တေစတ္တာလီသတိမ ပရိစ္ဆေဒ
စတုရာဇကော
၁. တတော ဝိဇိတသင်္ဂါမော၊ ကဿပေါ ပုရိတာသယော၊
မဟာပါဠိမှိ သံဃဿ၊ သမိဒ္ဓံ ဘောဇနံ အကာ.
၂. နာဂသာလာ နိဝါသိံ သော၊ မဟာဓမ္မကထိံ ယတိံ၊
မဟာပူဇာယ ပူဇေတွာ၊ သဒ္ဓမ္မံ တေန ဝါစယိ.
၃. ဝသန္တံ ဘာတုအာဝါသေ၊ သမုဒ္ဒိဿ လိခါပယိ၊
ကဋန္ဓကာရဝါသိံ သော၊ ပါဠိ သဗ္ဗံ သသင်္ဂဟံ.
၄. ဇိဏ္ဏံ သင်္ခရိကမ္မဉ္စ၊ နဝံ ကာရေသိ စေတိယေ၊
သံဃဘောဂမနေကဉ္စ၊ တတ္ထ တတ္ထ ပဝတ္တယိ.
၅. နာနာမဏိသမုဇ္ဇောတံ၊ ကာသိ စူဠမဏိတ္တယံ၊
သတံ ပဏ္ဍုပလာသာနံ၊ ဝတ္ထဒါနေန တပ္ပယိ.
၆. တဿာသုံ ဗဟဝေါ ပုတ္တာ၊ ဇေဋ္ဌော တေသဉ္စ မာဏကော၊
သဗ္ဗေ တေ န ဝယပ္ပတ္တာ၊ ဗာလာဝိဂတဗုဒ္ဓိနော.
၇. တတော သော ဗျာဓိနာ ဖုဋ္ဌော၊ အတေကိစ္ဆေန ကေနစိ၊
ပုတ္တာ မေ ဗာလကာ သဗ္ဗေ၊ နေ’တေ ရဇ္ဇက္ခမာ ဣတိ.
၈. ဝသန္တံ ရောဟဏေ ဒေသေ၊ ဘာဂိနေယျံ မဟာမတိံ၊
အာဟုယ သဗ္ဗံ ပါဒါသိ၊ ရဇ္ဇံ ပုတ္တေဟိ အတ္တနော.
၉. ဂန္ဓမာလာဒိပူဇာဟိ၊ ပူဇယိတွာန စေတိယေ၊
ဘိက္ခုသံဃံ ခမာဓပသိ၊ ဒတွာန စတုပစ္စယံ.
၁၀. ဧဝံ ဓမ္မံ စရိတွာန၊ မိတ္တာမစ္စဇနေသု စ၊
ဂတော နဝဟိ ဝဿေဟိ၊ ယထာကမ္မံ နရာဓိပေါ.
၁၁. ကတွာ ကတ္တဗ္ဗကိစ္စံ သော၊ မာတုလဿ သဂါရဝေါ၊
သင်္ဂဟန္တော ဇနံ မာဏော၊ ဒမိဠေ နီဟရာပယိ.
၁၂. ဧကတော ဒမိဠာ ဟုတွာ၊ နိဗ္ဗာသေမ ဣမံ ဣတိ၊
တသ္မိံ ဌိတေ ဗဟိဒ္ဓါဝ၊ အဂ္ဂဟေသုံ ပုရံ သယံ.
၁၃. ဟတ္တ ဒါဌဿ ပေသေသိ၊ ဇမ္ဗုဒီပဂတဿ တေ၊
အာဂန္တုံတဝ ကာလောတိ၊ သာသနံ ရဇ္ဇဂါဟဏေ.
၁၄. မာဏော’ပိ သံဃံ ပေသေသိ၊ သာသနံ ပိတုရောဟဏံ၊
ပိတာ သုတွာန တံ အာဂါ၊ န စီရေနေဝ ရောဟဏာ.
၁၅. ဥဘေ တေ မန္တယိတွာန၊ အကံသု သန္ဓိလေသကံ၊
ဥမိဠေဟိ တတော ဇာတာ၊ သဗ္ဗေ တေ သမဝုတ္တိနော.
