ဆပညာသတိမ ပရိစ္ဆေဒ

အနုရာဓပုရာဘိဂမနော

၁. ယုဝရာဇပဒေ တဿ၊ ဌိတဿာ’ထ နယညုနော၊

အဟူ ဝိဇယဗာဟူတိ၊ နာမံ သဗ္ဗတ္ထ ပါကဋံ.

၂. မဟာညဏော နိဇာဏာယ၊ တတ္ထ ဘေရိံ စရာဝိယ၊

ဌပေန္တော သစိဝေ’နေကေ၊ ပတိရူပေ ပဒန္တရေ.

၃. စောဠာနံ မဒ္ဒနတ္ထာယ၊ ရာဇရဋ္ဌာဓိဝါသိနံ၊

စတုရော စတုရောပါယေ၊ ယော ဇယံ တတ္ထ သော ဝသီ.

၄. စောဠရာဇာ သုဏိတွာ တံ၊ ပုဠတ္ထိနဂရေ ဌိတံ၊

သေနာပတိမ ပေသေသိ၊ ဒတွာန ဗလဝါဟနံ.

၅. သေနိန္ဒံ ကာဇရဂ္ဂါမ-သမီပံ သမုပါဂတံ၊

ဒုပ္ပသယှံ ဝိဒိတွာန၊ ဂိရိဒုဂ္ဂမဂါ တတော.

၆. သေနိန္ဒော ကာဇရဂ္ဂါမံ၊ ဝိလုမ္ပိတွာန ဝေဂသာ၊

တတ္ထ ဝတ္ထုမသက္ကောန္တော၊ သဒေသံ ပုန ရာဂမိ.

၇. တတော မဟာဒိပါဒေါ’ပိ၊ အာဂမ္မ မလယာ လဟုံ၊

မဟတာ ဗလကာယေန၊ သိပ္ပတ္ထလကမာဝသိ.

၈. ရာဇာ ရာမညဝိသယေ၊ ရာဇိနော သန္တိကံ ဇနေ၊

ပေသေသိ ဗဟုကေသာရံ၊ ဓနဇာတဉ္စ’နပ္ပကံ.

၉. ဝိစိတ္တဝတ္ထကပ္ပူရ-စန္ဒနာဒီဟိ ဝတ္ထူဟိ၊

ပရိပုဏ္ဏာ စ နာဝါယော၊ နေကာတိတ္ထေ သမောသဋာ.

၁၀. ဓနဇာ တေဟိ နေကေဟိ၊ ကရောန္တော ဘဋသင်္ဂဟံ၊

တတော တမ္ဗလဂါမမှိ၊ နိဝသိတ္ထ မဟဗ္ဗလော.

၁၁. အညမညဝိရုဒ္ဓတ္တာ၊ ရာဇာရဋ္ဌာဓိဝါသိနော၊

ဥပဂ္ဂမ္မ ဇနာ သဗ္ဗေ၊ ကရံ နော ဒေန္တိ သဗ္ဗသော.

၁၂. ဝိပက္ခာစောဠရာဇဿ၊ ဘိန္ဒန္တာ’ဏံ မဒုဒ္ဓတာ၊

အာယုတ္တကေ ဝိဟိံသေန္တော၊ ယထာကာမံ စရန္တိ စ.

၁၃. တံ သုတွာ စောဠဘူပါလော၊ သမ္ပကောပဝသီကတော၊

သေနံ မဟန္တိံ ဒတွာန၊ ပေသေသိ သစိဝံ နိဇံ.

၁၄. မဟာတိတ္ထေ’ဝဟိဏ္ဏော သော၊ တတ္ထ တတ္ထ ဗဟူဇနေ၊

ဃာတေန္တော သဝသေ ကတွာ၊ ရာဇာရဋ္ဌာဓိဝါသိနော.

၁၅. အနုက္ကမေန ဂန္တွာန၊ ခရာဏော ရောဟဏံ တဒါ၊

အဇ္ဈောတ္ထရိ သသေနော သ၊ ဘိန္နော ဝေလောဝသာဂရော.

