၆. အာချာတကပ္ပ
ပဌမကဏ္ဍ
(က)
အာချာတသာဂရမထဇ္ဇတနီတရင်္ဂံ၊
ဓာတုဇ္ဇလံ ဝိကရဏာဂမကာလမီနံ၊
လောပါနုဗန္ဓရိယမတ္ထဝိဘာဂတီရံ၊
ဓီရာ တရန္တိ ကဝိနော ပုထုဗုဒ္ဓိနာဝါ.
(ခ)
ဝိစိတ္တသင်္ခါရပရိက္ခိတံ ဣမံ၊
အာချာတသဒ္ဒံ ဝိပုလံ အသေသတော၊
ပဏမျ သမ္ဗုဒ္ဓမနန္တဂေါစရံ၊
သုဂေါစရံ ယံ ဝဒတော သုဏာထ မေ.
(ဂ)
အဓိကာရေ မင်္ဂလေ စေဝ၊ နိပ္ဖန္နေ စာဝဓာရဏေ၊
အနန္တရေ စ ပါဒါနေ၊ အထသဒ္ဒေါ ပဝတ္တတိ.
၄၁၆. ၊ ၄၂၉. အထ ပုဗ္ဗာနိ ဝိဘတ္တီနံ ဆ ပရဿပဒါနိ.
အထ သဗ္ဗာသံ ဝိဘတ္တီနံ ယာနိ ယာနိ ပုဗ္ဗကာနိ ဆ ပဒါနိ၊ တာနိ တာနိ ပရဿပဒသညာနိ ဟောန္တိ.
တံ ယထာ? တိ အန္တိ၊ သိ ထ၊ မိ မ.
ပရဿပဒမိစ္စနေန ကွတ္ထော? ကတ္တရိ ပရဿပဒံ.
၄၀၇. ၊ ၄၃၉. ပရာဏျတ္တနောပဒါနိ.
သဗ္ဗာသံ ဝိဘတ္တီနံ ယာနိ ယာနိ ပရာနိ ဆ ပဒါနိ. တာနိ တာနိ အတ္တနောပဒသညာနိ ဟောန္တိ.
တံ ယထာ? တေ အန္တေ၊ သေ ဝှေ၊ ဧ မှေ.
အတ္တနောပဒမိစ္စနေန ကွတ္ထော? အတ္တနောပဒါနိ ဘာဝေ စ ကမ္မနိ.
၄၀၈. ၊ ၄၃၁. ဒွေ ဒွေ ပဌမ မဇ္ဈိမုတ္တမပုရိသာ.
တာသံ သဗ္ဗာသံ ဝိဘတ္တီနံ ပရဿပဒါနံ၊ အတ္တနောပဒါနဉ္စ ဒွေ ဒွေ ပဒါနိ ပဌမမဇ္ဈိမုတ္တမပုရိသသညာနိ ဟောန္တိ.
တံ ယထာ? တိ အန္တိ ဣတိ ပဌမပုရိသာ၊ သိ ထ ဣတိ မဇ္ဈိမပုရိသာ၊ မိ မ ဣတိ ဥတ္တမပုရိသာ. အတ္တနောပဒါနမ္ပိ တေ အန္တေ ဣတိ ပဌမပုရိသာ၊ သေ ဝှေ ဣတိ မဇ္ဈိမပုရိသာ၊ ဧ မှေ ဣတိ ဥတ္တမပုရိသာ. ဧဝံ သဗ္ဗတ္ထ.
ပဌမမဇ္ဈိမုတ္တမပုရိသမိစ္စနေန ကွတ္ထော? နာမမှိ ပယုဇ္ဇမာနေပိ တုလျာဓိကရဏေ ပဌမော၊ တုမှေ မဇ္ဈိမော၊ အမှေ ဥတ္တမော.
၄၀၉. ၊ ၄၄၁. သဗ္ဗေသမေကာဘိဓာနေ ပရော ပုရိသော.
သဗ္ဗေသံ တိဏ္ဏံ ပဌမမဇ္ဈိမုတ္တမ ပုရိသာနံ ဧကာဘိဓာနေ ပရော ပုရိသော ဂဟေတဗ္ဗော.
