ၊ ဧကေ ဝဏ္ဏသဒ္ဒါ ဒွိန္နံ ကုမာရာနံ. အညတ္ထေ ဧကော အာစရိယော ဧဝ+မာဟ၊ ဧကေ အာစရိယာ ဧဝ+မာဟံသု. အသဟာယတေ ဧကောဝ အရညံ ပဝိသိတွာ.

ဧကော၊ ဧကေ. ဧကာ၊ ဧကာ ဧကာယော. ဧကံ ဧကာနိ+စ္စာဒိ သဗ္ဗသမံ တိလိင်္ဂေ. ဿာ+ဿံသု ပန ‘‘ဿ’’မာဒိနာ ဣ၊ ဧကိဿာ ဧကာယ၊ ဧကိဿံ ဧကာယံ ဧကာယ.

ဣဓ အတ္တပရဂါရဝဝသေန ဧကဿာပိ ‘‘အမှာကံ ရညော’’တိပိ ‘‘ဧကေ အာစရိယာ’’တိပိ ဗဟုဝစနဿ လောကေန ဣစ္ဆိတတ္တာ ဗဟုလဝိဓာနာ ဗဟုဝစနေနေဝ သိဇ္ဈတိ.

တုမှ+အမှသဒ္ဒါ အလိင်္ဂါ၊ တထာ ဥဘ+ကတိ+ဒွိသဒ္ဒါ၊ ပဉ္စာဒယော အဋ္ဌာရသန္တာ စ. တုမှ သိ၊ အမှ သိ.