စတုစတ္တာလီသတိမ ပရိစ္ဆေဒ

တိရာဇကော

၁. အစ္စယေ ဟတ္ထဒါဌဿ၊ အဂ္ဂဗောဓိကုမာရကော၊

ကဏိဋ္ဌော ရာဇိနော အာသိ၊ သိရိသံဃာဒိ ဗောဓိကော.

၂. ဓမ္မရာဇာ အယံ အာသိ၊ သမ္မာ ဒဿနသညုတော၊

တသ္မာ သော ပုညကမ္မာနိ၊ အပ္ပမေယျာနိ ဝတ္တယိ.

၃. နိကာယတ္တယဝါသီနံ၊ ဘတ္တဂ္ဂမဝလောကယိ၊

မဟာပါဠိဉ္စ ဝဍ္ဎေသိ၊ မာဃာတဉ္စေဝ ကာရယိ.

၄. ဌာနန္တရဉ္စ ဒါပေသိ၊ ယထာရဟ မနာလယော၊

သိပဂေါတ္တာဒိယောဂ္ဂေဟိ၊ သံဂတေဟိ စ သံဂဟိ.

၅. ယတ္ထ ကတ္ထစိ ဒိသွာပိ၊ ဘိက္ခဝေါ သော မဟာမတိ၊

သက္ကတွာ သောဘဏာပေသိ၊ ပရိတ္တံ သာသနောဂဓံ.

၆. ထေရံ သော ဥပသင်္ကမ္မ၊ နာဂသာလနိဝါသိနံ၊

ဒါဌာသိဝံ မဟာပညံ၊ သီလဝန္တံ ဗဟုဿုတံ.

၇. သက္ကစ္စ နံ တတော သုတွာ၊ သမ္မာသမ္ဗုဒ္ဓသာသနံ၊

ဓမ္မေ’တီဝပသီဒိတွာ၊ သဗ္ဗသန္တိကရော ဣတိ.

၈. သုတွာ ထေရိယဝါဒါနံ၊ ပုဗ္ဗဉာတီနမတ္တနော၊

ပါပါနံ ဒုဋ္ဌစိတ္တာနံ၊ အပကာရေ ကတေ ဗဟူ.

၉. ဝိဟာရေ ပရိဝေဏေ စ၊ ဇိဏ္ဏေပါကတိကေ အကာ၊

ဘောဂဂါမေ စ ဒါပေသိ၊ တတ္ထ တတ္ထ ဗဟူဒယေ.

၁၀. ဝိစ္ဆိန္နပစ္စယေ စာကာ၊ တဒါတျံ ကုရိတေ ဝိယ၊

ဒါသကေပိ စ သံဃဿ၊ ယထာဌာနေ ဌပါပယိ.

၁၁. ပဓာနဃရ မေတဿ၊ ထေရဿ’ကာသနာမကံ၊

ပဋိဂ္ဂဟေတွာ တံ သော’ပိ၊ သံဃဿာ’ဒါ မဟာမတီ.

၁၂. ဘောဂဂါမေ စ တဿာ’ဒါ၊ ဘရတ္တာလံ ကိဟိမ္ဗိလံ၊

ကတကဉ္စ တုလာဓာရံ၊ အန္ဓကာရကမေဝ စ.

၁၃. အန္ဓကာရံ အန္တုရေဠိံ၊ ဗာလဝံ ဒွါရနာယကံ၊

မဟာနိကဍ္ဎိကဉ္စေဝ၊ ပေဠဟာဠံ တထာပရံ.

၁၄. ဧတေ အညေ စ သော ဒတွာ၊ ဘောဂဂါမေ နရိဿရော၊

ဒါသိ အာရာမိကေ စေဝ၊ အတ္တနော ကိရ ဉာတကေ.

၁၅. တထာ ဒွိန္နံ နိကာယာနံ၊ ဝိဟာရေ မန္ဒပစ္စယေ၊

ဒိသွာပိ စ သုတွာ ဝါ၊ ဘောဂဂါမေ ဗဟူ အဒါ.

၁၆. ဗဟုနာ ကိန္တုဝုတ္တေန၊ နိကာယေသု’ပိ တီသု’ပိ၊

အဒါ ဂါမသဟဿံ သော၊ ဗဟုပ္ပါဒံ နိရာကုလံ.