သော စ ပဌတိ၊ တွဉ္စ ပဌသိ၊ တုမှေ ပဌထ. သော စ ပစတိ၊ တွဉ္စ ပစသိ. တုမှေ ပစထ. ဧဝံ သေသာသု ဝိဘတ္တီသု ပရော ပုရိသော ယောဇေတဗ္ဗော.
၄၁၀. ၊ ၄၃၂. နာမမှိ ပယုဇ္ဇမာနေပိ တုလျာဓိကရဏေ ပဌမော.
နာမမှိ ပယုဇ္ဇမာနေပိ အပ္ပယုဇ္ဇမာနေပိ တုလျာဓိကရဏေ ပဌမပုရိသော ဟောတိ.
သော ဂစ္ဆတိ၊ တေ ဂစ္ဆန္တိ.
အပ္ပယုဇ္ဇမာနေပိ – ဂစ္ဆတိ၊ ဂစ္ဆန္တိ.
တုလျာဓိကရဏေတိ ကိမတ္ထံ? တေန ဟညသေ တွံ ဒေဝဒတ္တေန.
၄၁၁. ၊ ၄၃၆. တုမှေ မဇ္ဈိမော.
တုမှေ ပယုဇ္ဇမာနေပိ အပ္ပယုဇ္ဇမာနေပိ တုလျာဓိကရဏေ မဇ္ဈိမပုရိသော ဟောတိ.
တွံ ယာသိ၊ တုမှေ ယာထ.
အပ္ပယုဇ္ဇမာနေပိ – ယာသိ၊ ယာထ.
တုလျာဓိကရဏေတိ ကိမတ္ထံ? တယာ ပစ္စတေ ဩဒနော.
၄၁၂. ၊ ၄၃၇. အမှေ ဥတ္တမော.
အမှေ ပယုဇ္ဇမာနေပိ အပ္ပယုဇ္ဇမာနေပိ တုလျာဓိကရဏေ ဥတ္တမပုရိသော ဟောတိ.
အဟံ ယဇာမိ၊ မယံ ယဇာမ.
အပ္ပယုဇ္ဇမာနေပိ – ယဇာမိ၊ ယဇာမ.
တုလျာဓိကရဏေတိ ကိမတ္ထံ? မယာ ဣဇ္ဇတေ ဗုဒ္ဓေါ.
၄၁၃. ၊ ၄၂၇. ကာလေ.
‘‘ကာလေ’’ ဣစ္စေတံ အဓိကာရတ္ထံ ဝေဒိတဗ္ဗံ.
၄၁၄. ၊ ၄၂၈. ဝတ္တမာနာ ပစ္စုပ္ပန္နေ.
ပစ္စုပ္ပန္နေ ကာလေ ဝတ္တမာနာဝိဘတ္တိ ဟောတိ.
ပါဋလိပုတ္တံ ဂစ္ဆတိ၊ သာဝတ္ထိံ ပဝိသတိ.
၄၁၅. ၊ ၄၅၁. အာဏတျာ သိဋ္ဌေ’နုတ္တကာလေ ပဉ္စမီ.
အာဏတျတ္ထေ စ အာသီသတ္ထေ စ အနုတ္တကာလေ ပဉ္စမီ ဝိဘတ္တိ ဟောတိ.
ကရောတု ကုသလံ၊ သုခံ တေ ဟောတု.
၄၁၆. ၊ ၄၅၄. အနုမတိပရိကပ္ပတ္ထေသု သတ္တမီ.
အနုမတျတ္ထေ စ ပရိကပ္ပတ္ထေ စ အနုတ္တကာလေ သတ္တမီ ဝိဘတ္တိ ဟောတိ.
တွံ ဂစ္ဆေယျာသိ၊ ကိမဟံ ကရေယျာမိ.
၄၁၇. ၊ ၄၆၀. အပစ္စက္ခေ ပရောက္ခာတီတေ.
အပစ္စက္ခေ အတီတေ ကာလေ ပရောက္ခာဝိဘတ္တိ ဟောတိ.
သုပိနေ ကိလမာဟ၊ ဧဝံ ကိလ ပေါရာဏာဟု.
