ဆတ္တိံသတိမ ပရိစ္ဆေဒ

တယောဒသ ရာဇကော

၁. မဟလ္လနာဂစ္စယေန၊ ပုတ္တော ဘာတိကတိဿကော၊

စတုဝီသတိဝဿာနိ၊ လံကာရဇ္ဇမကာရယိ.

၂. မဟာဝိဟာရေ ပါကာရံ၊ ကာရာပေသိ သမန္တတော၊

ဂဝရတိဿဝိဟာရံ၊ သော ကာရယိတွာ မဟီပတိ.

၃. မဟာဂါမဏိကံ ဝါပိံ၊ ဝိဟာရဿ’ဿ’ဒါသိ စ၊

ဝိဟာရဉ္စ အကာရေသိ၊ ဘာတိယတိဿ နာမကံ.

၄. ကာရေသုပေါသထာဂါရံ၊ ထူပါရာမေ မနောရမေ၊

ရန္ဓကဏ္ဍကဝါပိဉ္စ၊ ကာရာပေသိ မဟီပတိ.

၅. သတ္တေသု မုဒုစိတ္တောသော၊ သံဃမှိ တိဗ္ဗဂါရဝေါ၊

ဥဘတောသံဃေ မဟီပါလော၊ မဟာဒါနံ ပဝတ္တယိ.

၆. ဘာတိကတိဿစ္စယေန၊ တဿ ကနိဋ္ဌတိဿကော၊

အဋ္ဌဝီသသမာရဇ္ဇံ၊ လံကာဒီပေ အကာရယိ.

၇. ဘူတာရာမ မဟာနာဂ၊ ထေရသ္မိံ သော ပသီဒိယ၊

ကာရေသိ ရတနပါသာဒံ၊ အဘယဂိရိမှိ သာဓုကံ.

၈. အဘယဂိရိမှိ ပါကာရံ၊ မဟာပရိဝေဏမေဝ စ၊

ကာရေသိ မဏိသောမဝှေ၊ မဟာပရိဝေဏမေဝ စ.

၉. တတ္ထေဝ စေတိယဃရံ၊ အမ္ဗတ္ထလေ တထေဝ စ၊

ကာရေသိ ပဋိသင်္ခါရံ၊ နာဂဒီပေ ဃရေ ပန.

၁၀. မဟာဝိဟာရသီမံသော၊ မဒ္ဒိတွာ တတ္ထ ကာရယိ၊

ကုက္ကုဋဂိရိ ပရိဝေဏ၊ ပန္တိံ သက္ကစ္စ ဘူပတိ.

၁၁. မဟာဝိဟာရေ ကာရေသိ၊ ဒွါဒသ မနုဇာဓိပေါ၊

မဟာစတုရဿပါသာဒေ၊ ဒဿနေယျေမနောရမေ.

၁၂. ဒက္ခိဏဝိဟာရ ထူပမှိ၊ ကဉ္စုကဉ္စ အကာရယိ၊

ဘတ္တသာလံ မဟာမေဃ၊ ဝနာသိမဉ္စ မဒ္ဒိယ.

၁၃. မဟာဝိဟာရပါကာရံ၊ ပဿတော အပနီယသော၊

မဂ္ဂံ ဒက္ခိဏဝိဟာရ၊ ဂါမိဉ္စာပိ အကာရယိ.

၁၄. ဘူတာရာမ ဝိဟာရဉ္စ၊ ရာမဂေါဏကမေဝ စ၊

တထေဝ နန္ဒတိဿဿ၊ အာရာမဉ္စ အကာရယိ.

၁၅. ပါစိနတော အနုဠာတိဿ၊ ပဗ္ဗတံ ဂင်္ဂရာဇိယံ၊

နိယေလတိဿာရာမဉ္စ၊ ပိဠ ပိဋ္ဌိ ဝိဟာရကံ.

၁၆. ရာဇမဟာဝိဟာရဉ္စ၊ ကာရေသိ မနုဇာဓိပေါ၊

သောယေဝ တီသု ဌာနေသု၊ ကာရေသု’ပေါသထာလယံ.

၁၇. ကလျာဏီက ဝိဟာရေ စ၊ မဏ္ဍလဂိရိကေ တထာ၊

ဒုဗ္ဗလဝါပိတိဿဝှေ၊ ဝိဟာရေသု ဣမေသု ဟိ.

၁၈. ကနိဋ္ဌတိဿစ္စယေန၊ တဿ ပုတ္တော အကာရယိ၊

ရဇ္ဇံ ဒွေယေဝ ဝဿာနိ၊ စူဠနာဂေါတိ ဝိဿုတော.

