သတ္တတိံသတိမ ပရိစ္ဆေဒ

ပဉ္စရာဇကော

၁. ဇေဋ္ဌတိဿစ္စယေ တဿ၊ မဟာသေနော ကနိဋ္ဌကော၊

သတ္တဝီသတိဝဿာနိ၊ ရာဇာ ရဇ္ဇမကာရယိ.

၂. တဿ ရဇ္ဇာဘိသေကံ တံ၊

ကာရေတုံ ပရတီရတော၊

သော သံဃမိတ္တတ္ထေရော တု၊

ကာလံ ဉတွာ ဣဓာဂတော.

၃. တဿာဘိသေကံ ကာရေတွာ၊ အညံ ကိစ္စဉ္စနေကဓာ၊

မဟာဝိဟာရ ဝိဒ္ဓံသံ၊ ကာတုကာမော အသညတော.

၄. အဝိနယဝါဒိနော ဧတေ၊ မဟာဝိဟာရဝါသိနော၊

ဝိနယဝါဒီ မယံ ရာဇ၊ ဣတိ ဂါဟိယ ဘူပဘိံ.

၅. မဟာဝိဟာရဝါသိဿ၊ အာဟာရံ ဒေတိ ဘိက္ခုနော၊

ယော သော သတံ ဒဏ္ဍိယော’တိ၊ ရညာ ဒဏ္ဍံ ဌပါပယိ.

၆. ဥပဒ္ဒုတာ တေဟိ ဘိက္ခူ၊ မဟာဝိဟာရဝါသိနော၊

မဟာဝိဟာရံ ဆဍ္ဍေတွာ၊ မလယံ ရောဟဏံ အဂုံ.

၇. တေန မဟာဝိဟာရော’ယံ၊ နဝဝဿာနိ ဆဍ္ဍိတော၊

မဟာဝိဟာရဝါသီဟိ၊ ဘိက္ခူဟိ အာသိ သုညကော.

၈. ‘‘ဟောတိ အဿာမိကံ ဝတ္ထု၊ ပုတုဝိသာမိနော’’ဣတိ၊

ရာဇာနံ သညာပေတွာ သော၊ ထေရော ဒုမ္မတိ ဒုမ္မတိံ.

၉. မဟာဝိဟာရံ နာသေတုံ၊ လဒ္ဓါနုမတိ ရာဇတော၊

တထာ ကာတုံ မနုဿေ သော၊ ယောဇေသိ ဒုဋ္ဌမာနသော.

၁၀. သံဃမိတ္တဿ ထေရဿ၊ သေဝကော ရာဇဝလ္လဘော၊

သောဏာမစ္စော ဒါရဏော စ၊ ဘိက္ခဝေါ စ အလဇ္ဇိနော.

၁၁. ဘိန္ဒိတွာ လောဟပါသာဒံ၊ သတ္တဘူမက မုတ္တမံ၊

ဃရေ နာနပ္ပကာရေ စ၊ ဣတော’ဘယဂိရိံ နယုံ.

၁၂. မဟာဝိဟာရာ နီတေဟိ၊ ပါသာဒေဟိ ဗဟူဟိ စ၊

အဘယဂိရိဝိဟာရောယံ၊ ဗဟုပါသာဒကော အဟု.

၁၃. သံဃမိတ္တံ ပါပမိတ္တံ၊ ထေရံ သောဏဉ္စ သေဝကံ၊

အာဂမ္မ သုဗဟုံ ပါပံ၊ အကာသိ သော မဟီပတိ.

၁၄. မဟာသိလာပဋိမံ သော၊ ပါစိနတိဿပဗ္ဗတာ၊

အာနေတွာ’ဘယဂိရိမှိ၊ ပတိဋ္ဌာပေသိ ဘူပတိ.

၁၅. ပဋိမာဃရံ ဗောဓိဃရံ၊ ဓာတုသာလံ မနောရမံ၊

စတုသာလဉ္စ ကာရေသီ၊ သင်္ခရီ ကုက္ကုဋဝှယံ.

