ပဉ္စပညာသတိမ ပရိစ္ဆေဒ
ရောဟဏာရာတိ ဝိဇယောနာမ
၁. လောကနာမော စမူနာထော၊ မက္ခကုဒြူသဝါသိကော၊
သစ္စပဋိညော ဓီတိမာ၊ စောဠဒပ္ပဝိဃာတနော.
၂. အဘိဘူယ ဇနေ ပတွာ၊ ရဇ္ဇံ ရောဟဏမဏ္ဍလေ၊
ဝသီ ကာဇရဂါမမှိ၊ စာရိတ္တဝိဓိကောဝိဒေါ.
၃. အဟု တဒါ ကိတ္တိနာမော၊ ရာဇပုတ္တော မဟဗ္ဗလော၊
တဿ ဝံသာဒိသမ္ပတ္တီ၊ နုပုဗ္ဗေန ပဝုစ္စတေ.
၄. သုတော ကဿပဘူပဿ၊ မာဏနာမေန ဝိဿုတော၊
အာဒိပါဒေါ အဟု ဓီရော၊ သဒါစာရဝိဘူသိတော.
၅. တဿာ’ထ ဇေဋ္ဌကော ဘာတာ၊ မာဏဝမ္မော မဟာမတိ၊
ဂေါကဏ္ဏကသမီပဋ္ဌ-နဒီတီရေ နိသီဒိယ.
၆. ကတမန္တုပစာရော သော၊ ယထာဝိဓိမသေသတော၊
အက္ခမာလံ ဂဟေတွာန၊ မန္တံ ဇပ္ပိတုမာရဘိ.
၇. ကုမာရော ကိရ ဘတ္တဂ္ဂေ၊ ပါတုရာသိ သဝါဟနော၊
သိခဏ္ဍိ မုခတုဏ္ဍေန၊ ဗလိပဋ္ဋံ ဝိခဏ္ဍိယ.
၈. သစ္ဆိဒ္ဒကေ နာဠိကေရ-ကပါလေ ဝိစ္စုနောဒကေ၊
လူခေ ဇလမပဿန္တော၊ ဇပန္တဿ မုခံဂတော.
၉. တတော ဘာဝိနိံ သိဒ္ဓိ၊ မပေက္ခံ နယနံ သကံ၊
တဿောပနေသိ၊ နိဗ္ဘိဇ္ဇ၊ သောပိ တံ သဟသာပိစိ.
၁၀. ကုမာရော တဿ သန္တုဋ္ဌော၊ ကုမာရဿာဘိပတ္ထိတံ၊
ဝရံ ပဒါယ နဘသာ၊ ရာဇမာနော ဂတော တတော.
၁၁. ဘိန္နေကနယနံ ဒိသွာ၊ သစိဝါတံ ပရော ဒိသုံ၊
ဝရလာဘံ ပကာသေတွာ၊ သမဿာသေသိ သော ဇနေ.
၁၂. တတော သော သစိဝါတဿ၊ သန္တုဋ္ဌာရာဓယိံသု တံ၊
အနုရာဓပုရံ ပတွာ၊ ဘိသေကော ကာရိယော ဣတိ.
၁၃. အတ္ထော ကော မမရဇ္ဇေန၊ ဝိကလင်္ဂဿ သမ္ပတိ၊
တပေါကမ္မံ ကရိဿာမိ၊ ပဗ္ဗဇ္ဇမုပဂမ္မဟံ.
၁၄. ကဏိဋ္ဌော မာဏနာမော စ၊ လင်္ကာရဇ္ဇံ ကမာဂတံ၊
ပါလေတု ဣတိ သော ရဇ္ဇံ၊ သမ္ပတ္တံ သမ္ပဋိက္ခိပိ.
၁၅. ဝိညာတစိတ္တသဉ္စာရာ၊ သစိဝါ တဿ သဗ္ဗထာ၊
ဝတ္တုမေတံ ကဏိဋ္ဌဿ၊ ပေသေသုံ ပုရိသေ တဒါ.
