နဝမ ပရိစ္ဆေဒ

အဘယာဘိသေကော

၁. မဟေသီ ဇနယီ ပုတ္တေ၊ ဒသ ဧကဉ္စ ဓီတရံ၊

သဗ္ဗဇေဋ္ဌော’ဘယော နာမ၊ စိတ္တာနာမ ကနိဋ္ဌိကာ.

၂. ပဿိတွာ တံ ဝိယာကံသု၊ ဗြာဟ္မဏာ မန္တပါရဂါ၊

‘‘ရဇ္ဇဟေတု သုတော အဿာ၊ ဃာတယိဿတိ မာတုလေ’’.

၃. ဃာတေဿာမိ ကနိဋ္ဌိန္တိ၊ နိစ္ဆိတေ ဘာတရာ’ဘယော၊

ဝါရေသိ ကာလေ ဝါသေသုံ၊ ဂေဟံ တံ ဧကထုဏိကေ.

၄. ရညော စ သိရိဂဗ္ဘေန၊ တဿ ဒွါရမကာရယုံ၊

အန္တော ဌပေသုံ ဧကဉ္စ၊ ဒါသိံ နရသတံ ဗဟိ.

၅. ရူပေနု’မ္မာဒယီ နရေ၊ ဒိဋ္ဌမတ္တာဝ သာယတော၊

တတော ဥမ္မာဒစိတ္တာ’တိ၊ နာမံ သောပပဒံ လဘိ.

၆. သုတွာန လံကာဂမနံ၊ ဘဒ္ဒကစ္စာနဒေဝိယာ၊

မာတရာ စောဒိတာ ပုတ္တာ၊ ဌပေတွေ’ကဉ္စ အာဂမုံ.

၇. ဒိသွာန တေ ပဏ္ဍုဝါသု-ဒေဝံ လင်္ကိန္ဒမာဂတာ၊

ဒိသွာန တံ ကနိဋ္ဌိဉ္စ၊ ရောဒိတွာ သဟ တာယ စ.

၈. ရညာ သုကတသက္ကာရာ၊ ရညော’နုညာယ စာရိကံ၊

စရိံသု လံကာဒီပမှိ၊ နိဝသုဉ္စ ယထာရုစိံ.

၉. ရာမေန ဝုသိတဌာနံ၊ ရာမဂေါဏန္တိ ဝုစ္စတိ၊

ဥရုဝေလာ’နုရာဓာနံ၊ နိဝါသာ စ တထာ တထာ.

၁၀. တထာ ဝိဇိတဒီဃာယု-ရောဟဏာနံ နိဝါသကာ၊

ဝိဇိတဂါမော ဒီဃာယု-ရောဟဏန္တိ စ ဝုစ္စတိ.

၁၁. ကာရေသိ အနုရာဓော သော၊ ဝါပိံ ဒက္ခိဏတော တတော၊

ကာရာပေတွာ ရာဇဂေဟံ၊ တတ္ထ ဝါသမကပ္ပယီ.

၁၂. မဟာရာဇာ ပဏ္ဍုဝါသု-ဒေဝေါ ဇဋ္ဌသုတံ သကံ၊

အဘယံ ဥပရဇ္ဇမှိ၊ ကာလေ သမဘိသေစယိ.

၁၃. ဒီဃာယုဿ ကုမာရဿ၊ တနယော ဒီဃဂါမဏိ၊

သုတွာ ဥမ္မာဒစိတ္တံ တံ၊ တဿံ ဇာတကုတူဟလော.

၁၄. ဂဟေတွာ’ပတိဿ ဂါမံ၊ တံ အပဿိ မနုဇာဓိပံ၊

အဒါ သဟောပရာဇေန၊ ရာဇုပဋ္ဌာနမဿသော.

၁၅. ဂဝက္ခာဘိမုခဋ္ဌာနေ၊ တံ ဥပေစ္စ ဌိတံ တုသာ၊

ဒိသွာန ဂါမိဏိံ စိတ္တာ၊ ရတ္တစိတ္တာ’ဟ ဒါသိကံ.