၁၆. တတော သော ပိတရံ ရဇ္ဇေ၊ အဘိသိဉ္စိတ္ထ မာဏကော၊
သော’ဘိသိတ္တော နိကာယာနံ၊ သဟဿာနံ တယံ အဒါ.
၁၇. သံဃံ ရဋ္ဌဉ္စ သင်္ဂယှ၊ သဗ္ဗံ ရာဇကုလဋ္ဌိတံ၊
ဘဏ္ဍံ ပေသေသိ သတ္တူဟိ၊ ရက္ခဏတ္ထာယ ရောဟဏံ.
၁၈. ဟတ္ထဒါဌောပိ သုတွာန၊ ဒမိဠာနံ တု သာသနံ၊
ခဏေနာ’ဂါ ဣမံ ဒီပံ၊ ဂဟေတွာ ဒမိဠှံ ဗလံ.
၁၉. တဒါ တေ ဒမိဠာ သဗ္ဗေ၊ ပရိဘူတာ ဣဓ ဌိတာ၊
အာယန္တမေဝ တံ ဂန္တွာ၊ ပရိဝါရေသု မဉ္ဇသေ.
၂၀. မာဏောပိ သုတွာ တံ သဗ္ဗံ၊ နာယံ ကာလောတိ ယုဇ္ဈိတုံ၊
ပေသေတွာ ပိတုရာဇာနံ၊ သဒ္ဓိံ သာရေန ရောဟဏံ.
၂၁. ပုဗ္ဗဒေသံ သယံ ဂန္တွာ၊ သင်္ဂဏှန္တော ဇနံ ဝသီ၊
လဒ္ဓါ ဒမိဠပက္ခံ သော၊ ဂဟေတွာ ရာဇကံ ပုရံ.
၂၂. ဒါဌောပတိဿော ရာဇာတိ၊ နာမံ သာဝေတိ အတ္တနော၊
မာတုလံ ဝိယ တံ လောကော၊ တေန နာမေန ဝေါဟရိ.
၂၃. ပိတုစ္ဆပုတ္တမာနေတွာ၊ အဂ္ဂဗောဓိ သနာမကံ၊
ဌပေတွာ ယုဝရာဇတ္တေ၊ ဒေသဉ္စာ’ဒါသိ ဒက္ခိဏံ.
၂၄. ဌာနန္တရဉ္စ ပါဒါသိ၊ နိဿိတာနံ ယထာရဟံ၊
သာသနဿ စ လောကဿ၊ သဗ္ဗံ ကတ္တဗ္ဗမာစရိ.
၂၅. မဟာပါဠိမှိ ဒါပေသိ၊ သဝတ္ထံ ဒဓိဘတ္တကံ၊
ခီရံ ပါယာသကဉ္စေဝ၊ ဓမ္မံ သုဏိ ဥပေါသထိ.
၂၆. ကာရေတွာ သဗ္ဗပူဇာယော၊ ဒေသာ ပေတွာန ဒေသနံ၊
ဧဝမာဒီဟိ ပုညေဟိ၊ အတ္တာနံ’ကာသိ ဘဒ္ဒကံ.
၂၇. ကဿပဿ ဝိဟာရဿ၊ ဒတွာသေနဝှဂါမကံ၊
မဟာဂလ္လဉ္စ ပါဒါသိ၊ ပဓာနဃရကဿ သော.
၂၈. ပရိဝေဏဿ မောရဿ၊ အကာသိ သကဂါမကံ၊
ထူပါရာမဿ ပုဏ္ဏောဠိံ၊ ဒတွာ သက္ကာသိ စေတိယံ.
၂၉. ကပ္ပူရပရိဝေဏံ သော၊ ကာရေသိ အဘယုတ္တရေ၊
ဝိဟာရံ တိပုထုလ္လဝှံ၊ ကတွာ တဿေဝ ဒါပယိ.
