၁၀၃. ယံ

ဃပတော သ္မိနော ယံ ဝါ ဟောတိ. ကညာယံ ကညာယ. ‘‘ဃ+ ပတေ+ကသ္မိံ နာဒီနံ ယ+ယာ’’ ‘‘ယံ’’တိ စ ဣမေသံ အပဝါဒါဒီနံ ဝိသယေ မှိဿ ဥဿဂ္ဂတ္တာ ပဝတ္တိ နတ္ထီတိ သ္မိနော ဗဟုလာဓိကာရာ ‘‘သ္မာ+ဟိ+သ္မိန္န’’ မိစ္စာဒိနာ မှိကတေ ‘‘ဒသသဟဿိမှိ ဓာတုမှီ’’တိ သိဇ္ဈတိ. ကညာသု. ဧဝံ –

သဒ္ဓါ မေဓာ ပညာ ဝိဇ္ဇာ၊ စိန္တာ မန္တာ တဏှာ ဝီဏာ၊

ဣစ္ဆာ မုစ္ဆာ ဧဇာ မာယာ၊ မေတ္တာ မတ္တာ သိက္ခာ ဘိက္ခာ.

ဇင်္ဃာ ဂီဝါ ဇီဝှါ ဝါစာ၊ ဆာယာ အာသာ ဂင်္ဂါ နာဝါ၊

ဂါထာ သေနာ လေခါ သာလာ၊ မာလာ ဝေလာ ပူဇာ ခိဍ္ဍာ.

ပိပါသာ ဝေဒနာ သညာ၊ စေတနာ တသိနာ ပဇာ၊

ဒေဝတာ ဝဋ္ဋကာ ဂေါဓာ၊ ဗလာကာ ပရိသာ သဘာ.

ဦကာ သေဖာလိကာ လင်္ကာ၊ သလာကာ ဝါလုကာ သိခါ၊

ဝိသာခါ ဝိသိခါ သာခါ၊ ဝါစာ ဝဉ္ဈာ ဇဋာ ဃဋာ.

ဇေဋ္ဌာ သောဏ္ဍာ ဝိတဏ္ဍာ စ၊ ကရုဏာ ဝနိတာ လတာ၊

ကထာ နိဒ္ဒါ သုဓာ ရာဓာ၊ ဝါသနာ သိံသပါ ပပါ.

ပဘာ သီမာ ခမာ ဆာယာ၊ ခတ္တိယာ သက္ခရာ သုရာ၊

ဒေါလာ တုလာ သိလာ လိလာ၊ လာလေ+လာ မေခလာ ကလာ.

ဝဠဝါ+လမ္ဗုသာ မူသာ၊ မဉ္ဇုသာ သုလသာ ဒိသာ၊

နာသာ ဇုဏှာ ဂုဟာ ဤဟာ၊ လသိကာ ဝသုဓာဒယော.

‘‘န+မ္မာဒီဟီ’’တိ အမ္မာ+အန္နာ+အမ္ဗာဟိ ဂဿ ဧကာရာ+ဘာဝေ –