၄၁၈. ၊ ၄၅၆. ဟိယျောပဘုတိ ပစ္စက္ခေ ဟိယျတ္တနီ.
ဟိယျောပဘုတိ အတီတေ ကာလေ ပစ္စက္ခေ ဝါ အပစ္စက္ခေ ဝါ ဟိယျတ္တနီ ဝိဘတ္တိ ဟောတိ.
သော အဂမာ မဂ္ဂံ၊ တေ အဂမူ မဂ္ဂံ.
၄၁၉. ၊ ၄၆၉. သမီပေ’ဇ္ဇတနီ.
အဇ္ဇပ္ပဘုတိ အတီတေ ကာလေ ပစ္စက္ခေ ဝါ အပစ္စက္ခေ ဝါ သမီပေ အဇ္ဇတနီဝိဘတ္တိ ဟောတိ.
သော မဂ္ဂံ အဂမီ၊ တေ မဂ္ဂံ အဂမုံ.
၄၂၀. ၊ ၄၇၁. မာယောဂေ သဗ္ဗကာလေ စ.
ဟိယျတ္တနီအဇ္ဇတနီဣစ္စေတာ ဝိဘတ္တိယော ယဒါ မာယောဂါ၊ တဒါ သဗ္ဗကာလေ စ ဟောန္တိ.
မာ ဂမာ၊ မာ ဝစာ၊ မာ ဂမီ၊ မာ ဝစီ.
စဂ္ဂဟဏေန ပဉ္စမီဝိဘတ္တိပိ ဟောတိ. မာ ဂစ္ဆာဟိ.
၄၂၁. ၊ ၄၇၃. အနာဂတေ ဘဝိဿန္တီ.
အနာဂတေ ကာလေ ဘဝိဿန္တီ ဝိဘတ္တိ ဟောတိ.
သော ဂစ္ဆိဿတိ၊ ကရိဿတိ. တေ ဂစ္ဆိဿန္တိ၊ ကရိဿန္တိ.
၄၂၂. ၊ ၄၇၅. ကြိယာတိပန္နေ’တီတေ ကာလာတိပတ္တိ.
ကြိယာတိပန္နမတ္တေ အတီတေ ကာလေ ကာလာတိပတ္တိ ဝိဘတ္တိ ဟောတိ.
သော စေ တံ ယာနံ အလဘိဿာ၊ အဂစ္ဆိဿာ. တေ စေ တံ ယာနံ အလဘိဿံသု၊ အဂစ္ဆိဿံသု.
၄၂၃. ၊ ၄၂၆. ဝတ္တမာနာ တိ အန္တိ၊ သိ ထ၊ မိ မ၊ တေ အန္တေ၊ သေ ဝှေ၊ ဧ မှေ.
ဝတ္တမာနာ ဣစ္စေသာ သညာ ဟောတိ တိ အန္တိ၊ သိ ထ၊ မိ မ၊ တေ အန္တေ၊ သေ ဝှေ၊ ဧ မှေ ဣစ္စေတေသံ ဒွါဒသန္နံ ပဒါနံ.
ဝတ္တမာနာ ဣစ္စနေန ကွတ္ထော? ဝတ္တမာနာ ပစ္စုပ္ပန္နေ.
၄၂၄. ၊ ၄၅၀. ပဉ္စမီ တု အန္တု၊ ဟိထ၊ မိမ၊ တံ အန္တံ၊ ဿု ဝှေါ၊ ဧ အာမသေ.
ပဉ္စမီဣစ္စေသာ သညာ ဟောတိ တု အန္တု၊ ဟိ ထ၊ မိမ၊ တံ အန္တံ၊ ဿု ဝှေါ၊ ဧ အာမသေ ဣစ္စေတေသံ ဒွါဒသန္နံ ပဒါနံ.
ပဉ္စမီဣစ္စနေန ကွတ္ထော? အာဏတျာသိဋ္ဌေ၊ နုတ္တကာလေ ပဉ္စမီ.
