အဋ္ဌမ ပရိစ္ဆေဒ

ပဏ္ဍုဝါသုဒေဝါဘိသေကော

၁. ဝိဇယော သော မဟာရာဇာ၊ ဝဿေ အန္တိမကေ ဌိတော၊

ဣတိ စိန္တယိ ‘‘ဝုဒ္ဓေါ’ဟံ၊ န စ ဝိဇ္ဇတိ မေ သုတော.

၂. ကိစ္ဆေန ဝါသိတံ ရဋ္ဌံ၊ နဿေယျ မမ အစ္စယေ၊

အာဏာပေယျံ ရဇ္ဇဟေတု-သုမိတ္တံ ဘာတရံ မမ.

၃. အထာ’မစ္စေဟိ မန္တေတွာ၊ လေခံ တတ္ထ ဝိသဇ္ဇယိ၊

လေခံ ဒတွာန ဝိဇယော၊ န စိရေန ဒိဝင်္ဂတော.

၄. တသ္မိံ မတေ အမစ္စာ တေ၊ ပေက္ခန္တာ ခတ္တိယာဂမံ၊

ဥပတိဿဂါမေ ဌတွာန၊ ရဋ္ဌံ သမုနုသာသိသုံ.

၅. မတေ ဝိဇယရာဇမှိ၊ ခတ္တိယာဂမနာ ပုရာ၊

ဧကံ ဝဿံ အယံ လံကာ-ဒီပေါ အာသိ အရာဇကော.

၆. တသ္မိံ သီဟပုရေ တဿ၊ သီဟဗာဟုဿ ရာဇိနော၊

အစ္စယေန သုမိတ္တော သော၊ ရာဇာ တဿ သုတော အဟု.

၇. တဿ ပုတ္တာ တယော အာသုံ၊ မဒ္ဒရာဇဿ ဓီတုယာ၊

ဒူတာ သီဟပုရံ ဂန္တွာ၊ ရညော လေခံ အဒံသု တေ.

၈. လေခံ သုတွာန သော ရာဇာ၊ ပုတ္တေ အာမန္တယီ တယော၊

အဟံ မဟလ္လကော တာတာ၊ ဧကော တုမှေသု ဂစ္ဆတု.

၉. လံကံ နေကဂုဏံ ကန္တံ၊ မမ ဘာတုဿ သန္တကံ၊

တဿ’စ္စ ယေန တတ္ထေဝ၊ ရဇ္ဇံ ကာရေတု သောဘနံ.

၁၀. ကဏိဋ္ဌကော ပဏ္ဍုဝါသု-ဒေဝေါ ရာဇကုမာရကော၊

‘‘ဂမိဿာမီတိ စိန္တေတွာ၊ ဉတွာ သောတ္ထိ ဂတမ္ပိ စ.

၁၁. ပိတရာ သမနုညာတော၊ ဒွတ္တိံသာမစ္စ ဒါရကေ၊

အာဒါယ အာရုဟီ နာဝံ၊ ပရိဗ္ဗာဇကလိင်္ဂဝါ.

၁၂. မဟာကန္ဒရနဇ္ဇာ တေ၊ မုခဒွါရမှိ ဩတရံ၊

တေ ပရိဗ္ဗာဇကေ ဒိသွာ၊ ဇနော သက္ကရိ သာဓုကံ.

၁၃. ပုစ္ဆိတွာ နဂရံ ဧတ္ထ၊ ဥပယန္တံ ကမေန တေ၊

ဥပတိဿ ဂါမံ သမ္ပတ္တာ၊ ဒေဝတာ ပရိပါလိတာ.

၁၄. အမစ္စာ’နုမတော’မစ္စော၊ ပုစ္ဆိ နေမိတ္တကာ တဟိံ၊

ခတ္တိယာ’ဂမနံ တဿ၊ သော ဗျာကာသိ ပရံပိ စ.

၁၅. သတ္တမေ ဒီဝသေယေဝ၊ အာဂမိဿတိ ခတ္တိယော၊

ဗုဒ္ဓသာသန မေတဿ၊ ဝံသဇော’ဝ ဌပေဿတိ.