၁၆. ရညော ပစ္စတ္ထိကာ ဟုတွာ၊ ရဝိဒေဝစလဝှယာ၊

ဥဘော ဒမိဠသေနိန္ဒ-ဝသံ ယာတာ မဟဗ္ဗလာ.

၁၇. မဟာပက္ခဗလောပေတေ၊ တေ ပဿိယ စမူပတိ၊

ရောဟဏံ သကလံ ခိပ္ပံ၊ မညိတ္ထ သကဟတ္ထဂံ.

၁၈. ဧကာဒသမှိ သော ဝဿေ၊ ရာဇာ စောဠာဘိဘူတိယာ၊

ပလုဋ္ဌပဗ္ဗတေ ဒုဂ္ဂံ၊ ပဝိဓာယ တဟိံ ဝသီ.

၁၉. စောဠသေနာ တဒါသေလံ၊ သမန္တာ သမ္ပရိက္ခိပိ၊

တတ္ထော’ဘယေသံ သေနာန-မဟူ ဘိံသနကံ ရဏံ.

၂၀. ရညော ဘဋာ ဝိနာသေတွာ၊ သဗ္ဗံ တံ ဒမိဠံ ဗလံ၊

ပလာယန္တံ မဟာစောဠ-သာမန္တဉ္စာနုဗန္ဓိယ.

၂၁. ဂဟေတွာန သိရံ တဿ၊ ဂါမသ္မိံ တမ္ဗဝိဋ္ဌိကေ

သဒ္ဓိံ ဝါဟနယာနေဟိ၊ သာရဘူတဓနေဟိ စ.

၂၂. တဟိံ တံ သကလံ ဘဏ္ဍံ၊ နေတွာ ရညော ပဒဿိယ၊

ပုဠတ္ထိနဂရံ ဂန္တုံ၊ ကာလော ဣတိ သမဗြဝုံ.

၂၃. မဟီပါလောပိ တံ သုတွာ၊ သစိဝါနံ ဝစော တဒါ၊

မဟတာ ဗလကာယေန၊ ပုလတ္ထိနဂရံ ဂတော.

၂၄. ပဝတ္တိမေတံ သကလံ၊ သုတွာ စောဠနရိဿရော၊

တိဗ္ဗကောပဝသံယာတော၊ ဘူပါလဂဟဏတ္ထိကော.

၂၅. သာမံ ခိပ္ပံ သမာဂမ္မ၊ ဝီရော သာဂရပဋ္ဋနံ၊

ဘိယျောပိ မဟတိံ သေနံ၊ လံကာဒီပမပေသယီ.

၂၆. တံ ဝိဇာနိယ ဘူမိန္ဒော၊ သေနိန္ဒံ ပေသယီ သကံ၊

ဗလံ မဟန္တံ ဒတွာန၊ စောဠသေနာယ ယုဇ္ဈိတုံ.

၂၇. ဂစ္ဆမာနော စမူနာထော၊ သော’နုရာဓပုရန္တိကေ၊

သဒ္ဓိံ ဒမိဠသေနာယ၊ ဝတ္တေသိ တုမုလံ ရဏံ.

၂၈. ပတိံသု တသ္မိံ သင်္ဂါမေ၊ ဘူပါလဿ နရာ ဗဟူ၊

ဘိယျောပိ ဒမိဠာယတ္တာ၊ ဇာတာ တံ ရဋ္ဌဝါသိနော.

၂၉. ဝိဟာယ ဓရဏီပါလော၊ ပုလတ္ထိနဂရံ တဒါ၊

ဝိလ္လိကာဗာဏကံ ရဋ္ဌံ၊ သမ္ပာပုဏိယ ဝေဂသာ.

၃၀. နိဟစ္စာမစ္စယုဂလံ၊ တံ ရဋ္ဌာဓိဋ္ဌိတံ တဒါ၊

တဟိံ ဝါသမကပ္ပေသိ၊ သဘဋေ သန္နိပါတယံ.

