တတိယ ပရိစ္ဆေဒ

ပဌမဓမ္မသံဂီတိ

၁. ပဉ္စနေတ္တော ဇိနော ပဉ္စ-စတ္တာလီသသမာ’သမော၊

ဌတွာ သဗ္ဗာနိ ကိစ္စာနိ၊ ကတွာ လောကဿ သဗ္ဗထာ.

၂. ကုသိနာရာယယမက-သာလာနမန္တရေ ဝရေ၊

ဝေသာခပုဏ္ဏမာယံ သော၊ ဒီပေါ လောကဿ နိဗ္ဗုတော.

၃. သင်္ချာပထမတိက္ကန္တာ၊ ဘိက္ခူ တတ္ထ သမာဂတာ၊

ခတ္တိယာ ဗြာဟ္မဏာ ဝဿာ၊ သုဒ္ဓါ ဒေဝါ တထေဝ စ.

၄. သတ္တသတသဟဿာနိ၊ တေသု ပါမောက္ခဘိက္ခဝေါ၊

ထေရော မဟာကဿပေါဝ၊ သင်္ဃတ္ထေရော တဒါ အဟု.

၅. သတ္ထုသရီရသာရီရ-ဓာတုကိစ္စာနိ ကာရိယ၊

ဣစ္ဆန္တော သော မဟာထေရော၊ သတ္ထု ဓမ္မစိရဋ္ဌိတိံ.

၆. လောကနာထေ ဒသဗလေ၊ သတ္တာဟပရိနိဗ္ဗုတေ၊

ဒုဗ္ဘာသိတံ သုဘဒ္ဒဿ၊ ဗုဒ္ဓဿ ဝစနံ သရံ.

၇. သရံ စီဝရဒါနဉ္စ၊ သမတ္တေ ဌပနံ တထာ၊

သဒ္ဓမ္မဌပနတ္ထာယ၊ မုနိနာ’နုဂ္ဂဟံ ကတံ.

၈. ကာတုံ သဒ္ဓမ္မသံဂီတိံ၊ သမ္ဗုဒ္ဓါနမတေ ယတိ၊

နဝင်္ဂသာသနဓရေ၊ သဗ္ဗင်္ဂသမုပါဂတေ.

၉. ဘိက္ခူ ပဉ္စသတေယေဝ၊ မဟာခီဏာသဝေ ဝရေ၊

သမ္မန္နိ ဧကေနူနေ တု၊ အာနန္ဒတ္ထေရကာရဏာ.

၁၀. ပုန အာနန္ဒတ္ထေရာ’ပိ၊ ဘိက္ခူဟိ အဘိယာစိတော၊

သမ္မန္နိ ကာတုံ သံဂီတိံ၊ သာ န သက္ကာ ဟိ တံ ဝိနာ.

၁၁. သာဓုကီဠနသတ္တာဟံ၊ သတ္တာဟံ ဓာတုဘာဇနံ၊

ဣစ္စဒ္ဓမာသံ ခေပေတွာ၊ သဗ္ဗလောကာနုကမ္ပကာ.

၁၂. ဝဿံ ဝသံ ရာဇဂဟေ၊ ကဿာမ ဓမ္မသင်္ဂဟံ၊

နာညေဟိ တတ္တ ဝတ္ထဗ္ဗ-မိတိ ကတွာန နိစ္ဆယံ.

၁၃. သောကာတုရံ တတ္ထ တတ္ထ၊ အဿာသေန္တော မဟာဇနံ၊

ဇမ္ဗုဒီပမှိ တေ ထေရာ၊ ဝိစရိတွာန စာရိကံ.

၁၄. အာသဠှိသုက္ကပက္ခမှိ၊ သုက္ကပက္ခဌိတတ္ထိကာ၊

ဥပါဂမုံ ရာဇဂဟံ၊ သမ္ပန္နစတုပစ္စယံ.

