၇. ကိဗ္ဗိဓာနကပ္ပ
ပဌမကဏ္ဍ
(က)
ဗုဒ္ဓံ ဉာဏသမုဒ္ဒံ၊ သဗ္ဗညုံ လောကဟေတု’ခီဏမတိံ၊
ဝန္ဒိတွာ ပုဗ္ဗမဟံ၊ ဝက္ခာမိ သသာဓနံ ဟိ ကိတကပ္ပံ.
(ခ)
သာဓနမူလံ ဟိ ပယောဂံ၊
အာဟု ပယောဂမူလမတ္ထဉ္စ၊
အတ္ထေသု ဝိသာရဒမတယော၊
သာသနဿုဓရာ ဇိနဿ မတာ.
(ဂ)
အန္ဓော ဒေသကဝိကလော၊
ဃတမဓုတေလာနိ ဘာဇနေန ဝိနာ၊
နဋ္ဌော နဋ္ဌာနိ ယထာ၊
ပယောဂဝိကလော တထာ အတ္ထော.
(ဃ)
တသ္မာ သံရက္ခဏတ္ထံ၊ မုနိဝစနတ္ထဿ ဒုလ္လဘဿာဟံ၊
ဝက္ခာမိ သိဿကဟိတံ၊ ကိတကပ္ပံ သာဓနေန ယုတံ.
၅၂၄. ၊ ၅၆၁. ဓာတုယာ ကမ္မာဒိမှိ ဏော.
ဓာတုယာ ကမ္မာဒိမှိ ဏပစ္စယော ဟောတိ.
ကမ္မံ ကရောတီတိ ကမ္မကာရော၊ ဧဝံ ကုမ္ဘကာရော၊ မာလာကာရော၊ ကဋ္ဌကာရော၊ ရထကာရော၊ ရဇတကာရော၊ သုဝဏ္ဏကာရော၊ ပတ္တဂ္ဂါဟော၊ တန္တဝါယော၊ ဓညမာယော၊ ဓမ္မကာမော၊ ဓမ္မစာရော.
၅၂၅. ၊ ၅၆၅. သညာယမ နု.
သညာယမဘိဓေယျာယံ ဓာတုယာ ကမ္မာဒိမှိ အကာရပစ္စယော ဟောတိ၊ နာမမှိ စ နုကာရာဂမော ဟောတိ.
အရိံ ဒမေတီတိ အရိန္ဒမော၊ ရာဇာ. ဝေဿံ တရတီတိ ဝေဿန္တရော၊ ရာဇာ. တဏှံ ကရောတီတိ တဏှင်္ကရော၊ ဘဂဝါ. မေဓံ ကရောတီတိ မေဓင်္ကရော၊ ဘဂဝါ. သရဏံ ကရောတီတိ သရဏင်္ကရော၊ ဘဂဝါ. ဒီပံ ကရောတီတိ ဒီပင်္ကရော၊ ဘဂဝါ.
၅၂၆. ၊ ၅၆၇. ပုရေ ဒဒါ စ ဣံ.
ပုရသဒ္ဒေ အာဒိမှိ ဒဒဣစ္စေတာယ ဓာတုယာ အကာရပစ္စယော ဟောတိ၊ ပုရသဒ္ဒဿ အကာရဿ စ ဣံ ဟောတိ.
ပုရေ ဒါနံ အဒါသီတိ ပုရိန္ဒဒေါ ဒေဝရာဇာ.
၅၂၇. ၊ ၅၆၈. သဗ္ဗတော ဏွု တွာဝီ ဝါ.
သဗ္ဗတော ဓာတုတော ကမ္မာဒိမှိ ဝါ အကမ္မာဒိမှိ ဝါ အကာရ ဏွု တု အာဝီဣစ္စေတေ ပစ္စယာ ဟောန္တိ.
တံ ကရောတီတိ တက္ကရော၊ ဟိတံ ကရောတီတိ ဟိတကရော၊ ဝိနေတိ ဧတ္ထ၊ ဧတေနာတိ ဝါ ဝိနယော နိဿာယ နံ ဝသတီတိ နိဿယော.
ဏွုမှိ – ရထံ ကရောတီတိ ရထကာရကော၊ အန္နံ၊ ဒဒါတီတိ အန္နဒါယကော၊ ဝိနေတိ သတ္တေတိ ဝိနာယကော၊ ကရောတီတိ ကာရကော၊ ဒဒါတီတိ ဒါယကော၊ နေတီတိ နာယကော.