၃၀. တသ္မိံ ကရောန္တေ ဝါရေသုံ၊ သီမာယန္တော’တိ ဘိက္ခဝေါ၊
ထေရိယာ တေ ကိဗာဟေတွာ၊ ဗလံ တထေဝ ကာရယိ.
၃၁. အထ တေ တေ ထေရိယာ ဘိက္ခူ၊ ဒုမ္မညူ တတ္ထ ရာဇိနိ၊
အဿဒ္ဓံ တံ ဝိဒိတွာန၊ ပတ္တနိက္ကုဇ္ဇနံ ကရုံ.
၃၂. ဝုတ္တဉှိ မုနိနာ တေန၊ အဿဒ္ဓေါ ယော ဥပါသကော၊
အလာဘာယ စ ဘိက္ခူနံ၊ စေတေတ’က္ကောသတိ စ တေ.
၃၃. ပတ္တနိကုဇ္ဇနံ တဿ၊ ကတ္တဗ္ဗန္တိ တတော ဟိ တေ၊
တဿ တံ ကမ္မမကရုံ၊ လောကော မညိတ္ထ အညထာ.
၃၄. အာဒါယု ကုဇ္ဇိတံ ပတ္တံ၊ စရန္တော ဘိက္ခုဘိက္ခကံ၊
နိကုဇ္ဇေယျ ဃရဒွါရေ၊ တဿာ’တိ ကထိကံ ကရုံ.
၃၅. တသ္မိံ သော သမယေ ဖုဋ္ဌော၊ ဗျာဓိနာ မဟတာမရိ၊
ဝဿမှိ နဝမေ ရာဇာ၊ သမ္ပတ္တော ဇီဝိတက္ခယံ.
၃၆. ဒပ္ပုလောပိ တတော ရာဇာ၊ ဂတော ရောဟဏကံ သကံ၊
ဝါသံ ကပ္ပေသိ တတ္ထေဝ၊ ကရောန္တော ပုညသဉ္စယံ.
၃၇. ဣတော ပဋ္ဌာယ ဝက္ခာမ၊ တဿ ဝံသမနာကုလံ၊
ဝုစ္စမာနမှိ ဧတ္ထေဝ၊ တသ္မိံ ဟောတိ အသင်္ကရော.
၃၈. ဇာတော ဩက္ကာကဝံသမှိ၊ မဟာတိဿောတိ ဝိဿုတော၊
အာသိ ဧကော မဟာပုညော၊ သမာကိဏ္ဏဂုဏာကရော.
၃၉. တဿေ’ကာ ဘရိယာ အာသိ၊ သံဃပိဝါတိ ဝီဿုတာ၊
ဓညပုညဂုဏူပေတာ၊ ဓီတာ ရောဟဏသာမိနော.
၄၀. တဿာပုတ္တာ တယော အာသုံ၊ ပဌမော အဂ္ဂဗေဓိကော၊
ဒုတိယော ဒပ္ပုလော နာမ၊ တတိယော မဏိအက္ခိကော.
၄၁. ဧကာဝ ဓီတာ တဿာသိ၊ ရာဇနမဂမာ စ သာ၊
ဇေဋ္ဌော ရောဟဏနာမဿ၊ ဒေသဿာ’သိ သယံ ဝသီ.
၄၂. မဟာပါဠိံ သ ကာရေသိ၊ မဟာဂါမေ မဟာဓနော၊
ဒါဌဂ္ဂဗောဓိနာမဉ္စ၊ ပရိဝေဏံ တဟိ ဝံသော.
၄၃. ကာဏဂါမမှိ ကာဏာနံ၊ ဂိလာနာနဉ္စ သာလကေ၊
ဝိဟာရေ ပဋိမာဝှေ စ၊ မဟန္တံ ပဋိမာဃရံ.
၄၄. ပတိဋ္ဌပေသိ ကတွာန၊ ဗုဒ္ဓတတ္ထ သိလာမယံ၊
မဟန္တနာမံ သပ္ပညော၊ ဣဒ္ဓီဟိ ဝိယ နိမ္မိတံ.