၄၂၅. ၊ ၄၅၃. သတ္တမီ ဧယျ ဧယျုံ၊ ဧယျာ သိ ဧယျာ ထ၊ ဧယျာမိ ဧယျာမ၊ ဧထ ဧရံ၊ ဧထော ဧယျာဝှေါ၊ ဧယျံ ဧယျာမှေ.
သတ္တမီ ဣစ္စေသာ သညာ ဟောတိ ဧယျ ဧယျုံ၊ ဧယျာသိ ဧယျာထ၊ ဧယျာမိ ဧယျာမ၊ ဧထ ဧရံ၊ ဧထော၊ ဧယျာဝှေါ၊ ဧယျံ ဧယျာမှေ ဣစ္စေတေသံ ဒွါဒသန္နံ ပဒါနံ.
သတ္တမီ ဣစ္စနေန ကွတ္ထော? အနုမတိပရိကပ္ပတ္ထေသု သတ္တမီ.
၄၂၆. ၊ ၄၅၉. ပရောက္ခာ အဥ ဧတ္ထ၊ အံမှ၊ တ္ထရေ၊ တ္ထော ဝှေါ၊ ဣံ မှေ.
ပရောက္ခာ ဣစ္စေသာ သညာ ဟောတိ အ ဥ၊ ဧတ္ထ၊ အံ မှ၊ တ္ထ ရေ တ္ထော ဝှေါ၊ ဣံ မှေ ဣစ္စေတေသံ ဒွါဒသန္နံ ပဒါနံ.
ပရောက္ခာ ဣစ္စနေန ကွတ္ထော? အပစ္စက္ခေ ပရောက္ခာတီတေ.
၄၂၇. ၊ ၄၅၅. ဟိယျတ္တနီ အာဦ၊ ဩတ္ထ၊ အံမှာ၊ တ္ထတ္ထုံ၊ သေ ဝှံ၊ ဣံ မှသေ.
ဟိယျတ္တနီ ဣစ္စေသာ သညာ ဟောတိ အာ ဦ၊ ဩ တ္ထ၊ အံ မှာ၊ တ္ထ တ္ထုံ၊ သေ ဝှံ၊ ဣံ မှသေ ဣစ္စေတေသံ ဒွါဒသန္နံ ပဒါနံ.
ဟိယျတ္တနီ ဣစ္စနေန ကွတ္ထော? ဟိယျောပဘုတိ ပစ္စက္ခေ ဟိယျတ္တနီ.
၄၂၈. ၊ ၄၆၈. အဇ္ဇတနီ ဤ ဥံ၊ ဩ တ္ထ၊ ဣံ မှာ၊ အာ ဦ၊ သေ ဝှံ၊ အံ မှေ.
အဇ္ဇတနီ ဣစ္စေသာ သညာ ဟောတိ ဤ ဥံ၊ ဩ တ္ထ၊ ဣံမှာ၊ အာ ဦ၊ သေဝှံ၊ အံ မှေ ဣစ္စေတေသံ ဒွါဒသန္နံ ပဒါနံ.
အဇ္ဇတနီ ဣစ္စနေန ကွတ္ထော? သမီပေဇ္ဇတနီ.
၄၂၉. ၊ ၄၇၂. ဘဝိဿန္တီ ဿတိ ဿန္တိ၊ ဿသိ ဿထ၊ ဿာမိ ဿာမ၊ ဿတေ ဿန္တေ၊ ဿသေ ဿဝှေ၊ ဿံ ဿာမှေ.
ဘဝိဿန္တီ ဣစ္စေသာ သညာ ဟောတိ ဿတိ ဿန္တိ၊ ဿသိ ဿထ၊ ဿာမိ ဿာမ၊ ဿတေ ဿန္တေ၊ ဿသေ ဿဝှေ၊ ဿံ ဿာမှေ ဣစ္စေတေသံ ဒွါဒသန္နံ ပဒါနံ.
ဘဝိဿန္တီ ဣစ္စနေန ကွတ္ထော? အနာဂတေ ဘဝိဿန္တီ.
၄၃၀. ၊ ၃၇၃. ကာလာတိပတ္တိ ဿာ ဿံသု၊ ဿေ ဿထ၊ ဿံ ဿာမှာ၊ ဿထ သိဿု၊ ဿသေ ဿဝှေ၊ ဿိံ ဿာမှသေ.