၁၆. သုတွာ တံ သီဃမာဂမ္မ၊ ပဿိတွာ သကဘာတရံ၊
ပတိတွာ ပါဒမူလမှိ၊ ဗဟုံ ကန္ဒိယ ရောဒိယ.
၁၇. ဇေဋ္ဌေန ဘာတရာ သဒ္ဓိ-မနုရာဓပုရံ ဂတော၊
မကုဋံ တတ္ထ ဓာရေသိ၊ ဇေဋ္ဌစိတ္တာနုဝတ္တကော.
၁၈. တတော’ဘယဂိရိံ ဂန္တွာ၊ ပဗ္ဗဇ္ဇံ သကဘာတုနော၊
ယတ ယော တတ္ထ ယာစိတ္ထ၊ ဗဟုမာနပုရဿရံ.
၁၉. တတော တေ ယတယော တဿ၊ ပဗ္ဗဇ္ဇမုပသမ္ပဒံ၊
အကံသု ဝိကလင်္ဂဿ၊ သိက္ခာပဒနိရာဒရာ.
၂၀. ပရိဝေဏမုတ္တရောဠ-မုဠာရံ တဿ ကာရိယ၊
ကတွာ တံ ပရိဝေဏဿ၊ သာမိကံ ဓရဏီ ပတိ.
၂၁. ဘိက္ခူနံ ဆသတံ တတ္ထ၊ ဝိဓာယ တဒဓီနကံ၊
ပရိဟာရေ အဒါ တဿ၊ ပေဿဝဂ္ဂေ စ ပဉ္စ သော.
၂၂. သမပ္ပေသိ စ သော နာနာ-သိပ္ပကမ္မဝိစက္ခဏေ၊
ဇနေ စာကာ တဒါယတ္တေ၊ သော ဒါဌာဓာတုရက္ခိယေ.
၂၃. တဿေဝါဒကရာ’ဟေသုံ၊ ဘိက္ခူ’ဘယဂိရိမှိ တေ၊
ရာဇာ စ လောကံ ပါလေသိ၊ သမ္မာ တဿာနုသိဋ္ဌိယာ.
၂၄. ဇနာ တဗ္ဗံသဇာ ကေစိ၊ တံ ရဇ္ဇနိရပေက္ခကာ၊
နိဝသိံသု ယထာကာမံ၊ မဟာသာမိ ပဒံသိတာ.
၂၅. ဧတဿ မာဏဝမ္မဿ၊ ရညော ဓမ္မနယညုနော၊
အဂ္ဂဗောဓိကုမာရာဒိ-ပုတ္တနတ္တုက္ကမာဂတေ.
၂၆. ဝံသေ ဝိသုဒ္ဓေ ဇာတဿ၊ ဘူပါလနွယမုဒ္ဓနိ၊
သမာသောဠသကင်္ကာယံ၊ သမ္မာ ရဇ္ဇာနုသာသိနော.
၂၇. မဟီပဿ မဟိန္ဒဿ၊ ဒုဝေ မာကုလဓီတရော၊
ဒေဝလာ လောကိကာ စာတိ၊ နာမတော ဝိဿုတာ သုဘာ.
၂၈. ဧတာသု ဒွီသု ဓီတာသု၊ လောကိကာ မာတုလတ္တဇံ၊
ပဋိစ္စ ရာဇတနယံ၊ သုဘံ ကဿပနာမကံ.
၂၉. သာ မောဂ္ဂလ္လာန လောကဝှေ၊ ပုတ္တေ ဒွေ လဘိ သောဘနေ၊
တေသု ဇေဋ္ဌသုတော လောက-သာသနာဓာရကောဝိဒေါ.
၃၀. မဟာသာမီတိ ပညာတော၊ သင်္ဃုပါသနပါလယော၊
နေကသာရဂုဏာဝါသော၊ ဝါသံ ကပ္ပေသိ ရောဟဏေ.
