၂. ဒုတိယော ကဏ္ဍော (သျာဒိ)
၁. ဒွေ ဒွေ-ကာနေကေသု နာမသ္မာ သိ ယော၊ အံ ယော၊ နာ ဟိ၊ သ နံ၊ သ္မာ ဟိ၊ သ နံ၊ သ္မိံ သု.
ဧတေသံ ဒွေ ဒွေ ဟောန္တိ ဧကာနေကတ္ထေသု ဝတ္တမာနတော နာမသ္မာ. မုနိ မုနယော၊ မုနိံ မုနယော၊ မုနိနာ မုနီဟိ၊ မုနိဿ မုနီနံ၊ မုနိသ္မာ မုနီဟိ၊ မုနိဿ မုနီနံ၊ မုနိသ္မိံ မုနီသု၊ ဧဝံ ကုမာရီ ကုမာရိယော၊ ကညာ ကညာယောတိ. ဧတာနိ သတ္တ ဒုကာနိ သတ္တ ဝိဘတ္တိယော ဝိဘာဂေါ ဝိဘတီတိ ကတွာ၊ ဧတ္ထ သိအမိတီ-ကာရာ-ကာရာ ‘‘ကိမံ သိသု’’ ၂၊၂၀၀ တိ သံကေတတ္ထာ.
၂. ကမ္မေ ဒုတိယာ.
ကရီယတိ ကတ္တု ကိရိယာယာ-ဘိသမ္ဗန္ဓီယတီတိ ကမ္မံ၊ တသ္မိံ ဒုတိယာဝိဘတ္တိ ဟောတံ. ကဋံ ကရောတိ၊ ဩဒနံ ပစတိ၊ အာဒိစ္စံ ပဿတိ.
‘ဩဒနော ပစ္စတီ’တိ ဩဒနသဒ္ဒတော ကမ္မတာ နပ္ပတီယတေ၊ ကိဉ္စရဟိ? အာချာတတော. ‘ကဋံ ကရောတိ ဝိပုလံ ဒဿနီယ’န္တိ အတ္ထေဝ ဂုဏယုတ္တဿ ကမ္မတာ၊ ဣစ္ဆိတေပိ ကမ္မတ္တာဝ ဒုတိယာ သိဒ္ဓါ ဂါဝုံ ပယော ဒေါဟတိ၊ ဂေါမန္တံ ဂါဝံ ယာစတိ၊ ဂါဝမဝရုန္ဓတိ ဝဇံ၊ မာဏဝကံ မဂ္ဂံ ပုစ္ဆတိ၊ ဂေါမန္တံ ဂါဝံ ဘိက္ခတေ၊ ရုက္ခမဝစိနာတိ ဖလာနိ၊ သိဿံ ဓမ္မံ ဗြူတေ၊ သိဿံ ဓမ္မမနုသာသတီတိ. ဧဝံ အနိစ္ဆိတေပိ အဟိံ လင်္ဃယတိ၊ ဝိသံ ဘက္ခေတိ. ယံနေဝိစ္ဆိတံ နာပိ အနိစ္ဆိတံ၊ တတ္ထာပိ ဒုတိယာ သိဒ္ဓါ. ဂါမံ ဂစ္ဆန္တော ရုက္ခမူလမုပသပ္ပတိ.
ပထဝိံ အဓိသေဿတိ၊ ဂါမမဓိတိဋ္ဌတိ၊ ရုက္ခမဇ္ဈာသတေတိအဓိသီဌာသာနံပယောဂေ-ဓိကရဏေ ကမ္မဝစနိစ္ဆာ၊ ဝတ္တိစ္ဆာတော ဟိ ကာရကာနိ ဟောန္တိ. တံ ယထာ-ဝလာဟကာ ဝိဇ္ဇောတတေ၊ ဝလာဟကဿ ဝိဇ္ဇောတတေ၊ ဝလာဟကော ဝိဇ္ဇောတတေ၊ ဝလာဟကေ ဝိဇ္ဇောတတေ၊ ဝလာဟကေန ဝိဇ္ဇောတတေတိ. ဧဝမဘိနိဝိသဿ ဝါ ဓမ္မမဘိနိဝိသတေ ဓမ္မေ ဝါ.
တထာ ဥပနွဇ္ဈာဝသဿာဘောဇန နိဝုတ္တိဝစနဿ ဂါမမုပဝသတိ၊ ဂ၊ မမနုဝသတိ၊ ပဗ္ဗတမဓိဝသတိ၊ ဃရမာဝသတိ. အဘောဇနနိဝုတ္တိ ဝစနဿာတိ ကိံ? ဂါမေ ဥပဝသတိ၊ ဘောဇနနိဝုတ္တိံ ကရောတီတိ အတ္ထော. တပ္ပါနာစာရေပိ ကမ္မတ္တာဝ ဒုတိယာ သိယာ နဒိမ္ပိဝတိ၊ ဂါမံ စရတိ၊ ဧဝံ ‘သစေ မံ အာလပိဿတီ’တိအာဒီသုပိ. ဝိဟိတာဝ ပတိဓယောဂေ ဒုတိယာ – ‘ပဋိဘန္တု တံ စုန္ဒ ဗောဇ္ဈင်္ဂါ’တိ. တံ ပတိ ဗောဇ္ဈင်္ဂါ ဘာသန္တူတိ အတ္ထော၊ ယဒါတု ဓာတုနာယုတ္တော ပတိ၊ တဒါ တေနာ-ယောဂါ သမ္ဗန္ဓေ ဆဋ္ဌီဝ ‘တဿ နပ္ပဋိဘာတီ’တိ. အက္ခေ ဒိဗ္ဗတိ၊ အက္ခေဟိ ဒိဗ္ဗတိ၊ အက္ခေသု ဒိဗ္ဗတီတိ ကမ္မကရဏာဓိကရဏဝစနိစ္ဆာ.
၃. ကာလဒ္ဓါနမစ္စန္တသံယောဂေ.
ကိရိယာ၊ ဂုဏ၊ ဒဗ္ဗေဟိ သာကလ္လေန ကာလဒ္ဓါနံ သမ္ဗန္ဓော အစ္စန္တသံယောဂေါ. တသ္မိံ ဝိညာယမာနေ ကာလသဒ္ဒေဟိ အဒ္ဓအဒ္ဒေဟိ စ ဒုတိယာ ဟောတိ. မာသမဓီတေ၊ မာသံ ကလျာဏိ၊ မာသံ ဂုဠဓာနာ၊ ကောသမဓီတေ၊ ကောသံ ကုဋိလာ နဒီ၊ ကောသံ ပဗ္ဗတော. အစန္တသံယောဂေတိ ကိံ? မာသဿ ဒွီဟမဓီတေ၊ ကောသဿေကဒေသေ ပဗ္ဗတော.
