သဋ္ဌိမ ပရိစ္ဆေဒ

ကုမာရောဒယော

၁. ရောဟဏေ နိဝသိတ္ထာ’ဝ၊ ဇယဗာဟုမဟီပတိ၊

မိတ္တာဝှါ ရာဇိနီ စေဝ၊ တဒါ ကာလမကံသု တေ.

၂. သိရီဝလ္လဘဇာယာ’ထ၊ ဇနေသိ သုဂလာ ဒုဝေ၊

မာဏဘရဏကံ ပုတ္တံ၊ ပုတ္တိံ လီလာဝတိမ္ပိ စ.

၃. မာဏာဘရဏဘူပါလ-ဒေဝီ’ပိ ရတနာဝလီ၊

မိတ္တံ ပဘာဝတိဉ္စာပိ၊ အလဘီ ဓီတရော ဒုဝေ.

၄. ပဿန္တဿ ဥဘော တာယော၊ ဓီတရော ဝီရဗာဟုနော၊

တဒါ မဟာဒိပါဒဿ၊ ဧဝံ အာသိ ဝိတက္ကိတံ.

၅. လောကာဘိသမ္မတေ သဗ္ဗ-ဘူပါလနွယမုဒ္ဓနိ၊

ဝိသုဒ္ဓေ သောမဝံသမှိ၊ အဘိဇာတာ မယံ ပန.

၆. ပိဟနီယတရာကာရာ၊ သဗ္ဗသတ္တိသမုန္နတာ၊

နာနာဝိဇ္ဇာသု နိပုဏာ၊ ဟတ္ထိအဿာဒိသုက္ခမာ.

၇. တထာ ပေကာကိနာ ဝေ’တေ၊ တယော ဝိက္ကမဗာဟုနာ၊

ပရာဇယံ ပရိဘဝံ၊ ပါပိတာ ဗဟုသော ရဏေ.

၈. သူနုနော သုသမတ္ထဿ၊ ဝိသောဓေတု မိမံ မလံ၊

န ဒိဿတေ ပါတုဘာဝေါ၊ အဟော နော အပ္ပပုညတာ.

၉. ဇနဝါဒကိလိဋ္ဌေန၊ ရာဇတ္တေနာပိ ကိံ မမ၊

ဣဒါနိ ဝိသယာသင်္ဂံ၊ ဟိတွာ ကလျာဏကမ္မသု.

၁၀. အပ္ပမတ္တဿ သတတံ၊ နေတဗ္ဗာ ဝါသရာ’ဣတိ၊

နိယျာတေတွာ အမစ္စာနံ၊ သဗ္ဗံ ရဇ္ဇဝိစာရဏံ.

၁၁. တဟိံ သတ္တ’ဋ္ဌမာသဉှိ၊ ဝသံ ရတ္တိယမေကဒါ၊

ဒေဝရာဇဃရေသေယျံ၊ ကပ္ပေသိ သီလသံယတော.

၁၂. တတော ပစ္စူသကာလမှိ၊ ဒေဝပုတ္တံ မဟိဒ္ဓိကံ၊

ဝိစိတ္တဝတ္ထာဘရဏံ၊ ဂန္ဓမာလာဝိဘူသိတံ.

၁၃. ဥဠာရတရရူပေန၊ ဒေဟောဘာသေန အတ္တနော၊

ဩဘာသေန္တံ အသေသာ’သာ၊ သူရိယဉ္စ န ဘုဂ္ဂတံ.

၁၄. ဝဒန္တံ သုပိနေ ဧဝံ၊ အဒက္ခိ ဒရဏီပတိ၊

ပသီဒဿု မဟာဘာဂ၊ ပိတောဘဝ မဟိပတိ.

၁၅. ဓညလက္ခဏသမ္ပန္နော၊ ဣစ္ဆိတတ္ထဿသာဓကော၊

ဝိနီတော လောကကုဟရ-ဗျာပိတေဇော ပရက္ကမော.

၁၆. အာဏဗလယသောကိတ္တိ-ဘာသုရော သဂ္ဂုဏာကရော၊

လောကသာသနသံဝုဒ္ဓိ-ကရော ပုတ္တဝရော တဝ.

၁၇. လဗ္ဘီဿတေ မဟာရာဇ၊ န စိရဿေဝ သမ္ပတိ၊

ပုတ္တဒါရာဓိဝုတ္ထံ တံ၊ ပုရံ ခိပ္ပံ ပယာဟီတိ.