၁၆. သံဃမိတ္တေန ထေရေန၊ တေန ဒါရုဏကမ္မုနာ၊

ဝိဟာရော သော’ဘယဂိရိ၊ ဒဿနေယျော အဟု တဒါ.

၁၇. မေဃဝဏ္ဏာဘယော နာမ၊ ရညော သဗ္ဗတ္ထ သာခကော၊

သခါ အမစ္စော ကုဇ္ဈိတွာ၊ မဟာဝိဟာရနာသနေ.

၁၈. စောရော ဟုတွာန မလယံ၊ ဂန္တွာ လဒ္ဓမဟဗ္ဗလော၊

ခန္ဓာဝါရံ နိဝေသေသိ၊ ဒုရတိဿကဝါပိယံ.

၁၉. တတြာ’ဂတံ တံ သုတွာ၊ သဟာယံ သော မဟီပတိ၊

ယုဒ္ဓါဟ ပစ္စုဂ္ဂန္တွာန၊ ခန္ဓာဝါရံ နိဝေသယိ.

၂၀. သာဓုံ ပါနဉ္စ မံသဉ္စ၊ လဘိတွာ မလယာဂတံ၊

‘‘န သေဝိဿံ သဟာယေန၊ ဝိနာ ရညာ’’တိ စိန္တိယ.

၂၁. အာဒါယ တံ သယံယေဝ၊ ရတ္တိံ နိက္ခမ္မ ဧကကော၊

ရညော သန္တိကမာဂမ္မ၊ တမတ္ထံ ပဋိဝေဒယိ.

၂၂. တေနာ’ဘတံ တေန သဟ၊ ဝိဿတ္ထော ပရိဘုဉ္ဇိယ၊

‘‘ကသ္မာ စောရော အဟု မေ တွံ၊ ‘‘ဣတိ ရာဇာ အပုစ္ဆိတံ.

၂၃. ‘‘တယာ မဟာဝိဟာရဿ၊ နာသိတတ္တာ’’တိ အဗြုဝိ၊

‘‘ဝိဟာရံ ဝါသယိဿာမိ၊ ခေမမေတံ မမစ္စယံ.

၂၄. ဣစ္ဆေဝ မဗြဝီ ရာဇာ၊ ရာဇာနံ သော ခမာပယိ၊

တေန သညာပိတော ရာဇာ၊ နဂရံယေဝ အာဂမိ.

၂၅. ရာဇာနံ သညပေတွာ သော၊ မေဃဝဏ္ဏာဘယော ပန၊

ရညာ သဟ န အာဂဉ္ဆိ၊ ဒဗ္ဗသမ္ဘာရကာရဏာ.

၂၆. ဝလဘာ ဘရိယာ ရညော၊ ဧကံ လေခကဓီတိကာ၊

မဟာဝိဟာရနာသမှိ၊ ဒုက္ခိတံ တံ ဝိနာသကံ.

၂၇. ထေရံ မာရာပယိ ကုဒ္ဓါ၊ သံဂဟေတွာန ဝဍ္ဎကိံ၊

ထူပါရာမံ ဝိနာသေတုံ၊ အာဂတံ ဒုဋ္ဌမာနသံ.

၂၈. မာရာပေတွာ သံဃမိတ္တ-တ္ထေရံ ဒါရုဏကာရကံ၊

သောဏာမစ္စဒါရဏဉ္စ၊ ဃာတယိံသု အသညကာ.

၂၉. အာနေတွာ ဒဗ္ဗသမ္ဘာရံ၊ မေဃဝဏ္ဏာဘယော တု သော၊

မဟာဝိဟာရေနေကာနိ၊ ပရိဝေဏာနိ ကာရယိ.

၃၀. အဘယေနဘယော တသ္မိံ၊ ဝူပသန္တေ တု ဘိက္ခဝေါ၊

မဟာဝိဟာရံ ဝါသေသုံ၊ အာဂန္တွာန တတော တတော.

