ပဉ္စစတ္တာလီသတိမ ပရိစ္ဆေဒ

၁. ရညော တဿစ္စယေ ရာဇာ၊ မာဏဝမ္မော အဟောသိ သော၊

ကိံ ဂေါတ္တော ကဿ ပုတ္တော စ၊ ကထံ ရဇ္ဇမပါပုဏိ.

၂. မဟာသမ္မတဝံသမှိ၊ ဇာတော ဇာတိဂုဏာဝဟော၊

ပုတ္တော ကဿပနာမဿ၊ ထူပါရာမဿ ဘေဒိနော.

၃. ဓီတာ မလယရာဇဿ၊ သံဃနာမဿ ရာဇိနော၊

တံ လဘိတွာ ဝသံ ဒေသေ၊ ဥတ္တရေ လီနဝုတ္တိကော.

၄. ဟတ္ထဒါဌနရိန္ဒေန၊ တသ္မိံ အတ္ထေဝ ဓာရိတေ၊

ဇမ္ဗုဒီပမုပါဂမ္မ၊ နရသီဟံ မဟီပတိ.

၅. ဂန္တွာ ဝတွာ သကံ နာမံ၊ သေဝိတုံ တမုပက္ကမိ၊

အာရာဓေသိ စ သဗ္ဗေဟိ၊ ပယောဂေဟိ နရာဓီပံ.

၆. ဝိဒိတွာ တဿ သောဟဇ္ဇံ၊ နေတွာ ဘရိယမတ္တနော၊

ဝါသံ တတ္ထေဝ ကပ္ပေသိ၊ သေဝမာနော ဒိဝါနိသံ.

၇. သောပိ အာရာဓိတော တေန၊ ကဏ္ဍုဝေဋ္ဌိ နရုတ္တမော၊

သဗ္ဗံ နေန္တောဝ တံ ရဇ္ဇံ၊ မဟာဘောဂမဒါပယိ.

၈. တေန သံဝါသမနွာယ၊ ဘရိယာ သံဃနာမိကာ၊

စတဿော ဓီတရော ပုတ္တေ၊ စတ္တာရောပိ ဝိဇာယထ.

၉. အထေကဒိဝသံ ရာဇာ၊ ဟတ္ထိက္ခန္ဓဝရံ ဂတော၊

သဉ္စရန္တော ယထာကာမံ၊ မာဏဝမ္မေန ဧကတော.

၁၀. နာဠိကေရံ ပိဝိတွာန၊ တတြဋ္ဌောဝ ပိပါသိတော၊

မာဏဝမ္မဿ ပါဒါသိ၊ မညန္တော အညမေဝ တံ.

၁၁. သော တံ ဂဟေတွာ စိန္တေသိ၊ သခံ ပေသ နရာဓိပေါ၊

ဥစ္ဆိဋ္ဌံ နာမ ကိံ ဟောတိ၊ သတ္တာနံ ပရမတ္ထတော.

၁၂. တသ္မာ ယုတ္တံ မယာပါတု-မီတိ စိန္တိယ တံ ပိဝိ၊

ဧဝံ ဟောန္တိ မဟုဿာဟာ၊ ဒေတုကာမာဟိ ဗုဒ္ဓိနော.

၁၃. ရာဇာပိ ဒိသွာ တံ ဘီတော၊ တဿပီ တာဝ သေသကံ၊

သယံ ပိဝိ တထာဟောတိ၊ ကမ္မံ ပုညဝတံ သဒါ.

၁၄. ဌပေသိ သကဝေသေဝ၊ တတော ပဋ္ဌာယ အတ္တနော၊

ဘောဇနေ သယနေ စေဝ၊ ပရိဟာရေ စ ဝါဟနေ.

၁၅. ဧဝံ တေသု ဝသန္တေသု၊ ယုဒ္ဓတ္ထာယမုပက္ကမိ၊

ဝလ္လဘော နရသီဟေန၊ နရသီဟော ဝိစိန္တယိ.

၁၆. အယံ ခေါ မမ သေဝါယ၊ ရဇ္ဇံ ဝံသ ဂတံ သကံ၊

လဘိဿာမီတိ သေဝေတိ၊ ရတ္တိံ ဒိဝ မတန္ဒိတော.

၁၇. သစေ သောပိ မယာ ဂန္တွာ၊ ယုဇ္ဈန္တော မရဏံ ဂတော၊

တက္ကိတံ တဿ မယှဉ္စ၊ သဗ္ဗံ တမဖလံ ဘဝေ.