ပုဗ္ဗဏှသမယံ နိဝါသေတွာ၊ ဧကံ သမယံ ဘဂဝါ၊ ဣမံ ရတ္တိံ စတ္တာရော မဟာရာဇာတိ ဧဝမာဒီသု ကာလဝါစီ ဟိ အစ္စန္တသံယောဂတ္တာဝ ဒုတိယာ သိဒ္ဓါ. ဝိဘတ္တိဝိပလ္လာသေနပိ ဝါ ဗဟုလံဝိဓာနာ.
ဖလပ္ပတ္တိယံ ကိရိယာပရိသမတ္တျပဝဂ္ဂေါ၊ တသ္မိံ ဝိညာယမာနေ ကာလဒ္ဓါနံ ကိရိယာယာစ္စန္တသံယောဂေ တတိယာဘိမတာ၊ သာပိ ကရဏတ္တာဝ သိဒ္ဓါ ‘မာသေနာနုဝါကော-ဓီတော၊ ကောသေနာနုဝါကော-ဓီတော’တိ. အနပဝဂ္ဂေတု အသာဓကတမတ္တာကရဏတ္တာဘာဝေ ဒုတိယာဝ ‘မာသမဓီတော-နုဝါကော၊ န စာနေ န ဂဟိတော’တိ.
ကာရကမဇ္ဈေ ယေ ကာလဒ္ဓါနဝါစိနော၊ တတော သတ္တမီပဉ္စမိယော အဘိမတာ ‘အဇ္ဇ ဘုတွာ ဒေဝဒတ္တော ဒွိဟေ ဘုဉ္ဇိဿတိ၊ ဒွီဟာ ဘုဉ္ဇိဿတိ၊ အတြဋ္ဌော-ယမိဿာသော ကောသေ လက္ခံ ဝိဇ္ဈတိ၊ ကောသာ လက္ခံ ဝိဇ္ဈတီ’တိ၊ တာပီဟ သကသကကာရကဝစနိစ္ဆာယေဝ သိဒ္ဓါ.
၄. ဂတိ ဗောဓာဟာရ သဒ္ဒတ္ထာကမ္မက ဘဇ္ဇာဒီနံ ပယောဇ္ဇေ.
ဂမနတ္ထာနံ ဗောဓတ္ထာနံ အာဟာရတ္ထာနံ သဒ္ဒတ္ထာနမကမ္မကာနံ ဘဇ္ဇာဒီနဉ္စ ပယောဇ္ဇေ ကတ္တရိ ဒုတိယာ ဟောတိ. သာမတ္ထိယာ စ ပယောဇကဗျာပါရေန ကမ္မတာဝဿ ဟောတီတိ ပတီယတေ. ဂမယတိ မာဏဝကံ ဂါမံ၊ ယာပယတိ မာဏဝကံ ဂါမံ၊ ဗောဓယတိ မာဏဝကံ ဓမ္မံ၊ ဝေဒယတိ မာဏဝကံ ဓမ္မံ၊ ဘောဇယတိ မာဏ-ဝကံ မောဒကံ၊ အာသယတိ မာဏဝကံ မောဒကံ၊ အဇ္ဈာပယတိ မာဏဝကံ ဝေဒံ၊ ပါဌယတိ မာဏဝကံ ဝေဒံ၊ အာသယတိ ဒေဝဒတ္တံ၊ သာယယတိ ဒေဝဒတ္တံ၊ အညံ ဘဇ္ဇာပေတိ၊ အညံ ကောဋ္ဋာပေတိ၊ အညံ သန္ထရာပေတိ. ဧတေသမေဝါတိ ကိံ? ပါစေတိ ဩဒနံ ဒေဝဒတ္တေန ယညဒတ္တော. ပယောဇ္ဇေတိ ကိံ? ဂစ္ဆတိ ဒေဝဒတ္တော. ယဒါ စရဟိ ဂမယတိ ဒေဝဒတ္တံ ယညဒတ္တော၊ တမပရော ပယောဇေတိ၊ တဒါ ဂမယတိ ဒေဝဒတ္တံ ယညဒတ္တေနေတိ ဘဝိတဗ္ဗံ ။ ဂမယတိဿာ-ဂမနတ္ထတ္တာ.
၅. ဟရာဒီနံ ဝါ.
ဟရာဒီနံ ပယောဇ္ဇေ ကတ္တရိ ဒုတိယာ ဟောတိ ဝါ. ဟာရေတိ ဘာရံ ဒေဝဒတ္တံ ဒေဝဒတ္တေနေတိ ဝါ၊ အဇ္ဈောဟာရေတိ သတ္တုံ ဒေဝဒတ္တံ ဒေဝဒတ္တေနေတိ ဝါ၊ ကာရေတိ ကဋံ ဒေဝဒတ္တံ ဒေဝဒတ္တေနေတိ ဝါ ဒဿယတေ ဇနံ ရာဇံ ဇနေနေတိ ဝါ၊ အဘိဝါဒယတေ ဂုရုံ ဒေဝဒတ္တံ ဒေဝဒတ္တေနေတိ ဝါ.
၆. န ခါဒါဒီနံ.
ခါဒါဒီနံ ပယောဇ္ဇေ ကတ္တရိ ဒုတိယာ န ဟောတိ. ခါဒယတိ ဒေဝဒတ္တေန၊ အာဒယတိ ဒေဝဒတ္တေန၊ အဝှ၊ ပယတိ ဒေဝဒတ္တေန၊ သဒ္ဒါယယတိ ဒေဝဒတ္တေန၊ ကန္ဒယတိ ဒေဝဒတ္တေန၊ နာယယတိ ဒေဝဒတ္တေန.
(၁) ဝဟိဿာနိယန္တုကေ. ဝါဟယတိ ဘာရံ ဒေဝဒတ္တေန အနိယန္တုကေတိ ကိံ? ဝါဟ-ယတိ ဘာရံ ဗလီဗဒ္ဒေ.
(၂) ဘက္ခိဿာဟိံ သာယံ. ဘက္ခယတိ မောဒကေ ဒေဝဒတ္တေန. အဟိံသာယန္တိ ကိံ? ဘက္ခယတိ ဗလီဗဒ္ဒေ သဿံ.
၇. ဈာဒီဟိ ယုတ္တာ.
ဓီအာဒီဟိ ယုတ္တတော ဒုတိယာ ဟောတိ. ဓိရတ္ထု မံ ပူတိကာယံ၊ အန္တရာ စ ရာဇဂဟံ အန္တရာ စ နာလန္ဒံ၊ သမာဓာနမန္တရေန၊ မုစလိန္ဒမဘိတော သရမိစ္စာဒိ၊ ဆဋ္ဌိယာပဝါဒေါ-ယံ.
၈. လက္ခဏိတ္ထမ္ဘူတဝိစ္ဆာသွဘိနာ.
လက္ခဏာဒီသွတ္ထေသွဘိနာ ယုတ္တမှာ ဒုတိယာ မဟာတိ. ရုက္ခမဘိ ဝိဇ္ဇောတတေ ဝိဇ္ဇု၊ သာဓု ဒေဝဒတ္တော မာတရမဘိ၊ ရုက္ခံ ရုက္ခမဘိတိဋ္ဌတိ.
