တနာဒယော |ဩ၀.၀၀၂၈|

၁၂၀. တနု ဝိတ္ထာရေ သက သတ္တိသ္မိံ-ဒု ပရိတာပေ သနု ဒါနသ္မိံ၊

ဝန ယာစာယံ မနု ဗောဓသ္မိံ-ဟိ ဂတေ အပ ပါပုဏနသ္မိံ (ဟိ၊)

ကရ ကရဏသ္မိံ(ဘဝတိ)သိ ဗန္ဓေ-သု အဘိဿဝနေ(တနု အာဒီနိ၊)

နိစ္စံ ဏေဏယန္တာ စုရာဒယော.

၁၂၁. စုရ ထေယျေ လောက (ဓာတု) ဒဿနေ အကိ လက္ခဏေ၊

သိယာ ထက ပတိဃာတေ (ပုန) တက္က ဝိတက္ကဏေ၊

၁၂၂. လက္ခ ဒဿနအင်္ကေသု (ဝတ္တတေ) မက္ခ မက္ခဏေ၊

ဘက္ခာ’ဒနေ မောက္ခ မောစေ သုခ-ဒုက္ခ (စ) တကိရယေ၊

၁၂၃. |ဩ၀.၀၀၂၉|

လိင်္ဂ စိတ္တကိရယာ’ဒီသု မဂ-မဂ္ဂ ဂဝေသနေ၊

(ပုနာ’ပိ) ပစ ဝိတ္ထာရေ က္လေသေ ဝဉ္စ ပလမ္ဘနေ.

၁၂၄. ဝစ္စ အဇ္ဈာယနေ အစ္စ ပူဇာယံ ဝစ ဘာသနေ၊

ရစ ပတိယတနေ သုစ ပေသုညေ ရုစ ရောစနေ၊

၁၂၅. မုစပ္ပမောစနေ လောစ ဒဿနေ ကစ ဒိတ္တိယံ၊

သဇ္ဇာ’ဇ္ဇ အဇ္ဇနေ တဇ္ဇ တဇ္ဇနေ ဝဇ္ဇ ဝဇ္ဇနေ၊

၁၂၆. ယုဇ သံယမနေ ပူဇ ပူဇာယံ တိဇ တေဇနေ၊

ပဇ မဂ္ဂ သံဝရဏေ ဂတေ ဘဇ ဝိဘာဇနေ၊

၁၂၇. (အထော) ဘာဇ ပုထက္ကာရေ သဘာဇ ပီတိဒဿနေ၊

(အထော တု) ဃဋ သင်္ဃာတေ ဃဋ္ဋ သဉ္စလနာ’ဒိသု၊

၁၂၈. |ဩ၀.၀၀၃၀|

ကုဋ-ကောဋ္ဋစ္ဆေဒနေ (ဒွေ) ကုဋ အာကောဋနာ’ဒိသု၊

နဋ နစ္စေ စဋ-ပုဋ ဘေဒေ ဝဏ္ဋ ဝိဘာဇနေ၊

၁၂၉. တုဝဋ္ဋ ဧကသယနေ ဃဋော ဝိသရဏေ (သိယာ)၊

ဂုဏ္ဌ ဩဂုဏ္ဌနေ ဟေဌ ဗာဓာယံ ဝေဌ ဝေဌနေ

ဂုဍိ ဝေဌေ ကဍိ-ခဍိ ဘေဒနေ မဍိ ဘူသနေ၊

၁၃၀. ပဏ္ဍ-ဘဏ္ဍ ပရိဘာသေ ဒဍိ အာဏာယ (မီရိတော)၊

တဍိ သံတာဠနေ ပိဏ္ဍ သင်္ဃာတေ ဆဍ္ဍ ဆဍ္ဍနေ၊

၁၃၁. ဝဏ္ဏ သံဝဏ္ဏနေ စုဏ္ဏ စုဏ္ဏနေ အာဏ ပေသနေ၊

ဂဏ သံကလနေ ကဏ္ဏ သဝဏေ စိန္တ စိန္တနေ၊

၁၃၂. သန္တ သင်္ကောစနေ မန္တ ဂုတ္တ ဘာသန ဇာနနေ၊

စိတ သံစေတနာ’ဒိသု ကိတ္တ သံသဒ္ဒနေ (ဘဝေ၊)

၁၃၃. |ဩ၀.၀၀၃၁|

ယတ နီယျာတနေ ဂန္ထ သန္ဒဗ္ဘေ အတ္ထ ယာစနေ၊

ကထ ဝါကျပ္ပဗန္ဓေ (စ) ဝိဒ ဉာဏေ နုဒေ စုဒ၊

၁၃၄. ဆဒါ’ပဝါရဏေ ဆဒ္ဒ ဝမနေ ဆန္ဒ ဣစ္ဆယံ၊

ဝဒီ’ဘိဝါဒ ထောမေသု ဘဒိကလျာဏကမ္မနိ၊

၁၃၅. ဟိဠာဒ (တု) သုခေ ဂန္ဓ သူစနေ ဝိဓ ကမ္ပနေ၊

ရန္ဓ ပါကေ (အထော) မာန ပူဇာယံ နု တ္ထုတိမှိ (တု၊)