၁၈. ဧဝံ စိန္တိယတံ ရာဇာ၊ နိဝတ္တေတွာ သကေ ပုရေ၊

သယံ ဝလ္လဘရာဇေန၊ ကာတုံ သင်္ဂါမမာရသိ.

၁၉. မာဏဝမ္မောပိ စိန္တေသိ၊ သစေ’ယံ မယိ ဇီဝိတိ၊

ရာဇာ မီယတိ ယုဒ္ဓမှိ၊ ကိံ ဖလံ မမ ဇီဝိတေ.

၂၀. ဝိဿာသော ဒုက္ကတော တေန၊ ဘဝိဿတိ တထာသတိ၊

သင်္ဂဟေသိ ကိမတ္ထံ မံ၊ သမာနတ္တေန အတ္တနော.

၂၁. တသ္မာ ယုတ္တံ မယာ ဂန္တုံ၊ သဟသင်္ဂါမ မဏ္ဍလံ၊

သုခဉှိ သဒ္ဓိံ တေနေတ္ထ၊ ဇီဝိတံ မရဏံပိ ဝါ.

၂၂. ဧဝံ စိန္တိယ သန္နဒ္ဓ-ဗလော ဟတ္ထိဝရံ ဂတော၊

ဂန္တွာ ဒဿေသိ အတ္တာနံ၊ သော တံ သင်္ဂါမ မဏ္ဍလေ.

၂၃. နရသီဟောဝ တံ ဒိသွာ၊ ဟဋ္ဌတုဋ္ဌော သမုဂ္ဂိရိ၊

သဟော သန္ထဝမေတသ္မိံ၊ ကတ္တဗ္ဗံ မေ ကတံ ဣတိ.

၂၄. တတော မာနဿ သေနာ စ၊ သေနာ စေဝဿရာဇိနော၊

သေနံ ဝလ္လဘရာဇဿ၊ ဝိဒ္ဓံသေသိ သမာဂတာ.

၂၅. မာဏဝမ္မောပိ ဒဿေသိ၊ တဟိံ သုရတ္တမတ္တနော၊

ပရက္ကမန္တော ဒေဝါနံ၊ ရဏေ နာရာယဏော ဝိယ.

၂၆. နရသီတောပိ သန္တုဋ္ဌော၊ မာဏဝမ္မဿ ဝိက္ကမေ၊

အာလိင်္ဂတွာ သိနေဟေန၊ တွံ ခေါ မေ ဇယဒေါ ဣတိ.

၂၇. အတ္တနော ပုရမာဂမ္မ၊ ကတွာ ဝိဇယမင်္ဂလံ၊

မာဏဝမ္မဿ သေနာယ၊ ကတ္တဗ္ဗံ သဗ္ဗမာစရိ.

၂၈. အထေဝံ စိန္တယိ ရာဇာ၊ ကတ္တဗ္ဗံ မေ သဟာယကော၊

အတ္တနာ’ကာသိ သဗ္ဗဉ္စ၊ အနဏော သော မမဇ္ဇတော.

၂၉. ဣဏံ မမာပိ သောဓေမိ၊ ကတွာ ကတ္တဗ္ဗမတ္တနာ၊

ကတ္တညူ ကတဝေဒီဟိ၊ ပုရိသာ’တီဝဒုလ္လဘာ.

၃၀. အမစ္စေ သန္နိပါတေတွာ၊ ဣဒံ ဝစနမဗြဝိ၊

သဟာယဿ မမေတဿ၊ ကမ္မေ တုမှေပိ သက္ခိနော.

၃၁. မယာပိ တဿ ကတ္တဗ္ဗံ၊ ကမ္မံ သာဓု သုခါဝဟံ၊

ဥပကာရော ဟိ သာဓူနံ၊ ဓမ္မော ပုဗ္ဗောပကာရိနော.

၃၂. ဧဝံ ဝုတ္တေ အမစ္စာ တေ၊ ပစ္စာဟံသု မဟီပတိ၊

ယံ ယမိစ္ဆတိ ဒေဝေါဟိ၊ တံ တံ ရုစ္စတိ နော ဣတိ.

၃၃. အထ သော မာဏဝမ္မဿ၊ သေနံ ဒတွာ သဝါဟနံ၊

သဗ္ဗောပကရဏဉ္စေဝ၊ သဗ္ဗကမ္မကရေပိ စ.

၃၄. ဂစ္ဆာတိ ဝတွာ တံ ယန္တံ၊ သဟသေနာယပေက္ခိယ၊

ပရိဒေဝိတ္ထ ဘူမိန္ဒော၊ ဝိပ္ပဝုတ္ထံ’ဝ ပုတ္တကံ.