တုမှိ – တံ ကရောတီတိ တက္ကတ္တာ၊ တဿ ကတ္တာတိ ဝါ တက္ကတ္တာ. ဘောဇနံ ဒဒါတီတိ ဘောဇနဒါတာ၊ ဘောဇနဿ ဒါတာတိ ဝါ ဘောဇနဒါတာ. ကရောတီတိ ကတ္တာ. သရတီတိ သရိတာ.
အာဝီမှိ – ဘယံ ပဿတီတိ ဘယဒဿာဝီ ဣစ္စေဝမာဒိ.
၅၂၈. ၊ ၅၇၇. ဝိသ ရုဇ ပဒါဒိတော ဏ.
ဝိသ ရုဇ ပဒဣစ္စေဝမာဒီဟိ ဓာတူဟိ ဏ ပစ္စယော ဟောတိ.
ပဝိသတီတိ ပဝေသော၊ ရုဇတီတိ ရောဂေါ၊ ဥပ္ပဇ္ဇတီတိ ဥပ္ပါဒေါ၊ ဖုသတီတိ ဖဿော၊ ဥစတီတိ ဩကော၊ ဘဝတီတိ ဘာဝေါ၊ အယတီတိ အာယော၊ သမ္မာ ဗုဇ္ဈတီတိ သမ္ဗောဓော၊ ဝိဟရတီတိ ဝိဟာရော.
၅၂၉. ၊ ၅၈၀. ဘာဝေ စ.
ဘာဝတ္ထာဘိဓေယျေ သဗ္ဗဓာတူဟိ ဏပစ္စယော ဟောတိ.
ပစ္စတေ၊ ပစနံ ဝါ ပါတော၊ စဇတေ၊ စဇနံ ဝါ စာဂေါ၊ ဧဝံ ယာဂေါ၊ ယောဂေါ၊ ဘာဂေါ၊ ပရိဒါဟော.
၅၃၀. ၊ ၅၈၄. ကွိ စ.
သဗ္ဗဓာတူဟိ ကွိပစ္စယော ဟောတိ.
သမ္ဘဝတီတိ သမ္ဘူ၊ ဝိသေသေန ဘဝတီတိ ဝိဘူ၊ ဘုဇေန ဂစ္ဆတီတိ ဘုဇဂေါ၊ သံ အတ္တာနံ ခနတိ၊ သံ သဋ္ဌု ခနတီတိ ဝါ သင်္ခေါ.
၅၃၁. ၊ ၅၈၉. ဓရာဒီဟိ ရမ္မော.
ဓရဣစ္စေဝမာဒီဟိ ဓာတူဟိ ရမ္မပစ္စယော ဟောတိ.
ဓရတိ တေနာတိ ဓမ္မော၊ ကရီယတေ တန္တိ ကမ္မံ.
၅၃၂. ၊ ၅၉၀. တဿီလာဒီသု ဏီတွာဝီ စ.
သဗ္ဗေဟိ ဓာတူဟိ တဿီလာဒီသွတ္ထေသု ဏီ တု အာဝီ ဣစ္စေတေ ပစ္စယာ ဟောန္တိ.
ပိယံ ပသံသိတုံ သီလံ ယဿ ရညော၊ သော ဟောတိ ရာဇာ ပိယပသံသီ၊ ဗြဟ္မံ စရိတုံ သီလံ ယဿ ပုဂ္ဂလဿ သော ဟောတိ ပုဂ္ဂလော ဗြဟ္မစာရီ၊ ပသယှ ပဝတ္တိတုံ သီလံ ယဿ ရညော၊ သော ဟောတိ ရာဇာ ပသယှပဝတ္ထာ၊ ဘယံ ပဿိတုံ သီလံ ယဿ သမဏဿ၊ သော ဟောတိ သမဏော ဘယဒဿာဝီ ဣစ္စေဝမာဒိ.
၅၃၃. ၊ ၅၉၁. သဒ္ဒ ကု ဓ စလ မဏ္ဍတ္ထရုဓာဒီဟိယု.
သဒ္ဒ ကုဓ စလ မဏ္ဍတ္ထေဟိ စ ရုစာဒီဟိ စ ဓာတူဟိ ယုပစ္စယော ဟောတိ တဿီလာဒီသွတ္ထေသု.