၁၇. အနုဿရန္တော သော တိဏ္ဏံ၊ ရတနာနံ ဂုဏေ ဝရေ၊

ဧကာဝလိံ ဂဟေတွာန၊ အက္ခမာလ မကာ ကိရ.

၁၈. ဧဝံ သဗ္ဗပ္ပယောဂေဟိ၊ သော’ဟု ဓမ္မပရာယနော၊

သဗ္ဗေ တမနုသိက္ခန္တာ၊ ဟေသု ဓမ္မကရာ နရာ.

၁၉. ဒမိဠော ပေါတ္ထကုဋ္ဌဝေါ၊ တဿ ကမ္မကရော တဒါ၊

မာဋမ္ဗိယဝှံ ကာရေသိ၊ ပဓာနဃရမဗ္ဘုတံ.

၂၀. ဗူကကလ္လေ အမ္ဗဝါပိံ၊ တန္တဝါယိကစာဋိကံ၊

ဂါမံ နိဋ္ဌိလဝေဋ္ဌိဉ္စ၊ တဿာ’ဒါ သော သဒါ သကံ.

၂၁. ကပ္ပူရပရိဝေဏေ စ၊ ကုရုန္ဒပိလ္လကေ တထာ၊

မဟာရာဇဃရေ စေဝ၊ ပါသာဒေ သော’ဝ ကာရယိ.

၂၂. အညတ္ထာ’ဒါ တယော ဂါမေ၊ ဝိဟာရေသု မဟာဓနော၊

ပေါတ္ထသာတဝှယော ပညော၊ ဝိဟာရေ ဇေတနာမကေ.

၂၃. သေနာပတိရာဇနာမံ၊ ပရိဝေဏံ သမာပယိ၊

မဟာကန္ဒော စ ဒမိဠော၊ ပရိဝေဏံ သနာမကံ.

၂၄. စုလ္လပန္ထံ တထာ ဧကော၊ သေဟာလဥပရာဇကံ၊

ဥပရာဇာ သကာရေသိ၊ သင်္ဃတိဿော’ပိ ရာဇိနော.

၂၅. အညေသု ဗဟဝေါ အာသုံ၊ ဝိဟာရေ ဧဝမာဒိကေ၊

ဘဿ ရညော’ နုဝတ္တန္တာ၊ ဧဝံ ဓမ္မီဟိ ပါဏိနော.

၂၆. ပါပံ ဝါပိ ဟိ ပုညံ ဝါ၊

ပဓာနောယံ ကရောတိ ယော၊

လော ကော တံ တံ ကရောတေဝ၊

တံ ဝိဇနေယျ ပဏ္ဍိတော.

၂၇. ဇေဋ္ဌနာမာ မဟာပုညာ၊ မဟေသီ တဿ ရာဇိနော၊

ဇေဋ္ဌာရာမဉ္စ ကာရေသိ၊ ဘိက္ခူနီနမုပဿယံ.

၂၈. တဿာ’ဒါသိ စ ဒွေ ဂါမေ၊ ပက္ကပါသာဏဘူမိယံ၊

တမ္ဗုဒ္ဓံ ဘေလဂါမဉ္စ၊ အာရာမိကသတံ တထာ.

၂၉. အကာ မလယရာဇာပိ၊ ဓာတုဂေဟံ မဟာရဟံ၊

မဏ္ဍလဂိရိဝိဟာရမှိ၊ စေတိယဿ မဟာဓနော.

၃၀. လောဟပါသာဒကေ သော’ဝ၊ ဆာဒေသိ မဇ္ဈကူဋကံ၊

ဗောဓိတိဿဝိဟာရဉ္စ၊ ဗောဓိတဿော မဟာယသော.

၃၁. ဒီပေ မဏ္ဍလိကာ သဗ္ဗေ၊ တတ္ထ တတ္ထ ယထာဗလံ၊

ဝိဟာရေ ပရိဝေဏေ စ၊ ကာရယိံသု အနပ္ပကေ.

၃၂. တဿ ကာလော နရိန္ဒဿ၊ ပုညကမ္မမယော ဣဓ၊

အတိဝိတ္ထာရဘီတေန၊ သဗ္ဗသော န ဝိစာရိတံ.

