ဧကသဋ္ဌိမ ပရိစ္ဆေဒ

သင်္ခတ္ထလိပုရာဘိဂမနော

၁. သုတွာ ဒွေ ဘာတရော အညေ၊ ဇေဋ္ဌဿော ပရတိံသဒါ၊

ခိပ္ပံ သရဋ္ဌာ အာဂမ္မ၊ ကာရေသုံ အန္တိမံ ဝိဓိံ.

၂. အထ ကိတ္တိသိရိမေဃော၊ ရဋ္ဌံ ဇေဋ္ဌဿ ဘာတုနော၊

အတ္တာဓီနံ ကရိတွာန၊ အာမန္တိယ ကဏိဋ္ဌကံ.

၃. ဒတွာ ရဋ္ဌဒွယံ အညံ၊ ဝတ္ထုံ တတ္ထေဝ အာဒိသိ၊

သော’ပိ ဇေဋ္ဌဿ ဘာတုဿ၊ ဝစနံ သမ္ပဋိစ္ဆိယ.

၄. သမာဒါယ ကုမာရဉ္စ၊ ဒေဝိဉ္စ ရတနာဝလိံ၊

ဓီတရော ဒွေ စ ဂန္တာန၊ မဟာ နာမဟုလံ ပုရံ.

၅. သမဂ္ဂါ နိဝသံ တတ္ထ၊ ကုမာရဿ သိခါမဟံ၊

ကာရေတွာ ပရိဟာရေန၊ ဝဍ္ဎေသိ မဟတာ သဒါ.

၆. တတော သော ဒေဝိယာ ဇေဋ္ဌံ-ဓီတရံ မိတ္တနာမိကံ၊

ဒါတုကာမော သပုတ္တဿ၊ သဟာမစ္စေဟိ မန္တယိ.

၇. ကာလိင်္ဂနွယသမ္ဘူတာ၊ ပါယေနခလု ဘူမိပါ၊

သာမိဘာဝံ ဂတာ အသ္မိံ၊ လင်္ကာဒီပမှီ ဘူယသော.

၈. ကာလိင်္ဂဂေါတ္တ သမ္ဘူတ၊ ဂဇဗာဟုဿ ဒါတဝေ၊

ဂူဠရူပေန ဒေဝီ’ယံ၊ ယဒိ ပေသေယျ ဓီတရံ.

၉. ဘိယျော ဝိဝါဟသမ္ဗဒ္ဓေါ၊ ဗလဝါ သော ဘဝိဿတိ၊

မယှံ ဧသော နိရာလမ္ဗော၊ ပုတ္တော ဟေဟီတိ သဗ္ဗထာ.

၁၀. တသ္မာ မေ သုနူနော ဧသာ၊ ဒါတုံ ယုတ္တာ ကုမာရိကာ၊

ဧဝံ သတိ ဝတမှာကံ၊ ဝဍ္ဎိယေ’ဝ သိယာ ‘‘ဣတိ’’.

၁၁. ဒေဝီပိ သုတွာ တံ သဗ္ဗ-မာဒိစ္စနွယ မဏ္ဍနာ၊

သဗ္ဗထာ တမနိစ္ဆန္တိ၊ ဣဒမာဟ မဟီပတိံ.

၁၂. ဃာတေတွာ သကလေ ယက္ခေ၊ ကုမာရော ဝိဇယဝှယော၊

လံကာဒီပမိမံ’ကာသိ၊ မနုဿာဝါသကံ သဒါ.

၁၃. တတော ပဘုတိ အမှာကံ၊ ဃဋေသုံ ဝိဇယနွယံ၊

ကာလိင်္ဂဝံသဇေဟေဝ၊ သမ္ဗန္ဓံ ကတွ ပုဗ္ဗကံ.

၁၄. အညဘူပါလ သမ္ဗန္ဓော၊ သုတပုဗ္ဗော ပိနတ္ထိနော၊

သောမဝံသ သမုမ္ဘူတေ၊ ဌပေတွာ ဓရဏိဿရေ.

၁၅. တုယှံ ဇာတောတိ အမှာကံ၊ သမ္ဗန္ဓော သော ကထံ သိယာ၊

အရိယနွယ သမ္ဘူတ၊ ကုမာရေန သဟာမုနာ.

၁၆. ဧဝံ သော ဒေဝိယာ တာယ၊ နေကသော ဝါရယန္တိယာ၊

ပသယှသက ပုတ္ထဿ၊ တံ ကုမာရိမဒါပယိ.

၁၇. သော အနေကဂုဏောဒါရ- ဘရိယာနုဂတော တတော၊

ရဉ္ဇယန္တော ဇနေ သဗ္ဗေ၊ ဇနကသန္တိကေ ဝသိ.

