စတုပညာသတိမ ပရိစ္ဆေဒ

ဆ ရာဇကောနာမ

၁. ကတွာ ဝိက္ကမ္မ ဗာဟူ’တိ၊ နာမ ဘူပါလသူနုတော၊

တဿာဏာယ ပဝတ္တိံသု၊ သာဒရံ သီဟဠာ ခိလာ.

၂. သော ရာဇာ ဒမိဠေ ဟန္တုံ၊ ဓနံ သဉ္စိယ’နေကာဓာ၊

သင်္ဂဟံ သေဝကာနဉ္စ၊ ကုရုမာနော ယထောစိတံ.

၃. အလင်္ကာရကိရီဋာနိ၊ ဆတ္တသီဟာသနာနိ စ၊

ကာရယိတွာ’ဘိသေကတ္ထံ၊ သစိဝေဟာ’ဘိယာစိတော.

၄. န ယာဝ ရာဇရဋ္ဌဿ၊ ဂဟဏံ ဟောတိ တာဝ မေ၊

ဆတ္တုဿာပနကမ္မေန၊ ကိံ တေနာ’တိ ဝိဝါရိယ.

၅. သတံ နရသဟဿာနံ၊ သင်္ကလေတွာ မဟဗ္ဗလော၊

သင်္ဂါမာရဗ္ဘ ကာလမှိ၊ ဝါတရောဂါဘိပီဠိတော.

၆. ယုဇ္ဈိတုံ သမယော နေတိ၊ ဒွါဒသေ ဝစ္ဆရေ လဟုံ၊

ဥပေစ္စ ဒေဝနဂရံ၊ ဂဉ္ဆိဒေဝသဟဗျတံ.

၇. ကိတ္တိနာမော စ သစိဝေါ၊ သေနာပစ္စမဓိဋ္ဌိတော၊

ရဇ္ဇတ္ထိကော ဒိနာနဋ္ဌ၊ နိဇာဏံ သမ္ပဝတ္တယိ.

၈. ဃာတေတွာ တံ မဟာလာန-ကိတ္တိနာမော မဟဗ္ဗလော၊

ပတွာ’ဘိသေကံ ဘုဉ္ဇန္တော၊ ဒေသံ တံ ရောဟဏဝှယံ.

၉. သံဝစ္ဆရမှိ တတိယေ၊ စောဠယုဒ္ဓေ ပရာဇိတော၊

သဟတ္ထေန သကံ သီသံ၊ ဆိန္ဒိတွာ သဟသာ မရိ.

၁၀. တဒါပိတေ ကိရီဋာဒိ-ဓနသာရံ သမာဒိယ၊

ပေသေသုံ ဒမိဠာ စောဠ-မဟီပါလဿ သန္တိကံ.

၁၁. ဘယာ သရဋ္ဌံ ဟိတွာ’ထ၊ ဒုဋ္ဌဒေသေ ဝသံ တဒါ၊

ဧကော ဝိက္ကမပဏ္ဍူတိ၊ ဝိဿုတော ပတ္ထိဝတ္တဇော.

၁၂. ဝိညာတလင်္ကာဝုတ္တန္တော၊ ဒေသမာဂမ္မ ရောဟဏံ၊

ကာဠတိတ္ထေ ဝသံ ဝဿ-မေကံ ရဇ္ဇမကာရယိ.

၁၃. ရာမနွယသမုဗ္ဘူတော၊ တဒါယုဇ္ဈ ပုရာဂတော၊

ဇဂတီ ပါလနာမေန၊ ဝိဿုတော ဘူဘုဇတ္တဇော.

၁၄. ရဏေ ဝိက္ကမပဏ္ဍုတံ၊ ဃာတာပေတွာ မဟဗ္ဗလော၊

တတော စတ္တာရိ ဝဿာနိ၊ ရဇ္ဇံ ကာရေသိ ရောဟဏေ.

၁၅. တမ္ပိ စောဠာရဏေ ဟန္တွာ၊ မဟေသိံ ဓီတရာ သဟ၊

ဝိတ္တသာရဉ္စ သာကလံ၊ စောဠရဋ္ဌမပေသယုံ.

၁၆. ရာဇာ ပရက္ကမော နာမ၊ ပဏ္ဍုရာဇသုတော တတော၊

အကာ ဝဿဒွယံ စောဠာ၊ ဃာတေသုံ တမ္ပိ ယုဇ္ဈိယ.

၁၇. ဣမေ ဘုသံ လောဘဗလာဘိဘူတာ၊

ဂတာ အသေသာ ဝိဝသာ ဝိနာသံ၊

ဣစ္စေဝမညာယ သဒါ သပညော၊

တဏှက္ခယေယေဝ ရတိံ ကရေယျ.

သုဇနပ္ပသာဒသံဝေဂတ္ထာယ ကတေ မဟာဝံသေ

ဆ ရာဇကော နာမ

စတုပညာသတိမော ပရိစ္ဆေဒေါ.