၁၁၉. အဘူ

နနု စ အဘဝနန္နာမ သဗ္ဗထာ အနုပ္ပတ္တိယာ ဝါ အဝတ္ထန္တရေန ဝါ၊ တထာ သတျဘူတသဒ္ဒေါ-နုပ္ပန္နမတ္တဝစနောပီတိ ကထမဘူတသဒ္ဒေါ-ဝတ္ထန္တရေ နာဘူတေ ဝုတ္တောစ္စာဟ- ‘အဘူတဿိ’စ္စာဒိ. ကထမဝတ္ထာဝ တသဒ္ဒေန ပရာမသီယတီတိ စေ အဘူတသဒ္ဒေါ ယဒျနုပ္ပန္နဝါစီ သိယာ၊ တဒါ တသဒ္ဒပ္ပ ယောဂေါယေဝ န သိယာ။ တသဒ္ဒေနာဘူတဿေဝ ဂဟဏတော၊ အဘူတဘာဝေစ္စာဒိနာ သုတ္တိတံ သိယာ၊ တေန တသဒ္ဒပ္ပယောဂသာမတ္ထိယာ အဝတ္ထာဝ တသဒ္ဒေန ပရာမသီယတိ၊ တပ္ပရာမဋ္ဌဉ္စာဝတ္ထန္တရမဘူတ သဒ္ဒေါ အပေက္ခတေ၊ တေနာဟ- ‘တဗ္ဘာဝေတိဝစနာ’ဣစ္စာဒိ. ဘဝနံ ဘာဝေါ တာယ အဝတ္ထန္တရေ ဘာဝေါ တဗ္ဘာဝေါ တသ္မိံ. တေနာဟ ‘အဘူတဿေ’စ္စာဒိ. ဘာဝေတိ ဝိသယသတ္တမီ၊ သံသတ္တမီ ဝါတိ အာဟ- ‘ဝိသယေ ဂမ္မမာနေ ဝါ’တိ. ကုဏ္ဍလတ္တေနာတိ ကုဏ္ဍလသဘာဝေန.