၃၃. ပုဗ္ဗကောပိ ကထာမဂ္ဂေါ၊ အာကုလော ဝိယ ဘာတိမေ၊

ယထာပဓာနံ ကထိတံ၊ ဟေတူနံ ဥပလက္ခဏံ.

၃၄. အထာပရေန ကာလေန၊ ပုလတ္ထိနဂရံ ဂတော၊

ဝါသံ တတ္ထေဝ ကပ္ပေသိ၊ ကရောန္တော ပုညသဉ္စယံ.

၃၅. အတေကိစ္ဆိယရောဂေန၊ သမ္ဖုဋ္ဌော ကာလမတ္တနော၊

မရဏဿ ဝိဒိတွာန၊ တမာဟုယမဟာဇနံ.

၃၆. ဩဝဒိတွာန ဓမ္မေန၊ မရဏံ သော ဥပါဂမိ၊

မဟာဇနော မတေ တသ္မိံ၊ ဗာဠှသောကော ပရောဒိယ.

၃၇. ကတွာ အာဠဟဏေ တဿ၊ ကိစ္စံ သဗ္ဗမသေသတော၊

တဿာဠာဟဏဘသ္မမ္ပိ၊ ကတွာ ဘေသဇ္ဇမတ္တနော.

၃၈. ရာဇာ ဘဏ္ဍဉ္စ တံ သဗ္ဗံ၊ သဗ္ဗဉ္စ ဗလဝါဟနံ၊

သမ္မာ အာဒါယ ဂေါပေတွာ၊ နဂရံ သမုပါဂမိ.

၃၉. ဧဝံ သောဠသမေ ဝဿေ၊ ရာဇာ အာသိ ဒိဝင်္ဂတော၊

ပေါတ္ထကုဋ္ဌောပိ ဒမိဠော၊ ရဇ္ဇံ တဿ ဝိစာရယိ.

၄၀. ဥပရာဇံ ဂဟေတွာန၊ ဒါဌာသိဝံ ခိပါပယိ၊

စာရကော ဝိဟိတုံ သမ္မာ၊ ရက္ခာဝရဏ မာဒိသိ.

၄၁. ဝိနာ ရညာ န သက္ကာတိ၊ မေဒိနိံ ပရိဘုဉ္ဇိတုံ၊

အာနေတွာ ဒတ္တနာမကံ၊ ဓနပိဋ္ဌပ္ပဓာနကံ.

၄၂. ဥပ္ပန္နံ ရာဇဝံသမှိ၊ ရဇ္ဇေ တံ အဘိသိဉ္စိယ၊

တဿ နာမံ ဌပေတွာန၊ သယံ သဗ္ဗံ ဝိစာရယိ.

၄၃. ဒန္တော သော ဓနပိဋ္ဌိမှိ၊ ဝိဟာရံ သကနာမကံ၊

ကာရယိတွာန ပုညာနိ၊ အညာနိပိ သမာစိနိ.

၄၄. သမကန္တု သော ဌတွာ’ဝ၊ ဝဿဒွယ မဟုမတော၊

ပေါတ္ထကုဋ္ဌော မတေတသ္မိံ၊ ပုန အညမ္ပိ မာဏဝံ.

၄၅. ဟတ္ထဒါဌံ သမာဟူယ၊ ဥဏှာ နဂရသမ္ဘဝံ၊

တမ္ပိ ရဇ္ဇေ ဘိသိဉ္စိတွာ၊ ယထာ ပုဗ္ဗံ သယံဝသီ.

၄၆. ကာဠဒီဃာဝိကံ ကတွာ၊ ပဓာနဃရကံ တထာ၊

ပုညမညံ ဆမာသေဟိ၊ သော’ပိ မစ္စုဝသံ ဂတော.

၄၇. ဧဝံ ဝိဒိတွာ ဗဟုပဒ္ဒဝါနိ၊

ဓနာနိ ဓညာနိ စ ဝါဟနာနိ၊

ဝိဟာယ ရဇ္ဇေသု ရတိံသပ္ပညာ၊

မနုညပုညာဘိရတာ ဘဝေယျုံ.

သုဇနပ္ပသာဒသံဝေဂတ္ထာယ ကတေ မဟာဝံသေ

တိရာဇကော နာမ

စတုစတ္တာလီသတိမော ပရိစ္ဆေဒေါ.