၁၈. ဧကဝီသတိံ ဝဿာနိ၊ ရဇ္ဇံ ဝိက္ကမ ဗာဟုသော၊

အနုဘောတွာ ယထာကမ္မံ၊ ကာယဘေဒါ ဂတော ပရံ.

၁၉. တတော ဂဇဘုဇော ဌိတံ၊ သမ္ပန္နဗလဝါဟနံ၊

ရဇ္ဇံ ဟတ္ထဂတံ ကတွာ၊ ပုလတ္တိနဂရေ ဝသီ.

၂၀. တတော ကိတ္တိသိရီမေဃ၊ သိရီဝလ္လဘ ဘူမိပါ၊

ဝုတ္တန္တ မေတံ ဝိညာယ၊ ဧဝံ သမနုစိန္တယုံ.

၂၁. တဿ ဝိက္ကမ ဗာဟုဿ၊ ဝုဒ္ဓဘာဝေန နေကဓာ၊

မူလရဇ္ဇာဓိပစ္စံ တံ၊ အမ္မံ နိန္ဒာကရံ န ဟိ.

၂၂. တဒတ္ထဇဿ ဗာလဿ၊ မူလရဇ္ဇံ ပသာသနော၊

ဥပေက္ခဏံ ပနမှာကံ၊ နေဝါနုစ္ဆဝိကံ ဝတ.

၂၃. တေ သောယာဝ သရဇ္ဇမှိ၊ ဗဒ္ဓမူလော ဘဝိဿတိ၊

ပသယှ တာဝ တံ ရဇ္ဇံ၊ ဝဋ္ဋတိ ဂဏှိတုံ ဣတိ.

၂၄. ဝေလက္ကာရ ဗလံ သဗ္ဗံ၊ ဘိန္ဒိံသု ဓန ဒါနတော၊

ဌပေတွာ သေဝကေ ကေစိ၊ တဿဗ္ဘန္တရိကေ တဒါ.

၂၅. ဂဇဗာဟု မဟီပါလေ၊ ဝိရတ္တာ ရဋ္ဌဝါသိနော၊

ဥဘိန္နံ ရာဇူနံ ဒူတေ၊ ပေသယုံ နေကသော တတော.

၂၆. ရဇ္ဇံ သာဓေတွာ ဒဿာမ၊ ဧကီဘူတာ မယံ ပန၊

ဥပတ္ထမ္ဘကဘာဝေါ’ဝ၊ ကာတဗ္ဗော ကေဝလံ ဣတိ.

၂၇. တတော ဒွေ ဘာတုကာ သေနံ၊ သကံ သန္နယှ ဝေဂသာ၊

ဥဘတော မုခတော တဿ၊ ရဋ္ဌမဇ္ဈမုပါဂမုံ.

၂၈. ပဟိဏိံသု စ တေ ဒူတေ၊ တတော ဂဇဗောဟုဝှယော၊

ဘူမိပါလော နိဇာမစ္စေ၊ သန္နိပါတိယ မန္တယိ.

၂၉. ဝေဠက္ကာရဗလံ သဗ္ဗ-မုဇုပစ္စတ္တိကံ အဟု၊

ရာဇာနော ဒွေ စ နော ရဋ္ဌံ၊ သင်္ဂါမတ္ထမုပါဂတာ.

၃၀. ပဌမံ တေသု ပက္ခဿ၊ ဧကဿ ဗလိနော ဘုသံ၊

မုခဘင်္ဂေ ကတေ ခိပ္ပံ၊ တတော အညေ သုသာဓိယာ.

၃၁. ဣတိ နိစ္ဆိယ သေနင်္ဂံ၊ သဗ္ဗမာဒါယ အတ္တနော၊

သိရိဝလ္လဘရာဇာဘိ-မုခံ ယုဒ္ဓါ’ယုပါဂမိ.

၃၂. သိရိဝလ္လဘရာဇာပိ၊ သင်္ဂါမ မဟိဘိံသနံ၊

ပါတော ပဋ္ဌာယ သာယနှ-ကာလံ ယာဝ ပဝတ္တယံ.

၃၃. အသက္ကုဏန္တော’ဘိဘဝံ၊ ဝိဓာတုံ တဿ ကဉ္စိပိ၊

တတောဝ သော နိဝတ္တိတွာ၊ သကံ ရဋ္ဌံ ဂတော လဟုံ.

၃၄. ဂဇဗာဟုဿဂေါကဏ္ဏ-သစိဝေန ပရာဇိတော၊

အဂါ ရဋ္ဌံ သကံ ကိတ္တိ-သိရိမေဃော’ပိ ဘူပတိ.

၃၅. ဂဇဗာဟုနရိန္ဒောပိ၊ သင်္ဂါမေ တမှိ ကိဉ္စိပိ၊

ပရိဟာနိမသမ္ပတ္တော၊ ပုနာ’ဂမ္မ ပုရန္တိကံ.