ဃောသနသီလော ဃောသနော၊ ဘာသနသီလော ဘာသနော. ဧဝံ ဝိဂ္ဂဟော ကာတဗ္ဗော. ကောဓနော၊ ဒေါသနော၊ စလနော၊ ကမ္ပနော၊ ဖန္ဒနော၊ မဏ္ဍနော၊ ဝိဘူသနော၊ ရောစနော၊ ဇောတနော၊ ဝဍ္ဎနော.
၅၃၄. ၊ ၅၆၂. ပါရာဒိဂမိမှာ ရူ.
ဂမုဣစ္စေတမှာ ဓာတုမှာ ပါရသဒ္ဒါဒိမှာ ရူပစ္စယော ဟောတိ တဿီလာဒီသွတ္ထေသု.
ဘဝဿ ပါရံ ဘဝပါရံ၊ ဘဝပါရံ ဂန္တုံ သီလံ ယဿ ပုရိသဿ၊ သော ဟောတိ ပုရိသော ဘဝပါရဂူ.
တဿီလာဒီသွီတိ ကိမတ္ထံ? ပါရင်္ဂတော.
ပါရာဒိဂမိမှာတိ ကိမတ္ထံ? အနုဂါမီ.
၅၃၅. ၊ ၅၉၃. ဘိက္ခာဒိတော စ.
ဘိက္ခဣစ္စေဝမာဒီဟိ ဓာတူဟိ ရူပစ္စယော ဟောတိ တဿီလာဒီသွတ္ထေသု.
ဘိက္ခနသီလော ယာစနသီလော ဘိက္ခု၊ ဝိဇာနနသီလော ဝိညူ.
၅၃၆. ၊ ၅၉၄. တနတျာဒီနံ ဏုကော.
ဟနတျာဒီနံ ဓာတူနံ အန္တေ ဏုကပစ္စယော ဟောတိ တဿီလာဒီသွတ္ထေသု.
အာဟနနသီလော အာဃာတုကော၊ ကရဏသီလော ကာရုကော.
၅၃၇. ၊ ၅၆၆. နု နိဂ္ဂဟိတံ ပဒန္တေ.
ပဒန္တေ နုကာရာဂမော နိဂ္ဂဟိတမာပဇ္ဇတေ.
အရိံ ဒမေတီတိ အရိန္ဒမော၊ ရာဇာ. ဝေဿံ တရတီတိ ဝေဿန္တရော၊ ရာဇာ. ပဘံ ကရောတီတိ ပဘင်္ကရော၊ ဘဂဝါ.
၅၃၈. ၊ ၅၉၅. သံဟနာညာယ ဝါ ရော ဃော.
သံပုဗ္ဗာယ ဟနဣစ္စေတာယ ဓာတုယာ၊ အညာယ ဝါ ဓာတုယာ ရပစ္စယော၊ ဟနဿ စ ဃော ဟောတိ.
သမဂ္ဂံ ကမ္မံ သမုပဂစ္ဆတီတိ သံဃော၊ သမန္တတော နဂရဿ မာဟိရေ ခညတီတိ ပရိခါ၊ အန္တံ ကရောတီတိ အန္တကော.
သံဣတိ ကိမတ္ထံ? ဥပဟနနံ ဥပဃာတော.
၅၃၉. ၊ ၅၅၈. ရမှိ ရန္တော ရာဒိနော.
ရမှိ ပစ္စယေ ပရေ သဗ္ဗော ဓာတွန္တော ရကာရာဒိ လောပေါ ဟောတိ.
အန္တကော၊ ပါရဂူ၊ သတ္ထာ၊ ဒိဋ္ဌော ဣစ္စေဝမာဒိ.
၅၄၀. ၊ ၅၄၅. ဘာဝကမ္မေသု တဗ္ဗာနီယာ.
ဘာဝကမ္မဣစ္စေတေသွတ္ထေသု တဗ္ဗ အနီယဣစ္စေတေ ပစ္စယာ ဟောန္တိ သဗ္ဗဓာတူဟိ.
ဘဝိတဗ္ဗံ၊ ဘဝနီယံ၊ အာသိတဗ္ဗံ၊ အာသနီယံ၊ ပဇ္ဇိတဗ္ဗံ၊ ပဇ္ဇနီယံ၊ ကတ္တဗ္ဗံ၊ ကရဏီယံ၊ ဂန္တဗ္ဗံ၊ ဂမနီယံ.