၁၆. ‘‘ကော ဧသော’’တိ တတော သုတွာ၊

မာတုလဿ သုတောဣတိ၊

ဒါသိံ တတ္ထ နိယောဇေသိ၊

သဒ္ဓိံကတွာန သော တတော.

၁၇. ဂဝက္ခမှိ ဍသာပေတွာ၊ ရတ္တိံ ကက္ကဋယန္တကံ၊

အာရုယှ ဆိန္ဒယိတွာန၊ ကဝါဋံ တေန ပါဝိသိ.

၁၈. တာယ သဒ္ဓိံ ဝသိတွာန၊ ပစ္စူသေယေဝ နိက္ခမိ၊

ဧဝံ နိစ္စံ ဝသီ တတ္ထ၊ ဆိဒ္ဒါဘာဝါ အပါကဋော.

၁၉. သာ တေန အဂ္ဂဟီ ဂဗ္ဘံ၊ ဂဗ္ဘေ ပရိဏတေ တတော၊

မာတု အာရောစယီ ဒါသီ၊ မာတာ ပုစ္ဆိယ ဓီတရံ.

၂၀. ရညော အာရောစယီ ရာဇာ၊ အမန္တေတွာ သုတေ’ဗြဟ္မာ၊

ပေါသိယောသော’ပိ အမှေဟိ၊ ဒေဝ တဿေဝ တံ ဣတိ.

၂၁. ပုတ္တော စေ မာရယိဿာမ၊ တ’န္တိ တဿ အဒံသု တံ၊

သာ သူတိကာလသမ္ပတ္တေ၊ သူတိ ဂေဟဉ္စ ပါဝိသိံ.

၂၂. သင်္ကိတွာ ဂေါပကံ စိတ္တံ၊ ကာလဝေလဉ္စ ဒါသကံ၊

တသ္မိံ ကမ္မေ နိဿာယာ’တိ၊ ဂါမဏိ ပရိစာရကေ.

၂၃. တေ ပဋိညံ အဒေန္တေ တေ၊ ရာဇပုတ္တာ အဃာတယုံ၊

ယက္ခာ ဟုတွာန ရက္ခိံသု၊ ဥဘော ဂဗ္ဘေ ကုမာရကံ.

၂၄. အညံ ဥပဝိဇညံ သာ၊ သလ္လက္ခာ ပေသိ ဒါသိယာ၊

စိတ္တာ သာ ဇနယီ ပုတ္တံ၊ သာ ဣတ္ထိ ပန ဓီတရံ.

၂၅. စိတ္တံ သဟဿံ ဒါပေတွာ၊ တဿာ ပုတ္တံ သကမ္ပိ စ၊

အာဏာပေတွာ ဓီတရံ တံ၊ နိပဇ္ဇာပေသိ သန္တိကေ.

၂၆. ဓီတာ လဒ္ဓါ’တိ သုတွာန၊ တုဋ္ဌာ ရာဇသုတာ အဟုံ၊

မာတာ စ မာတုမာတာ စ၊ ဥဘော ပန ကုမာရကံ.

၂၇. မာတာမဟဿ နာမဉ္စ၊ ဇေဋ္ဌဿ မာတုလဿ စ၊

ဧကံ ကတွာ တမကရုံ၊ ပဏ္ဍုကာဘယနာမကံ.

၂၈. လံကာ ပါလော ပဏ္ဍုဝါသု-ဒေဝေါ ရဇ္ဇမကာရယိ၊

တိံသ ဝဿမှိ ဇာတမှိ၊ မတော သော ပဏ္ဍုကာဘယေ.

၂၉. တသ္မိံ မတသ္မိံ မနုဇာဓိပသ္မိံ၊

သဗ္ဗေ သမာဂမ္မ နရိန္ဒပုတ္တာ၊

တဿာဘယဿာဘယဒဿ ဘာတု၊

ရာဇာဘိသေကံ အကရုံ ဥဠာရာတိ.

သုဇနပ္ပသာဒ သံဝေဂတ္ထာယ ကတေ မဟာဝံသေ

အဘယာဘိသေကော နာမ

နဝမော ပရိစ္ဆေဒေါ.