၄၅. သာလဝါဏဉ္စ ကာရေသိ၊ ဝိဟာရံ အတ္တနာမကံ၊
ပရိဝေဏဝိဟာရဉ္စ၊ တထာ ကာဇရဂါမကံ.
၄၆. နဝကမ္မာနိ ကာရေတွာ၊ ဓမ္မသာလဝိဟာရကေ၊
သယံ ဝစ္စကုဋီ ဧသ၊ တတ္ထ သောဓေသိ ဗုဒ္ဓိမာ.
၄၇. ဥစ္စိဋ္ဌံ ဘိက္ခုသံဃဿ၊ ဘောဇနံ ပရိဘုဉ္ဇိယ၊
မဏ္ဍဂါမဉ္စ သံဃဿ၊ ဂါမံ’ဒါသိ မသာဒဝါ.
၄၈. ပုညာနေ’တာနိစညာနိ၊ ကတွာ တသ္မိံ ဒိဝင်္ဂတေ၊
အာသီ တဿာ’နုဇော တတ္ထ၊ သာမိ ဒပ္ပုလနာမကော.
၄၉. ဣဿေရံ တတ္ထ ဝတ္တေသိ၊ သမ္ပမဒ္ဒိယ သတ္တ ဝေါ၊
မဟာဒါနံ ပဝတ္တေသိ၊ နိဿင်္ကံ ရောဟဏံ အဂါ.
၅၀. တဿ တုဋ္ဌော ဇနော အာဟ၊ မဟာသာမီတိ ဧသနော၊
တတော ပဋ္ဌာယ တံ လောကော-မဟာသာမီတိ ဝေါဟရိ.
၅၁. သုတွာန တံ သိလာဒါဌော၊ နရိန္ဒော သကဓီတရံ၊
တဿ ပါဒါသိ သန္တုဋ္ဌော၊ ဂုဏေဟိ ဗဟုကေဟိ စ.
၅၂. ယုဇရာဇတ္တမဿာဒါ၊ ရဇ္ဇယောဂ္ဂေါတိ မာနိတုံ၊
မာဏဝမ္မာဒယော တဿ၊ ပုတ္တာ အာသုံ မဟာသယာ.
၅၃. ပါသာဏဒိပဝါသိဿ၊ မဟာထေရဿ သန္တိကေ၊
ဓမ္မံ သုတွာ ပသီဒိတွာ၊ တသ္မိံ တံ ဗဟုမာနိတုံ.
၅၄. ဝိဟာရံ ရောဟဏေ ကတွာ၊ တဿ ပါဒါသိ သောပိ တံ၊
စာတုဒ္ဒိသိယသံဃဿ၊ ပရိဘောဂါယ ဝိဿဇ္ဇိ.
၅၅. အမ္ဗမာလာ ဝိဟာရာဒိ၊ ဝိဟာရေ ကာရယိ ဗဟူ၊
ခဒိရာလိဝိဟာရဉ္စ၊ ကတွာ ဒေဝ မပူဇယိ.
၅၆. ပါသာဒမနုရာရာမံ၊ မုတ္တောလမ္ဗံ သုဇိဏ္ဏကံ၊
သီရိဝဍ္ဎဉ္စ ပါသာဒံ၊ တထာ တက္ကမ္ဗိလံ ပရံ.
၅၇. သောဓေတွာ ဘိက္ခဝေါ တတ္ထ၊ ဒွတ္တိံသ ပရိဝါသယိ၊
သဗ္ဗပစ္စယဒါနေန၊ သန္တပ္ပေတွာ မဟီမတိ.
၅၈. အဒါ ကေဝဋ္ဋဂမ္ဘီရံ၊ ဂါမံ နာဂဝိဟာရကေ၊
တထာ ရာဇဝိဟာရဿ၊ ဂေါန္နဂါမံ သမာဒိယိ.
၅၉. အဒါ တီသဝိဟာရဿ၊ တထာကန္တိကပဗ္ဗကံ၊
စိတ္တလပဗ္ဗတဿာ’ဒါ၊ ဂါမံ သော ဂေါန္နဝိဋ္ဌိကံ.