၅၄၁. ၊ ၅၅၂. ဏျော စ.
ဘာဝကမ္မေသု သဗ္ဗဓာတူဟိ ဏျပစ္စယော ဟောတိ.
ကတ္တဗ္ဗံ ကာရိယံ၊ ဇေတဗ္ဗံ ဇေယျံ၊ နေတဗ္ဗံ နေယျံ၊ ဣစ္စေဝမာဒိ.
စဂ္ဂဟဏေန တေယျပစ္စယော ဟောတိ. ဉာတဗ္ဗံ ဉာတေယျံ၊ ဒဋ္ဌေယျံ၊ ပတ္တေယျံ ဣစ္စေဝမာဒိ.
၅၄၂. ၊ ၅၅၇. ကရမှာ ရိစ္စ.
ကရဣစ္စေတမှာ ဓာတုမှာ ရိစ္စပစ္စယော ဟောတိ ဘာဝကမ္မေသု.
ကတ္တဗ္ဗံ ကိစ္စံ.
၅၄၃. ၊ ၅၅၅. ဘူတော’ဗ္ဗ.
ဘူဣစ္စေတာယ ဓာတုယာ ဏျပစ္စယဿ ဦကာရေန သဟ အဗ္ဗာဒေသော ဟောတိ ဘာဝကမ္မေသု.
ဘဝိတဗ္ဗော ဘဗ္ဗော၊ ဘဝိတဗ္ဗံ ဘဗ္ဗံ.
၅၄၄. ၊ ၅၅၆. ဝဒ မဒ ဂမု ယုဇ ဂရဟာကာရာဒီဟိ ဇ္ဇ မ္မ ဂ္ဂ ယှေယျာ ဂါရော ဝါ.
ဝဒ မဒ ဂမု ယုဇ ဂရဟာကာရန္တဣစ္စေဝမာဒီဟိ ဓာတူဟိ ဏျပစ္စယဿ ယထာသင်္ချံ ဇ္ဇ မ္မ ဂ္ဂ ယှ ဧယျာဒေသာ ဟောန္တိ ဝါ ဓာတွန္တေန သဟ၊ ဂရဿံ စ ဂါရော ဟောတိ ဘာဝကမ္မေသု.
ဝတ္တဗ္ဗံ ဝဇ္ဇံ၊ မဒနီယံ မဇ္ဇံ၊ ဂမနီယံ ဂမ္မံ၊ ယောဇနီယံ ယောဂ္ဂံ၊ ဂရဟိတဗ္ဗံ ဂါရယှံ၊ ဒါတဗ္ဗံ ဒေယျံ၊ ပါတဗ္ဗံ ပေယျံ၊ ဟာတဗ္ဗံ ဟေယျံ၊ မာတဗ္ဗံ မေယျံ၊ ဉာတဗ္ဗံ ဉေယျံ၊ ဣစ္စေဝမာဒိ.
၅၄၅. ၊ ၅၄၈. တေ ကိစ္စာ.
ယေ ပစ္စယာ တဗ္ဗာဒယော ရိစ္စန္တာ၊ တေ ကိစ္စသညာတိ ဝေဒိတဗ္ဗာ.
ကိစ္စသညာယ ကိံပယောဇနံ? ဘာဝကမ္မေသု ကိစ္စတ္တခတ္ထာ.
၅၄၆. ၊ ၅၆၂. အညေ ကိတ.
အညေ ပစ္စယာ ကိတ ဧဝ သညာ ဟောန္တိ.
ကိတ သညာယ ကိံပယောဇနံ? ကတ္တရိ ကိတ.
၅၄၇. ၊ ၅၉၆. နန္ဒာဒီဟိ ယု.
နန္ဒာဒီဟိ ဓာတူဟိ ယုပစ္စယော ဟောတိ ဘာဝကမ္မေသု.
နန္ဒီယတေ နန္ဒနံ၊ နိန္ဒိတဗ္ဗံ ဝါ နန္ဒနံ၊ ဂဟဏီယံ ဂဟဏံ၊ စရိတဗ္ဗံ စရဏံ၊ ဧဝံ သဗ္ဗတ္ထ ယောဇေတဗ္ဗာ.
၅၄၈. ၊ ၅၉၇. ကတ္တုကရဏပဒေသေသု စ.