၉. ပတိပရီဟိ ဘာဂေ စ.
ပတိပရီဟိ ယုတ္တမှာ လက္ခဏာဒီသု ဘာဂေ စတ္ထေ ဒုတိယာ ဟောတိ. ရုက္ခံ ပတိ ဝိဇ္ဇောတတေ ဝိဇ္ဇု၊ သာဓု ဒေဝဒတ္တော မာတရံ ပတိ၊ ရုက္ခံ ရုက္ခံ ပတိ တိဋ္ဌတိ၊ ယဒေတ္ထ မံ ပတိ သိယာ. ရုက္ခံ ပရိ ဝိဇ္ဇောတတေ ဝိဇ္ဇု၊ သာဓု ဒေဝဒတ္တော မာတရံ ပရိ၊ ရုက္ခံ ရုက္ခံ ပရိ တိဋ္ဌတိ၊ ယဒေတ္ထ မံ ပရိ သိယာ.
၁၀. အနုနာ.
လက္ခဏာဒီသွတ္ထေသွနုနာ ယုတ္တမှာ ဒုတိယာ ဟောတိ. ရုက္ခမနု ဝိဇ္ဇောတတေ ဝိဇ္ဇု၊ သစ္စကိရိယမနု ဝုဋ္ဌိ ပါဝဿိ၊ ဟေတု စ လက္ခဏံ ဘဝတိ၊ သာဓု ဒေဝဒတ္တော မာတရမနု၊ ရုက္ခံ ရုက္ခမနု တိဋ္ဌတိ၊ ယဒေတ္ထ မံ အနု သိယာ.
၁၁. သဟတ္ထေ.
သဟတ္ထေ-နုနာ ယုတ္တမှာ ဒုတိယာ ဟောတိ. ပဗ္ဗတမနု သေနာ တိဋ္ဌတိ.
၁၂. ဟီနေ.
ဟီနတ္ထေ-နုနာ ယုတ္တမှာ ဒုတိယာ ဟောတိ. အနု သာရိပုတ္တံ ပညဝန္တော.
၁၃. ဥပေန.
ဟီနတ္ထေ ဥပေန ယုတ္တမှာ ဒုတိယာ ဟောတိ. ဥပ သာရိပုတ္တံ ပညဝန္ထော.
၁၄. သတ္တမျာဓိကျေ.
အာဓိကျတ္ထေ ဥပေန ယုတ္တမှာ သတ္တမီ ဟောတိ. ဥပ ခါရိယံ ဒေါဏော.
၁၅. သာမိတ္တေ-ဓိနာ.
သာမိဘာဝတ္ထေ-ဓိနာ ယုတ္တမှာ သတ္တမီ ဟောတိ. အဓိ ဗြဟ္မဒတ္တေ ပဉ္စာလာ၊ အဓိ ပဉ္စာလေသု ဗြဟ္မဒတ္တော.
၁၆. ကတ္တုကရေဏေသု တတိယာ.
ကတ္တရိ ကရဏေ စ ကာရကေ တတိယာ ဟောတိ. ပုရိသေန ကတံ၊ အသိနာ ဆိန္ဒတိ. ပကတိယာ-ဘိရူပေါ၊ ဂေါတ္ထေန ဂေါတမော၊ သုမေဓော နာမ နာမေန၊ ဇာတိယာ သတ္တဝဿိကောတိ ဘူဓာတုဿ သမ္ဘဝါ ကရဏေ ဧဝ တတိယာ. ဧဝံ သမေန ဓာဝတိ ဝိသမေန ဓာဝတိ၊ ဒွိဒေါဏေန ဓညံ ကိဏာတိ၊ ပဉ္စကေန ပသဝေါ ကိဏာတီတိ.
၁၇. သဟတ္ထေန.
သဟတ္ထေန ယောဂေ တတိယာ သိယာ. ပုတ္တေန သဟ ဂတော၊ ပုတ္တေန သဒ္ဓိံ အာဂတော၊ တတိယာပိ ဆဋ္ဌီဝ အပ္ပဓာနေ ဧဝ ဘဝတိ.
၁၈. လက္ခဏေ.
လက္ခဏေ ဝတ္တမာနတော တတိယာ သိယာ. တိဒဏ္ဍကေန ပရိဗ္ဗာဇကမဒ္ဒက္ခီ၊ အက္ခိနာ ကာဏော၊ တေန ဟိ အင်္ဂေန အင်္ဂိနော ဝိကာရော လက္ခီယတေ.
၁၉. ဟေတုမှိ.
တက္ကိရိယာ ယောဂ္ဂေ တတိယာ သိယာ. အန္နေန ဝသတိ၊ ဝိဇ္ဇာယ ယသော.
၂၀. ပဉ္စမီဏေ ဝါ.
ဣဏေ ဟေတုမှိ ပဉ္စမီ ဟောတိ ဝါ. သတသ္မာ ဗဒ္ဓေါ၊ သတေန ဝါ.
၂၁. ဂုဏေ.
ပရင်္ဂဘူတေ ဟေတုမှိ ပဉ္စမီ ဟောတိ ဝါ. ဇဠတ္တာ ဗဒ္ဓေါ ဇဠတ္တေန ဝါ၊ ပညာယ မုတ္တော၊ ဟုတွာ အဘာဝတောအနိစ္စာ၊ သင်္ခါရနိရောဓာ ဝိညာဏနိရောဓော.
၂၂. ဆဋ္ဌီ ဟေတွတ္ထေဟိ.
ဟေတွတ္ထဝါစီဟိ ယောဂေ ဟေတုမှိ ဆဋ္ဌီ သိယာ. ဥဒရဿ ဟေတု၊ ဥဒရဿ ကာရဏာ.
၂၃. သဗ္ဗာဒိတော သဗ္ဗာ.
ဟေတွတ္ထေဟိ ယောဂေ သဗ္ဗာဒီဟိ သဗ္ဗာ ဝိဘတ္တိယော ဟောန္တိ. ကော ဟေတု၊ ကံ ဟေတုံ၊ ကေန ဟေတုနာ၊ ကဿ ဟေတုဿ၊ ကသ္မာ ဟေတုသ္မာ၊ ကဿ ဟေတုဿ၊ ကသ္မိံ ဟေတုသ္မိံ၊ ကိံ ကာရဏံ၊ ကေန ကာရဏေန၊ ကိံ နိမိတ္တံ၊ ကေန နိမိတ္တေန၊ ကိံ ပယောဇနံ၊ ကေန ပယောဇနေန ဣစ္စေဝမာဒိ. ဟေတွတ္ထေဟီတွေဝ? ကေန ကတံ.
၂၄. စတုတ္ထီ သမ္ပဒါနေ.