၁၅. တတ္ထေဝ ဝဿူပဂတာ၊ တေ မဟာကဿပါဒယော၊

ထေရာ ထိရဂုဏူပေတာ၊ သမ္ဗုဒ္ဓမတကောဝိဒါ.

၁၆. ဝဿာနံ ပဌမံ မာသံ၊ သဗ္ဗသေနာသနေသု’ပိ၊

ကာရေသုံ ပဋိသင်္ခါရံ၊ ဝတွာနာ’ဇာတသတ္တုနော.

၁၇. ဝိဟာရပဋိသင်္ခါရေ၊ နိဋ္ဌိတေ အဟု ဘူပတိ၊

ဣဒါနိ ဓမ္မသံဂီတိံ၊ ကရိဿာမိ မယံ ဣတိ.

၁၈. ကတ္တဗ္ဗံ ကိန္တိပုဋ္ဌဿ၊ နိသဇ္ဇဌာနမာဒိသုံ၊

ရာဇာ ကတ္ထာတိ ပုစ္ဆိတွာ၊ ဝုတ္တဌာနမှိ တေဟိ သော.

၁၉. သီဃံ ဝေဘာရသေလဿ၊ ပဿေ ကာရေသိ မဏ္ဍပံ၊

သတ္တပဏ္ဏိဂုဟာဒွါရေ၊ ရမ္မံ ဒေဝသဘောပမံ.

၂၀. သဗ္ဗထာ မဏ္ဍယိတွာ တံ၊ အတ္ထရာပေသိ တတ္ထ သော၊

ဘိက္ခူနံ ဂဏနာယေဝ၊ အနဂ္ဃတ္ထရဏာနိ စ.

၂၁. နိဿာယ ဒက္ခိဏံ ဘာဂံ၊ ဥတ္တရာမုခမုတ္တမံ၊

ထေရာသနံ သုပညတ္တံ၊ အာသိ တတ္ထ မဟာရဟံ.

၂၂. တသ္မိံ မဏ္ဍပမဇ္ဈသ္မိံ၊ ပုရတ္ထမုခမုတ္တမံ၊

ဓမ္မာသနံ သုပညတ္တံ၊ အဟောသိ သုဂတာရဟံ.

၂၃. ရာဇာ’ရောစယိ ထေရာနံ၊ ကမ္မံ နော နိဋ္ဌိတံ ဣတိ၊

တေ ထေရာ ထေရမာနန္ဒ-မာနန္ဒကရမဗြဝုံ.

၂၄. သွေ သန္နိပါတော အာနန္ဒ၊ သေခေန ဂမနံ တဟိံ၊

န ယုတ္တန္တေ သဒတ္ထေ တွံ၊ အပ္ပမတ္တော တတော ဘဝ.

၂၅. ဣစ္စေဝံ စောဒိတော ထေရော၊ ကတွာန ဝီရိယံ သမံ၊

ဣရိယာပထတော မုတ္တံ၊ အရဟတ္တမပါပုဏိ.

၂၆. ဝဿာနံ ဒုတိယေ မာသေ၊ ဒုတိယေ ဒိဝသေ ပန၊

ရုစိရေ မဏ္ဍပေ တသ္မိံ၊ ထေရာ သန္နိပတိံသု တေ.

၂၇. ဌပေတွာ’နန္ဒတ္ထေရဿ၊ အနုစ္ဆဝိကမာသနံ၊

အာသနေသု နိသီဒိံသု၊ အရဟန္တော ယထာရဟံ.

၂၈. ထေရော’ရဟတ္တပတ္တိံ သော၊ ဉာပေတုံ တေဟိ နာဂမာ၊

ကုဟိံ အာနန္ဒတ္ထေရော’တိ၊ ဝုစ္စမာနေ တု ကေဟိစိ.

၂၉. နိမ္မုဇ္ဇိတွာ ပထဝိယာ၊ ဂန္တွာ ဇောတိပထေန ဝါ၊

နိသီဒိ ထေရော အာနန္ဒော၊ အတ္တနော ဌပိတာသနေ.