၁၈. ပဗုဇ္ဈိတွာန သဉ္ဇာတ-ပီတိဝေဂေါထ ရတ္တိယာ၊

ဝိဘာတာယ တတောပေါင်္ခ-ဂါမံ ဂဉ္ဆိနရုတ္တမော.

၁၉. ယထာ ဒိဋ္ဌပ္ပကာရန္တံ၊ ကထေသိ သုပိနံ သုဘံ၊

မဟေသီ ပမုခါနံ သော၊ အမစ္စာနံ မဟီပတိ.

၂၀. သဒ္ဓိံ မဟေသိယာ တတ္ထ၊ ပတ္ထေန္တော ပုတ္တမုတ္တမံ၊

စိန္တောန္တော ဒါနသီလာဒိံ၊ သုဘံ နာနပ္ပကာရကံ.

၂၁. အထေကဒိဝသံကာလေ၊ ပစ္စူသေ သုပိနေ ပန၊

သဗ္ဗလက္ခဏသမ္ပန္နံ၊ သဗ္ဗသေတံ မနောဟရံ.

၂၂. ဒန္တီပေါတဝရံ ဒန္တံ၊ ကဏ္ဏေ ဂဏိယပေမတော၊

ပဝိသန္တမိဝတ္တာနံ၊ သေယျာဂဗ္ဘံ မဟေသိယာ.

၂၃. သမ္ပဿိယ ပဗုဇ္ဈိတွာ၊ ဥဋ္ဌာယ သယနာဝရာ၊

သဉ္ဇာတပီတိပါမောဇ္ဇ-ဝေဂပီဏိတမာနသော.

၂၄. တာယံ ဝေလာယမေဒါသု-သေယျာဂဗ္ဘံ မဟေသိယာ၊

ပဝိဿသုပိနံ တဿာ၊ ယထာဒိဋ္ဌံ ပကာသယီ.

၂၅. အဟမ္ပိ တာဒိသံ ဟတ္ထိ-ပေါတကံ သယနံ မမ၊

ပဒက္ခိဏံ ကရိတွာန၊ ဌိတံ သောဏ္ဍေ သမာဒိယ.

၂၆. အာကဍ္ဎိတွာန သယနံ၊ သမာရောပိယ ပေမတော၊

အာလိင်္ဂိံ သုပိနမှီတိ၊ ဒေဝီ စာပိ တမဗြဝီ.

၂၇. ဥဘော တေ အညမညဿ၊ ဒိဋ္ဌမေဝံ ပကာသိယ၊

ဥဋ္ဌာပေသုံ ပဟဋ္ဌာဝ၊ ဝီတနိဒ္ဒါရုဏံ တဒါ.

၂၈. တတော ပါတော ဥပဋ္ဌာတု၊ မုပယာတံ ပုရောဟိတံ၊

နေမိတ္တကေ စ ပုစ္ဆိံသု၊ သုနိတွာ တေ ပမောဒိတာ.

၂၉. န စိရဿေဝ ပုတ္တဿ၊ ဓညလက္ခဏသာလိနော၊

ဥပ္ပတ္တိယာ အဝဿံ’ဝ၊ ဘဝံတဗ္ဗန္တိ ကိတ္တယုံ.

၃၀. တံ သုဏိတွာ အမစ္စာ စ၊ တထာ နဂရဝါသိနော၊

အဝိန္ဒိံသု ဇနိန္ဒော စ၊ သဗ္ဗေပီတိ မဟုဿဝံ.

၃၁. တတော ပဋ္ဌာယ သောတ္ထာနံ၊ ပတ္ထယံ ပတ္ထိဝေါဘုသံ၊

ဘိက္ခုသံဃေန ဗဟုသော၊ ဘဏာပေသိ ပရိတ္တကံ.

၃၂. မဏိမုတ္တာဒိကံ စိတ္တံ၊ မဟဂ္ဃမနုဝါသရံ၊

ပရိစ္စဇိ ဒါနမုခေ၊ ယာစကာနမနေကသော.

၃၃. ပုရောဟိတာဒိဝိပ္ပေဟိ၊ ဝေဒဝေဒင်္ဂဝိညူဟိ၊

ဝတ္တာပေသိ စ ဟောမာဒိ-ဝိဓာနံ သောတ္ထိ သမ္မတံ.

၃၄. သုဝိနဋ္ဌေ ဝိဟာရေ စ၊ ဓာတုဂဗ္ဘေ စ ဝါပိယော၊

ဇိဏ္ဏာ စ ပဋိသင်္ခတ္တုံ၊ ယောဇယီ ရာဇကပ္ပိကေ.