၃၁. ရာဇာ မဟာဗောဓိဃရေ၊ ပစ္ဆိမာယ ဒိသာယ တု၊

ကာရေတွာ လောဟရူပါနိ၊ ဌပါပေသိ ဒုဝေ တု သော.

၃၂. ဒက္ခိဏာရာမဝါသိမှိ၊ ကုဟကေ ဇိမှမာနသေ၊

ပသီဒိတွာ ပါပမိတ္တေ၊ တိဿတ္ထေရေ အသညတေ.

၃၃. မဟာဝိဟာရသီမန္တေ၊ ဥယျာနေ ဇောတိနာမကေ၊

ဇေတဝနဝိဟာရံ သော၊ ဝါရယန္တောပိ ကာရယိ.

၃၄. တတော သီမံ သမုဂ္ဃါတုံ၊ ဘိက္ခုသံဃမယာစိသော၊

အဒါတုကာမာ တံ ဘိက္ခူ၊ ဝိဟာရမှာ အပက္ကမုံ.

၃၅. ဣဓ သီမာသမုဂ္ဃါတံ၊ ပရေဟိ ကရိယမာနကံ၊

ကောပေတုံ ဘိက္ခဝေါ ကေစိ၊ နိလီယိံသု တဟိံ တဟိံ.

၃၆. မဟာဝိဟာရော နဝမာသေ၊ ဧဝံ ဘိက္ခူဟိ ဝဇ္ဇိတော၊

‘‘သမုဂ္ဃါတံ ကရိမှာ’’တိ-ပရေ ဘိက္ခူ အမညိသုံ.

၃၇. တတော သီမာသမုဂ္ဃါတေ၊ ဗျာပါရေ ပရိနိဋ္ဌိတေ၊

မဟာဝိဟာရံ ဝါသေသုံ၊ ဣဓာဂန္တွာန ဘိက္ခဝေါ.

၃၈. တဿ ဝိဟာရဂါဟိဿ၊ တိဿတ္ထေရဿ စောဒနာ၊

အန္တိမဝတ္ထုနာ အာသိ၊ ဘူတတ္ထံ သံဃမဇ္ဈဂါ.

၃၉. ဝိနိစ္ဆိယ မဟာမစ္စော၊ တထာ ဓမ္မိကသမ္မတော၊

ဥပ္ပဗ္ဗာဇေသိ ဓမ္မေန၊ တံ အနိစ္ဆာယ ရာဇိနော.

၄၀. သောယေဝ ရာဇာ ကာရေသိ၊ ဝိဟာရံ မဏိဟီရကံ၊

တယော ဝိဟာရေ ကာရေသိ၊ ဒေဝါလယံ ဝိနာသိယ.

၄၁. ဂေါကဏ္ဏံ ဧရကာပိလ္လံ၊ ကလန္ဒဗြာဟ္မဏဂါမကေ၊

မိဂဂါမဝိဟာရဉ္စ၊ ဂင်္ဂသေနကပဗ္ဗတံ.

၄၂. ပစ္ဆိမာယ ဒိသာယာထ၊ ဓာတုသေနဉ္စ ပဗ္ဗတံ၊

ရာဇာ မဟာဝိဟာရဉ္စ၊ ကောကဝါတမှိ ကာရယိ.

၄၃. ရူပါရမ္မဝိဟာရဉ္စ၊ စူဠဝိဋ္ဋဉ္စ ကာရယိ၊

ဥတ္တရာဘယသဝှေ စ၊ ဒုဝေ ဘိက္ခူနုပဿယေ.

၄၄. ကာလဝေဠကယက္ခဿ၊ ဌာနေ ထူပဉ္စ ကာရယိ၊

ဒီပမှိ ဇိဏ္ဏကာဝါသေ၊ ဗဟူ စ ပဋိသင်္ခရိ.