၃၅. မာဏဝမ္မောပိ အာရုယှ၊ နာဝါယော ဇလဓီတဋေ၊

န စိရေနေဝ အာဂမ္မ၊ သမတ္တိက္ကမ္မ ဝေဂသာ.

၃၆. သဟ သေနာယ မဒ္ဒန္ထော၊ လင်္ကာဒီပမုပဝိသီ၊

တံ သုတွာန ပလာယိတ္ထ၊ ရာဇာ ဒါဌောပတိဿကော.

၃၇. မာဏဝမ္မော ပုရံ ဂန္တွာ၊ အဟုတွာဝ နရာဓိပေါ၊

ပလာတမနုဗန္ဓိတ္ထ၊ ပဒါနုပဒမုဂတော.

၃၈. တဒါ သာ ဒမိဠိ သေနာ၊ အဿောသိ ကိရ သာမိကော၊

မဟာရောဂါ’ဘိဘူတောတိ၊ သုတွာ တံ သာ အပက္ကမိ.

၃၉. သုတွာ ဒါဌောပတိဿော တံ၊ သမာဒါယ မဟာဗလံ၊

မာဏဝမ္မံ ဥပါဂမ္မ၊ ကာတုမာရဘိ သံယုဓံ.

၄၀. မာဏဝမ္မော စ စိန္တေသိ၊ သဗ္ဗာ သေနာ ဂတာ မမ၊

မတေ မယိ သမိဇ္ဈေယျ၊ ဝေရိနော မေ မနောရထံ.

၄၁. ဇမ္ဗုဒီပံဝ တသ္မာ’ဟံ၊ ဂန္တွာ’ဒါသ ဗလံ တတော၊

ပုန ရဇ္ဇံ ဂဟေဿံတိ၊ တသ္မာ ဧဝမကာသိ သော.

၄၂. ဂန္တွာ ပုန’ပိ ဒိသွာန၊ သဟာယံ နရသီဟကံ၊

အာရာဓဟန္တော နိပုဏံ၊ သက္ကစ္စံ တမုပဋ္ဌဟိ.

၄၃. ယာဝ ရာဇစတုက္ကံသော၊ မာဏာမ္မော တဟိံ ဝသိ၊

နရသီဟော’ထ စိန္တေသိ၊ မာနတ္ထဒ္ဓေါ ယသောဓနော.

၄၄. ရဇ္ဇတ္ထံ မေ သဟာ ယော မံ၊ သေဝန္တောယေဝ အဒ္ဓဂေါ၊

ဝုဒ္ဓေါ ဟေဿတိ တံ ပဿံ၊ ကထံ ရဇ္ဇံ ကရောမဟံ.

၄၅. ဣမသ္မိံ ပန ဝါရသ္မိံ၊ ပေသယိတွာ ဗလံ မမ၊

ရဇ္ဇံ တံ န ဂဟေဿာမိ၊ ကော အတ္ထော ဇီဝိတေန မေ.

၄၆. ဧဝံ စိန္တိယ သော သေနံ၊ သန္နိပါတိယ အတ္တနော၊

သန္နာဟေတွာ ယထာ ယောဂံ၊ ဒါပေတွာန ယထာရုစိံ.

၄၇. သယမေဝ တမာဒါယ၊ သမုဒ္ဒတဋမာဂတော၊

နာဝါယော စိတ္တရူပါယော၊ ကာရယိတွာ ထိရာ ဗဟူ.

၄၈. အမစ္စေ အာဟ ‘‘ဧတေန၊ သဒ္ဓိံ ဂစ္ဆထ ဘော’’ဣတိ၊

နာဝံ အာရောဟိတုံ သဗ္ဗေ၊ န ဣစ္ဆိံသု တဒါ ဇနာ.

၄၉. တဒါ သီဟော ဝိစိန္တေတွာ၊ သယံ ဟုတွာ တိရောဟိတော၊

အတ္တနော ပရိဟာရံ သော၊ ရာဇလက္ခဏသမ္မတံ.

၅၀. သဗ္ဗံ တဿေဝ ဒတွာန၊ အလင်္ကာရမ္ပိ အတ္တနော၊

အာရောပေတွာန တံ နာဝံ၊ ဂစ္ဆ ဌတွာန သာဂရေ.

၅၁. ဣမံ ဘေရိံစ ဝါဒေဟိ၊ ကောဋ္ဌနာမန္တိ ယောဇယီ၊

သော’ပိ သဗ္ဗံ တထာကာသိ၊ ရာဇာနော အဂမာ ဣတိ.