၃၀. ဥပါလိထေရော ဝိနယေ၊ သေသဓမ္မေ အသေသကေ၊

အာနန္ဒတ္ထေရမကရုံ၊ သဗ္ဗေ ထေရာ ဓုရန္ဓရေ.

၃၁. မဟာထေရော သကတ္တာနံ၊ ဝိနယံ ပုစ္ဆိတုံ သယံ၊

သမ္မန္နု’ပါလိထေရော စ၊ ဝိဿဇ္ဇေတုံ တမေဝ တု.

၃၂. ထေရာသနေ နိသီဒိတွာ၊ ဝိနယံ တမပုစ္ဆိ သော၊

ဓမ္မာသနေ နိသီဒိတွာ၊ ဝိဿဇ္ဇေသိ တမေဝ သော.

၃၃. ဝိနယညူနမဂ္ဂေန၊ ဝိဿဇ္ဇိတကမေန တေ၊

သဗ္ဗေ သဇ္ဈာယမကရုံ၊ ဝိနယံ နယကောဝိဒါ.

၃၄. အဂ္ဂံ ဗဟုဿုတာဒီနံ၊ ကောသာရက္ခံ မဟေသိနော၊

သမ္မန္နိတွာန အတ္တာနံ၊ ထေရော ဓမ္မမပုစ္ဆိ သော.

၃၅. တထာ သမ္မန္နိယ’တ္တာနံ၊ ဓမ္မာသနာဂတော သယံ၊

ဝိဿဇ္ဇေသိ တမာနန္ဒ-တ္ထေရော ဓမ္မမသေသတော.

၃၆. ဝေဒေဟမုနိနာ တေန၊ ဝိဿဇ္ဇိတကမေန တေ၊

သဗ္ဗေ သဇ္ဈာယမကရုံ၊ ဓမ္မံ ဓမ္မတ္ထကောဝိဒါ.

၃၇. ဧဝံ သတ္တဟိ မာသေဟိ၊ ဓမ္မသံဂီတိ နိဋ္ဌိတာ၊

သဗ္ဗလောကဟိတတ္ထာယ၊ သဗ္ဗလောကဟိ တေဟိ သာ.

၃၈. မဟာကဿပထေရေန၊ ဣဒံ သုဂတသာသနံ၊

ပဉ္စဝဿသဟဿာနိ၊ သမတ္ထံ ဝတ္တနေ ကတံ.

၃၉. အတီဝ ဇာတပါမောဇ္ဇာ၊ သန္ဓာရကဇလန္တိကာ၊

သံဂီတိပရိယောသာနေ၊ ဆဒ္ဓါကမ္ပိ မဟာမဟီ.

၄၀. အစ္ဆရိယာနိ စာ’ဟေသုံ၊ လောကေနေကာနိနေကဓာ၊

ထေရေဟေဝ ကတတ္တာ စ၊ ထေရိယာယံ ပရမ္ပရာ.

၄၁. ပဌမံ သင်္ဂဟံ ကတွာ၊ သဗ္ဗလောကဟိတံ ဗဟုံ၊

တေ ယာဝတာယုကံ ဌတွာ၊ ထေရာ သဗ္ဗေပိ နိဗ္ဗုတာ.

၄၂. ထေရာ’ပိ တေ မတိပဒီပဟတန္ဓကာရာ၊

လောကန္ဓကာရဟနနမှိ မဟာပဒီပါ၊

နိဗ္ဗာပိတာ မရဏဃောရမဟာနိလေန၊

တေနာပိ ဇီဝိတမဒံ မတိမာ ဇဟေယျာတိ.

သုဇနပ္ပသာဒံသံဝေဂတ္ထာယ ကတေ မဟာဝံသေ

ပဌမဓမ္မသံဂီတိနာမ

တတိယော ပရိစ္ဆေဒေါ.