၃၅. ဒိနံ နယန္တေ ကလျာဏ-ကမ္မေနေ’ဝံ နရိဿရေ၊

န စိရံ သဏ္ဌဟိ ဂဗ္ဘ-ဝရော ကုစ္ဆိမှိ ဒေဝိယာ.

၃၆. တတောဝဂမ္မ တံ ဟဋ္ဌ-ပဟဋ္ဌော သော နရိဿရော၊

မဟန္တံ ဒေဝိယာ ဂဗ္ဘ-ပရိဟာရမဒါပယိ.

၃၇. ပရိပက္ကဂဗ္ဘာ ဒေဝီ၊ ကမေန ဇနယီသုကံ၊

သမယေ ဘဒ္ဒနက္ခတ္တ-မုဟုတ္တေနဘိလက္ခိတေ.

၃၈. သုပ္ပသန္နာ အသေသာ စ၊ ဒိသာယော တံခဏေ အဟု၊

သမီရဏေ စ ဝါသိံသု၊ သုဂန္ဓိမုဒုသီတလာ.

၃၉. ဒန္တီနံ ကောဉ္စနာဒေန၊ ဟယာနံ ဟေသိတေန စ၊

ရာဇင်္ဂဏံ တဒါဇာတံ၊ မဟာကောလာဟလာ ကူလံ.

၄၀. အစ္ဆေရာတိသယေ ဧဝံ၊ ပါတုဘူတေ အနေကဓာ၊

ဒိသွာ တံ ဝိမှယပ္ပတ္တော၊ မာဏဘရဏဘူပတိ.

၄၁. သုတွာ နိဇဿ ပုတ္တဿ၊ တဒါ သဉ္ဇာတသာသနံ၊

အမတေနာဘိသိတ္တောဝ၊ ပီတိပုဏ္ဏမနောရထော.

၄၂. မောစာပေတွာ တဒါ ကာရာ-ဃရေ ဗဒ္ဓေ ဗဟူဇနေ၊

ဒါနံ ဥဠာရံ သမဏ-ဗြာဟ္မဏာနံ ပဒါပယိ.

၄၃. အမစ္စပမုခါ စာပိ၊ ဇနာပုရနိဝါသိနော၊

ကဒလီတောရဏာဒီဟိ၊ ရာဇဓာနီ မနေကဓာ.

၄၄. အလင်္ကရိတွာ သကလံ၊ သုမဏ္ဍိတပသာဓိတာ၊

ဆဏံ မဟန္တံ ဝတ္တေသုံ၊ ကတိပါဟံ မနောရမံ.

၄၅. ဝေဒေ ဝုတ္တဝိဓာနေန၊ ဇာတကမ္မာဒိကံ ဝိဓိံ၊

သဗ္ဗံ သမာပယိတွာန၊ ကုမာရဿာ’ဝနီပတိ.

၄၆. ပုရောဟိတာဒယော ဝိပ္ပေ၊ တတော လက္ခဏပါဌကေ၊

အာဏာပေတွာန သက္ကာရ-သမ္မာနဝိဓိပုဗ္ဗကံ.

၄၇. နိယောဇေသိ ကုမာရဿ၊ လက္ခဏာနံ ပဋိဂ္ဂဟေ၊

သာဓကံ သကလံ တဿ၊ ယတ္ထပါဒါဒိလက္ခဏံ.

၄၈. ဥပဓာရိယ မဟာမစ္စ-ဂဏမဇ္ဈဂတဿ တေ၊

ရာဇိနော ဒေဝိယာ စာပိ၊ ပကာသေသုံ ပမောဒိတာ.

၄၉. လင်္ကာဒီပံ ဌပေတွာန၊ ဇမ္ဗုဒီပတလမ္ပိ စ၊

ဧကစ္ဆတ္တင်္ကိတံ ကတွာ-နုဘောတ္တုံ နိပုဏော ဣတိ.

၅၀. တေ သန္တပ္ပိယ ဘောဂေဟိ၊ ဘိယျော ပုစ္ဆိတ္ထ သာဒရံ၊

သန္ဒိဿမာနံ ယံကိဉ္စိ၊ အရိဋ္ဌံ အတ္ထိ နတ္ထီ’တိ.

၅၁. ဒီဃာယုကော ကုမာရော’ယံ၊ ကိဉ္စိ ပညာယတေ ဝတ၊

ဇနကာရိဋ္ဌယောဂေါ’တိ၊ တေ မဟီပတိနော’ဗြဝုံ.