၁၃၆. ထန ဒေဝသဒ္ဒေ ဦန ပရိဟာနေ ထေန စောရိယေ၊

ဓန သဒ္ဒေ ဉပ တောသ နိသာန မာရဏာ’ဒိသု၊

၁၃၇. လပ ဝါကျေ ဈပ ဒါဟေ ရုပ ရောပဏအာဒိသု၊

ပီ တပ္ပနေ (သိယာ) ကပ္ပ ဝိတက္ကေ လဘိ ဝဉ္စနေ၊

၁၃၈. |ဩ၀.၀၀၃၂|

(အထော) ဝဟိ ဂရဟာယံ သမု သာန္တွန ဒဿနေ၊

ကမု ဣစ္ဆာယ ကန္တိမှိ (သိယာ) ထောမ သိလာဃနေ၊

၁၃၉. တိမု တေမန သင်္ကာသု အမ ရောဂဂတာ’ဒိသု၊

သံဂါမ ယုဒ္ဓေ (ဝတ္တေယျ) ဤရ ဝါစာ ပကမ္ပနေ၊

၁၄၀. ဝရ အာဝရဏိ’စ္ဆာသု ယာစာယံ ဓရ ဓာရဏေ၊

တီရ ကမ္မ သမတ္တိမှိ ပါရ သာမတ္ထိယာ’ဒိသု၊

၁၄၁. တုလု’မ္မာနေ ခလ သောဝေ သဉ္စယေ ပါလရက္ခဏေ၊

ကလ သင်္ကလနာ’ဒီသု (ဘဝေ) မီလ နိမီလနေ၊

၁၄၂. သီလူ’ပဓာရဏေ မူလ ရောဟဏေ လလ ဣစ္ဆနေ၊

ဒုလ ဥက္ခေပဏေ ပူလ မဟတ္တန သမုဿယေ၊

၁၄၃. |ဩ၀.၀၀၃၃|

ဃုသ သဒ္ဒေ ပိသ ပေသေ ဘုသာ’လင်္ကရဏေ (သိယာ၊)

ရုသ ပါရုသိယေ ခုံသ အက္ကောသေ ပုသ ပေါသနေ၊

၁၄၄. ဒိသ ဥစ္စာရဏာ’ဒီသု ဝသ အစ္ဆာဒနေ (သိယာ၊)

ရသ’ဿာဒေ ရဝေ သ္နေဟေ (အထော) သိသ ဝိသေသနေ၊

၁၄၅. သိ ဗန္ဓေ မိဿ သမ္မိဿေ ကုဟ ဝိမ္ဘာပနေ သိယာ၊

ရဟ စာဂေ ဂတေ (စာ’ပိ) မဟ ပူဇာယ (မီရိတော၊)

၁၄၆. ပိဟိ’စ္ဆာယံ သိယာ ဝီဠ လဇ္ဇာယံ ဧဠ ဖာဠနေ

ဟီဠ ဂါရဟိယေ ပီဠ ဗာဓာယံ တဠ တာဠနေ

လဠ (ဓာတူ)’ပသေဝါ’ယံ (ဝတ္တတီ’မေစုရာဒယော၊)

သမတ္တာ သတ္တဂဏာ.

၁၄၇. |ဩ၀.၀၀၃၄|

ဘုဝါဒီ စ ရုဓာဒီ စ-ဒိဝါဒိ သွာ’ဒယော ဂဏာ၊

ကိယာဒီ စ တနာဒီ စ-စုရာဒီတီ’ဓ သတ္တဓာ၊

၁၄၈. ကိရယာဝါစိတ္တမက္ခာတု-မေ’ကေကတ္ထော ဗဟူ’ဒိတော၊

ပယောဂတော’နုဂန္တဗ္ဗာ-အနေကတ္ထာ ဟိ ဓာတဝေါ၊

၁၄၉. ဟိတာယ မန္ဒဗုဒ္ဓီနံ-ဝျတ္တံ ဝဏ္ဏက္ကမာ လဟုံ၊

ရစိတာ ဓာတုမဉ္ဇုသာ-သီလဝံသေန ဓီမတာ၊

၁၅၀. သဒ္ဓမ္မပင်္ကေရုဟရာဇဟံသော၊

အာသိဋ္ဌဓမ္မဋ္ဌိတိ သီလဝံသော၊

ယက္ခဒ္ဒိလေနာချ နိဝါသဝါသီ၊

ယတိဿရော သောယမိဒံ အကာသိ၊

ကစ္စာယန ဓာတုမဉ္ဇူသာ သမတ္တာ.

သာစရိယာနုသိဋ္ဌာ |ဩ၀.၀၀၃၅| ပရိသိဋ္ဌပရိဘာသာ

၁. ဧကာ နေကဿ ရာနန္တူ-’ဘယေသံ အန္တိမာ သရာ၊

အင်္ဂါနုဗန္ဓာ ဓာတူနံ-ဝုစ္စန္တေ’ပိ ယထာက္ကမံ၊

၂. ဓာတုနော ဝျာဉ္ဇနာ ပုဗ္ဗေ-နိဂ္ဂဟီတံ သမ’န္တိမာ၊

ဣဝဏ္ဏေနာ’ရုဓာဒီန-မနုဗန္ဓေန စိဏှိတံ၊

၃. သေသာ’နုဗန္ဓာ သဗ္ဗေသံ-ဟောန္တီ’ဓု’စ္စာရဏပ္ဖလာ၊

ဥစ္စာဝစပ္ဖလာ ဘာသ-န္တရမ္ပတွာ ဘ ဝန္တိ’ပိ၊

၄. |ဩ၀.၀၀၃၆|

နာမဓာတုက ဘာဝေါ’ပိ-ကိရယာယ အဓိကာရတော၊

ဝိရုဒ္ဓန္တရာဘာဝါ-ကွစိဒေဝ ပယုဇ္ဇတေ၊

၅. ဒွန္ဒယုတ္တိဝသာ ကွာပိ-အာဒေသော ယောဝိဘတ္တိယာ၊

ဂုဏာဒိဘာဝ သဒ္ဒေါ’ပိ-တကိရယတ္ထေ ဝိဓီယတေ၊