၃၁. အတ္တာနမနုဗန္ဓန္တံ၊ သုတွာ စောဠစမူပတိံ၊

ဂန္တွာ ဝါတဂိရိံ နာမ၊ သမယညူ သိလုစ္စယံ.

၃၂. ဥပစ္စကာယ သေလဿ၊ တတ္ထ ဒုဂ္ဂံ နိဝေသိယ၊

ရဏံ ကရောန္တော တေမာသံ၊ ဒမိဠေ ပဋိဗာဟယိ.

၃၃. ကေသဓာတုကနာထဿ၊ မာရိတဿ ပုရာရဏေ၊

ဘာတာ ကဏိဋ္ဌော သမ္ပတ္တ၊ မဟာပက္ခဗလော တဒါ.

၃၄. မာရဏံ သကဘာတုဿ၊ သရန္တော ရုဋ္ဌမာနသော၊

သကလံ ပရိဝတ္တေသိ၊ ဂုတ္တဟာလကမဏ္ဍလံ.

၃၅. အထော လံကိဿရော တတ္ထ၊ ခိပ္ပံ ဂန္တွာ မဟဗ္ဗလော၊

ဌာနေ မစ္စုတ္ထလေ နာမ၊ ခန္ဓာဝါရံ နိဗန္ဓိယ.

၃၆. ခဒိရင်္ဂဏိဒုဂ္ဂမှာ၊ ပလာပေတွာန တံ ရဏေ၊

ဌာနာ ကုဗုလဂလ္လာ စ၊ ယုဇ္ဈန္တော တံ ပလာပယိ.

၃၇. ဝိဟာယ ပုတ္တဒါရာဒိ-သဗ္ဗံ နေကဓနံ ဗလံ၊

ပလာယမာနော သော ရဋ္ဌံ၊ စောဠာယတ္တ မဂါလဟုံ.

၃၈. တဒါ နရိဿရော တတ၊ တဿ သဗ္ဗံ သမာဒိယ၊

ဂန္တွာ တမ္ဗလဂါမမှိ၊ နဝံ ဒုဂ္ဂံ နိဝေသိယ.

၃၉. အနုက္ကမေန ဂန္တွာန၊ မဟာနာဂဟုလဝှယေ၊

ပုရေဝသီ သုသဇ္ဇေန္တော၊ ဗလံ စောဠေဟိ ယုဇ္ဈိတုံ.

၄၀. တတော ရာဇာ သမဝှါယ၊ သစီဝေ ဒွေ မဟဗ္ဗလေ၊

ပေသေသိ ဒိက္ခိဏံ ပဿံ၊ ဝသံ နေတုံ တဟိံ ဇနေ.

၄၁. သမ္ပေသေသိ မဟာမစ္စ-ယုဂလံ ကက္ခလံ ဝိဘူ၊

စောဠဒပ္ပဝိနာသာယ၊ တတော ဝေလာ မဟာပထေ.

၄၂. ပေသိတာ ဒက္ခိဏံ ပဿံ၊ အမစ္စာ’မေ မဟဗ္ဗလာ၊

မုဟုန္နရုဂ္ဂမဒုဂ္ဂံ၊ ဗဒဠတ္ထလမေဝ စ.

၄၃. ဝါပီနဂရဒုဂ္ဂဉ္စ၊ ဗုဒ္ဓဂါမကမေဝ စ၊

တိလဂုလ္လံ မဟာဂလ္လံ၊ မဏ္ဍဂလ္လကမေဝ စ.

၄၄. အနုရာဓပုရဉ္စာတိ၊ ဂဟေတွာန ကမေန တေ၊

ဝတ္တေန္တာ သဝသေ ရဋ္ဌံ၊ မဟာတိတ္ထမုပါဂတာ.

၄၅. ပေသိတာ သစိဝါဒွေတု၊ တတော ဝေလာ မဟာပထေ၊

ဝိလုမ္ပန္တာ ဆဂါမာဒိ-ခန္ဓာဝါရေ တဟိံ တဟိံ.

၄၆. ပုလတ္ထိနဂရာသန္နံ၊ ကမေနာ’ဂမ္မ ပေသယုံ၊

ဒူတေ ရာဇန္တိကခိပ္ပ-မာဂန္တုံ ဝဋ္ဋတီတိဟ.

