ဒုတိယပရိစ္ဆေဒ

မဟာသမ္မတဝံသ

၁. မဟာသမ္မတ ရာဇဿ၊ ဝံသဇော ဟိ မဟာမုနိ၊

ကပ္ပဿာဒိမှိ ရာဇာ’သိ၊ မဟာသမ္မတနာမကော.

၂. ရောဇော စ ဝရရောဇော စ၊ တထာ ကလျာဏကာ ဒုဝေ၊

ဥပေါသထော စ မန္ဓာတာ၊ စရကော’ပစရာ ဒုဝေ.

၃. စေတီယော မုစလော စေဝ၊ မဟာမူစလနာမကော၊

မုစလိန္ဒော သာဂရော စေဝ၊ သာဂရော ဒေဝ ဝနာမကော.

၄. ဘရတော ဘဂီရထော စေဝ၊ ရုစိ စ သုရုစိ ပိစ၊

ပတာပေါ မဟာပတာပေါ၊ ပနာဒါ စ တထာ ဒုဝေ.

၅. သုဒဿနော စ နေရု စ၊ တထာ ဧဝ ဒုဝေ ဒုဝေ၊

ပစ္ဆိမာ စာ’တိ ရာဇာနော၊ တဿ ပုတ္တပပုတ္တကာ.

၆. အသံခိယာယုကာ ဧတေ၊ အဋ္ဌဝီသတိ ဘူမိပါ၊

ကုသာဝတိံ ရာဇဂဟံ၊ မိထိလဉ္စာပိ အာဝသုံ.

၇. တတော သတဉ္စ ရာဇနော၊ ဆပ္ပညာသ စ သဋ္ဌိ စ၊

စတုရာသီတိ သဟဿာနိ၊ ဆတ္တိံသာ စ တတော ပရေ.

၈. ဒွတ္တိံသ အဋ္ဌဝီသာ စ၊ ဒွါဝီသတိ တတော ပရေ၊

အဋ္ဌာရသ သတ္တရသ၊ ပဉ္စဒသ စတုဒ္ဒသ.

၉. နဝ သတ္တ ဒွါဒသ စ၊ ပဉ္စဝီသ တတောပရေ၊

ပဉ္စဝီသံ ဒွါဒသ စ၊ ဒွါဒသဉ္စ နဝါ ပိစ.

၁၀. စတုရာသီတိသဟဿာနိ၊ မခါဒေဝါဒိကာပိ စ၊

စတုရာသီတိသဟဿာနိ၊ ကဠာရာဇနကာဒယော.

၁၁. သောဠသ ယာဝ ဩက္ကာတံ၊ ပပုတ္တာ ရာသိတော ဣမေ၊

ဝိသုံ ဝိသုံ ပုရေ ရဇ္ဇံ၊ ကမတော အနုသာသိသုံ.

၁၂. ဩက္ကာမုခေါ ဇေဋ္ဌပုတ္တော၊ ဩက္ကာကသာ’သိ ဘူပတိ၊

နိပုရော စန္ဒီမာ စန္ဒံ-မုခေါ စ သိဝိ သဉ္ဇယော.

၁၃. ဝေဿန္တရ မဟာရာဇာ၊ ဇာလီ စ သီဟဝါဟနော၊

သီဟဿရော စ ဣစ္စေတေ၊ တဿ ပုတ္တ ပ ပုတ္တကာ.

၁၄. ဒွေအသီတိ သဟဿာနိ၊ သီဟဿရဿ ရာဇိနော၊

ပုတ္တ ပ ပုတ္တ ရာဇာနော၊ ဇယသေနော တဒန္တိမော.

၁၅. ဧတေ ကပိလဝတ္ထုသ္မိံ၊ သကျရာဇာတိ ဝိဿုတာ၊

သီဟဟနု မဟာရာဇာ၊ ဇယသေနဿ အတြဇော.

၁၆. ဇယသေနဿ ဓီတာ စ၊ နာမေနာ’သိ ယသောဓရာ၊

ဒေဝဒယေ ဒေဝဒဟ-သက္ကော နာမာ’သိ ဘူပတိ.

၁၇. အဉ္ဇနော စာ’ထ ကစ္စာနာ၊ အာသုံ တဿ သုတာ ဒုဝေ၊

မဟေသီစာ’သိ ကစ္စာနာ၊ ရညော သီဟဟနုဿ သာ.

၁၈. အာသီ အဉ္ဇနသက္ကဿ၊ မဟေသီ သာ ယသောဓရာ၊

အဉ္ဇနဿ ဒုဝေ ဓီတာ၊ မာယာ စာထ ပဇာပတိ.