၃၁. ဒါဌောပတိဿ ရာဇဿ၊ နတ္တာ သုဂတသာသနေ၊
ပဗ္ဗဇ္ဇူပဂတော သဒ္ဓေါ၊ ဓုတဝါ သီလသံဝုတော.
၃၂. ပဟိတတ္တော ဝိစိတ္တောသော၊ ပန္တသေနာသနေ ဝသီ၊
ဂုဏံ သဗ္ဗတ္ထ ဝဏ္ဏေသုံ၊ တသ္မိံ ဒေဝါ ပသီဒိယ.
၃၃. ဂုဏံ သုဏိတွာ လံကိန္ဒော၊ တဒါ သဗ္ဗတ္ထ ပတ္ထဋံ၊
ဥပသင်္ကမ္မ တံ နတွာ၊ ကာတုမတ္တာနုသာသနံ.
၃၄. အာရာဓယမနိစ္ဆန္တံ၊ ယာစိတွာန ပုနပ္ပုနံ၊
အာနီယ ဝါသယိတွာ တံ၊ ပါသာဒေ သာဓုကာရိတေ.
၃၅. ယတိဿရဿ ဝသတော၊ ကတ္ထ ရာဇာဂုဏပ္ပိယော၊
တဿာနုသိဋ္ဌိမဂ္ဂဋ္ဌော၊ လောကံ ဓမ္မေန ပါလယိ.
၃၆. ဥဒ္ဒိဿာရာဓနံ သမ္မာ၊ လံကိန္ဒေန ကတံ တဒါ၊
သေလန္တရာဘိနိက္ခမ္မ၊ ယတိန္ဒော သော ဒယာနုဂေါ.
၃၇. ယတော ဘိက္ခူ သမူဟေတွာ၊ ဝါသံ ကပ္ပေသိ ယတ္ထ သော၊
သေလန္တရသမူဟော’တိ၊ ဝိက္ချာတိံ သော တတော ဂတော.
၃၈. တတော ပဋ္ဌာယ ဝါသေတွာ၊ ရတ္တိယံ ဒေဝပလ္လိယံ၊
ဒေဝတာနုမတံ ဘိက္ခုံ၊ မူလဌာနေ ဌပေန္တိ ဟိ.
၃၉. မူလတ္တမာဝသန္တာနံ၊ ယတီနမနုသာသနာ၊
လံကိဿရာ ပဝတ္တန္တိ၊ ပါလေန္တာ လောကသာသနံ.
၄၀. တဿ ဒါဌောပတိဿဿ၊ ဝံသဇံ ရာဇပုတ္တကံ၊
ဗောဓိံ ပဋိစ္စ တဗ္ဗံသာ၊ ဗုဒ္ဓနာမာ ကုမာရိကာ.
၄၁. အလတ္ထ လောကိတံ နာမ၊ ဓီတရံ ဝရလက္ခဏံ၊
ကာလေန သာ ပဒိန္နာ’သိ၊ မောဂ္ဂလ္လာနဿ ဓီမတော.
၄၂. သာ တံ ပဋိစ္စ ကိတ္တိဉ္စ၊ မိတ္တံ နာမ ကုမာရိကံ၊
မဟိန္ဒံ ရက္ခိတံ စာပိ၊ လတိတ္ထ စတုရော ပဇာ.
၄၃. အဟု ဇေဋ္ဌသုတော ဓီရော၊ ဝီရော တေရသဝဿိကော၊
ကတဟတ္ထော ဝိသေသေန၊ ဓနုသိပ္ပမှိ သော တတော.
၄၄. ကထံ လင်္ကံ ဂဟေဿာမိ၊ ဒူရေတွာ’ရာတိ ကဏ္ဋကံ၊
ဣတိ စိန္တာပရောဂါမေ၊ မူလသာလဝှယေ ဝသီ.