၁၆. သတ္တမေ ဒိဝသေယေဝ၊ တေ ပရိဗ္ဗာဇကေ တဟိံ၊

ပတ္တေ ဒိသွာန ပုစ္ဆိတွာ၊ အမစ္စာ တေ ဝိဇာနိယ.

၁၇. တံ ပဏ္ဏုဝါသုဒေဝံ တေ၊ လံကာရဇ္ဇေန အပ္ပယုံ၊

မဟေသိယာ အဘာဝါသော၊ န တာဝ အဘိသေစယိ.

၁၈. အမိတောဒနသက္ကဿ၊ ပဏ္ဍုသက္ကော သုတော အဟု၊

ဉတွာ ဝိနာသံ သကျာနံ၊ သော အာဒါယ သကံ ဇနံ.

၁၉. ဂန္တွာ အညာပဒေသေန၊ ဂင်္ဂါပါရံ တဟိံ ပုရံ၊

မာပေတွာ တတ္ထ ကာရေသိ၊ ရဇ္ဇံ တဿ သုတေ လဘိ.

၂၀. ဓီတာ ကဏိဋ္ဌိတာ အာသိ၊ ဘဒ္ဒကစ္စာန နာမိကာ၊

သဗ္ဗလက္ခဏသမ္ပန္နာ၊ သုရူပါ အဘိပတ္ထိတာ.

၂၁. တဒတ္ထံ သတ္တရာဇာနော၊ ပဏ္ဏာကာရေ မဟာရဟေ၊

ပေသေသုံ ရာဇိနော တဿ၊ ဘီတော ရာဇူဟိ သော ပန.

၂၂. ဉတွာန သောတ္ထိဂမနံ၊ အဘိသေကဖလမ္ပိ စ၊

သဟဒွတ္တိံသ ဣတ္ထီဟိ၊ နာဝံ အာရောပိယာ’သုတံ.

၂၃. ဂင်္ဂါယ ခိပိ ဂဏှာတု၊ ပဟု မေ ဓီတရံ ဣတိ၊

ဂဟေတုံ တေ န သက္ခိံသု၊ နာဝါသာပန သီဃဂါ.

၂၄. ဒုတိယေ ဒိဝသေယေဝ၊ ဂေါဏာဂါမက ပဋ္ဋနံ၊

ပတ္တာပဗ္ဗဇိတာ ကာရာ၊ သဗ္ဗာ တာ တတ္ထ ဩတရုံ.

၂၅. ပုစ္ဆိတွာ နဂရံ ဧတ္ထ၊ တာ ကမေနောပယန္တိယော၊

ဥပတိဿဂါမံ သမ္ပတ္တာ၊ ဒေဝတာ ပရိပါလိတာ.

၂၆. နေမိတ္တကဿ ဝစနံ၊ သုတွာ တတ္ထာ’ဂတာ တု တာ၊

ဒိသွာ အမစ္စော ပုစ္ဆိတွာ၊ ဉတွာ ရညော သမပ္ပယိ.

၂၇. တံ ပဏ္ဍုဝါသုဒေဝံ တေ၊ အမစ္စာ သုဒ္ဓဗုဒ္ဓိနော၊

ရဇ္ဇေ သမဘိသိဉ္စိံသု၊ ပုဏ္ဏသဗ္ဗမနောရထံ.

၂၈. သုဘဒ္ဒကစ္စာန မနောမရူပိနိံ၊

မဟေသီဘာဝေ အဘိသိဉ္စိယ’တ္တနော၊

သဟဂတာ တာယ ပဒါသိ အတ္တနာ၊

သဟာဂတာနံ ဝသိ ဘူမိပေါ သုခန္တီ.

သုဇနပ္ပသာဒ သံဝေဂတ္ထာယ ကတေ မဟာဝံသေ

ပဏ္ဍုဝါသုဒေဝါဘိသေကော နာမ

အဋ္ဌမော ပရိစ္ဆေဒေါ.