ယဿ သမ္မာ ပဒီယတေ တသ္မိံ စတုတ္ထီ သိယာ. သံဃဿ ဒဒါတိ. အာဓာရဝိဝက္ခာယံ သတ္တမီပိ သိယာ သံဃေ ဒေဟိ.
၂၅. တာဒတ္ထျေ.
တဿေ-ဒံ တဒတ္ထံ၊ တဒတ္ထဘာဝေ ဇောတနီယေ နာမသ္မာ စတုတ္ထီ သိယာ. သီတဿ ပဋိဃာတာယ၊ အတ္ထာယ ဟိတာယ (သုခါယ) ဒေဝမနုဿာနံ၊ နာလံ ဒါရဘရဏာယ၊ ယူပါယ ဒါရု၊ ပါကာယ ဝဇတီတွေဝမာဒိ.
ကဿ သာဒုံ န ရုစ္စဘိ၊ မာ-ယသ္မန္တာနမ္ပိ သံဃဘေဒေါ ရုစ္စိတ္ထ၊ ခမတိ သံဃဿ၊ ဘတ္တမဿ နစ္ဆာဒေသီတိ ဆဋ္ဌီ သမ္ဗန္ဓဝစနိစ္ဆာယံ၊ န စေဝံ ဝိရောဓော သိယာ သဒိသရူပတ္တာ၊ ဧဝံဝိဓေသု စ သမ္ဗန္ဓဿ သဒ္ဒိကာနုမတတ္တာ၊ ကဿ ဝါ တွံ ဓမ္မံ ရောစေသီတိ အတ္ထမတ္တေ ပဌမာ.
ဧဝမညာပိ ဝိဓညယျာ၊ ပရတောပိ ယထာဂမံ.
ရညော သတံ ဓာရေတိ၊ ရညော ဆတ္တံ ဓာရေတီတိ သမ္ဗန္ဓေ ဆဋ္ဌီ၊ ဧဝံ ရညော သိလာဃတေ၊ ရညော ဟနုတေ၊ ရညော ဥပတိဋ္ဌတေ၊ ရညော သပတေ၊ ဒေဝါပိ တဿ ပိဟယန္တိ တာဒိနော၊ တဿ ကုဇ္ဈ မဟာဝီရ၊ ယဒိဟံ တဿ ပကုပ္ပေယျံ၊ ဒုဟယတိ ဒိသာနံ မေဃော၊ ယော မိတ္တာနံ န ဒူဘတိ၊ ယော အပ္ပဒုဋ္ဌဿ နရဿ ဒုဿတိ၊ ကျာဟံ အယျာနံ အပရဇ္ဈာမိ၊ ဣဿယန္တိ သမဏာနံ တိတ္ထိယာ၊ ဓမ္မေန နယမာနာနံ ကာ ဥသူယာ ရညော ဘာဂျမာရဇ္ဈတိ၊ ရညော ဘာဂျမိက္ခတေ၊ တေန ယာစိတော အယာစိတော ဝါ တဿ ဂါဝေါ ပဋိသုဏာတိ၊ ဂါဝေါ အာသုဏာတိ၊ ဘဂဝတော ပစ္စဿောသုံ၊ ဟောတု ပတိဂိဏာတိ၊ ဟောတွနုဂိဏာတိ၊ အာရောစယာမိ ဝေါ ပတိဝေဒယာမိ ဝေါ၊ ဓမ္မံ တေ ဒေသေဿာမိ၊ ယထာ ဝေါ ဘဂဝါ ဗျာကရေယျ၊ အလံ တေ ဣဓ ဝါသေန၊ ကိံ တေ ဇဋာဟိ ဒုမ္မေဓ၊ အရဟတိ မလ္လော မလ္လဿာတိ.
ဇီဝိတံ တိဏာယပိ န မညမာနောတိ တာဒတ္ထျ စတုတ္ထီ၊ တိဏေန ယော အတ္ထော တဒတ္ထာယပီတိ အတ္ထော၊ ‘‘ယော စ သီတဉ္စ ဥဏှဉ္စ၊ တိဏာ ဘိယျော န မညတိ’’ တိဏမိဝ ဇီဝိတံ မညမာနောတိ သဝိသယာဝ ဝိဘတ္တိယော. သဂ္ဂါယ ဂစ္ဆတီတိ တာဒတ္ထျေ စတုတ္ထီ၊ ယော ဟိ သဂ္ဂံ ဂစ္ဆတိ တဒတ္ထံ တဿ ဂမနန္တိ၊ ကမ္မဝစနိစ္ဆာယန္တု ဒုတိယာဝ သဂ္ဂံ ဂစ္ဆတီတိ.
အာယု ဘောတော ဟောတု၊ စိရံ ဇီဝိတံ၊ ဘဒ္ဒံ ကလျာဏံ အတ္ထံ ပယောဇနံ၊ ကုသလံ အနာမယံ၊ ဟိတံ ပထျံ သုခံ သာတံ ဘောတော ဟောတု၊ သာဓု သမ္မုတိ မေတဿ၊ ပုတ္တဿာဝိကရေယျ ဂုယှမတ္ထံ၊ တဿ မေ သက္ကော ပါတုရဟောသိ၊ တဿ ပဟိဏေယျ၊ ဘိက္ခူနံ ဒုတံ ပါဟေသိ၊ ကပ္ပတိ သမဏာနံ အာယောဂေါ၊ ဧကဿ ဒွိန္နံ တိဏ္ဏံ ဝါ ပဟောတိ၊ ဥပမံ တေ ကရိဿာမိ၊ အဉ္ဇလိံ တေ ပဂ္ဂဏှာမိ၊ တဿ ဖာသု၊ လောကဿတ္ထော၊ နမော တေ ပုရိသာဇည၊ သောတ္ထိ တဿ၊ အလံ မလ္လော မလ္လဿ၊ သမတ္ထော မလ္လော မလ္လဿ၊ တဿ ဟိတံ၊ တဿ သုခံ၊ သွာဂတံ တေ မဟာရာဇာတိ သဗ္ဗတ္ထ ဆဋ္ဌီ သမ္ဗန္ဓေ၊ ဧဝံဝိဓမညမ္ပေဝ ဝိညေယျံ ယထာဂမံ.
၂၆. ပဉ္စမျဝဓိသ္မာ.
ပဒတ္ထာဝဓိသ္မာ ပဉ္စမီဝိဘတ္တိ ဟောတိ. ဂါမသ္မာ အာဂစ္ဆတု၊ ဧဝံ စောရသ္မာ ဘာယတိ၊ စောရသ္မာ ဥတ္တသတိ၊ ဩရသ္မာ တာယတိ၊ စောရသ္မာ ရက္ခတီတိ၊ သစေ ဘာယထ ဒုက္ခဿ၊ ပမာဒေ ဘယဒဿိဝါ၊ တသန္တိ ဒဏ္ဍဿာတိ ဆဋ္ဌီ သတ္တမိယောပိ ဟောန္တေဝ သမ္ဗန္ဓာဓာရဝစနိစ္ဆာယံ.