ကာလာတိပတ္တိ ဣစ္စေသာ သညာ ဟောတိ ဿာ ဿံသု၊ ဿေ ဿထ၊ ဿံ ဿာမှာ၊ ဿထ ဿိသု၊ ဿသေ ဿဝှေ၊ ဿိံ ဿာမှသေ ဣစ္စေတေသံ ဒွါဒသန္နံ ပဒါနံ.
ကာလာတိပတ္တိ ဣစ္စနေန ကွတ္ထော? ကြိယာတိပန္နေ’ တီတေ ကာလာတိပတ္တိ.
၄၃၁. ၊ ၄၅၈. ဟိယျတ္တနီ သတ္တမီ ပဉ္စမီ ဝတ္တမာနာ သဗ္ဗဓာတုကံ.
ဟိယျတ္တနာဒယော စတဿော ဝိဘတ္တိယော သဗ္ဗဓာတုက သညာ ဟောန္တိ.
အဂမာ၊ ဂစ္ဆေယျ၊ ဂစ္ဆတု၊ ဂစ္ဆတိ.
သဗ္ဗဓာတုက ဣစ္စနေန ကွတ္ထော? ဣကာရာဂမော အသဗ္ဗဓာတုကမှိ.
ဣတိ အာချာတကပ္ပေ ပဌမော ကဏ္ဍော.
ဒုတိယကဏ္ဍ
၄၃၂. ၊ ၃၆၂. ဓာတုလိင်္ဂေဟိ ပရာ ပစ္စယာ.
ဓာတုလိင်္ဂဣစ္စေတေဟိ ပရာ ပစ္စယာ ဟောန္တိ.
ကရောတိ၊ ဂစ္ဆတိ. ယော ကောစိ ကရောတိ၊ တံ အညော ‘‘ကရောဟိ ကရောဟိ’’ ဣစ္စေဝံ ဗြဝီတိ၊ အထ ဝါ ကရောန္တံ ပယောဇယတိ = ကာရေတိ. သံဃော ပဗ္ဗတမိဝ အတ္တာနမာစရတိ = ပဗ္ဗတာယတိ. တဠာကံ သမုဒ္ဒမိဝ အတ္တာနမာစရတိ = သမုဒ္ဒါယတိ၊ သဒ္ဒေါ စိစ္စိဋမိဝ အတ္တာနမာစရတိ = စိစ္စိဋာယတိ၊ ဝသိဋ္ဌဿ အပစ္စံ ဝါသိဋ္ဌော. ဧဝမညေပိ ယောဇေတဗ္ဗာ.
၄၃၃. ၊ ၅၂၈. တိဇ ဂုပ ကိတ မာနေ ဟိ ခ ဆ သာ ဝါ.
တိဇ ဂုပ ကိတ မာနု ဣစ္စေတေဟိ ဓာတူဟိ ခ ဆ သ ဣစ္စေတေ ပစ္စယာ ဟောန္တိ ဝါ.
တိတိက္ခတိ၊ ဇိဂုစ္ဆတိ၊ တိကိစ္ဆတိ၊ ဝီမံသတိ.
ဝါတိ ကိမတ္ထံ? တေဇတိ၊ ဂေါပတိ၊ မာနေတိ.
၄၃၄. ၊ ၅၃၄. ဘုဇ ဃသ ဟရ သု ပါဒီဟိ တုမိစ္ဆတ္ထေသု.
ဘုဇ ဃသ ဟရ သု ပါဣစ္စေဝမာဒီဟိ ဓာတူဟိ တုမိစ္ဆတ္ထေသု ခ ဆ သဣစ္စေတေ ပစ္စယာ ဟောန္တိ ဝါ.
ဘောတ္တုမိစ္ဆတိ=ဗုဘုက္ခတိ၊ ဃသိတုမိစ္ဆတိ=ဇိဃစ္ဆတိ၊ ဟရိတုမိစ္ဆတိ=ဇိဂီသတိ၊ သောတုမိစ္ဆတိ=သုဿုသတိ၊ ပါတုမိစ္ဆတိ=ပိဝါသတိ.