ကတ္တုကရဏပဒေသဣစ္စေတေသွတ္ထေသု စ ယုပစ္စယော ဟောတိ.
ကတ္တရိ တာဝ – ရဇံ ဟရတီတိ ရဇောဟရဏံ တောယံ.
ကရဏေ တာဝ – ကရောတိ တေနာတိ ကရဏံ.
ပဒေသေ တာဝ – တိဋ္ဌန္တိ တသ္မိန္တိ ဌာနံ. ဧဝံ သဗ္ဗတ္ထ ယောဇေတဗ္ဗာ.
၅၄၉. ၊ ၅၅၀. ရဟာဒိတော ဏ.
ရကာရဟကာရာဒျန္တေဟိ ဓာတူဟိ အနာဒေသဿ နဿ ဏော ဟောတိ.
ကရောတိ တေနာတိ ကရဏံ၊ ပူရေတိ တေနာတိ ပူရဏံ. ဂဟဏီယံ တေနာတိ ဂဟဏံ. ဧဝမညေပိ ယောဇေတဗ္ဗာ.
ဣတိ ကိဗ္ဗိဓာနကပ္ပေ ပဌမော ကဏ္ဍော.
ဒုတိယကဏ္ဍ
၅၅၀. ၊ ၅၄၆. ဏာဒယော တေကာလိကာ.
ဏာဒယော ပစ္စယာ ယုပစ္စယန္တာ တေကာလိကာတိ ဝေဒိတဗ္ဗာ.
ကုမ္ဘံ ကရောတိ အကာသိ ကရိဿတီတိ ကုမ္ဘကာရော၊ ကရောတိ အကာသိ ကရိဿတိ တေနာတိ ကရဏံ. ဧဝမညေပိ ယောဇေတဗ္ဗာ.
၅၅၁. ၊ ၅၉၈. သညာယံ ဒါ ဓာတော ဣ.
သညာယမဘိဓေယျာယံ ဒါ ဓာတော ဣပစ္စယော ဟောတိ.
ပဌမံ အာဒီယတီတိ အာဒိ၊ ဥဒကံ ဒဓာတီတိ ဥဒမိ၊ မဟောဒကာနိ ဒဓာတီတိ မဟောဒဓိ၊ ဝါလာနိ ဒဓာတိ တသ္မိန္တိ ဝါလဓိ၊ သမ္မာ ဓီယတီတိ သန္ဓိ.
၅၅၂. ၊ ၆၀၉. တိ ကိတ စာသိဋ္ဌေ.
သညာယမဘိဓေယျာယံ သဗ္ဗဓာတူဟိ တိပစ္စယော ဟောတိ၊ ကိတ စ အာသိဋ္ဌေ.
ဇိနော ဇနံ ဗုဇ္ဈတူတိ ဇိနဗုဒ္ဓိ၊ ဓနံ အဿ ဘဝတူတိ ဓနဘူတိ၊ ဘဝတူတိ ဘူတော၊ ဘဝတူတိ ဘာဝေါ၊ ဓမ္မော ဇနံ ဒဒါတူတိ ဓမ္မဒိန္နော၊ ဝဍ္ဎတူတိ ဝဍ္ဎမာနော. ဧဝမညေပိ ယောဇေတဗ္ဗာ.
၅၅၃. ၊ ၅၉၉. ဣတ္ထိယမတိယဝေါ ဝါ.
ဣတ္ထိယမဘိဓေယျာယံ သဗ္ဗဓာတူဟိ အကာရ တိ ယု ဣစ္စေတေ ပစ္စယာ ဟောန္တိ ဝါ.
ဇီရတီတီ ဇရာ၊ မညတီတိ မတိ၊ စေတယတီတိ စေတနာ၊ ဝေဒယတီတိ ဝေဒနာ. ဧဝမညေပိ ယောဇေတဗ္ဗာ.
၅၅၄. ၊ ၆၀၁. ကရတော ရိရိယ.
ကရတော ဣတ္ထိယမနိတ္ထိယံ ဝါ အဘိခေယျာယံ ရိရီယပစ္စယော ဟောတိ ဝါ.
ကတ္တဗ္ဗာ ကိရိယာ၊ ကရဏီယံ ကိရိယံ.
၅၅၅. ၊ ၆၁၂. အတီတေ တတဝန္တုတာဝီ.