အဇ္ဈေနာ ပရာဇေတိ၊ ပဋိပက္ခေ ပရာဇေတီတိ သဝိသယာဝ ဝိဘတ္တိယော. သစေ ကေဝဋ္ဋဿ ပရဇ္ဇိဿာမီတိ ဆဋ္ဌီပိ ဟောတိ သမ္ဗန္ဓဝစနိစ္ဆာယံ. ယဝေဟိ ဂါဝေါ ဝါရေတိ၊ ပါပါ စိတ္တံ နိဝါရယေ၊ ကာကေ ရက္ခတိ တဏ္ဍုလာတိ သဝိသယေဝ ပဉ္စမီ. စိတ္တံ ရက္ခေထ မေဓာဝီတိ ဒုတိယာဝ ဒိဿတိ ကမ္မတ္ထေ. ဥပဇ္ဈာယာ အန္တရဓာယတိ၊ ဥပဇ္ဈာယာ အဓိတေ၊ ကာမတော ဇာယတေ သောကောတိ သဝိသယေ ပဉ္စမီ.
တတ္ထေဝ-န္တရဓာယိ သု၊ နဋဿ သုဏောတိ၊ ပဒုမံ တတ္ထ ဇာယေထာတိ သတ္တမီဆဋ္ဌိယောပိ ဟောန္တေဝ သဝိသယေ. ဟိမဝန္တာ ပဘဝတိ ဂင်္ဂါ၊ ပါဏာတိပါတာ ဝိရမဿု ခိပ္ပံ၊ အညော ဒေဝဒတ္တာ၊ ဘိန္နော ဒေဝဒတ္တာတိ သဝိသယေဝ ပဉ္စမီ. ဧဝံ အာရာ သော အာသဝက္ခယာ၊ ဣတရော ဒေဝဒတ္တာ၊ ဥဒ္ဓံ ပါဒတလာ အဓော ကေသမတ္ထကာ၊ ပုဗ္ဗော ဂါမာ၊ ပုဗ္ဗေဝ သမ္ဗောဓာ၊ တတော ပရံ၊ တတော အပရေန သမယေန၊ တတုတ္တရိန္တိ. သမ္ဗန္ဓဝစနိစ္ဆာယံ ဆဋ္ဌီပိ ပုရတော ဂါမဿ၊ ဒက္ခိဏတော ဂါမဿ၊ ဥပရိ ပဗ္ဗတဿ၊ ဟေဋ္ဌာ ပါသာဒဿာတိ. ပါသာဒမာရုယှ ပေက္ခတိ ပါသာဒါ ပေက္ခတိ၊ အာသနေ ဥပဝိသိတွာ ပေက္ခတိ အာသနာ ပေက္ခတီတိ အဝဓိဝစနိစ္ဆာယံ ပဉ္စမီ.
ပုစ္ဆာနာချာနေသု ကုတော ဘဝံ? ပါတဋလိပုတ္တသ္မာတိ. တထာ ဒေသကာလမာနေပိ ပါဋလိပုတ္တသ္မာ ရာဇဂဟံ သတ္တ ယောဇနာနိ၊ သတ္တသု ယောဇနေသူတိ ဝါ. ဧဝံ ဣတော တိဏ္ဏံ မာသာန-မစ္စယေနာတိ၊ ကိစ္ဆာလဒ္ဓန္တိ ဂုဏေ ပဉ္စမီ. ကိစ္ဆေန မေ အဓိဂတန္တိ ဟေတုမှိ ကရဏေ ဝါ တတိယာ. ဧဝံ ထောကာ မုတ္တော၊ ထောကေန မုတ္တောတိ. ထောကံ စလတီတိ ကိရိယာဝိသေသနေ ကမ္မနိ ဒုတိယာ.
ဒူရန္တိ ကတ္ထယောဂေပိ သဝိသယေဝ ပဉ္စမီဆဋ္ဌိယော သိယုံ၊ ဒူရံ ဂါမသ္မာ၊ အန္တိကံ ဂါမသ္မာ၊ ဒူရံ ဂါမဿ၊ အန္တိကံ ဂါမဿာတိ၊ ဒူရန္တိ ကတ္ထေဟိ တု သဗ္ဗာဝ သဝိသယေ သိယုံ ဗာဓကာဘာဝါ ဒူရော ဂါမော၊ အန္တိကော ဂါမောတွေဝမာဒိ.
ကေစိ ပနာဟု ‘အသတ္တဝစနဟေတေဟိ ပါဋိပဒိကတ္ထေ ဒုတိယာတတိယာပဉ္စမီသတ္တမိယော၊ သတ္တဝစနေဟိ တု သဗ္ဗာဝ သဝိသယေ’တိ၊ တေ ပနညေဟေဝ ပဋိက္ခိတ္တာ. ဒူရံ မဂ္ဂေါ၊ အန္တိကံ မဂ္ဂေါတိ ကိရိယာဝိသေသနံ။ ဘူဓာတုဿ ဂမ္မမာနတ္တာ. ဝိသုဒ္ဓေါ လောဘနီယေဟိ ဓမ္မေဟိ၊ ပရိမုတ္တော သော ဒုက္ခသ္မာ ဝိဝိစ္စေဝ ကာမေဟိ၊ ဂမ္ဘီရတော စ ပုထုလတော စ ယောဇနံ၊ အာယာမေန ယောဇနံ၊ တတော ပဘုတိ၊ ယတော သရာမိ အတ္တာနန္တိ သဝိသယေဝ ဝိဘတ္တိယော.
၂၇. အပပရီဟိ ဝဇ္ဇနေ.
ဝဇ္ဇနေ ဝတ္တမာနေဟိ အပပရီဟိ ယောဂေ ပဉ္စမီ ဟောတိ. အပ သာလာယ အာယန္တိ ဝါဏိဇာ၊ ပရိ သာလာယ အာယန္တိ ဝါဏိဇာ၊ သာလံ ဝဇ္ဇေတွာတိ အတ္ထော. ဝဇ္ဇနေတိ ကိံ? ရုက္ခံ ပရိဝိဇ္ဇောတတေ ဝိဇ္ဇု. အာပါဋလိပုတ္တသ္မာ ဝဿိ ဒေဝေါတိ မရိယာဒါ-ဘိဝိဓီသွဝဓိ ဝိသယေဝ ပဉ္စမီ၊ ဝိနာ ပါဋလိပုတ္တေန သဟ ဝေတိ ဝိသေသော၊ ဧဝံ ယာဝ ပါဋလိပုတ္တသ္မာ ဝဿိ ဒေဝေါတိ.
၂၈. ပဋိနိဓိပဋိဒါနေသု ပတိနာ.