၁၉. ပုတ္တာ ဒုဝေ ဒဏ္ဍပါဏီ၊ သုပ္ပဗုဒ္ဓေါ စ သာကိယော၊

ပဉ္စ ပုတ္တာ ဒုဝေ ဓီတာ၊ အာသုံ သီဟဟနုဿရေ.

၂၀. သုဒ္ဓေါဒနော ဓောတောဒနော၊ သက္ကသုက္ကမိတောဒနော၊

အမိတာ ပမိတာစာ’တိ၊ ဣမေ ပဉ္စ ဣမာ ဒုဝေ.

၂၁. သုပ္ပဗုဒ္ဓဿ သက္ကဿ၊ မဟေသီ အမိတာ အဟု၊

တဿာ’သုံ ဘဒ္ဒကစ္စာနာ၊ ဒေဝဒတ္တော ဒုဝေ သုတာ.

၂၂. မာယာ မဟာပဇာပတိ စေဝ၊ သုဒ္ဓေါဒန မဟေသီယော၊

သုဒ္ဓေါဒန မဟာရညော၊ ပုတ္တော မာယာယ သော ဇိနော.

၂၃. မဟာ သမ္မတဝံသမှိ၊ အသမ္ဘိန္နေ မဟာမုနိ၊

ဧဝံ ပဝတ္တေ သဉ္ဇာတော၊ သဗ္ဗ ခတ္ထိယ မုဒ္ဓနိ.

၂၄. သိဒ္ဓတ္ထဿ ကုမာရဿ၊ ဗောဓိသတ္တဿ သာ အဟု၊

မဟေသီ ဘဒ္ဒကစ္စာနာ၊ ပုတ္တော တဿာ’သိ ရာဟုလော.

၂၅. ဗိမ္ဗိသာရော စ သိဒ္ဓတ္ထ-ကုမာရော စ သဟာယကာ၊

ဥဘိန္နံ ပိတရော စာပိ၊ သဟာယာဧဝ တေ အဟုံ.

၂၆. ဗောဓိသတ္တော ဗိမ္ဗိသာရာ၊ ပဉ္စဝဿာဓိကော အဟု၊

ဧကူနတိံသော ဝယသာ၊ ဗောဓိသတ္တော’ဘိနိက္ခမိ.

၂၇. ပဒဟိတွာန ဆဗ္ဗဿံ၊ ဗောဓိံ ပတွာ ကမေန စ၊

ပဉ္စတိံသော ထ ဝယသာ၊ ဗိမ္ဗိသာရမုပါဂမိ.

၂၈. ဗိမ္ဗိသာရော ပန္နရသ-ဝဿော’ထ ပီတရံ သယံ၊

အဘိသိတ္တော မဟာပညော၊ ပတ္တော ရဇ္ဇဿ တဿ တု.

၂၉. ပတ္တေ သောဠသမေ ဝဿေ၊ သတ္ထာ ဓမ္မမဒေသယိ၊

ဒွါပညာသေဝ ဝဿာနိ၊ ရဇ္ဇံ ကာရေသိ သော ပန.

၃၀. ရဇ္ဇေ သမာ ပန္နရသ၊ ပုဗ္ဗေ ဇိနသမာဂမာ၊

သတ္တတိံသ သမာ တဿ၊ ဓရမာနေ တထာဂတေ.

၃၁. ဗိမ္ဗိသာရသုတော’ဇာတ-သတ္တုတံ ဃာတီယာ’မတိ၊

ရဇ္ဇံ ဒွတ္တိံသဝဿာနိ၊ မဟာမိတ္တဒ္ဒုကာရယီ.

၃၂. အဇာတသတ္တုနော ဝဿေ၊ အဋ္ဌမေ မုနိ နိဗ္ဗုတော၊

ပစ္ဆာ သော ကာရယီ ရဇ္ဇံ၊ ဝဿာနိ စတုဝီသတိ.

၃၃. တထာဂတော သကလလောကဂ္ဂတံ ဂတော၊

အနိစ္စတာဝ သမဝသော ဥပါဂတော၊

ဣတိ’ဓ ယော ဘယဇနနိံ အနိစ္စတံ၊

အဝေက္ခတေ သ ဘဝတိ ဒုက္ခပါရဂူတိ.

သုဇနပ္ပသာဒသံဝေဂတ္ထာယ ကတေ မဟာဝံသေ

မဟာသမ္မတဝံသော နာမ

ဒုတိယော ပရိစ္ဆေဒေါ.