အတီတေ ကာလေ သဗ္ဗဓာတူဟိ တတဝန္တုတာဝီဣစ္စေတေ ပစ္စယာ ဟောန္တိ.
ဟုတော၊ ဟုတဝါ၊ ဟုတာဝီ. ဝုသိတော၊ ဝုသိတဝါ၊ ဝုသိတာဝီ. ဘုတ္တော၊ ဘုတ္တဝါ၊ ဘုတ္တာဝီ.
၅၅၆. ၊ ၆၂၂. ဘာဝကမ္မေသု တ.
ဘာဝကမ္မေသု အတီတေ ကာလေ တပစ္စယော ဟောတိ သဗ္ဗဓာတူဟိ.
ဘာဝေ တာဝ – တဿ ဂီတံ၊ နစ္စံ၊ နဋ္ဋံ၊ ဟသိတံ.
ကမ္မနိ တာဝ – တေန ဘာသိတံ၊ ဒေသိတံ.
၅၅၇. ၊ ၆၀၆. ဗုဓဂမာဒိတ္ထေ ကတ္တရိ.
ဗုဓဂမုဣစ္စေဝမာဒီဟိ ဓာတူဟိ တဒတ္ထေ ဂမျမာနေ တပစ္စယော ဟောတိ ကတ္တရိ သဗ္ဗကာလေ.
သဗ္ဗေ သင်္ခတာသင်္ခတေ ဓမ္မေ ဗုဇ္ဈတိ အဗုဇ္ဈိ ဗုဇ္ဈိဿတီတိ ဗုဒ္ဓေါ၊ သရဏင်္ဂတော၊ သမထင်္ဂတော၊ အမထင်္ဂတော၊ ဇာနာတိ အဇာနိ ဇာနိဿတီတိ ဉာတော၊ ဣစ္စေဝမာဒိ.
၅၅၈. ၊ ၆၀၂. ဇိတော ဣန သဗ္ဗတ္ထ.
ဇိဣစ္စေတာယ ဓာတုယာ ဣနပစ္စယော ဟောတိ သဗ္ဗကာလေ ကတ္တရိ.
ပါပကေ အကုသလေ ဓမ္မေ ဇိနာတိ အဇိနိ ဇိနိဿတီတိ ဇိနော.
၅၅၉. ၊ ၆၀၃. သုပတော စ.
သုပဣစ္စေတာယ ဓာတုယာ ဣနပစ္စယော ဟောတိ ကတ္တရိ၊ ဘာဝေ စ.
သုပတီတိ သုပိနံ၊ သုပီယတေ သုပိနံ.
၅၆၀. ၊ ၆၀၄. ဤသံဒုသူဟိ ခ.
ဤသံဒုသုသဒ္ဒါဒီဟိ သဗ္ဗဓာတူဟိ ခပစ္စယော ဟောတိ.
ဤသဿယော၊ ဒုဿယော၊ သုဿယော ဘဝတာ၊ ဤသက္ကရံ၊ ဒုက္ကရံ၊ သုကရံ၊ ဘဝတာ.
၅၆၁. ၊ ၆၃၆. ဣစ္ဆတ္ထေသု သမာနကတ္တုကေသု တဝေ တုံ ဝါ.
ဣစ္ဆတ္ထေသု သမာနကတ္တုကေသု သဗ္ဗဓာတူဟိတဝေတုံဣစ္စေတေ ပစ္စယာ ဟောန္တိ သဗ္ဗကာလေ ကတ္တရိ.
ပုညာနိ ကာတဝေ၊ သဒ္ဓမ္မံ သောတု မိစ္ဆတိ.
၅၆၂. ၊ ၆၃၈. အရဟသက္ကာဒီသု စ.
အရဟသက္ကာဒီသု စ အတ္ထေသု သဗ္ဗဓာတူဟိ တုံပစ္စယော ဟောတိ.
ကော တံ နိန္ဒိတုမရဟတိ၊ သက္ကာ ဇေတုံ ဓနေန ဝါ. ဧဝမညေပိ ယောဇေတဗ္ဗာ.
၅၆၃. ၊ ၆၃၉. ပတ္တဝစနေ အလမတ္ထေသု စ.
ပတ္တဝစနေ အလမတ္ထေသု သဗ္ဗဓာတူဟိ တုံပစ္စယော ဟောတိ.
အလမေဝ ဒါနာနိ ဒါတုံ၊ အလမေဝ ပုညာနိ ကာတုံ.