၄၅. သင်္ဃတ္ထေရသဟဿဿ၊ သဟဿဂ္ဃမဒါသိ သော၊

ထေရဒါနဉ္စ သဗ္ဗေသံ၊ အနုဝဿဉ္စ စီဝရံ.

၄၆. အန္နပါနာဒိဒါနဿ၊ ပရိစ္ဆေဒေါ န ဝိဇ္ဇတိ၊

သုဘိက္ခတ္ထာယ ကာရေသိ၊ သော’ဝ သောဠသ ဝါပိယော.

၄၇. မဏိဟီရမဟာဝါပိံ၊ ဇလ္လုရံ ခါဏုနာမကံ၊

မဟာမဏိံ ကောကဝါတံ၊ မောရကပရကဝါပိကံ.

၄၈. ကုဗ္ဗာဟကံ ဝါဟကဉ္စ၊ ရတ္တမာလကဏ္ဍကမ္ပိ စ၊

တိဿဝဍ္ဎမာနကဉ္စ၊ ဝေဠင်္ဂဝိဋ္ဌိကမ္ပိ စ.

၄၉. မဟာဂလ္လစီရဝါပိံ၊ မဟာဒါရဂလ္လကမ္ပိ စ၊

ကာဠပါသာဏဝါပိဉ္စ၊ ဣမာ သောဠသ ဝါပိယော.

၅၀. ဂင်္ဂါယ ပဗ္ဗဝဝှံသော၊ မဟာမာတိဉ္စ ကာရယိ၊

ဧဝံ ပုညမပုညဉ္စ၊ သုဗဟုံ သော ဥပါစိနီတိ.

၅၁. အသာဓုသင်္ဂမေနေဝံ၊ ယာဝဇီဝံ သုဘာသုဘံ၊

ကတွာ ဂတော ယထာကမ္မံ၊ သော မဟာသေနဘူပတိ.

၅၂. တသ္မာ အသာဓုသံသဂ္ဂံ၊ အာရကာ ပရိဝဇ္ဇိယ၊

အဟိံ ဝါ’သိ ဝိသံ ခိပ္ပံ၊ ကရေယျ’တ္ထဟိတံ ဗုဓော.

၅၃. အဟု ရာဇာ သိရိမေဃ-ဝဏ္ဏော တဿ သုတော တတော၊

ဝန္ဓာတာ ဝိယ လောကဿ၊ သဗ္ဗသမ္ပတ္တိဒါယကော.

၅၄. မဟာသေနေန ပါပါနံ၊ ဝသဂေန ဝိနာသိတေ၊

မဟာဝိဟာရေ သဗ္ဗေပိ၊ သန္နိပါတိယ ဘိက္ခဝေါ.

၅၅. ဥပသင်္ကမ္မ ဝန္ဒိတွာ၊ နိသိန္နော ပုစ္ဆိ သာဒရော၊

‘‘ပိတရာ သံဃမိတ္တဿ၊ သဟာယေန ဝိနာသိတံ.

၅၆. ကိံ ကိမေဝါ’’တိ အာဟံသု၊ ဘိက္ခဝေါ တံ နရိဿရံ၊

‘‘သီမာယုဂ္ဃါဋနံ ကာတုံ၊ ဝါယမိတွာပိ တေ ပိတာ.

၅၇. နာသက္ခိ အန္တောသီမာယံ၊ ဘိက္ခူနံ ဝိဇ္ဇမာနတော၊

ဘူမိဂဗ္ဘနိလီနာဟိ၊ သတ္တာသုံ ဧတ္ထ ဘိက္ခဝေါ.

၅၈. အမစ္စော သောဏာမစ္စော စ၊ သံဃမိတ္တော စ ပါပိယော၊

ရာဇာနံ သညာပေတွာန၊ အပုညံ တေန ကာရယုံ.

၅၉. ဘိန္ဒိတွာ လောဟပါသာဒံ၊ သတ္တဘူမကမုတ္တမံ၊

ဃရေ နာနပ္ပကာရေ စ၊ ဣတော’ဘယဂိရိံ နယုံ.