ပဋိနိဓိမှိ ပဋိဒါနေ စ ဝတ္တမာနေန ပတိနာ ယောဂေ နာမသ္မာ ပဉ္စမီ ဝိဘတ္တိ ဟောတိ. ဗုဒ္ဓသ္မာ ပတိ သာရိပုတ္တော၊ ဃတမဿ တေသသ္မာ ပတိ ဒဒါတိ၊ ပဋိနိဓိပဋိဒါနေသူတိ ကိံ? ရုက္ခံ ပတိ ဝိဇ္ဇောတတေ.
၂၉. ရိတေ ဒုတိယာ စ.
ရိတေသဒ္ဒေန ယောဂေ နာမသ္မာ ဒုတိယာ ဟောတိ ပဉ္စမီ စ. ရိတေ သဒ္ဓမ္မံ၊ ရိတေ သဒ္ဓမ္မာ.
၃၀. ဝိနာ-ညတြ တတိယာ စ.
ဝိနာ-ညတြသဒ္ဒေဟိ ယောဂေ နာမသ္မာ တတိယာ စ ဟောတိ ဒုတိယာ ပဉ္စမိယော စ. ဝိနာ ဝါတေန၊ ဝိနာ ဝါတံ၊ ဝိနာ ဝါတသ္မာ၊ အညတြ ဧကေန ပိဏ္ဍပါတနီဟာရကေန၊ အညတြ ဓမ္မံ၊ အညတြ ဓမ္မာ.
၃၁. ပုထနာနာဟိ.
ဧတေဟိ ယောဂေ တတိယာ ဟောတိ ပဉ္စမီ စ. ပုထဂေဝ ဇနေန၊ ပုထဂေဝ ဇနသ္မာ၊ ဇနေန နာနာ၊ ဇနသ္မာ နာနာ.
၃၂. သတ္တမျာဓာရေ.
ကိရိယာဓာရ ဘူတ ကတ္တု ကမ္မာနံ ဓာရဏေန ယော ကိရိယာယာဓာရော တသ္မိံ ကာရကေ နာမသ္မာ သတ္တမီ ဟောတိ. ကဋေ နိသီဒတိ (ဒေဝဒတ္တော)၊ ထာလိယံ ဩဒနံ ပစတိ၊ အာကာသေ သကုနာ၊ ဘိလေသု တေလံ၊ ဂင်္ဂါယံ ဝဇော.
၃၃. နိမိတ္တေ.
နိမိတ္တတ္ထေ သတ္တမီ ဟောတိ. အဇိနမှိ ဟညတေ ဒီပိ၊ မုသာဝါဒေ ပါစိတ္ထိယံ.
၃၄. ယဗ္ဘာဝေါဘာဝလက္ခဏံ.
ယဿ ဘာဝေါ ဘာဝန္တရဿ လက္ခဏံ ဘဝတိ၊ တတော သတ္တမီ ဟောတိ. ဂါဝီသု ဒုယှမာနာသု ဂတော၊ ဒုဒ္ဓါသု အာဂတော. ဘာဝေါတိ ကိံ? ယော ဇဋာဟိ သော ဘုဉ္ဇတိ. ဘာဝလက္ခဏန္တိ ကိံ? ယော ဘုဉ္ဇတိ သော ဒေဝဒတ္တော၊ ‘‘အကာလေ ဝဿတိ တဿ၊ တာလေ တဿ န ဝဿတီ’’တိ ဝိသယသတ္တမီ.
၃၅. ဆဋ္ဌီ စာနာဒရေ.
ယဿ ဘာဝေါ ဘာဝန္တရဿ လက္ခဏံ ဘဝတိ၊ တတော ဆဋ္ဌီ ဘဝတိ သတ္တမီ စ အနာဒရေ ဂမျမာနေ. ‘‘အာကောဋယန္တော သော နေတိ၊ သိဝိရာဇဿ ပေက္ခတော’’၊ ‘‘မစ္စု ဂစ္ဆတိ အာဒါယ၊ ပေက္ခမာနေ မဟာဇနေ’’.
ဂုန္နံ သာမီတိ သမ္ဗန္ဓေ ဆဋ္ဌီ၊ ဂေါသု သာမီတိ ဝိသယသတ္တမီ၊ ဧဝံ ဂုန္နမိဿရော၊ ဂေါသွိဿရော၊ ဂုန္နံ အဓိပတိ၊ ဂေါသု အဓိပတိ၊ ဂုန္နံ ဒါယာဒေါ၊ ဂေါသု ဒါဟာဒေါ၊ ဒုန္နံ သက္ခိ၊ ဂေါသု သက္ခိ၊ ဂုန္နံ ပတိဘူ၊ ဂေါသု ပတိဘူ၊ ဂုန္နံ ပသူတော၊ ဂေါသု ပသူတော၊ ကုသလာ နစ္စဂီတဿ၊ ကုသလာ နစ္စဂီတေ၊ အာယုတ္တော ကဋကရဏဿ၊ အာယုတ္တော ကဋကရဏေတိ.
တထာဓာရဝစနိစ္ဆာယံ သတ္တမီ၊ ဘိက္ခူသု အဘိဝါဒေန္တိ၊ မုဒ္ဓနိ ဓုမ္ဗိတွာ၊ ဗာဟာသု ဂဟေတွာ၊ ဟတ္ထေသု ပိဏ္ဍာယ စရန္တိ၊ ပထေသု ဂစ္ဆန္တိ၊ ကဒလီသု ဂဇေ ရက္ခန္တီတိ. ဉာဏသ္မိံ ပသန္နောတိ ဝိသယသတ္တမီ၊ ဉာဏေန ပသန္နောတိ ကရဏေ တတိယာ၊ ဧဝံ ဉာဏသ္မိံ ဥဿုက္ကော ဉာဏေန ဥဿုက္ကောတိ.
၃၆. ယတော နိဒ္ဓါရဏံ.
ဇာတိဂုဏကိရိယာဟိ သမုဒါယတေကဒေသဿ ပုထက္ကရဏံ နိဒ္ဓါရဏံ. ယတော တံ ကရီယတိ၊ တတော ဆဋ္ဌီသတ္တမိယော ဟောန္တိ. သာလယော သူကဓညာနံ ပထျတမာ၊ သာလယော သူကဓညေသု ပထျတမာ၊ ကဏှာ ဂါဝီနံ သမ္ပန္နခီရတမာ၊ ကဏှာ ဂါဝီသု သမ္ပန္နခီရတမာ၊ ဂစ္ဆတံ ဓာဝန္တော သီဃတမော၊ ဂစ္ဆန္တေသု ဓာဝန္တော သီဃတမော. သီလမေဝ သုတာ သေယျောတိ အဝဓိမှိယေဝ ပဉ္စမီ.
၃၇. ပဌမာတ္ထမတ္တေ.
နာမဿာဘိဓေယျမတ္တေ ပဌမာဝိဘတ္တိ ဟောတိ. ရုက္ခော. ဣတ္ထိ ပုမာ နပုံသကန္တိ လိင်္ဂမ္ပိ သဒ္ဒတ္ထောဝ၊ တထာ ဒေါဏော ခါရီ အာဠှကန္တိ ပရိမာဏမ္ပိ သဒ္ဒတ္ထောဝ၊ ဧကော ဒွေ ဗဟဝေါတိ သင်္ချာပိ သဒ္ဒတ္ထောဝ.