၆၀. ဒတွာ ရိယာကရဿေသ၊ ဂါမံ သောမာလဝတ္ထုကံ၊
အကာသိ ပဋိမာဂေဟံ၊ တထေဝ သုမနောဟရံ.
၆၁. တတြဋ္ဌဿ ဇိနဿာ’ကာ၊ ဥဏ္ဏလောမံ မဟဂ္ဃိယံ၊
ဟေမပဋ္ဋဉ္စ ကာရေသိ၊ သဗ္ဗံ ပူဇာဝိဓိံ သ’ကာ.
၆၂. စေတိယေ ပရိဇိဏ္ဏေ သော၊ သုဓာကမ္မေန ရဉ္ဇယိ၊
တိပဉ္စဟတ္ထံ ကာရေသိ၊ မေတ္တေယျံ သုဂတံ ပရံ.
၆၃. ဧဝမာဒိနိ ပုညာနိ၊ အပ္ပမေယျာနိ သော ဝိဘူ၊
အကာသိ စ သယံ သာဓု၊ ပရိဝါရေဟီ ကာရယိ.
၆၄. ပရိဝါရာ စ တဿာသုံ၊ ဗဟူပုညကရာ နရာ၊
ဝိဟာရာ နေကကာ အာသုံ၊ ကတာ တေဟိ သပ္ပစ္စယာ.
၆၅. ကဒါစိ မဂ္ဂံ ဂစ္ဆံ သော၊ အရညမှိ အဂါမကေ၊
သေနံ သံဝိဒဟိတွာန၊ ဝါသံ ကပ္ပေသိ ရတ္တိယံ.
၆၆. သုနဟာတဝိလ္လိတ္တော သော၊ သုဘုတ္တောသယနေ သုခေ၊
နိပန္နေသု ဃရေ ရမ္မေ၊ နိဒ္ဒါယိတုမုပက္ကမိ.
၆၇. အလဘန္တော တဒါ နိဒ္ဒံ၊ ကိန္နု ခေါ ဣတိ ကာရဏံ၊
ပဝတ္တိံ ဥပဓာရေန္တော၊ ဒိဝသေ သဗ္ဗမတ္တနော.
၆၈. အဒိသွာ ကာရဏံ အန္တော၊ အဝဿံ ဗဟိ ဟေဿတိ၊
ဣတိ စိန္တိယ ယောဇေသိ၊ မနုဿေတံ ဂဝေသိတုံ.
၆၉. ဧဝမာဟ စ နိဿင်္ကံ၊ အယျကာ မမ ရတ္တိယံ၊
တေမေန္တာ ရုက္ခမူလသ္မိံ၊ ဌိတာ အာနေထ တေ ဣတိ.
၇၀. တေပိ ဂန္တွာ ဂဝေသန္တာ၊ ဒီပဟတ္ထာ မဟာဇနာ၊
မဟာဂါမာ’ဂတေ ဘိက္ခူ၊ ရုက္ခမူလဂတေ တဒါ.
၇၁. တေ ဂန္တွာ သာသနံ ရညော၊ အာရောစေသုံ ပဓာဝိသော၊
ဒိသွာ စ ဘိက္ခု သန္တုဋ္ဌော၊ နေတွာ ဝါသဃရံ သကံ.
၇၂. နိစ္စဒါနာယ ဘိက္ခူနံ၊ ဌပိတေ ရတ္တစီဝရေ၊
တေသံ ဒတွာန တိန္တာနိ၊ စီဝရာနိ သမာဒိယ.
၇၃. သုက္ခာပိယ စ ကတွာန၊ ပါဒဓောဝနကာဒိကံ၊
နိသီဒါပိယ တေ သဗ္ဗေ၊ သယနေ သာဓု သန္ထတေ.
၇၄. ဘေသဇ္ဇံ ပဋိယာဒေတွာ၊ သယမေဝေါ’ပနာမိယ၊
ပစ္စူသေပိ စ ကတွာန၊ ကတ္တဗ္ဗံ ဘောဇနာဒိကံ.