ဝါတိ ကိမတ္ထံ? ဘောတ္တုမိစ္ဆတိ.
တုမိစ္ဆတ္ထေသူတိ ကိမတ္ထံ? ဘုဉ္ဇတိ.
၄၃၅. ၊ ၅၃၆. အာယ နာမတော ကတ္တူပမာနာဒါစာရေ.
နာမတော ကတ္တူပမာနာ အာစာရတ္ထေ အာယပစ္စယော ဟောတိ.
သံဃော ပဗ္ဗတမိဝ အတ္တာနမာစရတိ = ပဗ္ဗတာယတိ၊ တဠာကံ သမုဒ္ဒမိဝ အတ္တာနမာစရတိ = သမုဒ္ဒါယတိ၊ သဒ္ဒေါ စိစ္စိဋမိဝ အတ္တာနမာစရတိ = စိစ္စိဋာယတိ. ဧဝမညေပိ ယောဇေတဗ္ဗာ.
၄၃၆. ၊ ၅၃၇. ဤယူပမာနာ စ.
နာမတော ဥပမာနာ အာစာရတ္ထေ စ ဤယပစ္စယော ဟောတိ.
အဆတ္တံ ဆတ္တမိဝ အာစရတိ =ဆတ္တီယတိ၊ အပုတ္တံ ပုတ္တမိဝ အာစရတိ=ပုတ္တီယတိ.
ဥပမာနာတိ ကိမတ္ထံ? ဓမ္မံ အာစရတိ.
အာစာရေတိ ကိမတ္ထံ? အဆတ္တံ ဆတ္တမိဝ ရက္ခတိ. ဧဝမညေပိ ယောဇေတဗ္ဗာ.
၄၃၇. ၊ ၅၃၈. နာမမှာ’တ္တိစ္ဆတ္ထေ.
နာမမှာ အတ္တနော ဣစ္ဆတ္ထေ ဤယပစ္စယော ဟောတိ.
အတ္တနော ပတ္တမိစ္ဆတိ = ပတ္တီယတိ. ဧဝံ ဝတ္ထီယတိ၊ ပရိက္ခာရီယတိ၊ စီဝရီယတိ၊ ဓနီယတိ၊ ဃဋီယတိ.
အတ္တိစ္ဆတ္ထေတိ ကိမတ္ထံ? အညဿ ပတ္တမိစ္ဆတိ. ဧဝမညေပိ ယောဇေတဗ္ဗာ.
၄၃၈. ၊ ၅၄၀. ဓာတူဟိ ဏေ ဏယ ဏာပေ ဏာပယာ ကာရိတာနိ ဟေတွတ္ထေ.
သဗ္ဗေဟိ ဓာတူဟိ ဏေဏယ ဏာပေ ဏာပယဣစ္စေတေ ပစ္စယာ ဟောန္တိ ကာရိတသညာ စ ဟေတွတ္ထေ.
ယော ကောစိ ကရောတိ၊ တံ အညော ‘‘ကရောဟိ ကရောဟိ’’ ဣစ္စေဝံ ဗြဝီတိ၊ အထ ဝါ ကရောန္တံ ပယောဇယတိ = ကာရေတိ၊ ကာရယတိ၊ ကာရာပေတိ၊ ကာရာ ပယတိ. ယေ ကေစိ ကရောန္တိ၊ တေ အညေ ‘‘ကရောထ ကရောထ’’ ဣစ္စေဝံ ဗြုဝန္တိ = ကာရေန္တိ၊ ကာရယန္တိ၊ ကာရာပေန္တိ၊ ကာရာပယန္တိ. ယော ကောစိ ပစတိ၊ တံ အညော ‘‘ပစာဟိ ပစာဟိ’’ဣစ္စေဝံ ဗြဝီတိ၊ အထ ဝါ ပစန္တံ ပယောဇယတိ = ပါစေတိ၊ ပါစယတိ၊ ပါစာပေတိ၊ ပါစာပယတိ. ယေ ကေစိ ပစန္တိ၊ တေ အညေ ‘‘ပစထ ပစထ’’ ဣစ္စေဝံ ဗြုဝန္တိ = ပါစေန္တိ၊ ပါစယန္တိ၊ ပါစာပေန္တိ. ပါစာပယန္တိ. ဧဝံ ဘဏေတိ၊ ဘဏယတိ၊ ဘဏာပေတိ၊ ဘဏာပယတိ. ဘဏေန္တိ၊ ဘဏယန္တိ၊ ဘဏာပေန္တိ၊ ဘဏာပယန္တိ. တထရိဝ အညေပိ ယောဇေတဗ္ဗာ.