၃၈. အာမန္တဏေ.
သတော သဒ္ဒေနာဘိမုခီကရဏမာမန္တဏံ. တသ္မိံ ဝိသယေ ပဌမာ ဝိဘတ္တိ ဟောတိ. ဘောပုရိသ၊ ဘောက္ကတ္ထိ၊ ဘော နပုံသက.
၃၉. ဆဋ္ဌီ သမ္ဗန္ဓေ.
ကိရိယာကာရကသဉ္ဇာတော အဿေဒမ္ဘာဝဟေတုကော သမ္ဗန္ဓော နာမ. တသ္မိံ ဆဋ္ဌီ ဝိဘတ္တိ ဟောတိ. ရညော ပုရိသော၊ သရတိ ရဇ္ဇဿာတိ သမ္ဗန္ဓေ ဆဋ္ဌီ၊ ရဇ္ဇသမ္ဗန္ဓိနိံ သတိံ ကရောတီတိ အတ္ထော၊ ကမ္မဝစနိစ္ဆာရန္တု ဒုတိယာဝ သရတိ ရဇ္ဇံ. တထာ ရဇကဿ ဝတ္ထံ ဒဒါတိ၊ ပဟရတော ပိဋ္ဌိံ ဒဒါတိ၊ ဗာလော ပူရတိ ပါပဿ၊ အမစ္စေ တာတ ဇာနာဟိ၊ ဓီရေ အတ္ထဿ ကောဝိဒေ၊ ဒိဝသဿ တိက္ခတ္တုံ၊ သကိံ ပက္ခဿ၊ ပူရံ ဟိရညသုဝဏ္ဏဿ ကုမ္ဘန္တွေဝမာဒိ.
ကိတကပ္ပယောဂေ ကက္တုကမ္မေသု ဗဟုလံ သမ္ဗန္ဓဝစနိစ္ဆာယံ ဆဋ္ဌီ၊ သာဓု သမ္မတော ဗဟုဇနဿ၊ သုပ္ပဋိဝိဒ္ဓါ ဗုဒ္ဓါနံ ဓမ္မဓာတု၊ ဓမ္မဿ ဂုတ္တော မေဓာဝီ၊ အမတံ တေသံ ပရိဘုတ္တံ၊ တဿ ဘဝန္တိ ဝတ္တာရော၊ အဝိသံဝါဒကော လောကဿ၊ အလဇ္ဇီနံ နိဿာယ၊ စတုန္နံ မဟာဘူတာနံ ဥပါဒါယ ပသာဒေါတွေဝမာဒိ.
ကတ္တုကမ္မဝစနိစ္ဆာယန္တု တတိယာ ဒုတိယာယော စ၊ သဉ္စတ္တော ပိတရာ အဟံ၊ သရသိ တွံ ဧဝရူပိံ ဝါစံ ဘာသိတာ၊ ဘဂဝန္တံ ဒဿနာယတွေဝမာဒိ.
၄၀. တုလျတ္ထေန ဝါ တတိယာ.
တုလျတ္ထေန ယောဂေ ဆဋ္ဌီ ဟောတိ တတိယာ ဝါ၊ တုလျော ပိတု၊ တုလျော ပိတရာ၊ သဒိသော ပိတု၊ သဒိသော ပိတရာ၊ ဣဟ ကထံ တတိယာ န ဟောတိ? အဇ္ဇုနဿ တုလာ နတ္ထိ၊ ကေသဝဿုပမာ န စေတိ၊ နေတေ တုလျတ္ထာ၊ ကိဉ္ဇရဟိ တုလျာနမောပမ္မတ္ထာ.
၄၁. အတော ယောနံ ဋာဋေ.
အကာရန္ထတော နာမသ္မာ ယောနံ ဋာဋေ ဟောန္တိ ယထာက္ကမံ၊ ဋကာရာ သဗ္ဗဒေသတ္ထာ၊ ဗုဒ္ဓါ ဗုဒ္ဓေ၊ အတောတိ ကိံ? ကညာယော၊ ဣတ္ထိယော၊ ဝဓုယော၊ ဣဓ ကသ္မာ န ဘဝတိ အဂ္ဂယော. အဝိဓာနသာမတ္ထိယာ.
၄၂. နိနံ ဝါ.
အကာရန္တတော နာမသ္မာ နိနံ ဋာဋေ ဝါ ဟောန္တိ ယထာက္ကမံ. ရူပါ၊ ရူပေ၊ ရူပါနိ၊ အတောတွေဝ အဋ္ဌီနိ.
၄၃. သ္မာသ္မိံနံ.
အကာရန္တတော နာမသ္မာ သ္မာသ္မိန္နံ ဋာဋေ ဝါ ဟောန္တိ ယထာက္ကမံ. ဗုဒ္ဓါ ဗုဒ္ဓသ္မာ၊ ဗုဒ္ဓေ ဗုဒ္ဓသ္မိံ၊ အတောတွေဝ အဂ္ဂိသ္မာ အဂ္ဂိသ္မိံ.
၄၄. သဿာယ စတုတ္ထိယာ.
အကာရန္တတော ပရဿ သဿ စတုတ္ထိယာ အာယော ဟောတိ ဝါ. ဗုဒ္ဓါယ ဗုဒ္ဓဿ၊ ဘိယျော တာဒတ္ထျေယေဝါယမာယော ဒိဿတေ၊ ကွစိဒေဝညတ္ထ၊ အတောတွေဝ ဣသိဿ၊ စတုတ္ထိယာတိ ကိံ? ဗုဒ္ဓဿ မုခံ၊ အတ္တတ္ထန္တိ အတ္ထသဒ္ဒေန သမာသော.
သဗ္ဗာဒိတောပိ သ္မာသ္မိံသာနံ ဋာဋေအာယာ ဟောန္တေဝ။ နိရုတ္တိကာရာနုမတတ္တာ ဗုဒ္ဓဝစနေ သန္ဒဿနဝတော စ၊ တတြောဒမုဒါဟရဏံ ‘အသ္မာ လောကာ ပရမှာ စ၊ ဥဘယာ ဓံသတေ နရော’၊ ‘တျာဟံ မန္တေ ပရတ္ထဒ္ဓေါ’၊ ‘ယာယေဝ ခေါ ပနတ္ထာယ အာဂစ္ဆေယျာထော တမေဝတ္ထံ သာဓုကံ မနသိကရေယျာထော’တိ.
၄၅. ဃပတေကသ္မိံ နာဒီနံ ယယာ.
ဃပတော နာဒီနမေကသ္မိံ ယယာ ဟောနိ ယထာက္ကမံ. ကညာယ၊ ရတ္တိယာ၊ ဣတ္ထိယာ၊ ဓေနုယာ၊ ဝဓုယာ၊ ဧကသ္မိန္တိ ကိံ? ကညာဟိ၊ ရတ္တီဟိ.