၄၅. ဧကော မဟာဗလော ဝီရော၊ ဗုဒ္ဓရာဇောတိ ဝိဿုတော၊
ဝိလောမဝတ္တီ ဟုတွာန၊ လောကသေနာနိနော တဒါ.
၄၆. ပလာတော စုဏ္ဏသာလဝှံ၊ ခိပ္ပံ ဇနပဒံ တဟိံ၊
ကိတ္တာဒိကေ ဇနေ နေကေ၊ ဝသေ ဝတ္တိယ သဗ္ဗထာ.
၄၇. သဒ္ဓိံ ဗန္ဓူဟိ သင်္ဂါမ-သူရေဟိ ဗဟုကေဟိ သော၊
မလယာစလပါဒေသု၊ ဝသီ ဒုပ္ပသဟော တဒါ.
၄၈. တဿ’န္တိကမုပါဂမ္မ၊ သံဝစ္ဆရိကနာယကော၊
သံဃော နာမ ကုမာရဿ၊ သရူပံ သာဓုဝံ ဗြဝိ.
၄၉. မဟာသာမိဿ တနယော၊ ဇေဋ္ဌော ကိတ္တိ သနာမကော၊
ဓညလက္ခဏသမ္ပန္နော၊ သမ္ပန္နမတိဝိက္ကမော.
၅၀. ဇမ္ဗုဒီပေပိ တံ ရဇ္ဇံ၊ ကတ္တုမေကာတပတ္တကံ၊
သမတ္ထောတိ ဝိစိန္တေပိ၊ လင်္ကာဒီပမှိ ကာ ကထာ.
၅၁. တဿ သော ဝစနံ သုတွာ၊ သေဝိတဗ္ဗော ကုမာရကော၊
ဣတိ နိစ္ဆိယ ပေသေသိ၊ ကုမာရဿ’န္တိကံ ဇနေ.
၅၂. သုဏိတွာ သော ဝစော တေသံ၊ နိဝတ္တနဘယာ ဝိဘူ၊
အဇာနဟံ ပိတုန္နံ သော၊ ဝီရော ဓနုသဟာယကော.
၅၃. ဂေဟာ နိက္ခမ္မ ပဿန္တော၊ သုနိမိတ္တာနိနေကဓာ၊
အဂါလဟုံ သရီဝဂ္ဂ-ပိဋ္ဌိဂါမံ မဟာမတိ.
၅၄. တဟိံ သော နိဝသံ ဝီရော၊ ပေသယိတွာ သသေဝကေ၊
ဝိပက္ခာဓိဋ္ဌိတံ ဇေသိ၊ ဗောဓိဝါလဝှဂါမကံ.
၅၅. တတော’ဘိမာနီ သေနာနီ၊ သေနံ သော တတ္ထ ပေသယိ၊
သာ ပရိက္ခိပတံ ဂါမံ၊ သင်္ဂါမာယ သမာရဘီ.
၅၆. ကုမာရော တေဟိ ယုဇ္ဈန္တော၊ သုဘဋော ပဋုဝိက္ကမော၊
ဒိသာသု ဝိကိရီသဗ္ဗေ၊ တုလံ စဏ္ဍောဝ မာဠုတော.
၅၇. စုဏ္ဏသာလံ ဇနပဒံ၊ ဂန္တွာ ဌာနဝိဒူ တဒါ၊
တဟိံ ဝသံ ဝသေကာသိ၊ သဗ္ဗံ မလယမဏ္ဍလံ.
၅၈. တဒါပိ သေနံ သေနိန္ဒော၊ ပေသေတွာ အသကိံ သကံ၊
အဘိဘူတိမသက္ကောန္တော၊ ကာတုံ ဒုမ္မနတံ ဂတော.
၅၉. မက္ခကုဒြုသဝါသိဿ၊ သစိပဿာထ ကိတ္တိနော၊
သုတော မဟဗ္ဗလော ဒေဝ-မလ္လောတိ ဝိဒိတော တဒါ.