၁၉. စူဠနာဂကနိဋ္ဌောတု၊ ရာဇာဃာတိယ ဘာတိကံ၊

ဧကဝဿံ ကုဍ္ဍနာဂေါ၊ ရဇ္ဇံ လံကာယ ကာရယိ.

၂၀. မဟာပေဠဉ္စ ဝဍ္ဎေသိ၊ ဧကနာဠိကဆာတကေ၊

ဘိက္ခုသတာနံ ပဉ္စန္နံ၊ အဗ္ဘောစ္ဆိန္နံ မဟီပတိ.

၂၁. ကုဍ္ဍနာဂဿ ရညော တု၊ ဒေဝီယာ ဘာတုကော တဒါ၊

သေနာပတိ သိရိနာဂေါ၊ စောရော ဟုတွာန ရာဇိနော.

၂၂. ဗလဝါဟန သမ္ပန္နော၊ အာဂမ္မ နဂရန္တိကံ၊

ရာဇဗလေန ယုဇ္ဈန္တော၊ ကုဍ္ဍနာဂံ မဟီပတိံ.

၂၃. ပလာပေတွာ လဒ္ဓဇယော၊ အနုရာဓ ပုရေ ဝရေ၊

လံကာရဇ္ဇမကာရေသိ၊ ဝဿာနေကူနဝီသတိ.

၂၄. မဟာထူပဝရေ ဆတ္တံ၊ ကာရာပေတွာန ဘူပတိ၊

သုဝဏ္ဏကမ္မံ ကာရေသိ၊ ဒဿနေယျံ မနောရမံ.

၂၅. ကာရေသိ လောဟပါသာဒံ၊ သံခိတ္တံ ပဉ္စဘူမကံ၊

မဟာဗောဓိ စတုဒွါရေ၊ သောပါနံ ပုနကာရယိ.

၂၆. ကာရေတွာ ဆတ္တပါသာဒံ၊ မဟေ ပူဇမကာရယိ၊

ကုလမ္ဗဏဉ္စ ဒီပသ္မိံ၊ ဝိဿဇ္ဇေသိ ဒယာပရော.

၂၇. သိရိနာဂစ္စယေ တဿ၊ ပုတ္တော တိဿော အကာရယိ၊

ရဇ္ဇံ ဒွါဝီသဝဿာနိ၊ ဓမ္မဝေါဟာရ ကောဝိဒေါ.

၂၈. ဌပေသိ သော ဟိ ဝေါဟာရံ၊ ဟိံသာ မုတ္တံ ယတောဣဓ၊

ဝေါဟာရက တိဿရာဇာ၊ ဣတိ နာမံ တတော အဟု.

၂၉. ကမ္ဗုဂါမကဝါသိဿ၊ ဒေဝတ္ထေရဿ သန္တိကေ၊

ဓမ္မံ သုတွာ ပဋိကမ္မံ၊ ပဉ္စာဝါသေ အကာရယိ.

၃၀. မဟာတိဿဿ ထေရဿ၊ အနုရာ ရာမဝါသိနော၊

ပသန္နော မုစေလပဋ္ဋနေ၊ ဒါန ဝဋ္ဋမကာရယိ.

၃၁. တိဿရာဇ မဏ္ဍပဉ္စ၊ မဟာဝိဟာရဒွယေပိ သော၊

မဟာဗောဓိဃရေ ပါစိ၊ လောဟရူပဒ္ဓယမ္ပိ စ.

၃၂. သတ္တပဏ္ဏိကပါသာဒံ၊ ကာရေတွာ သုခဝါသကံ၊

မာသေ မာသေ သဟဿံ သော၊ မဟာဝိဟာရဿ ဒါပယိ.

၃၃. အဘယဂိရိဝိဟာရေ၊ ဒက္ခိဏမူလသဝှယေ၊

မရိစဝဋ္ဋိ ဝိဟာရမှိ၊ ကုလာလိတိဿသဝှယေ.

၃၄. မဟိယင်္ဂဏ ဝိဟာရမှိ၊ မဟာဂါမကသဝှယေ၊

မဟာနာဂတိဿဝှမှိ၊ တထာ ကလျာဏီကဝှယေ.

၃၅. ဣတိ အဋ္ဌသု ထူပေသု၊ ဆတ္တကမ္မမကာရယိ၊

မူကနာဂသေနာပတိ၊ ဝိဟာရေ ဒက္ခိဏေ တထာ.

၃၆. မရိစ ဝဋ္ဋိ ဝိဟာရမှိ၊ ပုတ္တဘာဂဝှယေ တထာ၊

ဣဿရသမဏဝှမှိ၊ တိဿဝှေ နာဂဒီပကေ.

၃၇. ဣတိ ဆသု ဝိဟာရေသု၊ ပါကာရဉ္စ အကာရယိ၊

ကာရေသု’ ပေါသထာဂါရံ၊ အနုရာရာမသဝှယေ.