၃၆. ဗလနာထေ ဝိနိဂ္ဂယှ၊ သာပရာဓေ ဗဟူ ဗလီ၊

ရဋ္ဌံ ဝူပသမေတွာန၊ ပါဝေက္ခိ နဂရံ သကံ.

၃၇. ရဋ္ဌေ သကေ သကေယေဝ၊ တတော ပဘူတိ ဘူမိပါ၊

အညောညမိတ္တေ သမ္ဗန္ဓံ၊ ဝိဓာယ ဝိဟရိံသု တေ.

၃၈. တတော ပရက္ကမဘုဇော၊ ဓရဏီ ပါလနန္ဒနော၊

မေဓာဝီနေကသိပ္ပေသု၊ သိက္ခမာနော သုသာဓုကံ.

၃၉. ဝိစာရက္ခမပညတ္တာ၊ ကိစ္စာ ကိစ္စေသု နေကသော၊

အစ္စုဠာရာသယတ္တာ စ၊ မဟာဘာဂတ္တနေန စ.

၄၀. အတ္တနော မာတုဘဂိနီ၊ သဟဝါသ သုခမှိ စ၊

အလဂ္ဂမာနသောနေက၊ ဗလာကီဠာရသေသု စ.

၄၁. သူရဘာဝါဒိသံယုတ္တာ၊ ရာဇပုတ္တာ တု မာဒိသာ၊

ပစ္စန္တေ ဤဒိသေ ဒေသေ၊ ကထံ နာမ ဝသိဿရေ.

၄၂. ဇာတဒေသဉ္စ မေ ဒါနိ၊ ယုဝရာဇပဘောဂိယံ၊

ဂမိဿာမီတိ နိဂ္ဂဉ္ဆိ၊ တမှာ ပရိဇနတ္ထိတော.

၄၃. ကမေန သန္တိကံ သင်္ခ-နာယကတ္ထလိသညိနော၊

ဂါမဿာဂါ အဟိံ ကိတ္တိ-သိရိမေဃော နိသမ္မ တံ.

၄၄. အဘာဝါ ရဇ္ဇ ဒါယာဒ-သမာနဿ’တြဇဿ မေ၊

ဧကာကီ’ဟန္တိ ယော စိတ္တ-သန္တာပေါ သန္တတံ ဂတော.

၄၅. ဇေဋ္ဌံဝ ဘာတရံ မယှံ၊ တံ ဒေဟပဋိဗိမ္ဗကံ၊

ဒဋ္ဌုံ မေ သတ္တတံ ပုညံ၊ မဟန္တမုဒိတံတိစ.

၄၆. ပါမုဇ္ဇဝေဂဝသဂေါ၊ နဂရံ တံ မနောဟရံ၊

အလင်္ကာရာ ပယိတွာန၊ တောရဏာဒီဟိ နေကဓာ.

၄၇. ဂန္တွာ ပဋိပထံယေဝ၊ ဗလောဃပရိဝါရိတော၊

နရိန္ဒော တိထိနက္ခတ္တ-ဝိသေသေ သုဘသမ္မတေ.

၄၈. အနညသာဓာရဏတံ၊ သမ္ပတ္တေဟိ ဂုဏေဟိ စ၊

လက္ခဏေဟိ စ သဗ္ဗေဟိ၊ ကလျာဏေယိ သုသံယုတံ.

၄၉. ဒိသွာ ကုမာရံ သန္တုဋ္ဌော၊ အာလိင်္ဂိတွာန ပေမတော၊

ဥရေ ကတွာန စုမ္ဗိတွာ၊ မတ္ထကမှိ ပုနပ္ပုနံ.

၅၀. ဇနဿ ဗလတော တဿ၊ ပဿတော လောစနေဟိ သော၊

သန္တောသ အဿုဓာရာယော၊ ဝဿာပေန္တော နိရန္တရံ.

၅၁. မနုညမေက မာရုယှ၊ ဝါဟနံ သဟ သူနုနာ၊

ဘေရိနိ ဒေန ပူရေန္တော၊ ဒိသာ ဒသ သမန္တတော.

၅၂. ပဝိသိတွာ ပုရံ တတ္ထ၊ အလင်္ကာရေ မနောရမေ၊

ဒဿယန္တော သပုတ္တဿ၊ ပါဝိသိ ရာဇမန္ဒိရံ.

၅၃. လဒ္ဓါ တတော ကဉ္စုကီ-သုပကာရ၊

ဝဂါဒိနေကေ ပရိစာရကေ သော၊

နာနာဂုဏာ ရာဓိတမာနသဿ၊

ဝသီသကာသေ ပိတုနော သုခေန.

သုဇနပ္ပသာဒသံဝေဂတ္ထာယ ကတေ မဟာဝံသေ

သင်္ခတ္ထလိပုရာဘိဂမနော နာမ

ဧကသဋ္ဌိမော ပရိစ္ဆေဒေါ.