၄၆. ဿာ ဝါ တေတိမာမူဟိ.
ဃပသညေဟိ တေတိမာမူဟိ နာဒီနမေကသ္မိံဿာ ဝါ ဟောတိ၊ တဿာ ကတံ၊ တဿာ ဒီယတေ၊ တဿာ နိဿဋံ၊ တဿာ ပရိဂ္ဂဟော၊ တဿာ ပတိဋ္ဌိတံ၊ တာယ ဝါ၊ ဧဝံ ဧတိဿာ ဧတာယ၊ ဣမိဿာ ဣမာယ၊ အမုဿာ အမုယာ၊ ဧတေဟီတိ ကိံ? သဗ္ဗာယ၊ နာဒီနံ တွေဝ? သာ၊ ဃပတောတွေဝ? တာဟိ အမူဟိ.
၄၇. နံမှိ နုက ဒွါဒီနံ သတ္တရသန္နံ.
ဒွါဒီနံ သတ္တရသန္နံ သင်္ချာနံ နုက ဟောတိ နံမှိ ဝိဘတ္တမှိ၊ ဒွိန္နံ စတုန္နံ၊ ပဉ္စန္နံ၊ ဧဝံ ယာဝ အဋ္ဌာရသန္နံ၊ ဥကာရော ဥစ္စာရဏတ္ထော၊ ကကာရော အန္တာဝယဝတ္ထော၊ တေန နံမှိ န ဒီဃော.
၄၈. ဗသုကတိန္နံ.
နံမှိ ဗဟုနော ကတိဿ စ နုက ဟောတိ၊ ဗဟုန္နံ၊ ကတိန္နံ.
၄၉. ဏ္ဏံဏ္ဏန္နံ တိတော ဈာ.
ဈသညာ တိတော နံဝစနဿ ဏ္ဏံဏ္ဏန္နံ ဟောတိ၊ တိဏ္ဏံ၊ တိဏ္ဏန္နံ၊ ဈာတိ ကိံ တိဿန္နံ.
၅၀. ဥဘိန္နံ.
ဥဘာ နံဝစနဿ ဣန္နံ ဟောတိ၊ ဥဘိန္နံ.
၅၁. သုဉ သဿ.
နာမသ္မာ သဿ သုဉ ဟောတိ၊ ဗုဒ္ဓဿ၊ ဒွိသကာရပါဌေန သိဒ္ဓေ လာဃဝတ္ထမိဒံ.
၅၂. ဿံဿာဿာယေသွိတရေ ကညေဘိမာနမိ.
ဿမာဒီသွိတရာဒီနမိ ဟောတိ၊ ဣတရိဿံ၊ ဣတရိဿာ၊ ဧကိဿံ၊ ဧကိဿာ၊ အညိဿံ၊ အညိဿာ၊ ဧတိဿံ၊ ဧတိဿာ၊ ဧတိဿာယ၊ ဣမိဿံ၊ ဣမိဿာ၊ ဣမိဿာယ၊ ဧသွိတိ ကိံ? ဣတရာယ၊ ဧသန္တိ ကိံ? သဗ္ဗဿံ၊ သဗ္ဗဿာ.
၅၃. တာယ ဝါ.
ဿမာဒီသု တဿာ ဝါ ဣ ဟောတိ၊ တိဿံ တဿံ၊ တိဿာ တဿာ၊ တိဿာယ တဿာယ၊ ဿံဿာဿာယေသွိတွေဝ? တာယ.
၅၄. တေတိမာတော သဿ ဿာယ.
တာဧတာဣမာတော သဿ ဿာယော ဟောတိ ဝါ. တဿာယ တာယ၊ ဧတိဿာယ ဧတာယ၊ ဣမိဿာယ ဣမာယ.
၅၅. ရတျာဒီဟိ ဋော သ္မိနော.
ရတျာဒီဟိ သ္မိနော ဋော ဟောတိ ဝါ၊ ရတ္တော ရတ္တိယံ၊ အာဒေါ အာဒိသ္မိံ.
၅၆. သုဟိသုဘဿော.
ဥဘဿ သုဟိသွော ဟောတိ. ဥဘောသု၊ ဥဘောဟိ.
၅၇. လ္တုပိတာဒိနမာ သိမှိ.
လ္တုပ္ပစ္စယန္တာနံ ပိတာဒီနံ စ အာ ဟောတိ သိမှိ. ကတ္တာ၊ ပိတာ. ပိတု၊ မာတု၊ ဘာဝု၊ မီတု၊ ဒုဟိတု၊ ဇာမာတု၊ နတ္တု၊ ဟောတု၊ ပေါတု.
၅၈. ဂေ အ စ.
လ္တုပိတာဒီနံ အ ဟောတိ ဂေ အာ စ၊ ဘော ကတ္တ၊ ဘော ကတ္တာ၊ ဘော ပိတ၊ ဘော ပိတာ.
၅၉. အယုနံ ဝါ ဒီဃော.
အ ဣ ဥ ဣစ္စေသံ ဝါ ဒီဃော ဟောတိ ဂေ ပရေ တိလိင်္ဂေ. ဘော ပုရိသာ၊ ဘော ပုရိသ၊ ဘော အဂ္ဂီ၊ ဘော အဂ္ဂိ၊ ဘော ဘိက္ခူ၊ ဘော ဘိက္ခူ.
၆၀. ဃဗြဟ္မာဒိတေ.
ဃတော ဗြဟ္မာဒိတော စ ဂဿေ ဝါ ဟောတိ. ဘောတိ ကညေ၊ ဘောတိ ကညာ၊ ဘော ဗြဟ္မေ၊ ဘော ဗြဟ္မ၊ ဘော ခတ္တေ၊ ဘော ခတ္တ၊ ဘော ဣသေ၊ ဘော ဣသိ၊ ဘော သခေ၊ ဘော သခ. သခိ သခီတိ ဣတ္ထိယံ သိဒ္ဓမေဝ. အာကတိဂဏော-ယံ၊ ဧဝမညတြာပိ.
၆၁. နမ္မာဒီဟိ.
အမ္မာဒီဟိ ဂဿေ န ဟောတိ. ဘောတိ အမ္မာ၊ ဘောတိ အန္နာ၊ ဘောတိ အမ္ဗာ.
၆၂. ရဿော ဝါ.
အမ္မာဒီနံ ဂေ ရဿော ဟောတိ ဝါ. ဘောတိ အမ္မ၊ ဘောတိ အမ္မာ.
၆၃. ဃော ဿံ၊ ဿာ၊ ဿာယံ တိံသု.
ဿမာဒီသု ဃော ရဿော ဟောတိ. တဿံ၊ တဿာ၊ တဿာယ၊ တံ၊ သဘတိံ၊ ဧသွိတိ ကိံ? တာယ၊ သဘာယ.