၃၈. အရိယဝံသကထာဌာနေ၊ လံကာဒီပေခိလေပိ စ၊

ဒါန ဝဋ္ဋံ ဌပါပေသိ၊ သဒ္ဓမ္မေ ဂါရဝေန သော.

၃၉. တိဏီ သတသဟဿာနိ၊ ဒတွာန မနုဇာဓိပေါ၊

ဣဏတော သယိကေ ဘိက္ခူ၊ မောစေသိ သာသနပ္ပိယော.

၄၀. မဟာ ဝေသာခ ပူဇံ သော၊ ကာရေတွာ ဒီပဝါသိနံ၊

သဗ္ဗေ သံယေဝ ဘိက္ခူနံ၊ တိစီဝရမဒါပယိ.

၄၁. ဝေတုလ္လဝါဒံ မဒ္ဒိတွာ၊ ကာရေတွာ ပါပနိဂ္ဂဟံ၊

ကပိလေန အမစ္စေန၊ သာသနံ ဇောတယီစ သော.

၄၂. ဝိဿုတော’ဘယနာဂေါ’တိ၊ ကနိဋ္ဌော တဿရာဇိနော၊

ဒေဝိယာ တဿ သံသဋ္ဌော၊ ဉာတော ဘီတော သဘာတရာ.

၄၃. ပလာယိတွာ ဟလ္လတိတ္ထံ၊ ဂန္တွာန သဟသေဝကော၊

ကုဒ္ဓေါ ဝိယ မာတုလဿ၊ ဟတ္ထပါဒဉ္စ ဆေဒယိ.

၄၄. ရာဇိနော ရဋ္ဌတေဒတ္ထံ၊ ဌပေတွာန ဣဓေဝ တံ၊

သုနခေါပမံ ဒဿယိတွာ၊ ဂဟေတွာ’တိ သိနိဒ္ဓကေ.

၄၅. တတ္ထေဝ နာဝံ အာရုယှ၊ ပရတီရမဂါသယံ၊

သုဘဝေါ မာတုလော တု၊ ဥပဂမ္မ မဟီပတိ.

၄၆. သုဟဒေါ ဝိယ ဟုတွာန၊ တသ္မိံ ရဋ္ဌမဘိန္ဒိသော၊

အဘယော တံ ဇာနနတ္ထံ၊ ဒူတံ ဣဓ ဝိသဇ္ဇယိ.

၄၇. တံ ဒိသွာ ပူဂရုက္ခံ သော၊ သမန္တာ ကုန္တနာဠိယာ၊

ပရိဗ္ဘမန္တော မဒ္ဒိတွာ၊ ကတွာ ဒုဗ္ဗလမူလကံ.

၄၈. ဗာဟုနာယေဝ ပါတေတွာ၊ တဇ္ဇေတွာ တံ ပလာပယိ၊

ဒူတော ဂန္တွာ အဘယဿ၊ တံ ပဝတ္တိံ ပဝေဒယိ.

၄၉. ဉတွာ’ဘယော တံ ဒမိဠေ၊ အာဒါယ ဗသုကေ တတော၊

နဂရန္တိကမာဂဉ္ဆိ၊ ဘာတရာ သဟ ယုဇ္ဈိတုံ.

၅၀. တံ ဉတွာန ပလာယိတွာ၊ အဿမာရုယှဒေဝိယာ၊

မလယံ အာဂမာ ရာဇာ၊ တံကနိဋ္ဌော’နု ဗန္ဓိယ.

၅၁. ရာဇာနံ မလယေ ဟန္တွာ၊ ဒေဝီမာဒါယ အာဂတော၊

ကာရေသိ နဂရေ ရဇ္ဇံ၊ အဋ္ဌဝဿာနိ ဘူပတိ.

၅၂. ပါသာဏဝေဒိံ ကာရေသိ၊ မဟာဗောဓိသမန္တတော၊

လောဟပါသာဒင်္ဂဏမှိ၊ ရာဇာ မဏ္ဍပမေဝ စ.

၅၃. ဒွိဟိ သတသဟဿေဟိ၊ နေကဝတ္ထာနိ ဘာဂိယ၊

ဒီပမှိ ဘိက္ခုသံဃဿ၊ ဝတ္ထဒါနမဒါသိ သော.

၅၄. အဘယဿ’စ္စယေ ဘာတု၊ တဿဿ တဿ အတြဇော၊

ဒွေဝဿာနိ သိရိနာဂေါ၊ လံကာရဇ္ဇ မကာရယိ.

၅၅. ပဋိသင်္ခရိယ ပါကာရံ၊ မဟာဗောဓိသမန္တတော၊

မဟာဗောဓိဃရဿေဝ၊ သောယေဝ ဝါလိကာတလေ.