၅၂. တဿာရိဇနသမ္မဒ္ဒိ-ပတာပဘုဇယော ဂတော၊

သော ပရက္ကမဗာဟူ’တိ၊ အနွတ္ထနာမမဂ္ဂဟီ.

၅၃. ကဏ္ဏဝေ ဓမဟဉ္စေဝ၊ အန္နုပါသနမင်္ဂလံ၊

ကာရာပိယ ဝိဓာနညူ၊ ယထာဝိဓိမသေသတော.

၅၄. ရညော ဝိက္ကမဗာဟုဿ၊ သပုတ္တုပ္ပတ္တိသာသနံ၊

ဝတ္တုံ သဒူတေ ပေသေသိ၊ ပုလတ္ထိနဂရံ တဒါ.

၅၅. တေဟိသော ဘာဂိနေယျဿ၊ မဟာဘာဂတ္တနမ္ပိ စ၊

ဇနကာရိဋ္ဌယောဂဉ္စ၊ သုတွာ ဝိက္ကမဗာဟုသော.

၅၆. ဓညံ ဝိဇယရာဇာဒိ-ရာဇမာလာယ နာယကံ၊

မဏိံဝ ဘာသုရံ မယှံ၊ ဘာဂိနေယျံ ဇနေသိသော.

၅၇. ဟာနိ ယာကာစိသတတံ၊ ယထာ တဿ န ဟေဿတိ၊

တထာ မမန္တိကေယေဝ၊ ကုမာရော ဧတ္ထ ဝဍ္ဎတံ.

၅၈. အလဒ္ဓံ လဘိတုံ လာဘံ၊ လဒ္ဓဉ္စ ပရိရက္ခိတုံ၊

သဗ္ဗထာ န သမတ္ထောယံ၊ ပုတ္တော ဂဇဗာဟု မမ.

၅၉. သူရဘာဝါဒိယုတ္တော’ပိ၊ မဟိန္ဒဝှပရောသုတော၊

နိဟီနော မာတုဂေါတ္တေန၊ န ရဇ္ဇဿ ရဟော မမ.

၆၀. ဌိတဿ ဝိက္ကဇာတေန၊ နေကသော သဉ္စိတေန မေ၊

ရဇ္ဇဿ ဘာဂိနေယျော’ဝ၊ ကာမံ ဘာဂီ ဘဝိဿတိ.

၆၁. ဣတိပေသေသိ ဒူတေ သော၊ အာနေတုံ တံ ကုမာရကံ၊

ကုမာရာ ဘရဏံ ဒတွာ၊ သေသံ သာရဉ္စုပါယနံ.

၆၂. သဗ္ဗံ ဒူတမုခါ သုတွာ၊ ဝီရဗာဟု မဟီပတိ၊

တဿေတံ ဝစနံ ယုတ္တံ၊ ဝုတ္တံ မေဟိတ ဗုဒ္ဓိယာ.

၆၃. တထာပိ စ နိဇာရိဋ္ဌ-ပဋိကာရတ္ထမီဒိသံ၊

ဩရသံ ပုတ္တရတနံ၊ ပေသေတုံ နာ’နုရူပကံ.

၆၄. ကိဉ္စ တတ္ထ ကုမာရမှိ၊ နီတေ ဝိက္ကမ ဗာဟုနော၊

ပက္ခော လဒ္ဓမဟာဝါဟ-ဗလော ဝိယ ဟုတာသနော.

၆၅. အစ္စုန္နတေန မဟတာ၊ တေဇသာ သဉ္ဇလိဿတိ၊

ဟာနိရေဝ ဝတမှာကံ၊ မဟတီ ဟေဿတေ ဘုသံ.

၆၆. ဣတိ ဟတ္ထေ ဂတာနံ သော၊ ဒူတာနံ ထနယံ သကံ၊

အပေသေတွာ ဝိသဇ္ဇေသိ၊ ပသာဒိယ မနေန သော.

၆၇. သပုတ္တဒါရေဟိ သမဂ္ဂဝါသံ၊

နရာဒိနာထော နိဝသံ တဟိံသော၊

တိဗ္ဗေန ဖုဋ္ဌော မဟတာဂဒေန၊

ရဇ္ဇေန သဒ္ဓိံ ဝိဇဟိတ္ထ ဒေသံ.

သုဇနပ္ပသာဒသံဝေ ဂတ္ထာယ ကတေ မဟာဝံသေ

ကုမာရောဒယော နာမ

သဋ္ဌိမော ပရိစ္ဆေဒေါ.