ဟေတွတ္ထေတိ ကိမတ္ထံ? ကရောတိ၊ ပစတိ.
အတ္ထဂ္ဂဟဏေန အလပစ္စယော ဟောတိ၊ ဇောတလတိ.
၄၃၉. ၊ ၅၃၉. ဓာတုရူပေ နာမသ္မာ ဏယော စ.
တသ္မာ နာမသ္မာ ဏယပစ္စယော ဟောတိ ကာရိတသညော စ ဓာတုရူပေ သတိ.
ဟတ္ထိနာ အတိက္ကမတိ မဂ္ဂံ = အတိဟတ္ထယတိ၊ ဝီဏာယ ဥပဂါယတိ ဂီတံ = ဥပဝီဏယတိ၊ ဒဠှံ ကရောတိ ဝီရိယံ = ဒဠှယတိ၊ ဝိသုဒ္ဓါ ဟောတိ ရတ္တိ = ဝိသုဒ္ဓယတိ.
စဂ္ဂဟဏေန အာရ အာလဣစ္စေတေ ပစ္စယာ ဟောန္တိ. သန္တံ ကရောတိ = သန္တာရတိ၊ ဥပက္ကမံ ကရောတိ = ဥပက္ကမာလတိ.
၄၄၀. ၊ ၄၄၅. ဘာဝကမ္မေသု ယော.
သဗ္ဗေဟိ ဓာတူဟိ ဘာဝကမ္မေသု ယပစ္စယော ဟောတိ.
ဌီယတေ၊ ဗုဇ္ဈတေ၊ ပစ္စတေ၊ လဗ္ဘတေ၊ ကရီယတေ၊ ယုဇ္ဇတေ၊ ဥစ္စတေ.
ဘာဝကမ္မေသူတိ ကိမတ္ထံ? ကရောတိ၊ ပစတိ၊ ပဌတိ.
၄၄၁. ၊ ၄၄၇. တဿ စဝဂ္ဂယကာရဝကာရတ္တံ သဓာတွန္တဿ.
တဿ ယပစ္စယဿ စဝဂ္ဂယကာရဝကာရတ္တံ ဟောတိ ဓာတူနံ အန္တေန သဟ ယထာသမ္ဘဝံ.
ဝုစ္စတေ၊ ဝုစ္စန္တေ၊ ဥစ္စတေ၊ ဥစ္စန္တေ၊ ပစ္စတေ၊ ပစ္စန္တေ. မဇ္ဇတေ၊ မဇ္ဇန္တေ၊ ယုဇ္ဇတေ၊ ယုဇ္ဇန္တေ. ဗုဇ္ဈတေ၊ ဗုဇ္ဈန္တေ၊ ကုဇ္ဈတေ၊ ကုဇ္ဈန္တေ၊ ဥဇ္ဈတေ၊ ဥဇ္ဈန္တေ. ဟညတေ၊ ဟညန္တေ. ကယျတေ၊ ကယျန္တေ. ဒိဗ္ဗတေ၊ ဒိဗ္ဗန္တေ.
၄၄၂. ၊ ၄၄၈. ဣဝဏ္ဏာဂမော ဝါ.
သဗ္ဗေဟိ ဓာတူဟိ ယမှိ ပစ္စယေ၊ ပရေ ဣဝဏ္ဏာဂမော ဟောတိ ဝါ.
ကရီယတေ၊ ကရီယတိ၊ ဂစ္ဆီယတေ၊ ဂစ္ဆီယတိ.
ဝါတိ ကိမတ္ထံ? ကယျတေ.
၄၄၃. ၊ ၄၄၉. ပုဗ္ဗရူပဉ္စ.