၆၀. သဟိတော ဗန္ဓုမိတ္တေဟိ၊ ဗဟူ ရောဟဏဝါသိနော၊
သမာဒါယာ’ဘိဂန္တွာန၊ ကုမာရံ ပဿိ သာဒရော.
၆၁. ဗန္ဓိယ ဆုရိကံ ဆေကော၊ သော ပန္နရသဝဿိကော၊
အာဒိပါဒပဒံ တတ္ထ၊ သမ္ပာပုဏိ မဟာယသော.
၆၂. တတော ဟိရညမလယ၊ မုပါဂမ္မ မဟဗ္ဗလော၊
တဟိံ ရေမုဏသေလမှိ၊ ခန္ဓာဝါရံ နိဗန္ဓယိ.
၆၃. တတ္ထာပိ သေနံ ပေသေတွာ၊ သင်္ဂါမေန္တော စမူပတိ၊
အလဒ္ဓဝိဇယော ဆန္ဒံ၊ ပုနယုဒ္ဓေ ဇဟိတတော.
၆၄. လောကနာမော စမူနာထော၊ လောကံ ဟိတွာ သကံ တဒါ၊
အဟု ဝဿမှိ ဆဋ္ဌေသော၊ ပရလောကပရာယနော.
၆၅. တဒါ ကဿပနာမေကော၊ ကေသဓာတုကနာယကော၊
ဇနေ’ဘိဘူယဝတ္တေသိ၊ နီဇာဏံ ရောဟဏေ တဒါ.
၆၆. သုတွာ တံ စောဠသာမန္တော၊ ပုဠတ္ထိနဂရာ တဒါ၊
နိက္ခမ္မ ယုဒ္ဓသနဒ္ဓေါ၊ ဂန္တွာ ကာဇရဂါမကံ.
၆၇. ကေသာဓာတု တတော ယုဒ္ဓေ၊ ဘိန္ဒိတွာ ဒမိဠံ ဗလံ၊
ရက္ခပါသာဏသီမာယံ၊ ဌပေတွာ ရက္ခိယေ ဇနေ.
၆၈. ပဋိလဒ္ဓဇယုဒ္ဒါမော၊ မဟာသေနာ ပုရက္ခတော၊
ပုနရာဂမ္မ ပါဝေက္ခိ၊ ဝီရော ကာဇရဂါမကံ.
၆၉. တဒါဒိပါဒေါ သုတွာန၊ သဗ္ဗံ သုတ္ထီရဓာတုကော၊
ကေသဓာတုံ နိဃာတေတုံ၊ ဗလံ သန္နယှိ ဝေဂသာ.
၇၀. ပဝတ္တိံ တံ သုဏိတွာ သော၊ သာဘိမာနော ဘုသံတတော၊
သမတ္တံ ဗလမာဒါယ၊ သိပ္ပတ္ထလကမာဂမာ.
၇၁. ပဉ္စယောဇနရဋ္ဌာဒိ-ဝါသိကေသု ဗဟူဇနေ၊
သမာဒါယ သမာသန္နေ၊ ရာဇပုတ္တေ သုဒုဇ္ဇယေ.
၇၂. ဝိရတ္တတဉ္စ သော ဉတွာ၊ ဗဟုန္နံ ရဋ္ဌဝါသိနံ၊
ဒုက္ကရံ ဧတ္ထ ယုဒ္ဓန္တိ၊ ဂတော သော ခဒိရင်္ဂဏိံ.
၇၃. မဟာသေနာယ ဘူပါလ သုတော သောဠသဝဿီကော၊
ခိပ္ပံ ဝါပေက္ခိ သော ဝီတ-ဒရော ကာဇရဂါမကံ.
၇၄. ဆမ္မာသမနုဘောတွာန၊ ရောဟဏံ ရုဋ္ဌမာနသော၊
ကေသဓာတုကနာထောပိ၊ သင်္ဂါမတ္ထာယ တတ္ထဂါ.