၆၀. မာသကေ စတုဗုဒ္ဓေဟိ၊ နိဝုတ္ထေ စေတိယင်္ဂဏေ၊

ဝပါပေသုဉ္စ ဒုပ္ပညာ၊ ပဿ ဗာလသမာဂမံ’’.

၆၁. တံ သုတွာ ပိတုကမ္မံ သော၊ နိဗ္ဗိန္နော ဗာလသင်္ဂမေ၊

ပိတရာ နာသိတံ တတ္ထ၊ သဗ္ဗံ ပါကတိကံ အကာ.

၆၂. လောဟပါသာဒမဂဒေါ’ဝ၊ ကာသိ ပါသာဒမုတ္တမံ၊

ရညော မဟာပနာဒဿ၊ ဒဿေန္တော ဝိယ ဘူတလေ.

၆၃. ပရိဝေဏာနိ သဗ္ဗာနိ၊ နာသိတာနိ နိဝေသယိ၊

ဘောဂေ အာရာမိကာနဉ္စ၊ ယထာဌာနေ ဌပေသိ သော.

၆၄. ပိတရာ ပစ္စယာနဉ္စ၊ ပစ္ဆိန္နတ္တာ ဝိဗုဒ္ဓိနာ၊

ဆိဒ္ဒါဝါသံ ဃနာဝါသံ၊ ဝိဟာရံ’ကာသိ ဗုဒ္ဓိမာ.

၆၅. ကာရိတေ ပိတရာ ဇောတိ ဝနေစေ’သော ဝိဟာရကေ၊

ကမ္မံ ဝိပ္ပကတံ သဗ္ဗံ၊ နိဋ္ဌာပေသိ နရိဿရော.

၆၆. ထေရဿာ’ထ မဟိန္ဒဿ၊ သမဏိန္ဒဿ သုနုနော၊

သုတွာန မနုဇိန္ဒော သော၊ ပဝတ္တိံ သဗ္ဗမာဒိတော.

၆၇. ပသီဒိတွာ ဂုဏေ တဿ၊ ရာဇာ ဒိပ္ပပသာဒကေ၊

‘‘ဣဿရော ဝတ ဒီပဿ၊ ထေရော’’ ဣတိ ဝိစိန္တိယ.

၆၈. ပဋိဗိမ္ဗံ သုဝဏ္ဏဿ၊ ကတွာ တမ္မာဏ နိဿိတံ၊

ပုဗ္ဗကတ္တိကမာသဿ၊ ပဗ္ဗပက္ခေ တု သတ္တမေ.

၆၉. ဒိနေ နေတွာ စေတိယမ္ဗ-ထလေ ထေရမ္ဗသညိတေ၊

တတြဋ္ဌမေ နိဝါသေတွာ၊ တတော တု နဝမေ ပန.

၇၀. မဟာသေနံ ဂဟေတွာ သော၊ ဒေဝသေနာ သမူပမံ၊

ဩရောဓေ နဂရေ စေဝ၊ ဂေဟရက္ခဏကေ ဝိနာ.

၇၁. လံကာဒီပေ စ သကလေ၊ သဗ္ဗေ အာဒါယ ဘိက္ခဝေါ၊

ဝိဿဇ္ဇေတွာ မနုဿေ စ၊ နဂရေ စာရကဋ္ဌိတေ.

၇၂. ပဋ္ဌပေတွာ မဟာဒါနံ၊ အယဉ္စာခိလပါဏိနံ၊

ပူဇံ သဗ္ဗောပဟာရေဟိ၊ ကရောန္တော စ အနူပမံ.

၇၃. ပစ္စုဂ္ဂမနမေတဿ၊ ဒီပသတ္ထုဿ သတ္ထုနော၊

ဝရပုတ္တဿ သော ကတွာ၊ ဒေဝရာဇာ’ဝ သတ္ထုနော.