၅၆. မူစေလရုက္ခပရတော၊ ဟံသဝဋ္ဋံ မနောရမံ၊

မဟန္တံ မဏ္ဍပဉ္စေဝ၊ ကာရာပေသိ မဟီပတိ.

၅၇. ဝိဇယကုမာရကော နာမ၊ သိရိနာဂဿ အတြဇော၊

ပိတုနော အစ္စယေ ရဇ္ဇံ၊ ဧကဝဿမကာရယိ.

၅၈. လမ္ဗကဏ္ဏာ တယော အာသုံ၊ သဟာတာ မဟိယင်္ဂဏေ၊

သင်္ဃတိဿော သံဃဗောဓိ၊ တတိယော ဂေါဋ္ဌကာဘယော.

၅၉. တေ တိဿဝါပိမရိယာဒ-ဂတော အန္ဓော ဝိစက္ခဏော၊

ရာဇုပဋ္ဌာနမာယန္တေ၊ ပဒသဒ္ဒေန အဗြဝိ.

၆၀. ‘‘ပထဝီသာမိနော ဧတေ၊ တယော ဝဟတိဘူ’ဣတိ၊

တံ သုတွာ အဘယော ပစ္ဆာ၊ ယန္တော ပုစ္ဆိ ပုနာဟသော.

၆၁. တဿ ဝံသော ဌဿတီတိ၊

ပုန ပုစ္ဆိတမေဝ သော၊

‘‘ပစ္ဆိမဿာ’’တိ သော အာဟ၊

တံ သုတွာ ဒွီဟိသောအဂါ.

၆၂. တေ ပုရံ ပဝိသိတွာန၊ တယော ရညော’တိ ဝလ္လဘော၊

ရာဇကိစ္စာနိ သာဓေန္တာ၊ ဝသန္တာ ရာဇသန္တိကေ.

၆၃. ဟန္တွာ ဝိဇယရာဇာနံ၊ ရာဇဂေဟမှိ ဧကတော၊

သေနာပတိံသင်္ဃတိဿံ၊ ဒုဝေရဇ္ဇေ’ဘိသေစယုံ.

၆၄. ဧဝံ သော အဘိသိတ္တောဝ၊ အနုရာဓပုရုတ္တမေ၊

ရဇ္ဇံ စတ္တာရိ ဝဿာနိ၊ သင်္ဃတိဿော အကာရယိ.

၆၅. မဟာထူပမှိ ဆတ္တဉ္စ၊ ဟေမကမ္မဉ္စ ကာရယိ၊

ဝိသုံ သတသဟဿဂ္ဃေ၊ စတုရော စ မဟာမဏိ.

၆၆. မဇ္ဈေ စတုန္နံ သူရိယာနံ၊ ဌပါပေသိ မဟီပတိ၊

ထူပဿ မုဒ္ဓနိ တထာ-နဂ္ဃဝဇိရစုမ္ဗဋံ.

၆၇. သော ဆတ္တမဟပူဇာယ၊ သံဃဿ မနုဇာဓိပေါ၊

စတ္တာလီသသဟဿဿ၊ ဆ စီဝရမဒါပယိ.

၆၈. တံ မဟာဒေဝထေရေန၊ ဒါမဂလ္လက ဝါသိနော၊

ဒေသိတံ ခန္ဓကေ သုတ္တံ၊ ယာဂါနိသံသ ဒီပနံ.

၆၉. သုတွာ ပသန္နော သံဃဿ၊ ယာဂုဒါနမဒါပယိ၊

နဂရဿ စတုဒွါရေ၊ သက္ကစ္စဉ္စေဝ သာဓု စ.

၇၀. သော အန္တရန္တရေ ရာဇာ၊ ဇမ္ဗုပက္ကာနိ ခါဒိတုံ၊

သဟောရောဓော သဟာမစ္စော၊ အဂါပါစိန ဒီပကံ.

၇၁. ဥပဒ္ဒုတံ’ဿ ဂမနေ၊ မနုဿာ ပါစိ ဝါသိနော၊

ဝိသံ ဖလေသု ယော ဇေသုံ၊ ရာဇဘောဇ္ဇာယ ဇမ္ဗုယာ.

၇၂. ခါဒိတွာ ဇမ္ဗုပက္ကာနိ၊ တာနိ တတ္ထေဝ သော မတော၊

သေနာပတိ သံဃဓဗာဓီံ-ဘယော ရဇ္ဇေ’ဘိသေစယိ.

၇၃. ရာဇာသိရိ သံဃ ဗောဓိ၊ ဝိဿုတော ပဉ္စသီလဝါ၊

အနုရာဓပုရေ ရဇ္ဇံ၊ ဒုဝေ ဝဿာနိ ကာရယိ.