၄၇. ဒိသာသာ ဒွီသု ယာနေဟိ၊ သစိဝေဟိ ပဝတ္တိတံ၊

ဝိက္ကမာတိ သယံ သုတွာ၊ ကာလညူ သော မဟီပဟိ.

၄၈. သီဃံ သန္နယှ သေနင်္ဂံ၊ သမဂ္ဂံ ဝိဒိကောဝိဒေါ၊

ဥမ္မူလနာယစောဠာနံ၊ ပုရာတမှာ’ဘိနိက္ခမိ.

၄၉. ဂစ္ဆံ ဂင်္ဂါယ မဟိယ-င်္ဂဏထူပန္တိကေ ဝိဘူ၊

သေနာနိဝေသံ ကာရေတွာ ကဉ္စိကာလံ တဟိံ ဝသီ.

၅၀. ကမေနာဂမ္မ ဌာနညူ၊ ပုဠတ္ထိနဂရန္တိကေ၊

ဗန္ဓာပေသိ မဟာဝီရော၊ ခန္ဓာဝါရံ ထိရံ ဝရံ.

၅၁. တတ္ထ တတ္ထ ဌိတာ သူရာ၊ စောဠာ ယေ ကက္ခလာ’ခိလာ၊

ပုလတ္ထိနဂရေ ယုဒ္ဓံ၊ ကာတုံ သန္နိပတိံသု တေ.

၅၂. နိက္ခမ္မ နဂရာ ဂန္တွာ၊ စောဠာ ဗဟိ မဟာရဏံ၊

ကတွာ ပရာဇိတာ ဘီတာ၊ ပဝိဿ နဂရံ သကံ.

၅၃. ဂုတ္တာ သေသပုရဒွါရာ၊ ဂေါပုရဋ္ဋာလနိဿိတာ၊

မဟာဟဝံ ဗဟုဿာဟာ၊ ပဝတ္တေသုံ ဘယာဝဟံ.

၅၄. ဒိယဍ္ဎမာသံ ယုဇ္ဈန္တိ၊ နဂရံ တမုပရုန္ဓိယ၊

သာဓေတုံ နေဝသာ’သက္ခိ၊ ဘူပါလဿ မဟာစမူ.

၅၅. မဟာရညော မဟာဝီရာ၊ မဟာသူရာ မဟဗ္ဗလာ၊

မဟာဘဋာ မဟာမာနာ၊ ရဝိဒေဝစလာဒယော.

၅၆. ဥလ္လင်္ဃိတွာန ပါကာရံ၊ ပဝိဿ သဟသာ ပုရံ၊

ခဏေန ဒမိဠေ သဗ္ဗေ၊ မူလဃစ္စမဃာတယုံ.

၅၇. ဧဝံ လဒ္ဓဇယော ရာဇာ၊ တဒါ ဝိဇယဗာဟုသော၊

စရာပေသိ နိဇာဏာယ၊ ဘေရိံ ဘူရိမတိပုရေ.

၅၈. တံ သုတွာ သကသေနာယ၊ ဝိနာသံ စောဠဘူပတိ၊

သီဟဠာ ဗလဝန္တောတိ၊ ဘိယျော သေနံ န ပါဟိဏိ.

၅၉. ဝီရော အသေသနိဟတုဒ္ဓဋ စောဠသေဋ္ဌော၊

ဝိညူ သုသာဓုဋ္ဌပိတာခိလရာဇရဋ္ဌော၊

ဣဋ္ဌန္နုရာဓပုရသေဋ္ဌမတီဝ ဟဋ္ဌော၊

ဝဿမှိ ပဉ္စဒသမေ ဂမိ ရာဇသေဋ္ဌော.

သုဇနပ္ပသာဒသံဝေဂတ္ထာယ ကတေ မဟာဝံသေ

အနုရာဓပုရာဘိဂမနော နာမ

ဆပ္ပညာသတိမော ပရိစ္ဆေဒေါ