၅၂. အာရုဟိံသု ဇနာ နာဝံ၊ ဧကံ ကတွာ နရာဓိပံ၊

သော တံ သေနင်္ဂမာဒါယ၊ မာဏော ဂန္တုံ သမာရဘိ.

၅၃. ကေဝလော’ပိ သမုဒ္ဒေါ သော၊ အဟောဘိ နဂရူပမော၊

အထ သော ပဋ္ဋနံ ပတွာ၊ ဩတရိတွာ သဝါဟနော.

၅၄. ဝိဿာမေတွာ ဗလံ တတ္ထ၊ ဝသံ ကတိပယေ ဒိနေ၊

ဥတ္တရံ ဒေသမာဒါယ၊ ကတွာ ဟတ္ထဂတံ ဇနံ.

၅၅. အက္ခောဗ္ဘိယ မဟာသေနော၊ နဂရံ ဂန္တုမာရဘိ၊

ပေါတ္ထကုဋ္ဌောပိ တံ သုတွာ၊ ပစ္စုဂ္ဂဉ္ဆိ မဟာဗလော.

၅၆. သံဂစ္ဆိံသု ဥဘော သေနာ၊ ဘိန္နဝေလာ’ဝ သာဂရာ၊

မာဏဝမ္မော တတော ဟတ္ထိ-မာရုယှ ဂဟိတာယုဓော.

၅၇. ပေါတ္ထကုဋ္ဌဉ္စ ရာဇာနံ၊ ဒွေဓာ ကတွာ ပလာပယိ၊

ဟတ္ထဒါဌံ ပလာယန္တံ၊ ဒိသွာ ဇနပဒါ နရာ.

၅၈. သီသမဿ ဂဟေတွာန၊ မာဏဝမ္မဿ ဒဿယုံ၊

ပေါတ္ထကုဋ္ဌောပလာယိတွာ၊ မေရုကန္ဒရမာဂမိ.

၅၉. တတော တံ သာမိကော ဒိသွာ၊ သဟာယော မေ အယံစိရံ၊

တသ္မာ န သက္ကာ စဍ္ဍေတုံ၊ အာပဒေ သရဏာဂတံ.

၆၀. သာမိနော စ သဟာယဿ၊ နိဒ္ဒေါသောဟံ ကထံ ဘဝေ၊

ဣတိ စိန္တိယ ပူဝံ သော၊ သဝိသံ ခါဒိယာ’မရိ.

၆၁. ကုဋ္ဌကောပိ စ တေနေဝ၊ ခါဒိတွာ ပူဝကံ မတော၊

မာဏဝမ္မဿ တဿေဝံ၊ ဒီပေါ အာသိ အကဏ္ဋကော.

၆၂. မာဏဝမ္မော တတော ဒီပေ၊ ဆတ္တံ ဥဿာပယိ တဒါ၊

ဝါရေန္တော ဝိယ တေနေဝ၊ ဒုက္ခံ ဒီပေ ဇနဿ သော.

၆၃. ပုညကမ္မာနိ သော’ကာသိ၊ အနဂ္ဃါနိ ဗဟူနိ စ၊

သမတ္ထော ကောဟိ တံ သဗ္ဗံ၊ ဝတ္တုံ ပဋိပဒံ နရော.

၆၄. ကပ္ပဂါမဝှယဉ္စေဝ၊ တထာ သေပဏ္ဏိနာမကံ၊

ပဓာနရက္ခေ စ သိရိံ၊ သိရီသံဃာဒိ ဗောဓိကေ.

၆၅. ပါသာဒံ သောဝ ကာရေသိ၊ ပသာဒါဝဟမုတ္တမော၊

ဆာဒေသိ လောဟပါသာဒံ၊ ထူပါရာမဃရံ တထာ.

၆၆. ထူပါရာမေ စ ပါသာဒံ ကတွာ’ဒါ ပံသုကူလိနံ၊

ဇိဏ္ဏကံ ပဋိသင်္ခါသိ ဆတ္တံ စေတိယမုဒ္ဓနိ၊

ဗဟဝေါ ဇိဏ္ဏကာဝါသေ တတ္ထေဝ ပဋိသင်္ခရိ.

[ဧတ္ထ မာဏဝမ္မဿ ရဇ္ဇကထာယ ဦနတာ ဒိဿတိ. ဣတော ပဋ္ဌာယ အဂ္ဂဗောဓိဿ ရဇ္ဇပဋိဗဒ္ဓါ ကထာ ဝိရ ခါယတိ.]